Keb Mat’awmed ni Ngan Pow’iymed ko Fapi Alublub ni Bay e Ran ko Yafas Riy
“Fare Fak e Saf . . . e ir e bay i gafaliyrad me pow’iyrad ko fapi alublub ni bay e ran ko yafos riy.”—REV. 7:17.
1. Uw rogon nike tamilangnag e Thin rok Got e Kristiano ni kan dugliyrad, ma mange maruwel nike pi’ Jesus ngorad?
THIN ROK GOT eke tamilangnag ni bay boche Kristiano ni kan dugliyrad ni ngar ayuweged e tirok Kristus u fayleng ni aram “fare tapigpig nib yul’yul’ ma ba gonop.” Nap’an nike fal’eg Kristus i yaliy “fare tapigpig” ko duw ni 1918, make pirieg e piin ni kan dugliyrad u fayleng ni yad ba yul’yul’ ni yad be pi’ e ‘ggan ni machib u ngal’an.’ Arfan, ni Jesus, ni ir fare Masta, eke m’agan’ ngay ni nge milfan “urngin ban’en rok” ngorad. (Mu beeg e Matthew 24:45-47.) Aray rogon nima pigpig e piin ni kan dugliyrad ngak boche tapigpig rok Jehovah u royu fayleng u m’on ni nga ranod nga tharmiy.—Mal. 3:1-3.
2. Mu weliy e pi n’en nib milfan ngak Jesus.
2 Ba masta e bay mat’awun ni nge mil fan ngak urngin ban’en rok, ma rayog ni nge maruwel ngay nrogon ni baadag. Urngin ban’en rok Jesus Kristus, nike Pilung u tagil’ Jehovah, nib muun ngay urngin ban’en ni bay rogon ko Gil’ilungun u fayleng. Ba muun ngay fare ‘ulung nib ga’’ ni pig e changar rok apostal John nge guy. I yog John murung’agen fare ulung nib ga’ ni gaar: “Mu gguy e girdi’ ni ke muulung ni pire’ ni pire’ ndariy be’ nrayog ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin, ni kar sak’iygad u p’eowchen tagil’ Got nge fare Fak e Saf, ni ka ron’ed e mad nib wechwech ni ba’ yuwan e fal’tir u pa’rad.”—Rev. 7:9.
3, 4. Uw rogon nrib ga’ e tow’ath ko fare ulung nib ga’?
3 Girdien fare ulung nib ga’ e yad fa piin ni yog Jesus ni “yugu boch e saf.” (John 10:16) Athap rorad e ngar pired ni manemus u fayleng. Ba pagan’rad nra pow’iyrad Jesus ko “fapi alublub ni bay e ran ko yafos riy” ma “bayi n’ag Got e lu’ u owcherad.” Ma bochane re n’em, ma kar “lukniged e mad rorad kar wechwechniged nga rachaen fare fak e Saf.” (Rev. 7:14, 17) Kar maruweliyed e michan’ rorad ko maligach nike pi’ Jesus, ere mit Got e kar chuwgad ko ‘mad nib wechwech.’ Chiney e kan mat’awnagrad ni yade pi tafager rok Got, ni bod rogon Abraham.
4 Tin kub muun ngaye, yugu aram rogon ni fapi yugu boche saf e masap Got ngorad ni kar mat’awgad, ma rayog ni ngar athapeged ni ngar mageygad nib fos u nap’an fare gafgow nib ga’. (Jas. 2:23-26) Rayog ni ngar chugurgad ngak Jehovah, ma yad gubin ni baye athap rorad ni ngar mageygad nib fos u nap’an e Armageddon. (Jas. 4:8; Rev. 7:15) Gathi yadra par rorad ni goo yad rorad ya kar adaged ni ngar pigpiggad u tane gagiyeg ko fare Pilung nu tharmiy nge pi walagen ni kan dugliyrad ni yad bayu fayleng.
5. Uw rogon nima ayuweg fare ulung nib ga’ fachi ulung i walag ni kan dugliyrad?
5 Pi Kristiano ni kan dugliyrad e ka yad be ulul i mada’nag e togopuluw rok Satan u lane re fayleng ney. Machane, rayog ni ngar taga’gad ko ayuw ni mayib ngorad rok fapi yugu boche saf. Yugu aram rogon ni fapi Kristiano ni kan dugliyrad e yad buchuuw, machane fapi yugu boche saf e yad be yoor iyan u gubin e duw. Girdien fachi ulung e dabiyog ni ngar guyed e n’en nima rin’ rebe ulung ko Kristiano nge reb u ga’ngin e fayleng ni 100,000 u gubin. Ere, bang ko ayuw nima pi’ fare ulung nib ga’ ngak fachi ulung e aram e piin nike bung rogorad e yad ma pigpig ni yade piin piilal u lane ulung. Yad ma uni ayuweg bokum milyon e pi Kristiano ni kan pag farad ngak “fare tapigpig nib yul’yul’ ma ba gonop.”
6. Uw rogon ni kan yiiynag e ayuw nibe pi’ yugu boche saf ngak e pi Kristiano ni kan dugliyrad?
6 I yiiynag Isaiah ni profet murung’agen e ayuw nibe pi’ fapi yugu boche saf ngak fapi Kristiano ni kan dugliyrad. I yoloy ni gaar: “I Somol e be gaar ngak yu Israel, ‘Pi tamaruwel ndariy puluwrad nu Egypt nge piin nib fel’ rogon u Ethiopia e bayi mil suwon ngom, ma pumoon ni n’un’uw nu Seba e bay ra manged sib rom; bay ra leked gur.’” (Isa. 45:14, NW) Pi Kristiano ni athap rorad e ngar pired u fayleng e yad be lek fachi ulung nge fare Governing Body, ma yad be fol rorad. Fapi yugu boche saf ni yad boche “tamaruwel ndariy puluwrad,” nike bung rogorad e yad be fanay gelngirad nge tin ni bay rorad ni ngar ayuweged fare maruwel ko machib u ga’ngin yange fayleng nike pi’ Jesus ngak fa piin gachalpen ni kan dugliyrad u fayleng.—Acts 1:8; Rev. 12:17.
7. Mang boche tow’ath ni yibe skulnag fare ulung nib ga’ riy?
7 Nap’an ni yad be pi’ e ayuw rorad ko fapi walag ni kan dugliyrad, ma fare ulung nib ga’ e yibe skulnagrad u rogon ni ngar manged def ko fare ulung ko girdi’ ni yira sunmiy u tomren e Armageddon. Thingari par ere def nem nib mudugil, ma piin ni gothon ere ulung nem e thingari m’ag u wan’rad ni ngar folgad u rogon nibe pow’iyrad fare Masta rorad. Ra bagayad e pi Kristiano ney ma kan pi’ ngorad fare tow’ath ni ngar daged nrayog ni nge fanayrad Jesus Kristus ni Pilung. U dakene michan’ rok nge rogon nibe dag nibe par nib yul’yul’, ebe dag nriyul’ nra fol u nap’an nra pow’iy fare Pilung u lan fare fayleng nib beech.
Ke Micheg Fare Ulung nib Ga’ e Michan’ Rorad
8, 9. Uw rogon nibe micheg fare ulung nib ga’ e michan’ rorad?
8 Fapi yugu boche saf ni yad be maruwel fapi Kristiano ni kan dugliyrad u taabang e boore kanawo’ ni kar micheged e michan’ rorad riy. Som’on ma, yad ma ayuweg i wereg fare thin nib fel’ ni murung’agen Gil’ilungun Got. (Matt. 24:14; 28:19, 20) Bin migid e, yad ma fol ko pi fonow ko fare Governing Body nib m’agan’rad ngay.—Heb. 13:17; mu beeg e Zekariah 8:23.
9 Bin dalip e, yad be ayuweg pi walagrad ni kan dugliyrad ni aram e yad ma par nib puluw ko pi kenggin e motochiyel rok Jehovah. Yad ma athamgil ni ngar maruweliyed ni ngeyog ngorad e “t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.” (Gal. 5:22, 23) Ngiyal’ ney e, oren e girdi’ e darur daged e pi fel’ngin ney ya yad ma ngongliy e “tin nib kireb ni yima ar’arnag.” Machane, fare ulung nib ga’ e kar dugliyed u wun’rad ni ngar siyeged e “ngongol ni darngal, nge ngongol ni golong, nge ngongol ni puwlag; nge ta’ fan nge meybil ngak e liyos ni ma meybil boch e girdi’ ngay nge pig; nge tathil ni be tay e girdi’, nge cham ni yad be tay, nge awan’, nge damumuw, nge athamgiliy ban’en ni fan e gur faanem e nga nog e sorok ngom. Ma yad be wer ngar yurba’gad ara ra yu ulunggad; ma yad ba chogow, ma yad be balyang ko rrum, ma yad be ngongliy e mur ni yibe wagagey u fithik’, ma yad be rin’ boch ban’en ni bod e tiney.”—Gal. 5:19-21.
10. Mange ke dugliy fare ulung nib ga’ ni ngar rin’ed?
10 Bochane daworda flontgad, ma rayog ni nge mo’maw’ ni ngad daged e pi wom’engin e kan ni thothup ney, ma gad siyeg e pi ar’ar ko dowef, nge towasar ko fayleng rok Satan. Machane, ke mudugil u wan’dad ndabda paged e meewar rodad, ara pi n’en ndar yog ni ngad rin’ed, ara magawon ko dowef rodad ni nge warnag e t’ufeg rodad ngak Jehovah. Gad manang nra rin’ Jehovah e tin ke micheg—mara tay fare ulung nib ga’ nib fos u nap’an fare gafgow nib ga’.
11. Mang kanawo’ eke fanay Satan ni nge warnag e michan’ rok e Kristiano?
11 Ere, gad be par ni gad ba od nibchane gad manang nib riyul’ ni toogor rodad e fare Moonyan’, made mom ni nge pag ban’en. (Mu beeg e 1 Peter 5:8.) Ke gay rogon ni nge fanay e piin ni kar diyeged ma kar togopuluwgad ko bin nriyul’ e liyor nge boche girdi’ ni ngar guyed rogon nge mich u wan’dad ni machib ni gad be fol riye googsur. Machane daryog ni nge buch ni aram rogon. Bod rogon, ni yugu aram rogon ni togopuluw e bayi n’en me sowathnag fare maruwel ko machib, mabin nriyul’ riy ebe gelnag e michan’ rok e piin ni yibe gafgownagrad. Ere, be elmerin Satan i fanay urngin e kanawo’ nrayog ni nge warnag e michan’ rodad. Nap’an nra mulan’dad, maku ma fanaye re n’em. Fatin nsom’on e Kristiano e ni ginangrad u murung’agen ere n’em nni gaar: “Mu tafinayniged gelngin e gafgow ni tay [Kristus], nge rogon ni k’adan’, nge gelngin e fanenikan ni tay e piin ntadenen ngak.” Mang fan? Ya nge “dabi mulan’med ngam paged gimed.”—Heb. 12:3.
12. Uw rogon nibe gelnag e fonow nu Bible e piin ke mulan’rad?
12 Bay ba ngiyal’ ni kam finey ni nge dab kum pigpig ku Jehovah, fa? Gama lemnag yu ngiyal’ ndariy ban’en ni gab fel’ ngay, fa? Faanra aray rogon, madab mu pag Satan nge fanay e pi lem ney nge k’aringem nge dab kum pigpig ku Jehovah. Fol Bible nib fel’ rogon, min pey’niy e meybil, min un ko muulung ni gubin ngiyal’ nge ngan chag ko pi Kristiano u lane ulung era gelnagem me ayuwegem ni nge ‘dabi m’ay gelngim.’ Ke micheg Jehovah nra ayuweg e piin ni yad be pigpig ngak ni nge yib gelngirad bayay, mar riyul’ nra lebug e pi n’en nike micheg. (Mu beeg e Isaiah 40:30, 31.) Mu tiyan’um ko fare maruwel rom ni fan ko Gil’ilungun. Mu siyeg boch ban’en nima feke tayim, mag tiyan’um nga rogon ni ngam ayuweg boche girdi’. Ma aram e rayog ni ngam par ni gab gel ni yugu aram rogon nibe mulan’um.—Gal. 6:1, 2.
Kan Ayuwegrad u Fithik’ fare Gafgow nib Ga’ Kar Thapgad ko Bin Beech e Fayleng
13. Mange maruwel ni bay ni fan ngak e piin nra magey nib fos u tomren e Armageddon?
13 Tomren e Armageddon, ma bokum e piin nde mat’aw ni kan fasegrad ko yam’ nra t’uf ni ngan skulnagrad ko pi kanawo’ rok Jehovah. (Acts 24:15) Ra t’uf rorad ni ngar filed murung’agen fare biyul ni pi’ Jesus, maku, thingar ni fil ngorad ni ngar maruweliyed e michan’ rorad ni fan ko fare biyul nge yog ni yib angin ngorad. Ra t’uf ni ngar siyeged e ban ko pi teliw ni googsur mar thilyeged kanawoen e yafas rorad. Thingara filed rogon ni nga ron’ed fabin ni beechi yad nga dakenrad ni aram e pow ko tin nriyul’ e Kristiano. (Efe. 4:22-24; Kol. 3:9, 10) Fapi yugu boche saf ni yadra magey nib fos e boore maruwel ni ngar rin’ed e ngiyal’ nem. Rib gel e felfelan’ riy ni ngan rin’ ere maruwel nem ni fan ku Jehovah, ndabki magawonnagey e kireb ko re fayleng ney!
14, 15. Mu weliy e pi n’en nrayog nra i weliy e piin ni magey nib fos ko fare gafgow nib ga’ nge piin nib mat’aw ni yira fasegrad ko yam’.
14 Pi tapigpig rok Jehovah nib yul’yul’ nra m’ad u m’on ko machib nii tay Jesus u fayleng e ku boor ban’en ni ngar filed e ngiyal’ nem. Yadra nang ko mini’ fare Messiah ni kan micheg, ni ire ur athapeged ni ngar guyed ma deyog. Nap’an ni ka yad ba fos mar daged ni yad baadag ni nge skulnagrad Jehovah. Rib gel e felfelan’ nge tow’ath riy ni ngan ayuwegrad—ni bod ni, ngan weliy ngak Daniel nge nang rogon nike lebug e pi yiiy nii yoloy nga but’ machane denang fan!—Dan. 12:8, 9.
15 Arrogon, yugu aram rogon ni piin ni kan fasegrad ko yam’ e boor ban’en ni bay ni ngar filed rodad, maku boore deer ni gadra fith ngorad. Rayog ni ngar weliyed ngodad boch ban’en ni kan yoloy nga Bible ma gathi rib tamilang. Rib gel e felfelan’ riy ni ngan nang boch ban’en u murung’agen e yafas ku Jesus rok John ni Tataufe ni fak rebi walagen e gallabthir ku Jesus! Pi n’en ni gadra fil rok e Pi Mich ney ni yad ba yul’yul’ e dariye maruwar riy nra ga’nag boche tamilangan’ rodad ko Thin rok Got ko chiney. Pi tapigpig rok Jehovah nib yul’yul’ ni kar m’ad—nib muun ngay e piin ni yad bang ko fare ulung nib ga’ ni kar m’ad u nap’an e ngiyal’ ney ko tomur—e yira “fasegrad ko yam’ nga reb e tamilang ni kab fel’” boch. Ra tababnaged e pigpig rorad ku Jehovah u lan ba fayleng nike suwey Satan. Rib gel e felfelan’ riy ni ngar ul’ulgad ko pigpig rorad u lan fare fayleng nib beech ni kab fel’ ko biney!—Heb. 11:35; 1 John 5:19.
16. Rogon ni kan yiiynag, e uw rogon fare Rran ko Pufthin?
16 Ba ngiyal’ ko fare Rran ko Pufthin e yira pithig fapi babyor ni kan bachiy. Fare Bible nge re babyor ney, era dag fan nge angin ni ngan pufthinnag e piin nike yoge yafas ni manemus ngorad. (Mu beeg e Revelation 20:12, 13.) Tomren e Rran ko Pufthin, ma gubin e girdi’ nrayog rorad ni ngar daged e gin ni yad bay riy ko fare deer nike sum u murung’agen e en ni bay mat’awun ni nge gagiyeg. Ra fol ko yaram ko fare Gil’ilungun me pag fare Fak e Saf nge pow’iy ko “fapi alublub ni bay e ran ko yafos riy”? Fara siyeg ni nge fol ko yaram ni yira pi’ u tan fare Gil’ilungun Got? (Rev. 7:17; Isa. 65:20) Ngiyal’ nem mara be’ ma rayog ni nge dugliy ban’en ni ir rok, ndabi kirebnag e denen nike af ngodad ara rarogon e par rodad. Dariy be’ nra i deeriy murung’agen feni mat’aw rogon e pufthin nra tay Jehovah ko tomur. Kemus ni yigoo tin nib kireb ban’en era chuw ndariy n’umngin nap’an.—Rev. 20:14, 15.
17, 18. Fapi Kristiano ni kan dugliyrad nge pi yugu boche saf e yad be sap ko fare Rran ko Pufthin ni bay nga m’on ni mange bayu lanin’rad?
17 Pi Kristiano ni kan dugliyrad e ngiyal’ ney, e bay rogorad ni ngeyog ba Gil’ilungun ngorad, ma yad be sap nga m’on ko ngiyal’ ni yadra gagiyeg u nap’an fare Rran ko Pufthin. Rib fel’ ere maruwel nem ni yadra rin’! Re athap nem ebe k’aringrad ni ngar leked fare fonow ni pi’ Peter ngak pi walagen ko bin nsom’on e chibog ni faani gaar: “Mu guyed rogon ngam athamgilgad nge yib fan e pong ni ke tay Got ngomed, nge rogon ni ke mel’egmed nguum pired riy; faan gimed ra rin’ ni aray rogon ma ri dabiyog ni ngam thaygad. Ereray kanawoen me yog nni pi’ mat’awmed ni aram e gimed ra yan nga lan e gin’en ni bayi par ndariy n’umngin nap’an, ni aram e gin’en ni suwon e Somol rodad i Jesus Kristus, ni ir e en ni ma thapegdad ngak Got.”—2 Pet. 1:10, 11.
18 Fapi yugu boche saf e yad ma felfelan’ u taabang nge walagrad ni kan dugliyrad. Kar dugliyed u wan’rad ni ngar ayuweged yad. Bochan ni yade pi tafager rok Got e ngiyal’ ney, ma aray e n’en nibe k’aringrad ni ngar rin’ed e tin nrayog rorad ko pigpig ni yad be tay ku Got. Ma nap’an fare Rran ko Pufthin, ma yadra felfelan’ ni ngar ayuweged fare yaram rok Got u nap’an nibe pow’iyrad Jesus ko fapi alublub ni baye ran ko yafos riy. Ma—tomur riy—era yib mat’awrad ni ngar manged pi tapigpig rok Jehovah ni manemus u fayleng!—Rom. 8:20, 21; Rev. 21:1-7.
Kaga Manang?
• Mange ba muun ko fapi n’en nib milfan ku Jesus?
• Uw rogon nibe ayuweg fare ulung nib ga’ pi walagrad ni kan dugliyrad?
• Mang maruwel nge athap ebe felfelan’ fare ulung nib ga’ nibchan?
• Uw rogon u wan’um fare Rran ko Pufthin?
[Picture on page 25]
Fare ulung nib ga’ e kar luknaged e mad rorad kar wechwechniged nga rachaen fare Fak e Saf
[Picture on page 27]
Mange n’en ni gabe athapeg ni ngam fil rok e piin ni yira fasegrad ko yam’?