‘Mu Togopluw Ngak Moonyan’’ ni Bod ni Rin’ Jesus
“Mu togopuluwgad ngak Moonyan’, me mil romed.”—JAS. 4:7.
1. Mang togopuluw e manang Jesus nra yib ngak u fayleng, ma mang angin nra yib?
MANANG Jesus Kristus nra togopluw Moonyan’ ngak. Ba tamilang e re n’ey ko n’en ni yog Got ngak fare porchoyog ni aram e fare kan nib kireb ni ir e ke fanay fare porchoyog ke togopluw riy ni gaar: “I gur nge fare pin [gin nu tharmiy e ulung rok Jehovah] e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon [Jesus Kristus] ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif ay.” (Gen. 3:14, 15; Rev. 12:9) Fare n’em ni kan k’ad wurilen e rifrif u ay Jesus e be yip’ fan nib achig e gafgow nra yib ngak ni aram e yam’ nra tay min faseg nge yan nga tharmiy. Machane maad’ad ni yira tay nga lolugen Moonyan’ e be yip’ fan ni gafgow ni yira tay ngak e dabi m’ay angin biid.—Mu beeg e Acts 2:31, 32; Hebrews 2:14.
2. Mang fan ni kari mudugil u wan’ Jehovah nra togopuluw Jesus ngak Moonyan’?
2 Rib mudugil u wan’ Jehovah nra lebguy Jesus e maruwel ni kan pi’ ngak maku ra togopuluw ngak Moonyan’ u nap’an ni bay u fayleng. Mang fan nib mudugil e re n’ey u wan’ Jehovah? Bochan e ke n’uw nap’an ni ke sunmiy Jesus, ma n’umngin nap’an ni kar pirew u taabang ma ke fal’eg i yaliy rarogon ma ke nang ni fare ‘ta maruwel rok nib salap’ nge “bin ni m’on i Fak” e ma fol rok mab yul’yul’ ngak. (Prov. 8:22-31; Kol. 1:15) Ere nap’an ni l’og Got Jesus nga fayleng me pag Moonyan’ ni nge skengnag nge ni taw ko ngiyal’ ni yim’ riy ya rib mudugil u wan’ nra togopuluw Fak ni kari maagirag rok ku Moonyan’.—John 3:16.
Ma Ayuweg Jehovah e Pi Tapigpig Rok
3. Uw rogon e ngongol rok Moonyan’ ngak e pi tapigpig rok Jehovah?
3 I yog Jesus ni Moonyan’ e ir e “be gagiyegnag e girdi’ nu fayleng” me yog ngak pi Gachalpen ni yira gafgownagrad, ni bod ir. (John 12:31; 15:20) Re fayleng ney ni bay u tan gelngin Satan ni Moonyan’, e ma fanenikay e tin riyul’ e Kristiano ni bochan e yad be pigpig ngak Jehovah ma yad e tamachib ko tin nib mat’aw. (Matt. 24:9; 1 John 5:19) Moonyan’ e ri be pulweg e tin ni ka bay ko girdien fachi ulung ndabki n’uw nap’an ma bay ra pigpiggad Kristus u taabang u Gil’ilungun u tharmiy. Ku be pulweg Satan e Pi Mich Rok Jehovah ni athap rorad e ngar pired u paradis u fayleng. Be ginangdad e Thin Rok Got ni gaar: “Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”—1 Pet. 5:8.
4. Mange mich riy ni be togopluw e girdi’ rok Got ngak Moonyan’ e ngiyal’ ney?
4 Rayog ni ngad togopuluwgad ngak Satan ni bochan e be ayuweg Jehovah e ulung rodad. Mu lemnag e pi thin ni baaray nib riyul’ ni: Nap’an fa 100 nem e duw ni ke yan, ma boch e am nth’abi kireb ni immoy e ur gayed rogon ni ngar thanged mit e Pi Mich Rok Jehovah. Machane ka be yoor i yan e Pi Mich ma chiney e ke chugur i gaman 7,000,000 urngirad u gubin u lan e ulung ni boor ko 100,000 u ga’ngin e fayleng. Pi am nib kireb nem ni ur gafgowniged e girdi’ rok Jehovah e dakur moyed e chiney!
5. Uw rogon ni ke m’ug nib riyul’ fare thin u Isaiah 54:17 ko tin ni be buch ko pi tapigpig rok Jehovah?
5 I micheg Got e re n’ey u nap’an ni be non ngak fare ulung nu Israel kakrom ni “ppin” rok ni gaar: “Dariy ba talin e cham nni ngongliy nra maad’ad ngom; urngin e piin ni yad ra yog ni gab kireb e bay e fulweg riy ni ga ra pi’ ngorad. Bay gu ayuweg e pi tapigpig rog, mu gu gagiyegnagrad ngar gelgad.” (Isa. 54:11, 17) Ke m’ug nib riyul’ e re n’ey ko n’en ni be buch ko girdi’ rok Jehovah u ga’ngin e fayleng ko ngiyal’ ney ko “tin tomren e rran.” (2 Tim. 3:1-5, 13) Ka gad be ulul gad be togopluw ngak Moonyan’, ma dariy ba mit e talin e cham nrayog ni nge fanay nge thang mit e girdi’ rok Got, yab muun Jehovah nga ba’ rodad.—Ps. 118:6, 7.
6. Mange be dag fare babyor rok Daniel ngodad u murung’agen e n’en nra buch ko gagiyeg rok Moonyan’?
6 Ngiyal’ nra mus e re m’ag ni kireb ney e yira gothey min chuweg gubin ban’en ko gagiyeg rok Satan. I yiiynag Daniel ni profet e thin ni kan thagthagnag ngak ni gaar: “Ngiyal’ ni bay i gagiyeg e pi pilung nem [ni bay e ngiyal’ ney], e aram e bayi sunumeg Got nu tharmiy reb e gagiyeg [u tharmiy] ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem [ni bay e chiney] nge gagiyeg ni yad be tay me mang fa birok e gagiyeg e i par ndariy n’umngin nap’an.” (Dan. 2:44) Nap’an nra buch e re n’em, ma gagiyeg ni be tay Satan nge girdi’ e ra mus. Gubin ban’en ko m’ag nib kireb rok Satan e ra chuw ni manemus, ma Gil’ilungun Got e ra gagiyegnag e fayleng ndariy ban’en nra magawonnag.—Mu beeg e 2 Peter 3:7, 13.
7. Uw rogon ma kad nanged nrayog ni gel e pi tapigpig rok Jehovah ngak Moonyan’?
7 Dariy e maruwar riy nra magey e ulung rok Jehovah mi i par nib fel’ u wan’ Got. (Mu beeg e Psalm 125:1, 2.) Ma uw rogodad? Be yog e Bible nrayog rodad ni ngad togopuluwgad ngak Moonyan’, ni bod ni rin’ Jesus. Arrogon, fare yiiy ni pi’ Kristus u daken apostal John e be dag ni yugu aram rogon ni be togopluw Satan, mab ‘ulung nib ga’’ ni piin ni athap rorad e ngar pired u fayleng e yad ra magey nib fos u tomren e re m’ag ney. Rogon ni be yog e Bible e yad ra non nib ga’ lamrad ni be lungurad: “Kanawoen ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf [Jesus Kristus]!” (Rev. 7:9-14) Piin ni kan dugliyrad e kan weliy murung’agrad ni kar gelgad ku Satan, maku arrogon fapi “yugu boch e saf.” (John 10:16; Rev. 12:10, 11) Machane faanra ngan togopluw ngak Moonyan’ mab t’uf e athamgil min meybil ngak Got u fithik’ e yul’yul’ nge yog ni ‘ayuwegey u pa’ faanem nib kireb.’—Matt. 6:13.
Cha’ ni Togopluw Ngak Moonyan’ nib Fel’ Rogon Nrayog ni Ngan Folwok Rok
8. Mang e bin som’on e wal ni fanay Moonyan’ nge gay rogon ni nge bannag Jesus riy u daken e ted ni kan yoloy nga Bible, ma mange rin’ Jesus?
8 I gay Moonyan’ rogon ni nge dabki par Jesus nib yul’yul’. Nap’an ni bay Jesus u daken e ted me gay Satan rogon ni nge waliy u daken boch ban’en ya nge dabki fol rok Jehovah. Machane, me togopuluw Jesus ngak Moonyan’. Nap’an ni par u lan 40 e rran nge nep’ nde kay ban’en, ma dabisiy ni yim’ ko bilig. Ere gaar Satan ngak: “Faanra Fak Got gur, me ere mu non ko pi malang ney nge ngal’ ni flowa.” Machane de fanay Jesus gelngin ni pi’ Got ni fan nga ban’en ni nge fel’ ngak. N’en ni rin’ e gaar ngak Moonyan’: “Fare babyor nib thothup e be gaar, ‘Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.’”—Matt. 4:1-4; Deut. 8:3.
9. Mang fan ni ngad togopuluwgad ko pi n’en ni gad ma ar’arnag ni ma waliydad Moonyan’ ngay?
9 Ngiyal’ ney e ma gay Moonyan’ rogon ni nge fanay e tin ni baadag e pi tapigpig rok Jehovah. Ere, thingar dab da paged gadad ngan waliydad nga boch ban’en ni yima ar’arnag ni ke garer u fayleng ni bay rogon ko ngongol ndarngal. Be gaar e Thin Rok Got: “Ri gimed manang ni piin nib kireb e dabiyog ni ngar manged girdien e gin nsuwon Got. Dab mu banniged gimed: ya girdi’ ni ma ngongliy e ngongol ko darngal, ara yad ma ta’ fan ma yad ma meybil ko liyos ni ma meybil boch e girdi’ ngay, ara yad ma par e piin ni gathi mabgol rorad, ara yad e pumoon ni ma darngalnag e pumoon, . . . dariy bagayad e mit i girdi’ ney nrayog ngorad e gin nsuwon Got.” (1 Kor. 6:9, 10) Ere, ba tamilang ni piin nib kireb e ngongol rorad ma dubrad ni ngar thilyeged e dab ni pagrad ngar pired u lan e bin nib beech e fayleng rok Got.
10. Rogon ni bay ko Matthew 4:5, 6 e ku mang ban’en ni fanay Satan nge gay rogon ni nge bannag Jesus?
10 Be weliy e Bible murung’agen bayay nni waliy Jesus u daken e burey ni gaar: “Me fek fare moonyan’ Jesus nga lan fare binaw nib thothup, nge yan i tay nga daken e gin’en nth’abi tolang ko fare tempel, me gaar ngak, ‘Faanra Fak Got gur, ma ga og nga but’; ya be gaar e babyor nib thothup, “Ra yog Got ngak e pi engel rok e n’en ni ngar rin’ed ngom; ma bay ra feked gur i yan nga but’, ndabi maad’ad em ko malang.”’” (Matt. 4:5, 6) Rayog ni nge m’ug riy ni Jesus fare Messiah. Machane bin riyul’ riy e faan gomanga fol Jesus riy ma ra yan i m’ug nib tolangan’ ma dabki fel’ u wan’ Got. Ku bayay e ram ni par Jesus nib yul’yul’ ngak Jehovah me fulweg u daken reb e thin ko Bible ni gaar: “Machane ki yog e babyor nib thothup ni gaar, ‘Ri dab mu skengnag Somol ni Got rom.’”—Matt. 4:7; Deut. 6:16.
11. Uw rogon nra waliydad Satan, ma mang angin nra yib?
11 Rayog ni nge waliydad Satan ngad guyed rogon ni nga unog e sorok ngodad u boch ban’en. Rayog ni nge k’aringdad ngad folgad u rogon e munmad ni ma tay e fayleng nge rogon ni yad ma fal’eg yaarad ara da uned nga boch e fafel nde fel’. Machane faanra da digeyed e fonow ko Bible ngad folgad ko fayleng, ma gur, rayog ni ngad lemnaged nra ayuwegdad e pi engel u wenegan e n’en ni kad dugliyed ni ngad rin’ed? Yugu aram rogon ni kalngan’ David ko denen nra ngongliyew Bath-sheba, machane dan ayuweg nde yib angin ngak e kireb ni rin’. (2 Sam. 12:9-12) Dab da skengnaged Jehovah u boch e kanawo’ nde fel’, ni bod ni ngad m’aged fager ko fayleng.—Mu beeg e James 4:4; 1 John 2:15-17.
12. Mang wal ni fanay Satan ni bay ko Matthew 4:8, 9, ma mang e rin’ Fak Got?
12 Ku ban’en ni fanay Moonyan’ ni nge bannag Jesus riy e nap’an ni bay u daken e ted me ognag e pi am nu fayleng ngak. I dag Satan gubin e pi am nu fayleng ngak Jesus nge flaab riy me gaar: “Faan ga ra ragbug nga but’ ngam ta’ fag mu gu pi’ e pi n’ey ni urngin ngom.” (Matt. 4:8, 9) Rib kireb e n’en ni rin’, ya gay rogon ni nge mang ir e un liyor ngak ma dab kun fol ku Got! Bochan gelngin e chogow rok e re engel nem ni immoy nib yul’yul’ ma aram me mang Satan ni Moonyan’ nib kireb. (Jas. 1:14, 15) Machane, Jesus e ke dugliy u wan’ ni nge par nib yul’yul’ ko Chitamangin nu tharmiy ma aram fan ni gaar: “Satan, mman ngam chuw! Ya babyor nib thothup e be gaar, ‘Mu ta’ fan Somol ni Got rom ma yigo ir e ngam pigpig ngak!’” Ku aray bayay ni togopuluw Jesus ngak Satan nib mudugil e lem rok. Fak Got e dabun ni nge mang bang ko fayleng rok Satan ma dabi liyor ngak faanem nib kireb!—Matt. 4:10; Deut. 6:13; 10:20.
‘Mu Togopluw ngak Moonyan’ Me Mil Rom’
13, 14. (a) Mange ognag Moonyan’ ngak Jesus u daken e pi am nu fayleng ni dag ngak? (b) Uw rogon ni ma gay Satan rogon ni nge kirebnagdad?
13 Be ognag Moonyan’ gelngin e girdi’ ko gagiyeg u nap’an ni dag fapi am nu fayleng ngak Jesus. Ya be athapeg ni manga yigi fel’ u wan’ Jesus e re n’em nge lemnag nrayog ni nge mang en nth’abi tolang ko pilung nu fayleng. Ngiyal’ ney e der ognag Moonyan’ e am ngodad, machane ma gay rogon ni nge kirebnag gum’irchadad u daken e tin ni gad ma guy nge tin gad ma rung’ag nge tin gad ma lemnag.
14 Moonyan’ e ir e be gagiyegnag e re fayleng ney. Ere ku ir e be gagiyegnag e pi n’en ni ma chuweg e chalban ko girdi’. Ere, tin ni bay u fayleng ni yima beeg ma yima yaliy ma yima motoyil ngay e ba sug e ngongol ndarngal nge cham riy. Pi n’en ni be dag e fayleng yaan e yad ma dag ni bochan e yad be gay rogon ni ngar k’aringed gadad ngad chuw’iyed boor ban’en nde t’uf rodad. Ma gay Moonyan’ rogon ni nge waliydad u daken e pi n’ey nrayog ni nge rin’ ban’en nga rogon ni gad ma guy ban’en nge rogon ni gad ma rung’ag ban’en nge rogon ni gad ma lemnag ban’en. Machane faanra dab da beeged ara da guyed ara da motoyilgad ko pi n’en nib togopuluw ko pi kenggin e motochiyel nu Bible, ma aram e gad be gaar ngak Satan: “Satan, mman ngam chuw!” Ere gad ma folwok ku Jesus u rogon ni gad be par nib mudugil nge rogon ni gad be siyeg e tin nib alit ko fayleng rok Satan. Ma fare n’em ni gathi gad bang ko fayleng rok Satan e ku ma m’ug u rogon ni gad ma dag ni gad boch e Pi Mich Rok Jehovah ma gad be folwok rok Kristus u tabon e maruwel ngu skul nge gin ni gad ma par riy ngu fithik’ e girdi’ rodad.—Mu beeg e Mark 8:38.
15. Mang fan ni ngan togopuluw ku Satan e be yip’ fan ni ngan par ni yibe od?
15 Tomren e yay ndalip ngay ni gay Moonyan’ rogon ni nge dab ki yul’yul’ Jesus ngak Got, “ma aram me pag fare moonyan’ Jesus.” (Matt. 4:11) Machane, de lemnag Satan ni nge tal i waliy Jesus, ya ka nog ngodad ni ke lunguy: “Ma faani mu’ fare moonyan’ i guy rogon u gubin i kanawoen e n’en nra rin’ me denen Jesus [u daken e ted], me pag nge yan nib ngoch nap’an.” (Luke 4:13) Faanra ke yog nda togopuluwgad ngak Moonyan’, ma susuna ngad pininged e magar ngak Jehovah. Machane ku thingar da ululgad i gay e ayuw rok Got, ya ku ra sul Moonyan’ bayay ngki waliydad nga ban’en nib kireb, nra sul u ba ngiyal’ ndad lemnaged nra sul riy. Ere, thingar da pired ni gad be od ni gubin ngiyal’, ma gad par ni kad fal’eged rogodad ni ngad pigpiggad ngak Jehovah u polo’ i gum’irchadad ndemtrug e skeng nra yib ngodad.
16. Mange re gelngin ni ma pi’ Jehovah ngodad, ma mang fan ni ngad yibilayed e re n’em?
16 Ra ngan ayuwegdad ko maruwel ni gad be tay ni ngad togopuluwgad ku Moonyan’ ma ngad yibilayed me yib ngodad e bin th’abi gel e gelngin ni bay u palpalth’ib ni kan ni thothup rok Got. Ra bungnag rogodad ni ngad rin’ed boch ban’en ndabiyog ni ngad rin’ed u gelngidad. Ma ki micheg Jesus ngak pi gachalpen nrayog ni nge ayuwegey e kan ni thothup rok Got ni gaar: “Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!” (Luke 11:13) Ngaud meybilgad ngaud ninged e kan ni thothup rok Jehovah. Rayog ni ngad gelgad ni bochan e ra ayuwegdad gelngin Got nge yog nda togopuluwgad ngak Moonyan’. Tin kub muun ko meybil ni gad ma p’eyn’iy ni gubin e rran e ba t’uf ni nga don’ed urngin e talin e cham rok Got nga dakendad nge yog nda ‘togopuluwgad ko pi ban rok Moonyan’.’—Efe. 6:11-18.
17. Mange pi n’en ni i felfelan’ Jesus ngay me ayuweg ni nge togopluw ku Moonyan’?
17 Ku bay ban’en ni ayuweg Jesus nge togopluw ngak Moonyan’, ni ku rayog ni ayuwegdad. Be gaar e Bible: ‘Bochan e felfelan’ ni be sonnag ma daki tafinaynag e tamra’ nra tay ko yam’ ni nge tay u daken baley i gek’iy, me ere chiney e ke par nga but’ u ba’ ni mat’aw rok Got u tagil’ Got.’ (Heb. 12:2) Ku rayog ni ngki yib e felfelan’ ngodad ni aray rogon nfaan gad ra tayfan e gagiyeg rok Jehovah nge fithingan, me par ni gad be lemnag fare tow’ath ni yafas ni manemus. Rra yib e felfelan’ ngodad u nap’an ni yira thang mit gubin e ngongol nib kireb rok Satan me ‘par e piin nib munguy u daken e nam u fithik’ e gapas, mu ur pired u fithik’ e gapas ni yad ba felfelan’’! (Ps. 37:11) Ere, gubin ngiyal’ ni ngad togopuluwgad ngak Moonyan’ ni bod ni rin’ Jesus.—Mu beeg e James 4:7, 8.
Uw Rogon ni Ga Ra Fulweg?
• Mange mich riy ni ma ayuweg Jehovah e girdi’ rok?
• Uw rogon ni dag Jesus e kanawo’ nrayog nda folwokgad riy u rogon ni togopluw ngak Satan?
• Mang kanawo’ e rayog ni ngam togopluw ngak Moonyan’ riy?
[Picture on page 29]
Faanra da m’aged fager ko fayleng ma aram e kad manged toogor ku Got
[Picture on page 31]
I siyeg Jesus e pi am nu fayleng ni ognag Satan ngak