Rogon ni Ngam Fil Ban’en ko Bitir Rom

Nap’an ni sunmiy Jehovah e tabinaw, me tay ni gallabthir e yad e ngar ayuweged pi fakrad. (Kolose 3:20) Ere, faanra gur reb e gallabthir, me gur e ba milfan ngom ni ngam fil ko bitir rom rogon ni nge t’uf Jehovah rok nge rogon ni nge milfan boch ban’en ngak u nap’an ni ke ilal. (2 Timothy 1:5; 3:15) Ku thingar mu guy rogon ni ngam nang e n’en ni bay u laniyan’ e bitir rom. Machane, ngongol rom e kub ga’ fan. Ya faan ga ra suguy e Thin rok Jehovah nga lanin’um, ma aram e ra mom ni ngam fil ko bitir rom.​—Psalm 40:8.

1 MU GUY ROGON NI NGE MOM KO BITIR ROM NI NGA I NON NGOM

N’EN NI BE YOG E BIBLE: ‘Thingar mu gur ko motoyil, machane dab mu gur ngam welthin.’ (James 1:19) Ba mudugil ni ga baadag ni nge puf rogon e bitir rom nrayog ni ngaur nonad ngom. Ere, thingar ra nanged ndemtrug e ngiyal’ ni yad ra weliy ban’en ngom, ma ga ra motoyil. Mu guy rogon ni nga i par nib gapas thilmed, ya nge mom rorad ni ngaur weliyed lanin’rad ngom. (James 3:​18) Faan yad ra lemnag ni ga ra puwan’ ngorad ara ga ra dugliy e kireb nga dakenrad, ma aram e dab ur weliyed boch ban’en ngom. Ngaum gum’an’ u puluwon e bitir rom, mu u mog ngorad ni yad ba t’uf rom.​—Matthew 3:17; 1 Korinth 8:1.

N’EN NRAYOG NI NGAM RIN’:

• Faanra ba t’uf ko bitir rom ni nge weliy ban’en ngom, mag tay e tayim ni fan ngak

• Gathi fin ngiyal’ ni ke sum e magawon e ngam nonad e bitir rom, ya thingar um nonad ni gubin ngiyal’

2 MU GUY ROGON NI NGAM NANG FAN E N’EN NI BE YOG

N’EN NI BE YOG E BIBLE: “Be’ nib gonop e gubin ngiyal’ ni ma tafinay mfini ngongol.” (Proverbs 13:16) Yu ngiyal’ e nap’an nra non e bitir rom ngom, mab t’uf ni ngam guy rogon ni ngam nang ko mang e be yip’ fan, ya nge yag nim nang e n’en ni bay u laniyan’. Bitir e ba ga’ ni yad ma weliy boch ban’en nib pag rogon ara yug yad ma yog boch e thin ndarur lemgad. “Mmotoyil u m’on ni ngam non. Ya ra danga’ ma gur be’ ni ga ba pinat.” (Proverbs 18:13, BT) Ere, dab mu gur ngam damumuw.​—Proverbs 19:11.

N’EN NRAYOG NI NGAM RIN’:

• Demtrug e n’en ni ke yog e bitir rom, ma ngam athamgil ndab mu th’ab e thin rok ara mu damumuw

• Mu lemnag rarogom u nap’an ni um moy ko binem e yangar nge n’en ni immoy nib ga’ fan u wan’um

3 THINGARI TAAREBAN’ E GALLABTHIR U GUBIN BAN’EN

N’EN NI BE YOG E BIBLE: “Fakag, mu telim ko tin ni be machibnag e chitamam ngom, ma ga uthum e lim ko tin ni be yog e chitinam.” (Proverbs 1:8) Ke pi’ Jehovah mat’awun e matam nge matin ni ngar ayuwegew e bitir rorow. Ere, thingar mu filew ko bitir romew rogon ni nga i tay famew ma be fol romew. (Efesus 6:1-3) Faanra der par e gallabthir nib ‘taareb lanin’rad,’ mab mom ni nge nang e bitir. (1 Korinth 1:10) Ere, faanra der taareban’mew u ban’en, mi gimew guy rogon ndab mu weliyew u p’eowchen e bitir romew ni bochan e rayog ni nge k’aringrad ni nge dab kur ted famew.

N’EN NRAYOG NI NGAM RIN’:

• Mu weliyew u taabang rogon ni ngaum llowan’nagew e bitir romew

• Faanra der taareban’mew e en mabgol rom u rogon ni ngam llowan’nagew e bitir romew, mag guy rogon ni ngam lemnag rogon laniyan’ e en mabgol rom

4 MU DUGLIYEW BOCH BAN’EN NI NGAN RIN’

N’EN NI BE YOG E BIBLE: “Mu fil ngak ba bitir rogon e ngongol ni ngi i tay.” (Proverbs 22:6) Dabiyog ni nga yigi mit boch ban’en nib fel’ ko bitir romew ni faanra dab mu filew ngak. Ere, ba t’uf ni ngam dugliyew rogon ni ngam filew boch ban’en ngak, nib muun ngay rogon ni ngam llowan’nagew. (Psalm 127:4; Proverbs 29:17) Ra ngan llowan’nag e bitir, ma gathi kemus ni ngan toy u nap’an ni ke rin’ ban’en nib kireb, ya kub muun ngay ni ngan ayuweg ni nge nang fan ni kan ngongliy boch e motochiyel ni nga i fol riy. (Proverbs 28:7) Kub muun ngay ni ngan fil ngak rogon ni nge ga’ fan e Thin rok Jehovah u wan’, me nang e pi kenggin e motochiyel rok. (Psalm 1:2) Re n’ey e ra ayuweg fare tir ni nga i par nib beech e nangan’ rok.​—Hebrews 5:14.

N’EN NRAYOG NI NGAM RIN’:

• Mu guy rogon ni nge mich u wan’ e bitir rom nriyul’ ni bay Got nrayog ni nge pagan’rad ngak

• Mu ayuwegrad ni ngar nanged mar siyeged boch ban’en nrayog ni nge yib wenegan nib kireb ngorad ni bay ko Internet nge ku boch ban’en ni yima rin’ ko Internet ni ka nog e social network ngay. Mu kum fil ngorad rogon ni ngar paloggad rok boch e girdi’ ni yad ma guy rogon ni ngar rin’ed boch ban’en nib kireb ngorad