Ba T’uf ko Piin Bitir ni Ngar Filed Murung’agen Got, Fa?

“Ba gaman urngin raba’ e teliw ni nge sunmiy e fanenikan u thilin e girdi’, ma de gaman ni nge sunmiy e t’ufeg.”​—JONATHAN SWIFT, BE’ NI MA YOLOY E BABYOR.

REB e pumoon ni Swift fithingan e yog e re thin ney u lan e bin 18 e chibog, machane boor e girdi’ e ngiyal’ ney nib m’agan’rad ko re thin ney. Bin riyul’ riy e, bay boch e girdi’ ni yad ma lemnag ni dariy rogon ni nge fil e piin gallabthir murung’agen Got ko bitir rorad. Yad ma lemnag ni bitir ni kan chuguliyrad ko tabinaw nib m’ing ko teliw e boor ban’en nib fel’ ni dabiyog ni ngar rin’ed.

Uw rogon ni ga be lemnag? Bin ngan ko pi thin ni baaray e ba puluw?

● Piin gallabthir e susun ndab ur filed murung’agen Got ko bitir rorad.

● Piin gallabthir e susun e ngar songad nge ilal pi fakrad, mfin aram e ngiyal’ ni ngar filed e thin rok Got ngorad.

● Nap’an e kab achig e bitir, ma piin gallabthir e thingar ra weliyed murung’agen e michan’ rorad u murung’agen Got ngorad. Machane nap’an nra ilal fapi bitir, ma aram e ke milfan ngorad ni ngar lemnaged e pi n’en ni kan fil ngorad.

● Piin bitir e thingar ra folgad ko pi n’en ni ke michan’ e gallabthir rorad ngay.

Ra Gafgownag e Teliw e Piin Bitir, Fa?

Dariy reb e gallabthir ni baadag ni nge gafgownag fak. Machane ba tamilang ni pi n’ey e rayog ni nge taleg e piin bitir nge dab kur filed murung’agen Got, fa? Bokum biyu’ e duw ni ke yan ma piin ni yad ma fil murung’agen boch ban’en e kar filed boch ban’en ni ma rin’ e bitir ni bochan e pi n’en ni ke michan’ e gallabthir rorad ngay. Ere mang e kar pirieged?

Kar pirieged ni piin bitir ni yad ma fil e thin rok Got e rayog ni nge yib angin ko yafos rorad. Nap’an fare duw ni 2008, ma bay reb e babyor ni yog ni gaar: “Thin rok Got e be dag nrayog ni nge fal’eg e tha’ u thilin e bitir nge gallabthir.” Miki yog e re babyor nem ni gaar: “Teliw nge tirok Got ban’en e be tamilangnag nib ga’ fan ko yafos ko bitir, ma kub t’uf ko tha’ u thilin e girdi’ u lan e tabinaw.” (Social Science Research)a Mu taarebnag e re n’ey ko n’en ni yog Jesus Kristus ni gaar: “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad.”​—Matthew 5:3.

Ma uw rogon fare lem ni ma tay e girdi’ ni fin ra ilal e bitir ma aram e ngiyal’ ni ngar filed murung’agen Got nge teliw? Re lem ney e ba togopuluw ko re thin ni baaray: Bitir e dariy ban’en ni yad manang ni bod ba pakit ndariy ban’en u langgin. Ere piin gallabthir e yad e ngar dugliyed ko ngar suguyed fare “pakit” ko tin nib fel’ u tabinaw, fa ngar paged pi fakrad ngaur suguyed lanin’rad ko pi n’en ni ma yog boch e girdi’ u wuru’ e tabinaw.

Mang Fare N’en nib Mith?

Pi n’en ni i buch kakrom e be micheg ni teliw e rayog ni nge k’aring e girdi’ ngaur fanenikayed boch e girdi’. Ere, uw rogon nrayog ko piin gallabthir ni ngar ayuweged pi fakrad ndab ra mada’naged e magawon ni ke weliy Jonathan Swift murung’agen? Uw rogon nrayog ni ngar filed ko bitir rorad rogon ni ngar daged e t’ufeg ko girdi’?

Fare n’en nib mith e bay e fulweg riy ko re dalip i deer ni baaray: (1) Mang e thingari fil e bitir? (2) Mini’ e piin ni nge fil ban’en ngorad? (3) Uw rogon ni ngan fil ban’en ngorad mi yad nang fan?

[Footnote]