Ga Ra Fol u Rogon ni Ma Pow’iyey Jehovah, Fa?

“Gu ma fanenikay urngin woen e kireb.”​—PS. 119:128.

1, 2. (a) Nap’an ni be pow’iyem e fager rom ko gin ni ngam sor ngay, ma mang boch ban’en ni ga baadag ni nge yog ngom u m’on riy, ma mang fan? (b) Mang boch ban’en ni ma yog Jehovah ngodad ndab da rin’ed, ma mang fan?

SUSUN e ba t’uf ni ngam milekag nga bang machane ba t’uf e ayuw rom ya dam nang e kanawo’ ni yan e ngaram. Bay e fager rom nrayog ni nge ayuwegem ma be pagan’um ngak. Ke weliy ngom e n’en susun e ngam rin’ nge boch e magawon nrayog ni ngam mada’nag u kanawo’. Ke yog ngom ni bay boch e sign nde tamilang ma bochan e re n’ey ma boor e girdi’ ni kar maloggad. Gur, ga ra adag ni ngam fol ko n’en ni ke yog, fa? Jehovah e taareb rogon ko re fager nem ni be pow’iydad ko kanawo’ ni yan ko yafas ni manemus, maku be ayuwegdad u boch ban’en nrayog ni nge girngiydad ko kanawo’ nib kireb.​—Deut. 5:32; Psalm 25:8.

² Re article ney nge bin migid e ra weliy murung’agen boch ban’en ni be yog Jehovah ni thingar da paloggad riy. Dab da paged talin ni ma fonownagdad Jehovah ya gad ba t’uf rok. Baadag ni nge yog e yafas ni manemus ngodad, ma ma kireban’ ni ma guy e girdi’ ni kar uned ko ngongol nib kireb mar talgad ko pigpig ni yad be tay ngak ni bochan. (Ezek. 33:11) Re article n’ey e gad ra weliy riy dalip ban’en ni ma magawonnagdad. Bin som’on e ma yib rok e girdi’, ma bin migid e ma sum rodad. Ma bin dalip e ma yib u ban’en nde riyul’, machane bay e riya’ riy. Ba t’uf ni ngad nanged e pi n’ey nge rogon ni be ayuwegdad Jehovah ni ngad togopuluwgad ngay. I yog reb e psalmist ngak Jehovah ni gaar: “Gu ma fanenikay urngin woen e kireb.” (Ps. 119:128, BT) Aram rogon e lem rom, fa? Chiney e ngad weliyed rogon nrayog ni ngad pared ni gad ba mudugil ya nge yog nda gelgad nga gubin “woen e kireb.”

Dab Mu Leked e Tin “Yoor e Girdi’”

3. (a) Nap’an ni gad be milekag, ma mang fan nde fel’ ni ngad leked yugu boch e girdi’ ni faanra da kud nanged e gin ni ngad sorgad ngay? (b) Mang ban’en nib ga’ fan ni gad ra fil ko Exodus 23:2?

³ Nap’an ni ga be milekag, ma mang e ga ra rin’ ni faanra da kum nang e gin ni ngam sor ngay? Sana ga ra adag ni ngam lek boch e girdi’ ni gimed be milekag u taabang nib ga’ ni faanra ga be guy ni yooren i yad e taab yang i ban’en i yad be sor ngay. Machane bay e riya’ ko re n’ey. Ya pi girdi’ nem e rayog ni yugu bang e yad be sor ngay, ara kar maloggad. Re n’ey e ra ayuwegdad ni ngad nanged fan e n’en ni lemnag Jehovah ni nge fil ngak piyu Israel u lan reb fapi motochiyel ni pi’ ngorad. Pi tapuf oloboch ara piin ni yad e mich u boch e oloboch ni yima fek nga tafen e puf oloboch e ni weliy ngorad e n’en nra buch ni faan yad ra lek e tin “yoor e girdi’.” (Mu beeg e Exodus 23:2.) Dariy e maruwar riy nib mom ko girdi’ ni dawor ra flontgad ni ngar leked e tin yoor e girdi’ mar dugliyed ban’en nrogon ni baadag boch e girdi’. Machane, fare fonow ni be yog ndab un lek e tin yoor e girdi’ e kemus ni fan ngak e pi tapuf oloboch nge piin ni yad e mich u boch e oloboch, fa? Danga’.

4, 5. Uw rogon ni kan towasariy Joshua nge Kaleb ni ngar rin’ew e n’en ni be yog e girdi’, ma mang e ayuwegrow ni ngar siyegew e re n’ey?

⁴ Bin riyul’ riy e demtrug e ngiyal’ nrayog ni ngan waliydad ni ngad leked e “tin yoor e girdi’.” Re n’ey e ku rayog ni nge buch nib tomgin, mab mo’maw’ ni ngan siyeg. Am lemnag e n’en ni buch rok Joshua nge Kaleb. Yow bagayad fa 12 i pumoon nni l’ograd ni ngar lekaged fare Nam ni Kan Micheg. Nap’an nra sulod ma ragag i yad e weliy boch ban’en nib kireb u murung’agen fare Nam ni Kan Micheg mar k’aringed e marus ngak piyu Israel. (Gen. 6:4) Dabiyog ni nge buch ban’en ni aram rogon ya fapi Nephilim ni ke yoor e chibog ni ur moyed e kar m’ad u nap’an fare Ran ni Tharey e Fayleng u nap’an Noah. Machane ke mich u wan’ piyu Israel e n’en ni yog e pi pumoon nem ni bochan e ke war e michan’ rorad. Ma nap’an nra war e michan’ rok be’ ma aram e dabki pagan’ ngak Got ma ke mom ni nge mich u wan’ e pi n’en nde riyul’ ni ma yog e girdi’. Ere de n’uw nap’an nga tomuren, ma boor piyu Israel nra tababgad i lemnag ndab ra folgad ko n’en ni ke yog Jehovah ni aram e nga ranod nga lan fare Nam ni Kan Micheg. Machane mang e rin’ Joshua nge Kaleb?​—Num. 13:25-33.

⁵ Dar unew i rin’ e n’en ni i rin’ yooren e girdi’. Ka rognew e tin riyul’ ma dar thilyegew e thin rorow ni yugu aram rogon ni dabun e girdi’ ni ngar motoyilgad ngorow mu kun guy rogon ni ngan malangnagrow! Uw rogon ni yog ni ngar parew ni yow ba mudugil? Bochan e ba mich Jehovah u wan’row. Faanra rib mich Jehovah u wan’ be’, ma aram e ba riyul’ e thin rok u wan’ ma gathi n’en ni ma yog e girdi’ nde puluw. Gal pumoon ney e ra weliyew rogon lanin’row ko pi n’en ni ke micheg Jehovah boch nga tomuren. (Mu beeg e Joshua 14:6, 8; 23:2, 14.) Rib mich Jehovah u wan’ Joshua nge Kaleb, ma rib t’uf rorow. Dubrow ni nga ranow nga laniyan’ e girdi’ mi yow kirebnag laniyan’ Jehovah.​—Num. 14:1-10.

6. Mang boch e kanawo’ nra mom riy ngodad ni ngad rin’ed e n’en ni be rin’ yooren e girdi’?

⁶ Bay yu ngiyal’ ni ga baadag ni ngam rin’ e n’en ni be rin’ yooren e girdi’, fa? Yooren e girdi’ e darur ted fan Jehovah ma yad ma lemnag nde puluw e pi n’en ni ma yog u murung’agen e tin nib fel’ nge tin nib kireb. Bay rogon ni yad ma lemnag e tin nib fel’ nge tin nib kireb, ma yad ma guy rogon ni nge mich u wan’dad e pi n’ey nde riyul’. Bod ni yad ma yog ni dariy ban’en nib kireb ko pi kachido nge pi n’en ni yima gosgos ngay ko computer ni be dag yaan e ngongol ni darngal, nge cham, nge ngongolen e pig. (2 Tim. 3:1-5) Nap’an ni ga be mel’eg e pi n’en ni ngam n’aged chon e tabinaw rom e chalban romed ngay, ma ga ma pag e lem rok boch e girdi’ ni nge gagiyegnag e pi n’en ni ga ra dugliy nge nangan’ rom, fa? Faan ga ra rin’ ni aram rogon, ma gathi aram e ga be rin’ e n’en ni ma rin’ yooren e girdi’?

7, 8. (a) Uw rogon ni ngad filed rogon ni ngad “nanged e tin nib fel’ ko tin nib kireb”? (b) Mang fan ni kab fel’ e re n’ey ko bin ni ngan tay boch e motochiyel ni ngad folgad riy? (c) Mang fan ni ga be felfelan’ ni ga be guy boor e fel’ yangaren ni Kristiano ni yad be athamgil ni ngar rin’ed e tin nib fel’?

⁷ Ke pi’ Jehovah reb e tow’ath nrib manigil ngodad nra ayuwegdad u rogon ni ngad dugliyed ban’en. Re tow’ath nem e aram e, rogon ni ‘ngad nanged e tin nib fel’ ko tin nib kireb.’ Machane thingar da “filed rogon” ni ngad maruwelgad ngay. (Heb. 5:14) Faan gad ra un i rin’ e tin ni be rin’ yooren e girdi’ ara ni pi’ boch e motochiyel ni ngaud folgad riy ma aram e dabiyog ni ngad filed rogon ni ngad nanged e tin nib fel’ ko tin nib kireb. Aram fan ni danir yoloy nga but’ fithingan e re mit i kachido, nge babyor, nge Website ko Internet ni dabi yan e Pi Mich Rok Jehovah ngay. Bochan ni be thil rarogon e re fayleng ney nib papey, ma faan yira yoloy urngin e pi n’ey nga but’ ma dabi n’uw nap’an ma ke t’uf ni ngan thilyeg u babyor rodad ya kan ngongliy boch nib beech. Maku reb e ra mo’maw’nag ngodad ni ngad maruwelgad ko tow’ath ni ke pi’ Jehovah ngodad ni aram e ngaud fal’eged i lemnag e n’en ni be yog e Bible, ma gad yibilay e ayuw rok, ngemu’ ma gad dugliy ban’en nib m’agan’ ngay.​—Efe. 5:10.

⁸ Nap’an ni gad ra dugliy boch ban’en nib puluw ko Bible, ma boch e girdi’ e yad ra dabuy dakendad. Ba gel e magawon ni ma mada’nag e piin fel’ yangaren u skul ni bochan e ma guy boch e bitir rogon ni ngar towasariyed yad ni ngar uned i rin’ e pi n’en ni yibe rin’ u toobrad. (1 Pet. 4:4) Ere rib fel’ ni gad ma guy e pi fel’ yangaren ni Kristiano nge ku boch e Kristiano ni kar ilalgad ni yad ma folwok ko n’en ni rin’ Joshua nge Kaleb ndar folgow ko n’en ni i rin’ yooren e girdi’.

Dab Mu Lek e ‘Pi N’en ni Bay u Gum’irchaem nge Pi N’en ni Ga Be Guy’

9. (a) Nap’an ni gad be milekag, ma mang fan ni bay e riya’ riy ni faanra yugu da leked gubin pa’ e kanawo’ ni gad be lemnag nib fel’? (b) Mang nib ga’ fan fare motochiyel ni bay ko Numbers 15:37-39 ngak e girdi’ rok Got u Israel kakrom?

⁹ Bin l’agruw e n’en nrayog ni nge magawonnagdad e ban’en ni bay rodad. Baaray rogon nrayog ni ngan susunnag: Faanra ga be milekag nga bangi ban’en, ma ga be lemnag nrayog ni ngam n’ag e map rom ngaum lek gubin pa’ e kanawo’ ni ga be lemnag nib fel’? Ba tamilang ni ga ra rin’ ni aray rogon ma dabiyog ni ngam taw ko gin ni ga be nameg. Re n’ey e be ayuwegdad ni ngad nanged fan ban’en ni baadag Jehovah ni nge fil ngak piyu Israel u daken reb e motochiyel ni pi’ ngorad. Boor e girdi’ e ngiyal’ ney e sana dar nanged fan fare motochiyel ni ngan tay e matharthar nga tabon e mad nra reb min m’ag ba yil’ i gaf nib raen mak’ef ngay. (Mu beeg e Numbers 15:37-39a.) Machane ga manang feni ga’ fan e re motochiyel nem, fa? Re motochiyel nem e ir e i tay e girdi’ rok Got kakrom ni yad ba gagiyel ni yad ba thil u fithik’ e pi nam u toobrad ni yad ma liyor nga boch e got ni googsur. Faanra ngar pared ni yad ba fel’ u wan’ Jehovah ma thingar ra folgad ko re motochiyel ney. (Lev. 18:24, 25) Machane ku bay reb i fan nni pi’ e re motochiyel nem, ni aram e n’en ni ngad weliyed. Ngemu’ mu kud weliyed e bin l’agruw e n’en nrayog ni nge k’aringdad nge dab kud folgad rok Jehovah.

10. Uw rogon ni ke dag Jehovah nri manang rarogon e girdi’?

¹⁰ Nap’an ni pi’ Jehovah e re motochiyel nem ngak e girdi’ rok me yog fan ngorad ni gaar: “Dab mu pied keru’med ngog ngam leked e pi n’en ni bay u gum’ircha’med nge pi n’en ni gimed be guy.” Ri manang Jehovah rarogon e girdi’ nib fel’ rogon. Manang nib mom ni nge adag gum’ircha’dad e pi n’en ni ma guy owchedad. Be fonownagdad e Bible ni gaar: “Mini’ e rayog ni nge nang fan laniyan’ e girdi’? Dakuriy yugu reb e ban’en ni aram feni sasaliyeb.” (Jer. 17:9, BT) Ere kam nang fan nib puluw e re fonow ney ngak piyu Israel? Manang Jehovah ni faanra i sap piyu Israel ko pi nam ni darur pigpiggad ngak ma rayog ni ngar adaged ni ngar boded yad. Maku rayog ni ngar adaged ni ngaur lemgad, ma ur ngongolgad ni bod yad.​—Prov. 13:20.

11. Uw rogon nrayog ni ngan waliydad ngad leked e pi n’en ni bay u gum’ircha’dad nge pi n’en ni gad ma guy?

¹¹ Ngiyal’ ney e ba mom ni ngad adaged e pi n’en ni gad ma guy. Gad be par u ba fayleng nib mom ni ngan ar’arnag e pi n’en nib kireb riy. Ere, uw rogon ni ngad folgad ko fare kenggin e motochiyel ni bay ko Numbers 15:39? Rayog ni nge mom ni ngad leked e pi n’en ni bay u gum’ircha’dad nge pi n’en ni gad ma guy u rogon e munmad ni gad ma tay. Girdi’ ni gadad nga skul, ngu tabon e maruwel, nge gin ni gad ma par riy e yad ma munmad u reb e kanawo’ ni be m’ug riy ni yad baadag ni ngar k’aringed boch e girdi’ ni ngar lemnaged boch ban’en nib kireb. Bochan ni gad ma guy e pi n’ey ni gubin ngiyal’ ma rayog ni ngad adaged ni ngad boded yad. Ma ra munmun ma gad munmad ni bod yad ndaki bod rogon e tin riyul’ e Kristiano.​—Rom. 12:1, 2.

12, 13. (a) Mang e susun ni ngad rin’ed ni faanra be waliydad owchedad nga boch ban’en nib kireb? (b) Uw rogon ni ngad siyeged ndab da rin’ed boch ban’en nra waliy boch e girdi’ ko kireb?

¹² Rib ga’ fan ni ngaud t’ared lanin’dad. Ba t’uf ni ngad feked owchedad ko tin nib kireb. Rayog ni nge ayuwegdad e n’en ni rin’ Job ni ir be’ nib yul’yul’. I yog ni ke yog ngak u wan’ ndariy ba ngiyal’ nra changar ngak reb e ppin ni gathi leengin me lemnag e tin nde machalbog. (Job 31:1) Ku aray e n’en ni dugliy David ni Pilung ni gaar: “Ma dariy biid nrayog ni gu k’adan’ug ko n’en nib kireb.” (Ps. 101:3, BT) Demtrug ban’en nra alitnag e nangan’ rodad me kirebnag e tha’ u thildad Jehovah e ba “kireb.” Re n’ey e ba muun ngay e pi n’en ni gad ma guy nrayog ni nge sunumiy e ar’ar nib kireb u gum’ircha’dad me k’aringdad ni ngad rin’ed ban’en nib kireb.

¹³ Maku reb, e de fel’ ni ngaud rin’ed e “kireb” ngad k’aringed boch e girdi’ ni ngar ar’arnaged boch ban’en nib kireb. Ere, ba fel’ ni ngad folgad ko fare fonow nu Bible ni be yog ni ngad gonopiyed e munmad rodad nge yan i par nib fel’ rogon. (1 Tim. 2:9) Faanra ngam munmad nib fel’ rogon ma gathi be yip’ fan ni ngam munmad ni rogon ni ga baadag. Ya kub t’uf ni ngam man nga laniyan’ e girdi’ u toobem, ya nge dab mu magawonnag laniyan’ be’ ara mu darifannag. (Rom. 15:1, 2) Bokum biyu’ e fel’ yangaren u lan e ulung ni Kristiano ni yad ma dag e kanawo’ nib fel’ ni ngan folwok riy u rogon e munmad ni yad ma tay. Gad ma felfelan’ ni gad ma guyrad ndarur leked e pi n’en ni bay u gum’ircha’rad nge pi n’en ni yad ma guy. Yad ma guy rogon ni ngar rin’ed e tin nib m’agan’ Jehovah ngay.

Dab Mu Lek e “Pi Got ni De Riyul’”

14. Mang fonow u murung’agen e “liyos” ara boch ban’en nde riyul’ ni pi’ Samuel?

¹⁴ Susun e ga be milekag ma ga taw nga bang nib t’uf ni ngam th’ab e day nga barba’. Nap’an ni ga be yan ma ga lemnag ni kam guy e binaw. Machane gathi riyul’ e re n’em ya dariy ban’en u rom. Mang e ra buch ni faan ga ra thilyeg e kanawo’ rom ya ga be nameg fare donguch ni dariy u rom? Ga ra lek e re n’ey ma rayog ni ngam mada’nag e riya’. Manang Jehovah ni bay e riya’ riy ni faanra pagan’dad nga ban’en nde riyul’. Ireray ban’en ni fonownag piyu Israel riy. Gubin e pi nam nib liyegrad ni goo bay e pilung rorad, ere baadag piyu Israel ni ngki yog reb e pilung ngorad nib girdi’. De fel’ e re n’em ni bochan e be m’ug riy ni dubrad ni nge mang Jehovah e pilung rorad. Ere yugu aram rogon ni pagrad Jehovah ni nge yog reb e pilung ngorad, machane me l’og Samuel ni profet ni nge fonownagrad u murung’agen e “liyos” ara boch ban’en nde riyul’.​—Mu beeg e 1 Samuel 12:21.

15. Mang boch e kanawo’ ni i lek piyu Israel boch ban’en nde riyul’ riy?

¹⁵ Sana i lemnag piyu Israel nrayog ni nge pagan’rad nga yugu reb e pilung nib thil ngak Jehovah. Faanra aram e n’en ni ur lemnaged, ma aram e yad be lek e pi “liyos” ara boch ban’en nde riyul’. Ma re n’ey e ke momnag ni ngki mich u wan’rad boch ban’en nde riyul’ ni ma bannagey Satan riy. Piin ni yad ra gagiyegnagrad e ba mom ni ngar waliyed yad ngar uned ko meybil ko liyos. Piin ni yad ma meybil ko liyos e yad ma lemnag nrayog ni nge pagan’rad ko pi got ni kan ngongliy ko gek’iy ara malang ni bochan e rayog ni ngar guyed mar mathgad ngorad. Der pagan’rad ngak Jehovah ni ir fare Got ni ke sunmiy urngin ban’en ma dab ni guy. Machane rogon ni yog apostal Paul e, pi liyos ni yima meybil ngay e “gathi riyul’.” (1 Kor. 8:4) Dabiyog ni ngar guyed ban’en, ara ra rung’aged ban’en, ara ra nonad, ara ra rin’ed ban’en. Sana rayog ni ngam guyrad ma ga math ngorad, machane faan ga ra liyor ngay ma aram e ga be lek boch ban’en nde riyul’ nra yib wenegan nib kireb.​—Ps. 115:4-8.

16. (a) Uw rogon ni ma waliy Satan e girdi’ e ngiyal’ ney ni ngar leked boch ban’en nde riyul’? (b) Mang fan nrayog ni nga dogned ni salpiy nge chugum e aram boch ban’en nde riyul’ ni faanra ngan taarebrogonnag ngak Jehovah Got?

¹⁶ Rib salap Satan ko sabanban ma ma guy rogon ni nge k’aring e girdi’ ni ngar leked boch ban’en nde riyul’ e ngiyal’ ney ni taareb rogon ko fapi “liyos.” Boor e girdi’ ni ke bannagrad kar lemnaged ni chugum e aram e n’en nra pagan’rad ngay. Salpiy, nge chugum, nge maruwel nib tolang puluwon e ra yibnag e felfelan’ nge pagan’ ngorad miki ayuwegrad ni ngar pithiged e pi magawon rorad. Machane uw rogon nra ayuwegrad e pi n’ey u nap’an ni yad ra m’ar ara nap’an ni bay e magawon ko salpiy ko nam, ara nap’an ni ke yib e yoko’ ara durru’ ara boch ban’en? Uw rogon nra ayuwegrad e pi n’ey u nap’an ni yad ra thamiy ni dakuriy fan e yafas rorad? Rayog ni nge pi’ e pi n’ey e fulweg ko tin th’abi ga’ fan e deer rorad u murung’agen e yafas, fa? Rayog ni nge ayuwegrad u nap’an ni ke chugur ni ngar m’ad, fa? Ra pagan’dad ko salpiy nge chugum, ma ra kireban’dad ya dabiyog ni nge yibnag e felfelan’ ngodad, maku dabiyog ni nge ayuwegdad ko m’ar nge yam’ ni bochan e taareb rogon e pi n’ey ko fapi “liyos” nde riyul’. (Prov. 23:4, 5) Machane Jehovah e ir e bin riyul’ e Got ni bochan e faanra fel’ e tha’ u thildad ma gad ra felfelan’ me pagan’dad. Riyul’ nreb e tow’ath nib fel’ e ray. Ere dariy ba ngiyal’ ni ngad paged Jehovah ngad leked boch ban’en nde riyul’.

17. Mang e ga ra rin’ ko pi fonow ni bay ko re article ney?

¹⁷ Gathi gad ba tow’ath ni Jehovah e ir e Fager rodad ma ir e be Pow’iydad ko yafas ni manemus? Faan gad ra ulul ngaud folgad ko pi fonow rok ma aram e rayog ni ngad pared ni manemus. Re article ney e kad weliyed riy dalip ban’en nrayog ni nge chafeg e girdi’ nga orel ko tirok Got ban’en, ni aram e: tin yoor e girdi’, nge pi n’en ni bay u gum’ircha’dad, nge pi liyos ara boch ban’en nde riyul’. Ma bin migid e article e gad ra weliy riy dalip ban’en ni be fonownagdad Jehovah riy ya nge yog nda fanenikayed ma gad siyeg urngin woen e kireb.​—Ps. 119:128.

[Footnote]

Uw Rogon ni Ga Be Lemnag?

Uw rogon nrayog ni ngam fol ko pi thin nu Bible ni baaray?

• Exodus 23:2

• Numbers 15:37-39

• 1 Samuel 12:21

• Psalm 119:128

[Picture on page 11]

Bay yu ngiyal’ ni ga baadag ni ngam lek yooren e girdi’, fa?

[Picture on page 12]

Mang ni bay e riya’ riy ni ngam lek e pi n’en ni bay u gum’irchaem nge pi n’en ni ga ma guy?

[Picture on page 13]

Ga be nameg boch ban’en nde riyul’, fa?