Fare Moonyan’ E Gathi Kemus Ni Ba MachibNi De Riyul’

“U gubin yang ko bin nib biech e chep ko Bible ma bay e togopuluw riy nib gel ni aram e gelngin Got nge tin nib fel’, nga barba’ ma tin nib kireb, ni Satan, e be pow’iy nga barba’. Re n’eney e gathi lem rok taa be’ fa l’agruw ni’, ko piin ni yad ma yoloy e Bible ya aray e n’en nib ga’ ni yima yog. . . . Fare mich riy ni ke bi m’ug ko fa bin nib biech e chep ko Bible e ba tamilang. Satan e ba moonyan’ nib riyul’, ni yugu ma par ni togopuluw rok Got nge girdi’ rok.”​—“The New Bible Dictionary.”

ERE mang fan, ni boor e girdi’ ni be yog ni yad e Kristiano​—ma yad be yog nib mich u wan’rad e Bible—​e darar lemnaged nib riyul’ ni ba’ Moonyan’? Ya, bin riyul’ riy, e dara ma lemnaged ni Bible e thin rok Got. (Jeremiah 8:9) Piin tayoloy e Bible, e lungurad, bochan e pi n’en ni be mich u wan’ e pi nam u toobrad i yan ma de yog ni ra nanged nib fel’ rogon e tin riyul’ ni yib rok Got. Ni bod rogon Hans Küng, ni be’ nib salap ko machib ko tirok Got ban’en ni ba Katolik e yoloy, ni gaar: “Pi n’en ni de riyul’ ni yima lemnag ni murung’agen Satan ni buulung i moonyan’ . . . e yib rok e piin ni yad ma tunguy e yat en ban’en u Babylon ko tin som’mon e Judaism me yan u rom ko bin biech e babyor ko Bible.”​—On Being a Christian.

Machane fare Bible e gathi yugu thin ko girdi’; ya rriyul’ ni thin ni i thagthagnag Got. Ere ba fel’, ni gad ra fal’eg i lemnag, ko mang e be yog u murung’agen e Moonyan’.​—2 Timothy 3:14-17; 2 Peter 1:20, 21.

Mang e Lemnag Jesus?

Jesus Kristus e ba mich u wan’ ni fare Moonyan’ e ba riyul’. Jesus e gathi ban’en nib kireb ni bay u fithik’ i dow e yibnag e skeng ngak. Ya cham be’ ngak nib riyul’ ni faani taaboch me pining ni faani “be gagiyegnag e fayleng.” (John 14:30; Matthew 4:1-11, New World Translation) Maku ba mich u wan’ ni ku bay boch e kan ni yad be ayuweg Satan ko pi liyeb rok nib kireb. I golnag e “girdi’ ni ke gabliy e moonyan’.” (Matthew 12:22-28, NW) Nap’an ni i weliy Jesus murung’agen fare Moonyan’ nge pi kan ni yad, ma gathi kemus ni be sul u daken e pi n’en ni googsur ni yima rus ngay nni fek rok e pi ta tunguy e chep nu Babylon. Ya ma nang ni rriyul’ ni yad bay.

Rogon ni yog ko John 8:44, fare Devil, nib “tagathibthib,” ni ba “malulfith me ir e chitamangin urngin e malulfith.” I ir e bin som’mon ko pi n’en ni kan sunmiy ni lifith l’ugun u murung’agen Got, ni rin’ u nap’an fare milay nu Eden. Ke yog Jehovah ni gali ga’ rodad e “mmudugil ni yow ra yim’” ni faan yow ra ka’ wom’engin fare ke gek’iy ko tamilangan’ ko tin nib fel’ nge tin nib kireb. U l’ugun ba porchoyog, e yog Satan riy ni pi thin nem e de riyul’. (Genesis 2:17; 3:4) Rib puluw, ni kan pining ngak “fa bin som’mon e porchoyog, fa bin ni ka nog Moonyan’ ngak ara Satan.”​—Revelation 12:9.

U rom ko John 8:44, e ki yog Jesus riy ni fare Moonyan’ “e ka nap’an ko tabolngin ni i thang e fan ko girdi’” maku “de par u fithik’ e tin riyul’.” Re n’eney e gathi fan e sunmiy Jehovah fare Moonyan’ ni be’ nib “ta ma li’ girdi’.” Gathi ni sunmiy ni ban’en ni ba tatamdag yaan ni ir e baga’ u bangi ban’en ni bay e nifiy riy ma yima gafgownag e piin ma togopuluw ku Got riy.

Fare Moonyan’ e sum u “fithik’ e tin riyul’.” Immoy ni ir reb i gothon e tabinaw rok Jehovah u tharmiy nib kan nib flont ni fak Got. Machane de “par nib mudugil u fithik’ e tin riyul’.” Ka baadag e tirok e kanawo’ nge tin nib ga’ fan u wan’ ni ma rin’ u fithik’ e malulfith. “I tabab,” ni gathi ngiyal’ nni sunmiy nib engel ni fak Got, ya fini tabab u nap’an ni turguy u wan’ ni nge togopuluw ngak Jehovah me sasalapiy l’ugun ku Adam nge Efa. Satan e fini mang “be’ tathang fan ko girdi’” ko ngiyal’ ni togopuluw me mang tapgin e yam’ ni tay Adam nge Efa, ni aram e bin riyul’ riy, e urngin e piin ni chon e tabinaw rorow.​—Roma 5:12.

Fare Moonyan’ e Ba Toogor ni Ba Mo’maw ni Ngan Gel Ngak

Fare Moonyan’ e ba toogor nib mo’maw ni ngan gel ngak. Yugu “be yan ni bod ba layon, ni be tolul ni be gayiy be’ ni nge longuy.” (1 Peter 5:8) I ir e gathi yugu ban’en nib kireb ni be par u fithik’ i dowdad. Riyul’, ni gubin e rran ma gadad be athamgiliy ni nga ud i togopuluwgad ko tin nib kireb ni ir e gadad baadag. (Roma 7:18-20) Machane bin riyul’ e n’en ni ngad athamgilgad ngad togopuluwgad ngay e “togopuluw nga gelngin e kan nib kireb u lan e tharmiy.”​—Efesus 6:12, NW.

Uw fene ga’ ni ke garer gelngin fare Moonyan’ ni be pingeg e girdi’? “Fare fayleng ni polo’ e be par u tan gelngin faanem nib kireb,” aray rogon ni yog apostal John. (1 John 5:19, NW) Ba mich, ni dubdad ni nge suguydad e Moonyan’ ara da paged e pi n’en ni googsur ni yima tamdag ngay ngak nge marwothnagdad. Ba tamilangan’dad, machane, ni faan gadad ra par ni ba’ u wan’dad e maruwel rok ni be guy rogon ni nge malmitnagdad ko tin riyul’ me kirebnag e yul’yul’ rodad ngak Got.​—Job 2:3-5; 2 Korinth 4:3, 4.

Mu pilo’ riy nge dabi mom ni ngam aw nga pa’ Satan ni aram e ga be un ko pi n’en nib l’ag nga yugu boch e michan’. (Deuteronomy 18:10-12) Umu par ni ga be tayan’um ma ga ba mudugil ko Thin rok Got, nga u mu lemnag ni Jesus Kritus ni i sul u daken e Thin rok Got u nap’an nib Moonyan’ ni nge wawliy ko kireb. (Matthew 4:4, 7, 10) Maku, nga um meybil nib gel ngak Jehovah ko ngiyal’ ni kam thamiy rom ni ke tomalnigem fare Moonyan’ nge pi kan rok.​—Filippi 4:6, 7.

De t’uf ni ngan rus ko fare Moonyan’. Jehovah e ke micheg e ayuw ni rriyul’ ni ngan togopuluw ko urngin e tin ra rin’ Satan. (Psalm 91:1-4; Proverbs 18:10; James 4:7, 8) “Um feked gelngimed rok Somol nge gelngin nib gel,” aray rogon ni yog apostal Paul. Ma aram ma “rayog romed ni ngam sak’iygad ni gimed ba mudugil ngam togopuluwgad nga ngongolen e sabanban ko fare Moonyan’.”​—Efesus 6:10, 11, NW.