“Mi Gimed Togopuluw Ngak Fare Moonyan’”

“Mi gimed togopuluw ngak fare Moonyan’, me mil romed.”​—JAMES 4:7.

1. Uw rogon ni ngad weliyed murung’agen fare fayleng e ngiyal’ ney, ma mangfan ni piin ni kan dugliyrad nge piin ba chag ngorad e bat’uf ni ngar tiyan’rad ko matanag?

“GOT e daki moy, machane fare Moonyan’ e ka ba’.” Pi thin nem ni yog reb e author ni be’ nu France ni André Malraux fithingan e rib puluw nga rarogon e fayleng e chiney ya bochan e ngongol ko girdi’ e mmutrug ni be m’ug riy e sasaliyeb ni ma rin’ fare Moonyan’ ma gathi tin nib m’agan’ Got ngay. Ma sasaliyebnag Satan e girdi’ u daken “gubin mit e maangang nge pow ni be ban nge urngin mit e ban ni fan ngak e piin ni yira thang owcherad.” (2 Thessalonika 2:9, 10) Machane, ngiyal’ ney ni “tin tomren e rran,” e ri ma tiyan’ Satan ngak e pi tapigpig rok Got ni kar ognaged yad, ni be mahl ngak e pi Kristiano ni kan dugliyrad, “ni yad be fol ko motochiyel rok Got ma yad be micheg murung’agen Jesus.” (2 Timothy 3:1; Revelation 12:9, 17) Ma Pi Mich ney nge piin nib chag ngorad ni athap rorad e yad ra par u fayleng e ba t’uf ni nguur tiyan’rad ko matanag.

2. Uw rogon ni ke wawliy Satan Eva ko kireb, ma ke rus Paul ni apostal nbochan e mang?

² Satan e ma bannagey u urngin e kanawo’. I fanay fare porchoyog ni nge dabni poy, me bannag Efa ni nge lemnag nra yib e felfelan’ ngak nib gel nfaanra par nib dar ku Got. (Genesis 3:1-6) Sogonapan aningeg e biyu’ e duw nga tomren, me rusnag Paul ni apostal e piin Kristiano nu Korinth ni kan dugliyrad ni ri bannagrad Satan nge gel ngorad. I yoloy Paul ni gaar: “Kug rusnagmed nri yib e kireb nga fithik’ i lanin’med nge dab kum yul’yul’gad ngak Kristus, ni bod rogon ni bannag fare porchoyog Efa.” (2 Korinth 11:3) Ma ma kirebnag Satan laniyan’ e girdi’ ma dabkiyog ni nguur lemnaged ban’en nib puluw. Bod ni i wawliy Efa ko kireb, ma rayog ni nge k’aring e Kristiano ni nge lemnag ban’en nde puluw ma nge yog u laniyan’ nra yib e felfelan’ ngak ni ma tor nga daken boch ban’en ni dabun Jehovah nge Fak.

3. Mang ayuw ni pi’ Jehovah ni fan ni nge dabi kirebnagdad fare Moonyan’?

³ Satan e rayog ni ngan taarebrogonnag ngak e en ma kol e arche’ ni be tay e wup ni fan ko arche’ ni der ma tiyan’. Rogon ni ngan pilo’ ko fapi wup rok Satan, e ba t’uf ni nguud ‘pared u tagil’ e en Th’abi Tolang nib mith,’ ni aram e gin ni be yip’ fan ban’en ni ma pi’ Jehovah e ayuw riy ngak e piin ni ma dag ko ngongol rorad ni ke michan’rad ngak ni ir e Th’abi Tolang u palpalthib. (Psalm 91:1-3) Ba t’uf rodad urngin e ayuw ni ma pi’ Got u daken e Thin rok, nge kan ni thothup rok, nge ulung rok ni fan ni ngeb gelngidad ni ngad “togopuluwgad ko pi ban rok fare Moonyan’.” (Efesus 6:11) Fare thin nu Greek ni fan ko “pi ban” e ku rayog ni ngan thiliyeg ko “ngongol nib sasalap.” Dariy e maruwar riy, ni fare Moonyan’ e ma fanay boor e kanawo’ rogon ni ma sasaliyebnag e pi tapigpig rok Jehovah ni fan e ngara awgad ko wup rok.

Fapi Wup ni Tay Satan ni Fan ko Kristiano Kakrom

4. Mit i mang e fayleng e ma par e piin Kristiano riy?

⁴ Fapi Kristiano ni ur moyed ko fa bin som’mon nge bin l’agruw e chibog C.E. e kar pared u ba ngiyal’ ni Am nu Roma e ir e th’abi tolang ni ba’. Bochan fare Pax Romana (Gapas ko piyu Roma) me par nib fel’rogon e tafol chuway u rom. Bochan e re mon’og ney ma ke guy girdien e am ni ke yoor e tayim ni ke puf rogorad ni fan ko fafel, ma kar gagiyegnaged ni yug girdi’ e nge yoor e tayim ko fafel rorad ma nge dab ra togopuluwgad. Immoy boch e tayim, ni immoy ni urngin e rran ni dariy e maruwel e yani taareb oren ko pi rran ni bay e maruwel. Piin ma yog e thin e kar fanayed e salpiy ko girdi’ ni fan ni ngar pied e ggan ngorad nguur pared ni yad ba fas mar pied me par e lem rorad nib sor nga bang.

5, 6. (a) Mang fan ni de fel’ ko piin Kristiano ni nguu ranod nga tafen e gosgos nib achichig nge gagang’ nu Roma? (b) Uw rogon ni ma sasaliyebnigey Satan kakrom, ma uwrogon ni nge siy e piin Kristiano riy?

⁵ Bay e riya’ riy ni fan ko tin som’mon e Kristiano? Ra ngan guy boch e babyor ni be ginang e girdi’ ni piin ni ur moyed ko ngiyal’ ndawori n’uw nap’an u tomren e tayim ko fapi apostal, ni bod Tertullian, ma oren e fafel ni yima ta’ ko ngiyal’ nem e ri bay e riya’ riy nga pangiy nge tirok Got ko tin riyul’ e Kristiano. Reb, e baga’ ni madenom nge fafel ni yima ta’ e fan ni ngan pining e sorok ngak fapi got ni pagan. (2 Korinth 6:14-18) U tafen e gosgos, e boor e fafel ni yima ta’ riy ni bay rogon ko yalen rorad ni ri ma dag e ngongol ni darngal ara cham ni yima puog e racha’ riy. Tomren ni ke yan boch e tayim, ma ke lich i yan e girdi’ ni baadag e fafel ni aram rogon, min ta’ boch e fafel nga luwan ndariy laman e girdi’ riy mab puwlag. U lan e babyor rok ni Daily Life in Ancient Rome, me yog Jérôme Carcopino ni reb e historian ni gaar: “Nap’an e miti fafel ney ma piin ni actresses e kan pi’ mat’awrad ni ngar chuweged e mad rorad ni urngin . . . Ma boor e racha’ ni yima puog riy. . . . [Fafel ni dabni rung’ag laman e girid’] e ri ma dag yaan e par ko pumoon nge ppin ni rib thil rogon ni ma gagiyegnag laniyan’ boor e girdi’ ko fare mach. Me par ni de kireb u wan’rad e re miti ngongol nem ni ri ma k’aring e tamra’ ya bochan ni kar mechamgad ngay ke thil rogon e lem ni yad be tay ya bochan ni ke n’uw nap’an ni aram e n’en ni yad be guy ke fan u wan’rad.​—Matthew 5:27, 28.

⁶ U lan e tafen e gosgos nib gagang’, ma piin ni gladiator e yad ma cham nge mada’ ko yam’ ara ur chamgad e pi gamanman nib maloboch, ni ngar lied yad ngar m’ad ara nge li’rad e gamamman ngar m’ad. Ma mus ko piin ni kan pirieg e kireb rorad, nge ku, boor e Kristiano e kanin’rad nga fithik’ fapi gamanman nib maloboch. Ki mus ko kakrom, ma ban ni i rin’ Satan e aram e i maruweliy e lem ko girdi’ u rogon ni dubrad e ngongol ni darngal nge cham e nge war me mang ban’en ni ke mecham e girdi’ ngay ma kar adaged. Reb e kanawo’ ni ngan pilo’ ko re wup ney e kari mus ni ngan palog u tafen e kachido nib achichig nge gagang’.​—1 Korinth 15:32, 33.

7, 8. (a) Mang fan ni de gonop e Kristiano ni faanra un ko sagreng ko karro ni ma giringiy e os? (b) Uw rogon ni i fanay Satan e gin ni yima maluk riy u Roma ni fan ni nge mang wup rok ngak e Kristiano?

⁷ Sagreng ko karro ni ma giringiy e os ni yima ta’ ko gin nib tolulbuy mab ga’yang ni ka nog e circuses ngay e ba mudugil ni baadag e girdi’, machane de m’ag ko piin Kristiano ya bochan ndariy e maruwar riy nra k’aring e damumuw nge cham ngak e girdi’. En ta yol ko fa bin dalip e chibog e ke yog ni boch e tayangeg e kar chamgad, ma ke yog Carcopino ni “piin astrologer nge boch e ppin ni yad ma pi’rad ni chuway’ e bay tagil’rad u rom” u lan e re naun nem. Ba tamilang, ni fare gin’en nu Roma ni yima sagreng riy e de fel’ ni nge yan fapi Kristiano ngay.​—1 Korinth 6:9, 10.

⁸ Ma uw rogon e gin’en u Roma ni yima maluk riy nib gilbuwan? Riyul’, ni dariy ban’en nib kireb ni ngan maluk ngan par nib beech. Machane boor yang u Roma ni yima maluk riy e ba naun nib ga’ mab muun ngay e pi singgil ni yima chamgiy e girdi’ riy, nge gymnasium, nge fapi singgil ko gambling, nge tafen e ggan nge garbod. Yugu aram rogon, ma yibe susunnag, ni immoy e tayim ni kan ta’ nib thil ni fan ko pumoon nge ppin ni ngar malukgad riy, ma baga’ ni kan pag ni ngar malukgad ni kar maathukgad. I yoloy Clement nu Alexandria ni gaar: “Gin’en ni yima maluk riy e rayog ni nge un ngay e piin pumoon nge ppin; mi yad chuweg e mad rorad ni urngin ma ur rin’ed e tin yad baadag nib pag rogon.” Ma arfan, ni naun ni yima fanay nga ban’en e ba mom ni nge fanay Satan nge mang wup ko Kristiano. Piin nib gonop e dabra uned ngay.

9. Mang boch e wup ni i pilo’ e Kristiano kakrom riy?

⁹ Fafel ni yima fek e salpiy riy e aram e fafel ni kari adag e girdi’ ko ngiyal’ ni rib gel gelngin fare Am nu Roma. Piin Kristiano kakrom e rayog rorad ni ngar siyeged ni dabra ted e salpiy u nap’an e sagreng ko karro ni ma giringiy e os ni ke mus nfaanra dabranod nga ram. Fafel ni yima fek e salpiy riy nib achichig e ku yima ta’ ko fapi singgil nib mith ko naun ni ka nog e inn nge tavern ngay. Piin ni ma un ngay e yad ma sananag e malang nib achichig ara boch e yil ni be kol be’ ko ba papluw fa de papluw. Fafel ni yima fek e salpiy riy e kan uneg ban’en ko yafas ko girdi’ ni nge tiyan’ ngay, ya be ognag ni nge yog e salpiy ngak ndabni maruwel nib gel. (Efesus 5:5) Maku, piin ni ppin ni ma maruwel ko gin’en nem ni yima pi e wain riy ni chuway e baga’ ni ppin ni ma pi’ ir ni chuway, ra gel boch e riya’ riy ni ngan aw ko ngongol ni darngal. Ireray boch e wup ni ma tay Satan ni fan ko Kristiano ni ma par u lan e pi mach ko Am nu Roma. Ke thil rarogon boch ban’en ko ngiyal’ ney fa?

Fapi Wup ni Ma Fanay Satan ko Ngiyal’ Ney

10. Uw rogon ni ba taareb rogon e par ko girdi’ e chiney ko tin ma rin’ e girdi’ u nap’an e Am nu Roma?

¹⁰ Ra ngan guy ni polo’, ma u lan fapi chibog ni ke yan e de thil rogon ni ma sasaliyebnag Satan e girdi’. Rogon ni nge dabi “gel Satan” ngak e Kristiano ni ma par u lan fare mach nu Korinth nib kireb, pi’ Paul e fonow ngorad nib gel. Me yog ni gaar: “Ya gadad manang e tin ni be lemnag [Satan] ngodad.” (2 Korinth 2:11) U lan e pi nam ni be mon’og, e par ko girdi’ riy e chiney e ba taareb rogon nga nap’an ni ke gel gelngin fare Am nu Roma. Fapi lottery ko am e ke pi’ e athap ngak e girdi’ ni kub muun ngay e piin nib gafgow. Boor e fafel riy nib sobut’ puluwon ni ma tiyan’ e girdi’ ngay. Fapi tafen e gosgos e ke sug ko girdi’, ma girdi’ e yad ma un ko gambling, yu ngiyal’ ma piin tayngeg e yad ma maangach nib gel, ma piin ni ma un ko gosgos e baga’ ni ma yodorom. Ma ma rung’ag e girdi’ e musik nib kireb, ma yima dag u m’on u tafen e gosgos boch ban’en nib puwlag maku arrogon ko kachido nge TV. U boch e nam, ma nge maluk e pumoon nge ppin u taabang u lan e pi sauna nge spring nib gawel e ban’en ni ki yima rin’, ma ka ba’ fare n’en ni ngan maluk u yuyang u dap’e l’ay ni ri dariy e mad. Taareb rogon ko fapi Kristiano ko boch e chibog kakrom, ma be guy Satan rogon ni nge wawliy e pi tapigpig rok Got ko kireb u daken e felfelan’ ko fayleng.

11. Mang boch e wup ni bay ko en ni baadag ni nge toffan boch ara nge un ko fafel?

¹¹ U lan e fayleng nib sug ko girdi’ ni ke mochuch, ma baga’ ni yima lemnag nib t’uf ni ngan fafel boch. Machane, taareb rogon ko gin’en ni yima maluk riy u Roma ni bay boch ban’en riy ni rayog ni nge kirebnag e Kristiano kakrom, ma gin’en ni yima yan ngay ni ngan toffan boch e kan pirieg ni ma fanay Satan nge mang wup ko Kristiano ko ngiyal’ ney ngar uned ko ngongol ni darngal nge ngan unum e wain nib pag rogon. I yoloy Paul ngak fapi Kristiano u Korinth ni gaar: “Dab mpaged gimed nga ni bannagmed, ya ra yan i bod ni ke lunguy: “ Nchag ngak e girdi’ nib kireb me kireb pangiy nib fel’.” Mu sulweged lanin’med mi gimed tal ndab kum denengad, ya boch e girdi’ e dariy e tamilangan’ rorad u murung’agen Got.”​—1 Korinth 15:33, 34.

12. Uw rogon ni be sasaliyebnag Satan e pi tapigpig rok Jehovah e chiney?

¹² Kad guyed ko n’en ni buch rok Efa ko uw rogon ni i bannag Satan nge kirebnag laniyan’. (2 Korinth 11:3) Ngiyal’ ney, ma reb e wup ni ma fanay fare Moonyan’ e nge pow’iy e Kristiano ngar lemnaged ni faanra fol boch e Pi Mich Rok Jehovah ko fayleng ni ngar daged ni taareb rogorad ngak yugu boch e girdi’, ma rayog ni ngar giringiyed boch i yad ngar uned ko tin riyul’ e Kristiano. Yu ngiyal’, ma kar rin’ed ban’en nib pag rogon, mab thil e n’en ni buch ya yad e kan giringiyrad ko fayleng. (Haggai 2:12-14) Yugu reb e kanawo’ ni ma sasaliyebnag Satan e Kristiano ni kar ognaged yad ndemtrug ko piin fel’yangaren fa pilibthir e aram nge k’aringrad ngar daged l’agruw mit e ngongol mar ‘kirebannaged fare kan ni thothup rok Got.’ (Efesus 4:30) Boch e girdi’ e kara awgad ko re wup ney ya kar fanayed fare Internet rorad nib pag rogon.

13. Mang wup nib mith ni reb ko fapi ban rok Moonyan’, ma mang fonow ni bay ko Proverbs nib puluw ngay?

¹³ Maku reb e wup ni ma fanay Satan e aram e ngongol nib mith mab l’ag ko kan nib kireb. Dariy reb e tin riyul’ e Kristiano ni nge un ko maruwel rok Satan ara pig ni nge m’agan’ ngay. Machane, boch e girdi’ e de yog rorad ni ngar koled ayuwngirad u boch e kachido ni yad ma yaliy, nge TV, nge video games, ma kub muun ngay e pi babyor ko bitir nge comics ni be dag yaan e maangach nge ngongol nib mith. Urngin ban’en ni bay e pow ko ngongol nib mith riy e ba t’uf ni ngan palog riy. Reb e proverb nib gonop e be yog ni gaar: “Fapi rachngal nge wup e bay u kanawo’ rok e en nde yaluw laniyan’; ma en ni ma ayuweg e yafas rok e ra par nib palog riy.” (Proverbs 22:5, NW) Bochan Satan ni ir “fare got ko re m’ag ney,” ma urngin ban’en nib gilbuguwan e rayog ni mithag nge mang reb e wup rok.​—2 Korinth 4:4; 1 John 2:15, 16.

I Togopuluw Jesus Ngak fare Moonyan’

14. Uw rogon ni i togopuluw Jesus ko skeng ni som’mon ni tay fare Moonyan’ ni fan ngak?

¹⁴ I dag Jesus rogon ni ngan togopuluw ko fare Moonyan’ min k’aring ni nge mil. Tomren ni kan taufenag me pag e abich u lan 40 e rran, me skengnag Satan Jesus. (Matthew 4:1-11) Bin som’mon e skeng e ke puluwnag ko tin be thamiy ya keb e bilig ngak Jesus u tomren ni ke pag e abich. Me pining Satan Jesus ni nge fal’eg e bin som’mon e maangang nge yog ngak e tin ni baadag downgin. I fanay e thin ni bay ko Deuteronomy 8:3, me dag ni dabun ni nge fanay gelngin ni nge yog e tin baadag downgin me ta’ fare ggan nib spiritual nib m’on ko ggan ni yima kay.

15. (a) Mang e n’en ni yima rin’ ni i fanay Satan ni nge wawliy Jesus ko kireb? (b) Mang reb fapi n’en ni ri ma fanay fare Moonyan’ ni nge sasaliyebnag e pi tapigpig rok Got e ngiyal’ ney, machane uwrogon ni ngad togopuluwgad ngay?

¹⁵ Reb e n’en nib ga’fan ni ngan lemnag u murung’agen e re skeng ney fan de guy rogon fare Moonyan’ ni nge wawliy Jesus nge un ko ngongol ni darngal. Bilig, ni ir e th’abi gel ni yima finey e ggan riy e ir e kan skengnag Jesus riy ko ngiyal’ nem ya keb e bilig ngak. Mang boch e skeng ni ma fanay fare Moonyan’ ni nge wawliy e girdi’ rok Got ko kireb e ngiyal’ ney? Boor e skeng ni bay mab thilthil rogon, machane ngongol ni darngal e ri ma fanay ni nge sasaliyebnag e girdi’ rok Jehovah nge kirebnag e yul’yul’ rorad ngak. Ra ngad folwokgad rok Jesus, ma rayog ni ngad togopuluwgad ngak fare Moonyan’ nge skeng ni ma tay. Bod rogon ni gel Jesus ngak Satan ya bochan e i lemnag boch e thin nu Bible nib puluw, ma faan yira wawliydad ni ngad uned ko ngongol ni darngal ma rayog ni ngad lemnaged e thin nu Bible ni bay ko Genesis 39:9 nge 1 Korinth 6:18.

16. (a) Uw rogon ni i wawliy Satan Jesus ko fa bin l’ag’ruw e skeng? (b) Ma mang boch e kanawo’ ni ma wawliydad Satan ni ngad skengnaged Jehovah?

¹⁶ Ngemu’, me k’aring fare Moonyan’ Jesus ni nge og u daken e rungrung ko fare tempel nga but’ ya nge skengnag ko rayog rok Got ni nge ayuweg u daken e pi engel Rok. I fanay Jesus e thin ni bay ko Deuteronomy 6:16, me yog ni dabun ni nge skengnag e Chitamangin. Sana dabi wawliydad Satan ni ngad oggad u tempel nga but’, machane rayog ni nge wawliydad ni ngad skengnaged Jehovah. Rayog ni ngan wawliydad ni ngad guyed feni chuchugur rogon nrayog ni ngad folwokgad ko fayleng u rogon e munmad rorad nge rogon ni yad ma fal’eg yaarad ndabni fonownagdad? Rayog ni ngan wawliydad ni ngad uned ngab mit e fafel nde tamilang ko ba kireb fa danga’? Sana gad be skengnag Jehovah riy. Faanra bay e lem rodad ni aram rogon, ma dabi mil Satan rodad, ya ra par rodad, ma dabi tal ni nge wawliydad ni ngad uned nga ba’ rok.

17. (a) Uw rogon ni wawliy fare Moonyan’ Jesus ko bin dalip yay? (b) Uw rogon ni ba riyul’ fare thin ko James 4:7 ngodad?

¹⁷ Nap’an ni ke yog Satan ngak Jesus ni nge pi’ urngin gil’ilungun e fayleng ngak nfaanra liyor ngak taab yay, me togopuluw Jesus ngak biyay me fanay e Thin nu Bible, me par nib mudugil laniyan’ ko liyor ni karimus ni fan ko Chitamangin. (Deuteronomy 5:9; 6:13; 10:20) Sana dabiyog rok Satan ni ra pi’ ngodad gil’ilungun e fayleng, machane gubin ngiyal’ ni ma fanay e chugum nge wawliydad, ma kub muun ngay e lem ni nge yog ngodad gil’ilungudad nib achichig. Gad ra fulweg ni bod e n’en ni rin’ Jesus, ma gad yul’yul’ ngak Jehovah u polo’ i lanin’dad? Faanra aram rogon, ma tin ni buch rok Jesus e ku ra buch rodad. Fare chep ni tay Matthew e yog ni gaar: “Ma aram me pag fare moonyan’ Jesus.” (Matthew 4:11) Ra digeydad Satan nfaanra kari dugil lanin’dad ni ngad togopuluwgad ngak ma aram ngad lemnaged e kenggin e motochiyel u Bible nib puluw ma ngada folgad riy. James ni gachalpen e i yoloy ni gaar: “Mi gimed togopuluw ngak fare moonyan’, me mil romed.” (James 4:7) Reb e Christiano e yoloy e babyor me pi’ nga tochuch ko Pi Mich Rok Jehovah u France ni gaar: “Satan e riyul’ ni ma sasaliyeb. Yugu aram aram ni gu baadag ni nggu rin’ e tin th’abi fel’, ma ku guy ni rib mo’maw’ ni nggu gagiyegnag e lem rog nge tin ni baadag dowag. Machane, lem nib mudugil, nge gum’an’, ma tin kab ga’fan riy, e ayuw rok Jehovah, me yog ni nggu par nib yul’yul’ ma gu chichiiy paag ko tin riyul’.”

Kari Fel’ Rogon ni Ngan Togopuluw Ku fare Moonyan’

18. Mang talin e cham nib spiritual e be fal’eg rogodad ni ngad togopuluwgad ngak fare Moonyan’?

¹⁸ Ke pi’ Jehovah ngodad e talin e cham ni urngin ma rayog rodad ni “ngad togopuluwgad ko pi ban rok moonyan’.” (Efesus 6:11-18) T’ufeg rodad ko tin riyul’ e bod e leed rodad ni kad chichiiyed nga lukngudad, ara be fal’eg rogdad, ni ngad uned ko maruwel ko Kristiano. Bochan ni kari dugil lanin’dad ni ngad folgad ko kenggin e motochiyel rok Jehovah ko tin nib mat’aw ban’en e ra bod fa gin’en ni ma ing e salthaw nga daken ngorongoren ni be ayuweg gum’irchadad. Faanra aydad e bod e sus ko fare thin nib fel’, ma ra fekdad i yan ko maruwel ni ngan wereg e machib ni gubin ngiyal’, ma ra gelnagdad ko tirok Got ban’en. Michan’ rodad nib gel e ra mang fa gin’en ni yima mith nga fon ko cham, ni be ayuwegdad ni ngad piliged ngay “fapi gan e gat’ing ni be yik’ ni be pag Faanem nib Kireb,” ni aram e cham ni ma ta’ u fithik’ e sasalap nge tin ma wawliy ko kireb. Ma athap rodad nib mudugil nra lebug e tin ni micheg Jehovah e ra mang urwach nra ayuweg gelngin lanin’dad ma ra yibnag e gapas nga lanin’dad. (Filippi 4:7) Faan gad ra salap nga rogon ni ngad fanayed e Thin rok Got, ma ra bod ba sayden nrayog ni ngad fanayed ni ngad ayuweged e girdi’ ko tirok Got ni ngar chuwgad u pa’ Satan. Maku rayog ni ngad fanayed e re n’ey ni fan ni ngad ayuweged gadad, ya aram e n’en ni rin’ Jesus ko ngiyal’ ni kan wawliy ko kireb.

19. Faan ku ra un ngay ngan ‘togopuluw ko fare Moonyan’,’ ma mang e kub t’uf?

¹⁹ Ra ngad fanayed e “talin e cham ni yib rok Got ni urngin” ma ngad meybilgad ni gubin ngiyal’, ma ba mudugil nra ayuwegdad Jehovah u nap’an nra yib Satan ni nge cham ngodad. (John 17:15; 1 Korinth 10:13) Machane i dag James ni ngan ‘togopuluw ngak fare Moonyan’’ e dabi gaman.’ Ya tin ni kab ga’fan, e ku thingarda ‘pied gadad nga pa’ Got,’ ni en be runguydad. (James 4:7, 8) Uw rogon ni gad ra rin’ e n’en ni aram rogon e yira weliy ko bin migid e article.

Uw Rogon ni Ngam Pi’ e Fulweg?

• Mang boch e wup rok Satan ni fapi Kristiano e susun ngar siyeged?

• Mang e maruwel rok Satan u fithik’ e sasalap ni ma fanay ni nge mang wup ko pi tapigpig rok Jehovah?

• Uw rogon ni ke togopuluw Jesus ko skeng ni pi’ fare Moonyan’ ngak?

• Mang talin e cham nib spiritual e ra gelnagdad ni ngad togopuluwgad ngak fare Moonyan’?

[Picture on page 8, 9]

Kari dugil laniyan’ Jesus ni nge togopuluw ngak fare Moonyan’

[Pictures on page 10]

Fapi Kristiano ko fa bin som’mon e chibog e dabra uned ko fafel ni bay e cham riy nge ngongol ni darngal

[Credit Line]

The Complete Encyclopedia of Illustration/J. G. Heck