Mini’ e Riyul’ ni Be Gagiyegnag e Fayleng?

SANA dawor mu mada’nag reb e ga’ ko kireb. Ere gur, be yip’ fan ndar moyed? Girdi’ nib ga’ ko kireb e ba mo’maw’ ni ngan nangrad. Ku yira yin’rad nga kalbus, maku yad ba salap i rin’ e maruwel rorad. Yugu aram rogon ma pi n’en ni yibe tay ko shimbung ni murung’agen e cham ni yibe tay ni bochan e drugs, nge ppin ni yad ma pied yad ni chuway’, nge girdi’ ni yibe pi’rad ni chuway’, nge ku boch e kireb e be puguran ngodad ni bay wenegan e pi n’ey ni be rin’ e pi girdi’ ni kireb ney. Bochan e gafgow ni yad be tay ko girdi’, ma aram fan ni gad manang ni bay e pi girdi’ nem.

Be yog e Bible nriyul’ ni bay Satan. Ma bod reb e ga’ ko kireb ni be guy rogon ni nge lebug e tin nib m’agan’ ngay u daken boch e “pow” ni goo ban nge “urngin mit e ban nib kireb.” Bin riyul’ riy e ku be yog e Bible ni ma “piliyeg ir nge bod yaan ba engel ko tamilang!” (2 Thessalonika 2:9, 10; 2 Korinth 11:14) Ere riyul’ ni bay Moonyan’ ni bochan e pi n’en ni be buch. Machane, yooren e girdi’ e ba mo’maw’ ni nge mich u wan’rad ni bay reb e kan nib kireb ndabiyog ni ngan guy. U m’on ni ngad fal’eged i yaliy e n’en ni be yog e Bible u murung’agen, ma ngad weliyed murung’agen boch e magawon nge boch ban’en ni ke michan’ e girdi’ ngay nde puluw ni ir e be taleg boor e girdi’ nder mich u wan’rad ni bay Moonyan’.

◼ “Uw rogon ni nge sunmiy reb e Got ni ma t’ufegey Moonyan’?” Got e ba flont, ere de puluw ni ngan lemnag nra sunmiy reb e kan nib kireb. Bin riyul’ riy e der yog e Bible ni ke sunmiy Got reb e kan ni aram rogon, ya baaray e n’en ni be yog e Bible u murung’agen Got: “I Somol e ba gel ma bay i par ni manaf romed, ir e ba yal’uw ma ba mmat’aw urngin e tin ma rin’. Got romed e ba yul’yul’ ma der ma ban, ngongolen e ba fel’ ma ba yal’uw.”​—Deuteronomy 32:4; Psalm 5:4.

N’en ni ngad lemnaged e rayog rok reb e kan ni ke sunmiy Got nib flont ni nge piningeg ir nge ngal’ nib kireb fa dabiyog. Girdi’ nge engel ni sunmiyrad Got e gathi yad bod e masin, ya ke sunmiyrad nib puf rogorad ni ngar mel’eged e n’en ni ngar rin’ed. Ere rayog rok reb e engel ara girdi’ nib flont ni nge mel’eg ni nge rin’ e tin nib fel’ ara tin nib kireb. Bin riyul’ riy e kemus ni goo pi n’en ni ma rin’ be’ ara reb e engel nib flont e rayog ni ngan turguy ko ba fel’ fa ba kireb.

Ere ba tamilang ndabiyog ni nge pi’ Got e puf rogon ko engel nge girdi’ mi ki talegrad ndab ra rin’ed e kireb ni faanra aram e n’en ni yad baadag ni ngar rin’ed. I weliy Jesus murung’agen Moonyan’ nde fanay e puf rogon rok nib fel’ rogon ni gaar: “De par ko tin riyul’.” (John 8:44, NW) Re thin ney e be dag ni fare engel ni mang Moonyan’ e som’on e ir reb e engel nib flont ni immoy ko “tin riyul’.”a I sunmiy Jehovah Got e pi engel nge girdi’ nib puf rogorad ni bochan e yad ba t’uf rok ma be pagan’ ngorad.​—Mu guy fare kahol ni kenggin e “Rayog ni Nge Thil Be’ nib Flont nge Par Ndaki Flont, Fa?” ni bay ko page 6.

◼ “Moonyan’ e ir reb e tapigpig rok Got” Boch e girdi’ e yad ra beeg fare babyor ni Job ma yad ma lemnag ni ireray e n’en ni be yog. I yog reb e babyor ni ma weliy murung’agen e Bible ni fare thin ni yog Moonyan’ ni faani gaar, “kuug yanyan ni gu be liyeg e fayleng,” e be yip’ fan e maruwel ko pi damit nu Persia kakrom ni ur milekaggad ma yad be yaliy boch ban’en, ngemu’ ma ranod rogned ko pilung rorad. (Job 1:7) Machane, faanra riyul’ ni Moonyan’ e damit rok Got, ma mang fan ni nge weliy ngak Got ni ka i ‘yanyan ni be liyeg e fayleng’? Fare thin ni bay ko Job e der yog ni ir e taayuw, ya be yog ni ir Satan ni be yip’ fan e “Tatogopuluw,” ni be dag ni ir e bin th’abi ga’ e Toogor rok Got. (Job 1:6) Ere, uw e ke sum fare lem riy ni Moonyan’ e ir reb e tapigpig rok Got?

Nap’an e bin som’on e chibog C.E., min weliy u l’agruw e babyor ni apocryphal ni fin nni puthuy ko Bible ni ka nog e “Book of Jubilees” nge “Common Rule” ngay ni Moonyan’ e be fal’eg e m’ag u thilrow Got ma ka be rin’ e tin nib m’agan’ Got ngay. I yog J. B. Russell u baken e babyor rok ni ke yog Martin Luther ni ir e tababnag e teliw ko Protestant ni Moonyan’ e ir reb e talin e maruwel rok Got ni “bod e kuwa ni ma fanay u milay’ rok.” Ki yog Russell nre n’em e be yip’ fan ni “ri baadag e re kuwa nem ni ma li’ e pan,” machane ka be par u pa’ Got ni be rin’ e tin nib m’agan’ Got ngay. (Mephistopheles) Re machib rok Luther ney e boch nga tomuren me mich u wan’ John Calvin ni ir be’ ni ma fil murung’agen Got nge teliw, machane boor e girdi’ nra dabuyed ni bochan e de mat’aw u wan’rad. Uw rogon ni nge pag reb e Got ni ma t’ufegey ni nga i buch e tin nib kireb, maku be k’aring? (James 1:13) Re machib ney nge pi n’en ni ke buch u lan fa bin 20 e chibog e ke k’aring boor e girdi’ ni nge dab ki mich Got nge Moonyan’ u wan’rad.

◼ “Moonyan’ e kemus ni be yip’ fan e kireb” Faan yira lemnag ni Moonyan’ e aray rogon, ma ra yan i aw ni bay boch e thin nu Bible ndabiyog ni ngan nang fan. Ere mini’ e cha’ ni ur nonow Got nrogon ni bay ko Job 2:3-6? Gur, be non ko kireb ni bay u fithik’ i dow Job fa yugu be non rok? Rayog ni nge yog Got nib fel’ Job, maku be k’aring e gafgow ni nge yib ngak ya nge skengnag, fa? Faanra aram rogon ma ra yan i aw ni ir reb e Got nib kireb ma de riyul’ ni “ba mat’aw.” (Psalm 92:15, BT) Re n’ey e de riyul’, ya de ‘gad Got pa’ ngak’ Job. Ere Moonyan’ e der yip’ fan e kireb ara ban’en nib kireb ni bay rok Got, ya aram fare engel ni pilyeg ir nge mang Toogor rok Got.

Mini’ e Riyul’ ni Be Gagiyegnag e Fayleng?

Ngiyal’ ney e boor e girdi’ ni ma lemnag ndaki puluw ni nge mich u wan’uy ni bay Moonyan’. Machane, dariy ba mit e kireb ni kan weliy nde moy Moonyan’ riy ni ke fel’ u wan’ e girdi’. Bin riyul’ riy e boor e girdi’ ni dakurur folgad rok Got ma dakurur ngongolgad nib yalen ni bochan e re lem ney.

Nap’an e bin 19 e chibog me yoloy be’ nib moon ni ka nog Charles-Pierre Baudelaire ngak ni gaar: “Bin th’abi ga’ e ban rok moonyan’ e nge k’aring e girdi’ ngar lemnaged nde riyul’ ni bay.” Bochan ni be mithag Moonyan’ ir, ma aram fan ni ke maruwar Got u wan’ boor e girdi’. Machane, faanra de riyul’ ni bay Moonyan’, ma gathi ra yan i aw ni Got e be k’aring e kireb? Gathi aram e n’en ni baadag Moonyan’ ni nge mich u wan’ e girdi’?

Moonyan’ e be mithag ko ir mini’ ni bod reb e ga’ ko kireb, ya nge yog ni rin’ e n’en ni be nameg. Mang e re n’em? Ke pi’ e Bible e fulweg riy ni gaar: “Der mich u wan’rad ni bochan e fare kan nib kireb nu roy u fayleng e ke ta’ lanin’rad u fithik’ e lumor. Ya ke ta’rad ndab ra guyed ramaen fare tamilang ni be mat nga dakenrad, ni fare tamilang ni be yib ko Thin Nib Fel’ ni yib rok Got ni murung’agen e flaab rok Kristus, ni Kristus ni ir e ri taareb rogorow Got.”​—2 Korinth 4:4.

Ka bay taareb e deer ndawori tamilang, ni aram e, Mang e ra rin’ Got ngak e cha’ney ni ir tapgin urngin e kireb nge gafgow? Ireray e n’en ni gad ra weliy ko bin migid e article.

[Footnote]

[Blurb on page 5]

Moonyan’ reb e tapigpig rok Got fa ir e toogor rok?

[Box/​Picture on page 6]

Rayog ni Nge Thil Be’ nib Flont nge Par Ndaki Flont, Fa?

Rarogon e pi n’en ni ke sunmiy Got nib flont e rayog ni nge thil. Yugu aram rogon nni sunmiy Adam nib flont, machane ba t’uf ni nge tayfan boch ban’en ni ke tay Got ndabi rin’. Bod ni dabiyog ni nge kay e but’, nge malang, nge l’ud, ya faanra rin’ ma ra yib wenegan nib kireb ngak. Maku dabi og u bang nib tolang ya ra yim’ fe maad’ad nib gel.

Ere ku taareb rogon ndabiyog ni nge thum’ reb e engel ara reb e girdi’ nib flont nga wuru’ e gin ni ke tay Got ni nge mus riy ndabi yib wenegan nib kireb ngak. Ere nap’an nra dabi maruwel be’ nib flont ko puf rogon ni kan pi’ ngak nib fel’ rogon, ma aram e ba mom ni nge oloboch me denen.​—Genesis 1:29; Matthew 4:4.