Ba Mudugil ni Dabi Yib Angin e Gagiyeg ni Be Tay Satan
“Machane piin kireb e dariy ban’en nra fel’ u puluwrad.”—EKL. 8:13, BT.
1. Mang fan ni fare pufthin ni fan ko piin kireb e ra fal’eg lanin’uy?
DABKI n’uw nap’an ma yira pufthinnag e girdi’ nib kireb. Aram wenegan e kireb ni ur rin’ed. (Prov. 5:22; Ekl. 8:12, 13) Ireray e thin nra fal’eg laniyan’ e piin nib mat’aw nge piin yibe gafgownagrad. Fa en tabolngin e kireb ni yira gechignag e Satan ni Moonyan’.—John 8:44.
2. Mang fan nib t’uf ni ngan pag boch e tayim nge yan ya nge yog ni ngan pithig fare magawon ni sum u Eden?
2 Satan ni ir faen nib tolangan’ e ke wawliy e girdi’ kar togopuluwgad ko gagiyeg rok Jehovah. Aram me un Adam nge Efa ngak ko togopuluw. (Rom. 5:12-14) Ba mudugil ni manang Jehovah wenegan e togopluw ni yad ra tay. Machane ba t’uf ni nge tamilang u wan’ e girdi’ nge pi engel wenegan nra yib ni faanra dab ni fol. Arfan ni ba t’uf ni nge yan boch e tayim ya nge yog nni pithig fare magawon.
3. Nge uw rogon u wan’dad e am ko girdi’?
3 Bochan ni ke dabuy e girdi’ e birok Jehovah e am ma aram fan ni kar ngongliyed reb e am ngorad. Nap’an ni yol apostal Paul ko pi Kristiano nu Roma me weliy murung’agen e “am” ko girdi’. Ngiyal’ nem ma Nero ni ir e pilung nu Roma e i gagiyeg ko duw ni 54 nge mada’ ko duw ni 68. Ke yog Paul ni re am ney e “Got e ke tayrad.” (Mu beeg e Roma 13:1, 2.) Gur, i yog Paul ni am ko girdi’ e kab tolang ko am rok Got? Danga’. Ya thin rok e be yip’ fan ni n’umngin nap’an ni be gagiyeg e am ko girdi’ ma ba t’uf ni nge fol e pi Kristiano rorad ya Got e ke tayrad.
Ba Kanawo’ ni Yan ko Yam’
4. Mu weliy ko mang fan ni gagiyeg ko girdi’ e dabiyog ni nge yib angin nib fel’?
4 Dabi yib angin e gagiyeg ni be tay e pi am u tan pa’ Satan. Mang fan? Ya bochan ni dariy e gonop rok Got rorad. Kemus ni Jehovah e bay e gonop rok ni rib fel’ ma arfan ni goo birok e am e ra yib angin. (Jer. 8:9; Rom. 16:27) Girdi’ e ba ga’ ni yad ma fil ban’en ko oloboch rorad, machane Jehovah e gubin ngiyal’ ni manang e n’en nib fel’ ni ngan rin’. Urngin e am e dabi yib angin e maruwel rorad nib fel’ ni faanra dab ra folgad rok Jehovah. Bochan e re n’ey ma am ni be gagiyeg u tan pa’ Satan e ba mudugil ni dabiyog ni nge ayuweg e girdi’.
5, 6. Mang e k’aring Satan ni nge togopluw ngak Jehovah?
5 Be’ nib gonop e ba ga’ ni dabi rin’ ban’en ni manang ni dabi yib angin nib fel’. Faan ra pi’ nga daken nge rin’ ma rayog ni nge guy wenegan. Boor e mich riy ni kan guy ni faanra ngan togopluw ngak e en ta sunmiy ma dabi fel’ rogoy riy. (Mu beeg e Proverbs 21:30.) Machane rib tolangan’ Satan ma aram e ke togopluw ngak Jehovah. Aram fan ni lem rok ni nge mel’eg fare kanawo’ ni yan ko yam’.
6 Reb e pilung nu Babylon ni ke dag e ngongol rok Satan e gaar: “Nggu wan nga lang nga tharmiy. Nggu ngongliy tagil’ e gagiyeg rog nga daken e pi t’uf nth’abi tolang. Ug lemnag ni gu ra par nga but’ ni bod be’ nib pilung u daken e burey ko lel’uch ko gin ni yima muulung ngay. Nggu wan nga lang nga p’ebugul e pi manileng nggu bod rogon e En ni Gubin ma Rayog Rok.” (Isa. 14:13-15, NW) De yib angin e n’en ni ke yog fare pilung ya ke war fare am nu Babylon. Ma ku ireray e n’en nra buch rok Satan nge fayleng rok.
Mang Fan ni Ke Pag Got e Girdi’ ni Ngar Togopuluwgad Ngak?
7, 8. Mang boch i angin ya ke pag Got e kireb nib n’uw nap’an?
7 Boch e girdi’ e yad ma lemnag ko mang fan ni ke pag Jehovah e girdi’ ngar uned ngak Satan ngar ngongliyed boch e am ni dabi yib angin nib fel’. Rayog rok Got ni nge talegrad ya ir e Got ni Th’abi Gel Gelngin. (Ex. 6:3) Machane de rin’ ya manang ni faanra pag boch e tayim ni nge togopuluw e girdi’ ngak ma ra tamilang ni ir ba Pilung ni ma t’ufegey ma yira nang nra fel’ rogon e girdi’ u tan e gagiyeg rok.
8 Rayog ni nge siyeg e girdi’ e gafgow nib gel ni faan manga dar folgad rok Satan mar paged nge mang Got e gagiyegnagrad. Bochan ni ke pag Jehovah ni girdi’ e ngar gagiyegnaged yad, ma girdi’ nib fel’ gum’ircha’rad e kar guyed feni rib fel’ ni ngan fol rok Got. Kab kakrom i yib ma boor mit e am ni ke fal’eg e girdi’ ma dariy reb ni ke yan i m’ug nrib fel’. Re n’ey e ke ayuweg e pi tapigpig rok ni ngari mich u wan’rad ni gagiyeg rok Jehovah e ir e th’abi fel’. Riyul’ ni bochan ni ke pag Jehovah ni nge gagiyeg Satan ma ke gafgow e girdi’ nib muun e piin ni yad ma pigpig ku Got ngay. Machane ke yib angin ko piin nib yul’yul’.
Ka Nog e Sorok Ngak Jehovah ni Bochan e Togopluw
9, 10. Mu weliy ko uw rogon ni ka nog e sorok ngak Jehovah ni bochan e gagiyeg ni i tay Satan?
9 Yugu aram rogon ni ke pag Jehovah Satan ni nge gagiyegnag e girdi’ machane gathi be micheg nib kireb e gagiyeg rok. N’en ni ke buch rok e girdi’ e be micheg nib riyul’ e n’en ni yog Jeremiah ni girdi’ e dabiyog ni ngar gagiyegnaged yad. (Mu beeg e Jeremiah 10:23.) Ma ku togopluw ni i tay Satan e ke gagiyelnag e pi fel’ngin Jehovah nib fel’. Uw rogon?
10 Bochan ni rayog ni ngad guyed wenegan e gagiyeg rok Satan ma aram e ke gagiyel e pi fel’ngin Jehovah nib fel’. Ere girdi’ nib t’uf Jehovah rorad e yad ma pining e sorok ngak. Ma aram e ke aw ni gagiyeg rok Satan e ke k’aring ni ngan pining e Sorok ngak Got. Ma ke tamilang feni fel’ rogon ni ke pithig Jehovah fare magawon ni ke sum ni bay rogon nga mat’awun ni nge gagiyeg. Ere ngad weliyed boch e pi fel’ngin Jehovah ma gad guy ko uw rogon ni gagiyeg rok Satan e ke k’aring Jehovah ni nge dag pi fel’ngin nib fel’.
11. Uw rogon ni ke gagiyel e t’ufeg rok Jehovah?
11 T’ufeg rok Got. Be yog e Bible ni “Got e t’ufeg.” (1 John 4:16) Ke dag Got e t’ufeg rok u nap’an ni ke sunmiy e girdi’. Maku rogon ni ke sunmiydad Got e be micheg ni gadad ba t’uf rok. Miki fal’eg e fayleng nib fel’ yaan ni bay gubin ban’en riy nib t’uf ko girdi’ ya baadag ni ngar felfelan’gad. (Gen. 1:29-31; 2:8, 9; Ps. 139:14-16) Machane nap’an ni ke denen e girdi’ me dag Jehovah e t’ufeg rok u yugu boch e kanawo’. Ni uw rogon? Ke yoloy John e thin rok Jesus ni gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Reb e kanawo’ ni rib fel’ u rogon ni dag Got e t’ufeg rok riy e aram e ke pi’ Fak ni kari maagirag rok ni nge biyuliy e girdi’. (John 15:13) Re n’ey e be fil ngodad rogon ni ngad daged e t’ufeg ni gubin ngiyal’ ni bod rogon ni i rin’ Jesus.—John 17:25, 26.
12. Mang kanawo’ e ke m’ug gelngin Jehovah riy?
12 Gelngin Got. Kemus ni “Got ni Th’abi Gel Gelngin” e rayog ni nge sunmiy e yafas. (Rev. 11:17, NW; Ps. 36:9) Nap’an ni yira gargeleg be’ ma yafas rok e bod e babyor ni dariy e yol riy. Ma nap’an nra yim’ ma bod ni ke sug fare gi babyor ko pi n’en ni ke dugliy, ngongol rok, nge pi n’en ni i rin’ u nap’an e yafas rok. Pi n’ey e dabi pag Jehovah talin, ya nap’an nra faseg be’ ko yam’ ma ra sulweg urngin e pi n’ey ngak. (John 5:28, 29) Yugu aram rogon nde m’agan’ Got ngay ni nge yim’ e girdi’ machane re n’ey e ke bing e kanawo’ ni nge dag ni bay gelngin ni nge faseg e yam’. Ere riyul’ ni Jehovah e ir “Got ni Th’abi Gel Gelngin.”
13. U rogon ma fare biyul ni pi’ Jesus e be dag feni mat’aw Jehovah?
13 Got e Ba Mat’aw. Jehovah e der ma ban; ma der rin’ e tin de mat’aw. (Deut. 32:4; Titus 1:2) Ma gubin ngiyal’ nib mat’aw mab yul’yul’ ko n’en ni ma rin’ ni yugu aram rogon nra yib e kireban’ riy ngak. (Roma. 8:32) Ni bod rogon ni ri kireban’ u nap’an ni guy fak nrib t’uf rok ni ke yim’ u daken fare ley i ren ni gowa be’ nib kireb. Machane bochan nib t’uf e girdi’ rok me m’agan’ ngay ni nge yim’ Fak ni fan e nge gagiyel ni ir Got nib mat’aw. (Mu beeg e Roma 5:18-21.) Re fayleng ney ni yooren e girdi’ riy e darur rin’ed e tin nib mat’aw e ke gagiyelnag ni Jehovah e ir e Got nrib mat’aw.
14, 15. Mang boch e kanawo’ ni ke m’ug riy ni Jehovah e rib gonop mab gum’an’?
14 Got e Ba Gonop. De n’uw nap’an nga tomuren ni denen Adam nge Efa, me dag Jehovah ko uw rogon nra chuweg wenegan e togopuluw nra tayew. (Gen. 3:15) Bochan ni ke rin’ e re n’em nib papey, ma ke tamilang e tin nib m’agan’ ngay ni fan ko pi tapigpig rok ma aram e ke gagiyel feni gonop. (Roma. 11:33) Dariy ban’en ni ra sagaalnag Got u rogon ni nge yal’uweg e magawon. Re fayleng ney ni ke sug ko ngongol ni darngal, mahl, girdi’ ni dar ma fol ma dariy e runguy rorad, ma yad ba laniyan’, ma yad be dake yad ba mat’aw e ke bing e kanawo’ ni nge dag Jehovah e gonop rok. Ke gaar James: “Fare gonop ni yib u tharmiy e mmachalbog; ma ku er rogon ni ma fal’eg thiliy nge aw e gapas riy, ma ma sumunguynigey, ma ma fal’eg owchey nge thin ngak e girdi’, ma ba sug ko runguy ma ma k’uf ni ngongol nib fel’; ma ma taareb rogonnag e girdi’ u wan’uy ma der ma dake modingnigey.”—Jas. 3:17.
15 Got e Ba Gum’an’. Bochan ni ke denen e girdi’ mab t’uf ni nge ayuwegrad Jehovah ma aram e ke gagiyel feni rib gum’an’. Riyul’ nrib gum’an’ Jehovah ya ke gaman bokum biyu’ e duw ni be ayuweg e girdi’, ere susun ni ngad felfelan’gad ni ke rin’ ni aram rogon. Ke yog apostal Peter ni gaar: “Mu lemniged e gum’an’ rok e Somol rodad.”—2 Pet. 3:9, 15.
16. Mang fan nib gel e felfelan’ riy nib m’agan’ Jehovah ngay ni nge n’ag fan e kireb u wan’?
16 Ba M’agan’ Got Ngay ni Nge N’ag Fan e Denen. Gad gubin e ta denen ma gad ma oloboch. (Jas. 3:2; 1 John 1:8, 9) Thingar da pininged e magar ngak Jehovah ya “ba m’agan’ ngay” ni nge n’ag fan e denen rodad u wan’. (Isa. 55:7, NW) A kum lemnag e re n’ey: Yugu aram rogon ni gadad e tadenen ma rayog ni ngari felan’dad u nap’an ni ke n’ag Got fan e denen rodad. (Ps. 51:5, 9, 17) Bochan ni ke n’ag Jehovah fan e denen rodad ma ra gel e t’ufeg rodad ngak, ma ku ra pi’ e athamgil ngodad ni ngkud n’aged fan e denen rok boch e girdi’ u wan’dad.—Mu beeg e Kolose 3:13.
Fan ni Ke Magawon e Girdi’
17, 18. Mang boch e kanawo’ ni be dag ni dabi yib angin nib fel’ e gagiyeg ni be tay Satan?
17 Kab kakrom i yib ma de yib angin e gagiyeg rok Satan. Nap’an e duw ni 1991 ma reb e shimbung e yog ni gaar: “Gur, ke magawon e girdi’? Arrogon, machane gathi Got e ke k’aring e magawon ya girdi’.” (The European) Riyul’ ni aram rogon, ya Adam nge Efa e kar piew keru’row ngak Jehovah mar mel’egew e gagiyeg rok e girdi’ ni dariy angin nib fel’. Ma gafgow ni ke yib ngak e girdi’ e be dag ni gagiyeg rok e girdi’ e dabi fel’.
18 Gagiyeg rok Satan e be k’aring e chogow. Machane chogow e dabi gel ko t’ufeg ya be gagiyeg Jehovah u fithik’ e t’ufeg. Gagiyeg rok Satan e de ayuweg e girdi’ nge fel’ rogon e par rorad, me yog e pagan’ nge felfelan’ ngorad. Ere ke tamilang ni gagiyeg rok Jehovah e ba mat’aw. Gur, bay e mich riy e ngiyal’ ney? Rayog ni ngad guyed e mich riy ko bin migid e thin.
Mang e Kad Filed u Murung’agen e Gagiyeg u Rogon ni Bay ko . . .
• Roma 13:1, 2?
• Proverbs 21:30?
• Jeremiah 10:23?
• Kolose 3:13?
[Picture on page 25]
Gagiyeg rok Satan e de ayuweg e girdi’
[Picture on page 25]
U.S. Army photo
WHO photo by P. Almasy
[Picture on page 26]
Bay gelngin Jehovah ni nge faseg e yam’
[Picture on page 27]
Fare maligach ni pi’ Jesus e ke tamilangnag ni Jehovah e ma t’ufegey ma ba mat’aw