Rogon ni Ngeb e Felfelan’ Nga Lan e Tabinaw

Ngan Yal’uweg e Bitir

John:a U m’on ni nge llowan’nageg e gallabthir rog, ma yow ma athamgil ni ngar nangew ko mang fan ni kug rin’ e re n’em. Gu ma guy rogon ni nggu llowannag e bitir ni bod rogon ni ur llowan’nagew gag. Alison ni leengig, e ba thil rogon ni un chuguliymow. Gallabthir rok e papey ni yow ma damumuw. Yow ma strafnag e bitir rorow ni dawor ra nangew tapgin. Yu ngiyal’ e ma llowan’nag leengig e bitir romow ni aram rogon.

Carol: Chitamag e digeymad ko ngiyal’ ni ke gaman lal e duw rog. Dakir lemnagmad pi walageg. Chitiningimad e ma maruwel nib gel ni fan ni nge yog e tin nib t’uf romad, boor e maruwel ni gu ma rin’ ni nggu ayuweg pi walageg ni ppin. Mo’maw’ ni nggu un ngak boch e bitir ko fafel ya gu ma ayuweg pi walageg. Ki mada’ ko chiney, ma gathi ri gu ma un ko thin ni gosgos. Ngiyal’ ni ba t’uf ni nggu llowan’nag e bitir rog, ma ri gu ma lemnag ni ba n’uw nap’an. Ya ri gu baadag ni nggu nang ko mang tapgin. Mark ni figirngig e ba thil, ya der ma lemnag e magawon nib n’uw nap’an. Ya ke chuguliy reb e matam ni ma t’ufeg ma ba mudugil laniyan’ maku ma ayuweg e chitiningin nib fel’ rogon. Ra bay e magawon ko bitir romow ma ma pithig nib papey.

ROGON ni yog John nge Carol e be micheg ni rogon ni kan chuguliyem e ba ga’ ni ku aram rogon ni ga ra chuguliy e bitir rom. Faanra en figirngiy nge en leengiy e ba thil rogon ni kan chuguliyrow ma ba ga’ ni kub thil rogon ni yow ra chuguliy e bitir rorow. Yu ngiyal’, e ma sum e magawon riy.

Rayog ni nge gel e magawon ni faanra ke aw parowon e gallabthir. Piin ni ka fini fakay e bitir e kar pirieged ni chugol bitir e reb e maruwel ni ba gel. Joan ni pomoon rok e Darren e bay l’agruw e buliyel ni fakrow e gaar: “Ri yow ba t’uf rog, machane mo’maw’ ni ngar molow ko ngiyal’ ni kug dugliy. Yow ma od ko ngiyal’ ni susun dabra od riy. Yow ma th’ab e thin rog ko ngiyal’ ni gu baadag ni nggu non. Darur ayuwegew e sus nge mad nge boch e chugum rorow nge ggan.”

Jack ni ke m’ar e ppin rok u tomren ni ke gargeleg e bin l’agruw e bitir rorow, e gaar: “Gubin ngiyal’ ni gu ra sul nga tabinaw ni kug magar ko maruwel ma dabgu mol nge mada’ ko lukngun e nep’ ni gu be ayuweg fare tir romow. Re n’ey e be mo’maw’nag ni nggu llowan’nag e bin ilal e bitir romow nib fel’ rogon. Ma awan’ ya dabun ni nggu ayuwegew walagen.”

L’agruw e gallabthir ni ke aw parowrow e rayog ni ngar tugthingow u nap’an ni yow be llowan’nag e bitir rorow. Faanra dabi puf e magawon rorow ma rayog ni ngar paloggow me guy fare tir ko mini’ rorow e rayog ni nge fol ngak me rin’ e tin ni baadag. Mang thin nu Bible e rayog ni nge ayuweg ba wu’ e mabgol nge par nib fel’ thilrow u nap’an ni yow be llowan’nag e bitir rorow?

Ba Wu’ e Mabgol e Thingar Ra Turguyew Ba Ngiyal’ ni Ngaur Sabethingow

Thingar ra mabgolgow u m’on ni ngar fakayew e bitir, ma susun dabi dar e re wu’ i mabgol nem ni mus ko ngiyal’ ni ke chuw e bitir rorow u tabinaw. Be yog e Bible ni gaar: “Thingari dabi dareg e girdi’ e gali cha’ ni Got e ke chagiyrow.” (Matthew 19:6) Ma ba thil ko n’en ni be yog e Bible u murung’agen e bitir ya ba m’agan’ Got ngay “nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.” (Matthew 19:5) Riyul’ ni chugol bitir e gathi ireray e def ko mabgol. Ba mudugil ni ba t’uf ni ngar tew ba ngiyal’ ni ngar llowan’nagew e bitir rorow. Machane thingar dab ra pagew talin ni rayog ni ngar ayuwegew e bitir rorow ni faanra ba gel e def ko mabgol rorow.

Uw rogon ni rayog ni nge gelnag ba wu’ e mabgol e tha’ u thilrow u nap’an ni ka yow be ayuweg e bitir rorow? Ba fel’ ni ngar tew ba ngiyal’ ni rayog ni ngar sabethingow ni demoy e bitir rorow. Ma rayog ni ngar weliyew boch ban’en ni ba ga’ fan ni rayog ni nge ayuweg e tabinaw rorow. Riyul’ ni ba mo’maw’ ni nge pirieg fa wu’ i mabgol ba ngiyal’ ni ngar sabethingow ni goo yow. Alison, ni fare matin ni kan weliy faram e be yog ni gaar, “Nap’an ni gamow ra sabethin figirngig me yib e bin bitir i fakmow ni be gelfen ni ngan tiyan’uy ngak ara bin nel’ e duw rok ni be yog ni dabiyog ni nge pirieg e crayon rok.”

Joan nge Darren ni kan weliy faram, e kar dugliyew e ngiyal’ ni nge mol e bitir rorow ni ppin. Ke gaar Joan, “Gubin ngiyal’ ni yow ma yog ngak e bitir rorow ni ngar molod ko ngiyal’ ni kan dugliy. Ma aram e ngiyal’ ni rayog ni nggu toffangow nggu sabethingow.”

Ra ngan rin’ ni aram rogon, ma gathi ke mus ni ra yog ba ngiyal’ ni ngar sabethingow ni goo yow ya ku ra ayuweg e bitir ni ‘dabi pag rogon e lem ni susun ni nge tay.’ (Roma 12:3) Bitir ni kan skulnagrad ni ngar folgad ko ngiyal’ ni kan turguy ni ngar molod e rayog ni ngar nanged ni thingar ra folgad ko tin ni kan yarmiy u tabinaw ma gathi tin ni yad baadag e ngar rin’ed.

MU GUY ROGON I RIN’ E RE N’EY: Ngam dugliy ba ngiyal’ ni nge mol e bitir rom ma ngaum puguran ngorad ni ngar folgad riy. Faanra toway nga boch ban’en ya nge dabi mol ni bod ni nge unum e ran, ma taab yay ni ngam pag ni nge ning ban’en. Faanra be wenig e bitir rom ni ngam pi’ lal e minit ngak ma ngam fal’eg e alarm nge chub ko lal e minit. Nap’an ni ra chub fare alarm ma dabisiy ni nge yan i mol. Ngam fol ko fare thin ni nge lungum “Er rogon” fa reb e nge lungum “Dangay.”​—Matthew 5:37.

Dab Mu Dagew Ngak e Bitir Romew ni De Taareban’mew

Be yog e proverb ni gaar, “Fakag, mu telim ko tin ni be machibnag e chitamam ngom, ma ga uthum e lim ko tin ni be yog e chitinam.” (Proverbs 1:8) Re thin nu Bible ney e be dag ni bay mat’awon e gallabthir ni ngar llowan’agew pi fakrow. Machane, yugu aram rogon ni taareb rogon ni kan chuguliy fa wu’ i mabgol, ma yu ngiyal’ e de taareban’row u rogon ni ngar llowan’nagew fakrow. Uw rogon ni nge pithig e gallabthir e re magawon ney nib fel’ rogon?

John ni kan weliy faram e be gaar, “Gu be lamnag ni ba ga’ fan ni dab i tugthin e gallabthir u p’eowchen e bitir.” Machane, ke yog ni ba mo’maw’ ni ngan mithag ni faanra de taareban’row. I yog John ni gaar: “Mom ni nge nang e bitir ni faanra de taareban’mow. Ya fakmow ni ppin e ra guymow ma ra nang ni bay ban’en ni ke buch.”

Mang e ke rin’ John nge Alison? I gaar Alison: “Faanra dabug rogon ni be llowan’nag e pumoon rog fakmow ni ppin, ma gu ma son ni nge chuw fare tir ma fini gu weliy e lem rog ngak. Dabug ni nge lemnag ni rayog ni nge gagiyegnag bagamow ni nge fol ngak. Faanra ke naab ngay ni de taareban’mow nga ban’en, ma gu ma yog ngak ni gubin e girdi’ u tabinaw e thingari fol ko yaram rok Jehovah. Ma gu baadag ni nggu tayfan e chitamangin ni ir lolugen e tabinaw maku arrogon ir ni susun ni nge tayfamow ya gamow e gallabthir rok.” (1 Korinth 11:3; Efesus 6:1-3) I gaar John: “Ngiyal’ ni urngin e girdi’ ma ba’ u tabinaw, ma gag e gu ma llowan’nag e bitir romow. Yu ngiyal’ e gu ma pag Alison ni nge llowan’nagrad ni faanra ir e manang fan, machane gu ma pi’ e ayuw. Faanra bay ban’en ni ke yog ni dabug ma gamow ma weliy ni goo gamow.”

Uw rogon ni ngam llowan’nagew e bitir romew ma dabi kirebnag e tha’ u thilmew e ani mabgol rom, ma aram e ra i tay e bitir romew famew?

MU GUY ROGON I RIN’ E RE N’EY: Mu mel’eg bangiyal’ u reb e wik ni ngam weliyew rogon ni ngam llowan’nagew e bitir romew, ma ngam weliyew boch ban’en ni de taareban’mew ngay. Mu guy rogon ni ngam nang fan e n’en ni be lemnag e en ni mabgol rom, ma ngam lemnag ni ir e chitamangin fa chitiningin e bitir romew.

Ngam Nangew Gimew

Riyul’ nib mo’maw’ ni ngan llowan’nag e bitir. Machane dabi n’uw nap’an ma ra chuw e bitir u tabinaw mi gimew par ni goo gimew bayay. Ere uw rogon e mabgol romew ra gel fa ra magawon ni bochan e chugol bitir ni um tayew? Fulweg riy e be yan u rogon ni ngam fol ko thin ni bay ko Eklesiastes 4:9, 10, BT: “L’agruw e ba fel’ ko taareb, ni bochan e yow ra peth mi yow maruwel ni ba fel’ rogon. Faanra paraw bagayow me ayuweg bagayow nge sak’iynag. Machane faanra be’ ni goo ir nra paraw, ma rib gafgow, ni bochan e dariy be’ nra ayuweg.”

Faanra maruwel e gallabthir u taabang ma ba ga’ angin. Carol ni kan weliy murung’agen faram e be gaar: “Gu manang ni pumoon rog e boor fel’ngin ni ba fel’, ma nap’an ni gamow be chuguliy e bitir romow u taabang mug guy ni ka bay boch e pi fel’ngin nib fel’ nem. Ri gu ma tay fan e pumoon rog u nap’an ni gu be yaliy ni be ayuweg e bitir romow u fithik’ e t’ufeg.” I gaar John, “Kari t’uf rog e ppin rog u nap’an ni gu be guy ni rib fel’ rogon ni be ayuweg e bitir romow.”

Faanra ngam tew e tayim ni ngam nonow e ani mabgol rom ma ngam chuguliyew e bitir romew u taabang ma ra gel e tha’ u thilmew u nap’an ni be ilal e bitir i yan. Mang kanawo’ nib fel’ ni rayog ni ngam dagew ngak e bitir romew?

[Footnote]

MU FITHEM NI NGE LUNGUM . . .

▪ Uw n’umngin napan ni gamow ma sabethin e en mabgol rog u reb wik ni demoy e bitir?

▪ Uw rogon ni gu ma ayuweg e en mabgol rog u nap’an ni be llowan’nag e bitir romow?