Bay Mmanged “Ba Nam ni Gimed Be Pigpig Ngog ni Kam Manged Pi Prist”

1, 2. Mang e ba t’uf ni ngan ayuweg fak ara owchen fare pin riy, ma mang fan?

FA BIN som’on e yiiy nni yoloy nga lan e Bible e ba ga’ fan nga rogon nra lebguy Jehovah e n’en nib m’agan’ ngay. Nap’an ni micheg Got e pi thin nem u Eden, me yog ni gaar: “I gur [Satan] nge fare pin e bay mu pirew ni gimew ba toogor; maku er rogon pi fak nge pi fakam ni bay ur pired ni yad ba toogor.” Uw feni gel e fanenikan nra par u thilin e gal toogor ney? I yog Jehovah ni gaar: “Bayi bilbilig [fak fare pin] lolugem [Satan] mi gur e bay mu k’ad wurilen ay.” (Gen. 3:15, BT) Ra par Satan nge fare pin nrib gel e fanenikan u thilrow, ere aram fan nra guy Satan rogon e n’en nra rin’ me thang owchen fare pin.

² Aram fan ni meybil fare psalmist ngak Got ni be yibilay e girdi’ Rok ni ke mel’egrad ni gaar: “Am sap, pi toogor rom e kar chelgad kar mahlgad nib togopuluw ngom, ma piin yad be fanenikayem e yad be togopuluw. Yad be puruy’ nib mith nib togopuluw ngak e tirom e girdi’; yad be makath nib togopuluw ngak e piin ga ma yororiyrad. Yad be gaar, ‘Mired, ngad thirifed e re nam rorad ney.’” (Ps. 83:2-4, BT) Ere, ba t’uf ni ngan ayuweg fare ganong nra yib fak ara owchen fare pin riy ya nge dabi math ara kireb. Aram fan ni ki ngongliy Jehovah boch e m’ag ya nge yag ni lebug e n’en nib m’agan’ ngay.

BA M’AG NRA AYUWEG OWCHEN FARE PIN

3, 4. (a) Wuin e tabab fare m’ag ko Motochiyel, ma mang e m’agan’ piyu Israel ngay ni ngar rin’ed? (b) Mang fan nni ngongliy fare m’ag ko Motochiyel?

³ Nap’an ni yoor i yan e piin ni owchen Abraham, nge Isak, nge Jakob, ma aram me ngongliyrad Jehovah ngar manged ba nam, ni aram fare nam nu Israel. Ere, ngongliy Jehovah ba m’ag u thilrad e re nam nem u daken Moses, ma aram me pi’ fare Motochiyel ngorad, me m’agan’rad ngay ni ngar ted e re m’ag nem u gil’. Be gaar e Bible: “Me fek [Moses] fare ke babyor ni babyoren fare m’ag u thilin Got nge piyu Israel nge beeg ngak piyu Israel ni ba ga’ laman, me gaar piyu Israel, ‘Bay gu rin’ed urngin e tin ni ke yog Somol ni nggu rin’ed; bay gu folgad rok.’ Me fek Moses fa yu raba’ i n’en ni bay e racha’ [ko fapi garbaw ni ngan pi’ ni maligach] riy nge wereg e racha’ riy nga daken piyu Israel. Me gaar, ‘Ereray fare racha’ ni ir e ke micheg fare m’ag ni ke ngongliy Got u thilmed nge ir, yi pi’ ngomed urngin e pi motochiyel ney.’”​—Ex. 24:3-8.

⁴ Nap’an e duw ni 1513 B.C.E. ma aram e ngiyal’ ni tabab fare m’ag ko Motochiyel u nap’an ni immoy piyu Israel ko fare Burey ni Sinai. Re m’ag nem e ir e tay piyu Israel ni yad ba thil u fithik’ e pi nam, mar pared ni yad ba nam ni ke mel’eg Got. Ere, ke mang Jehovah e Tapuf Oloboch rorad, nge Pilung rorad, nge En Ma Pi’ e Motochiyel ngorad. (Isa. 33:22; Jas. 4:12) Pi n’en ni i buch rok piyu Israel e be dag e n’en nra buch ni faanra ni fol ara dab ni fol ko pi motochiyel rok Got nib mat’aw. Bay ko re Motochiyel nem nthingar dabi leay piyu Israel e girdi’ u yugu boch e nam ara ra liyorgad nga boch e got ni googsur. Ere, fan nni ngongliy e re motochiyel nem e bochan ni nge ayuweg fare ganong rok Abraham ndabi kireb.​—Ex. 20:4-6; 34:12-16.

5. (a) Mang e ke mab kanawoen ngak piyu Israel nrayog ni ngar rin’ed u tan fare m’ag ko Motochiyel? (b) Mang fan ni n’ag Got piyu Israel?

⁵ Fare m’ag ko Motochiyel e ki bing e kanawo’ ngak boch e girdi’ nu Israel ni ngar manged prist, ni be dag yaan boch ban’en ni kan yarmiy nra buch boch nga m’on. (Heb. 7:11; 10:1) Bin riyul’ riy, e re m’ag nem e ir e bing e kanawo’ ngak piyu Israel ni ngar manged ‘girdien ba nam ni yad be pigpig ni kar manged pi prist’ ni faan yad ra fol ko pi motochiyel rok Jehovah. (Mu beeg e Exodus 19:5, 6.) Machane, de yag ni nge fol piyu Israel ko pi motochiyel rok Got. De riyul’ fare Messiah u wan’rad ni ir e en som’on ni yib ni owchen Abraham, ma aram mar togopuluwgad ngak. Ere, bochan e re n’ey ma aram me n’agrad Got.

6. Mang fan fare Motochiyel?

⁶ Bochan nde par piyu Israel ni yad ba yul’yul’ ngak Got, ma aram e de yag ni ngar manged ba nam i prist. Machane, gathi aram e be yip’ fan ni ke yan i aw nib m’ay fan fare Motochiyel. Ya fan fare Motochiyel e bochan ni nge ayuweg fak ara owchen fare pin, me ayuweg e girdi’ ni ngar nanged ko mini’ fare Messiah. Ere, nap’an ni yib Kristus nga fayleng min nang ko mini’ fare Messiah, ma aram me lebug fan fare Motochiyel. Be gaar e Bible: “Kristus e yib i taleg e Motochiyel.” (Rom. 10:4) Machane, ka bay reb e deer nib t’uf ni ngan nang e fulweg riy, ni aram e: Mini’ e piin ni yira mel’egrad ni ngar pigpiggad ni kar manged pi prist? Ku bay reb e m’ag ni ngongliy Jehovah ni ir e sunmiy e re nam nib beech ney.

KE SUM REB E NAM NIB BEECH

7. Mang e yiiynag Jehovah u daken Jeremiah ni murung’agen ba m’ag nib beech?

⁷ Ba n’uw nap’an u m’on ni nge tal fare m’ag ko Motochiyel, me yiiynag Jehovah u daken Jeremiah ni profet Nra ngongliy ba “m’ag nib beech” u thilrad fare nam nu Israel. (Mu beeg e Jeremiah 31:31-33.) Re m’ag nem e ba thil ko fare m’ag ko Motochiyel ni bochan e ra bing e kanawo’ ko girdi’ ni ngan n’ag fan e denen rorad ndaki t’uf e gamanman ni maligach. Ni uw rogon?

8, 9. (a) Rachaen Jesus ni map’ e bing e kanawo’ ko mang? (b) Mang e kan bing kanawoen ngak e piin ni kar uned nga tan e bin nib beech e m’ag? (Mu guy e sasing ni bay u tabolngin e re article ney.)

⁸ Boch e chibog nga tomuren u nap’an e Nisan 14 ko duw ni 33 C.E., me tababnag Jesus fare Abich ni Blayal’ rok Somol. Nap’an ni be weliy murung’agen fare kap ni bay e wain riy, me gaar ngak fa 11 i apostal rok nra pared ni yad ba yul’yul’ ngak: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.” (Luke 22:20) Fare babyor rok Matthew e bay riy e n’en ni yog Jesus u murung’agen fare wain ni gaar: “Ereray rachaeg ni ir e bayi micheg e m’ag u thilin Got nge girdi’, ni rachaeg ni bay map’ nga but’ ni fan ngak boor e girdi’ ni fan e nge n’ag Got fan e denen.”​—Matt. 26:27, 28.

⁹ Rachaen Jesus ni map’ nga but’ e ireram e n’en nri micheg fa bin nib beech e m’ag. Maku rachaen Jesus ni map’ e ir e ki bing e kanawo’ nrayog ni ngan n’ag fan e denen rok boor e girdi’ ni taab yay ma aram e ke mus. Machane, de un Jesus nga lan fa bin nib beech e m’ag. Ya bochan nib flont, ma de t’uf ni ngan n’ag fan e denen rok. Machane, rayog ni nge fanay Got fel’ngin rachaen Jesus ni map’ ni fan ngak pi fak Adam. Maku rayog ni nge pof boch e girdi’ ni yad ba yul’yul’ ni ngar manged “pi fak” me dugliyrad nga gelngin nib thothup. (Mu beeg e Roma 8:14-17.) Ma rayog ni nge tayrad ni kar boded Fak, ni aram Jesus ndariy e denen rok. Pi girdi’ ney ni kan dugliyrad e yad ra ‘un ngak Kristus ngar fanayed e tin ni ke tay Got ni fen’ miki yag e pi tow’ath ngorad nde yag ngak piyu Israel ni ur moyed u tan fare Motochiyel, ni aram e ngar manged ‘ba nam ni yad be pigpig ni kar manged pi prist.’ Faan gomanga fol piyu Israel u nap’an ni ur moyed u tan fare Motochiyel, ma ke yag e re tow’ath ney ngorad. I weliy apostal Peter murung’agen e piin ni yad ra ‘un ngak Kristus ngar fanayed e tin ni ke tay Got ni fen’ ni gaar: “Gimed girdien fare nam ni ke mel’egmed Got, ni gimed e pi prist rok e en ni Pilung, ma gimed fare nam ni gimed girdien Got, ni mel’egmed Got ni ngam wereged murung’agen e n’en nrib fel’ ni ke ngongliy Got, ni ir e piningmed u fithik’ e lumor ngam bad nga fithik’ e tamilang rok nrib fel’.” (1 Pet. 2:9) Ere, rib ga’ fan fa bin nib beech e m’ag ya ke bing e kanawo’ ngak pi gachalpen Jesus ni ngar manged e tin ni ka bay i owchen Abraham.

KE TABAB FA BIN NIB BEECH E M’AG

10. Wuin e tabab fa bin nib beech e m’ag, ma mang fan ni fin aram e ngiyal’ ni tabab?

¹⁰ Wuin e tabab fa bin nib beech e m’ag? De tabab u nap’an ni weliy Jesus murung’agen ko fa bin tomur e nep’ ni immoy u fayleng. Ya u m’on ni nge tabab e re m’ag nem, ma thingari map’ rachaen Jesus nga but’ me fek fel’ngin nge pi’ ngak Jehovah u tharmiy. Maku reb e, ku thingar ni puog gelngin Got nib thothup nga daken e piin ni yad ra ‘un ngak Kristus ngar fanayed e tin ni ke tay Got ni fen.’ Ere, fa bin nib beech e m’ag e tabab ko Pentekost ko duw ni 33 C.E. u nap’an nni puog gelngin Got nib thothup nga daken pi gachalpen Jesus.

11. Uw rogon ni ke yag ni nge mang e pi Jew nge piin gathi yad e Jew bang ko fare nam nib beech u daken fa bin nib beech e m’ag? Uw urngin e piin ni yad ba muun nga tan fa bin nib beech e m’ag?

¹¹ Nap’an ni yog Jehovah u daken Jeremiah Nra sunmiy reb e m’ag nib beech u thilrad piyu Israel, ma aram me m’ug riy nra munmun ma dab ki t’uf ni ngan fanay fare m’ag ko Motochiyel. Ere, nap’an ni tabab fa bin nib beech e m’ag, ma aram e ngiyal’ ni mus fare Motochiyel. (Heb. 8:13) Bochan e re m’ag nib beech nem, ma aram me mab e kanawo’ ngak e pi Jew nge piin gathi yad e Jew ni ngar uned ko gagiyeg u Gil’ilungun Got ni bochan e ‘kan maad’ad nga lanin’rad, ni gelngin Got nib thothup e ke yodoromnag, machane gathi fare Motochiyel ni kan yoloy.’ (Rom. 2:29) Bochan e re m’ag ney ni ke ngongliy Got u thilrad, ma aram e ‘ke tay e pi motochiyel rok nga fithik’ i lanin’rad, ma ke yoloy nga gum’ircha’rad.’ (Heb. 8:10) Piin ni yad ba muun nga tan fa bin nib beech e m’ag e 144,000 urngirad u gubin. Ma yad girdien fare nam nib beech, ni aram e piin ni kar manged piyu Israel u fithik’ i lanin’rad.​—Gal. 6:16; Rev. 14:1, 4. 

12. Mang e taareb rogon ko fare m’ag ko Motochiyel nge fa bin nib beech e m’ag?

¹² Mang e taareb rogon ko fare m’ag ko Motochiyel nge fa bin nib beech e m’ag? Fare m’ag ko Motochiyel e ba m’ag ni ngongliy Jehovah u thilrad piyu Israel; ma fa bin nib beech e m’ag e ba m’ag ni ngongliy Jehovah u thilrad e piin ni ka nog piyu Israel u fithik’ i lanin’rad ngorad. Moses e ir e tamaaf u thilin e bin kakrom e m’ag; me Jesus e ir e Tamaaf u thilin e bin nib beech e m’ag. Fare m’ag ko Motochiyel e un micheg u daken rachaen e gamanman; ma fa bin nib beech e m’ag e ni micheg u daken rachaen Jesus ni map’. Ma nap’an ni immoy piyu Israel u tan fare m’ag ko Motochiyel ma Moses e ir e i yog e thin rorad. Ma Jesus ni ir Lolugen e ulung e ir e ma yog e thin ko piin ni yad ba muun nga tan e bin nib beech e m’ag.​—Efe. 1:22.

13, 14. (a) Mang rogon fa bin nib beech e m’ag nga Gil’ilungun Got? (b) Mang reb e ban’en ni kub t’uf ya nge yag ni un e piin ni kan mel’egrad ni ngar manged piyu Israel u fithik’ i lanin’rad ngak Kristus ko gagiyeg u tharmiy?

¹³ Bay rogon fa bin nib beech e m’ag nga Gil’ilungun Got ni bochan e ir e ra sunmiy reb e nam nib thothup ni athap rorad e ngar manged pilung nge prist ko re Am nem ni bay u tharmiy. Piin ni yad ra mang girdien e re nam nem e aram e tin ni ka bay i pi fak ara owchen Abraham. (Gal. 3:29) Maku reb, e fa bin nib beech e m’ag e be micheg nra riyul’ fare m’ag rok Abraham.

¹⁴ Machane, ka bay taab n’en ni bay rogon nga Gil’ilungun Got ni kub t’uf ni ngan dugliy. Ya u daken fa bin nib beech e m’ag e ir e ra yib piyu Israel u fithik’ i lanin’rad riy, maku aram e n’en nra bing e kanawo’ ko pi girdi’ ney ni ngar ‘uned ngak Kristus ngar fanayed e tin ni ke tay Got ni fen.’ Ere, ku bay reb e m’ag ni kub t’uf ni ngan ngongliy ya nge yag ni un e pi girdi’ ney nga Gil’ilungun Jesus u tharmiy ni ku yad boch e pilung nge prist.

BA M’AG NRA BING E KANAWO’ NGAK BOCH E GIRDI’ NI NGAR UNED NGAK KRISTUS KO GAGIYEG

15. Mang m’ag e ngongliy Jesus u thilrad e pi apostal rok nra pared ni yad ba yul’yul’ ngak?

¹⁵ Tomuren ni tababnag Jesus fare Abich ni Blayal’ rok Somol, me ngongliy ba m’ag u thilrad pi gachalpen nra pared ni yad ba yul’yul’ ngak. Re m’ag nem e yima yog fare m’ag ni fan nga Gil’ilungun Got ngay. (Mu beeg e Luke 22:28-30.) Biney e m’ag e yugu ba thil, ya gathi ba m’ag ni ngongliy Jehovah u thilrad boch e girdi’. Ya biney e m’ag e ba m’ag ni ngongliy Jesus u thilrad pi gachalpen ni kan dugliyrad. Nap’an ni gaar Jesus, “rogon ni ke pi’ e Chitamag mat’awug ngog ni ngug gagiyeg, e eram e n’en ni bay gu rin’ ngomed,” ma be weliy murung’agen fare m’ag ni ngongliy Jehovah u thilrow ni aram e ra ‘par ni ir reb e prist ndariy n’umngin nap’an, ni bod rogon Melkizedek.’​—Heb. 5:5, 6. 

16. Mang e ra bing fare m’ag ni fan nga Gil’ilungun Got e kanawo’ ngak e pi Kristiano ni kan dugliyrad ni ngar rin’ed?

¹⁶ Fa 11 i apostal rok Jesus ni yad ba yul’yul’ e ra ‘pired rok ndar paged’ u fithik’ urngin e gafgow ni yib ngak. Ere, fare m’ag ni fan nga Gil’ilungun Got e be micheg ni yad ra un ngak ko gagiyeg u tharmiy ni yad boch e pilung nge prist. Machane, gathi kemus nre 11 i apostal rok Jesus nem e ra yag e re tow’ath nem ngorad. Ya m’ug Jesus ngak apostal John u nap’an nni pilyeg e changar rok, me gaar ngak: “Piin ni yad ra gel ndar paged yad ko kireb e gu ra pi’ mat’awrad ni ngar pired nga but’ u toobeg u tagil’ig, ni bod rogon ni kug gel ngak e kireb, me ere chiney e kug par nga but’ u tooben e Chitamag u tagil’.” (Rev. 3:21) Ere, fare m’ag ni fan nga Gil’ilungun Got e ba m’ag ni ke ngongliy Jesus u thilrad e pi Kristiano ni kan dugliyrad ni yad 144,000 u gubin. (Rev. 7:4; 20:6) Ireray e re m’ag nra bing e kanawo’ ngorad ni ngar uned ngak Jesus ko gagiyeg u tharmiy. Re n’ey e rayog ni ngan taareb rogonnag ngak be’ nib pin ni fak e pilung ni ke yan i leay reb e pilung, ma ke yib mat’awun ni ngki un i yog lungun fare pilung. Bin riyul’ riy, e be yog e Bible ni pi Kristiano ni kan dugliyrad e yad “e ppin rok” Kristus, ara ba “ppin nib machalbog” ni kan dugliy ni ngar mabgolgow Kristus.​—Rev. 19:7, 8; 21:9; 2 Kor. 11:2.

NGARI MICH U WAN’UM NRA LEBGUY GIL’ILUNGUN GOT E TIN KE MICHEG

17, 18. (a) Mog ko mang fa nel’ i m’ag ni bay rogon nga Gil’ilungun Got ni kad weliyed murung’agen. (b) Mang fan nrayog ni ngari mich u wan’dad nra lebguy Gil’ilungun Got e tin ke micheg?

¹⁷ Fapi m’ag ni kad weliyed murung’agen ko gal article ney e bay rogon nga taab n’en ara boor ban’en u rarogon Gil’ilungun Got. (Mu guy fare thin ni kenggin e “Rogon Nra Lebguy Got e N’en nib M’agan’ Ngay.”) Ere, ba tamilang ni pi m’ag ney ni kan ngongliy e be micheg nrib mudugil nra yan i par e re Gil’ilungun Got nem nga rogon ni lemnag aram ko som’on. Ere, bay rogon ni nge pagan’dad nra fanay Got Gil’ilungun fare Messiah ni nge lebguy e n’en nib m’agan’ ngay ni fan ko girdi’ nge fayleng aram ko som’on.​—Rev. 11:15.

¹⁸ Dariy e maruwar riy ni pi n’en nra rin’ Gil’ilungun Got e ra yibnag e flaab ko girdi’ ndariy n’umngin nap’an. Ere, rayog ni ngaud machibnaged ko girdi’ u fithik’ e pagan’ ni kemus ni yigoo Gil’ilungun Got e rayog ni nge chuweg urngin e magawon ko girdi’. Ere, manga yug ud weliyed e re n’ey ko girdi’, ya riyul’ nra buch!​—Matt. 24:14.