Ngad Athamgiliyed e Gin Ka Bay ni Ngad Milgad Riy

“Ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg.”​—HEB. 12:1.

1, 2. Mang e ke taarebrogonnag e Bible e yafas ko tin riyul’ e Kristiano ngay?

GUBIN e duw ni ma un boor e girdi’ u ga’ngin yang e fayleng ko marasong. Boch e girdi’ ni ma un ko re sagreng ney e yad ba cheg ko mil, ma yad baadag ni ngar m’ongad. Machane, yooren e tin ka bay i girdien e re sagreng ney e yad manang ndabiyog ni ngar m’ongad. Ere n’en nib ga’ fan u wan’rad e ngar mu’naged e re sagreng ney.

² Ku be weliy e Bible murung’agen reb e sagreng. Be weliy ni yafas ko tin riyul’ e Kristiano e bod e sagreng ni yira pi’ puluwoy riy. Piin ni yad ma athamgil ni ngar pared ni bod rogon e tin riyul’ e Kristiano ni yad ba yul’yul’ ngak Jehovah e yad bod fapi girdien e mil ni yad baadag ni ngar mu’naged fare sagreng. I weliy apostal Paul murung’agen e re miti sagreng ney ko gin som’on e babyor ni yoloy nge yan ko pi Kristiano nu Korinth ni gaar: “Ri gimed manang ni yira tay reb e sagreng ko mil ma urngin fapi girdi’ nra milgad e ri taab bagayad e rayog puluwon ngak. Ere mmilgad ni aram rogon nge yog puluwon ngomed.”​—1 Kor. 9:24.

3. Mang e be yip’ Paul fan u nap’an ni yog ni kemus ni taabe’ e ra yog puluwon fare sagreng ngak?

³ Ere nap’an ni yog Paul ni kemus ni taabe’ e ra yog puluwon fare sagreng ngak, ma gur, be yip’ fan ni kemus ni taareb e Kristiano e ra yog e yafas ngak? Danga’, ya be weliy fan ni ma mil e piin ni yad ma un ko sagreng. Pi Kristiano nu Korinth e yad manang ni piin ni yad ma un ko mil e kar turguyed u wan’rad ni ngar m’ongad. Aram fan ni piin ni yad ma un ko mil e yad ma fal’eg rogorad u m’on ko sagreng, mar milgad ni kari mus rogorad riy. Ri yad ma athamgil ni ngar m’ongad. Ere baadag Paul ni nge athamgil pi walagen ngar pared ni yad ba yul’yul’ ngak Jehovah mar mu’naged fare sagreng ni yad be un ngay. Gubin e Kristiano ni yad ra rin’ e re n’ey e ra yog puluwon ngorad ni aram e yafas ndariy n’umngin nap’an.

4. Mang e ba t’uf ni ngad nanged u murung’agen e sagreng ni be tay e piin Kristiano?

⁴ Pi thin nem e ra pi’ e athamgil nga lanin’dad, machane ku ra ayuwegdad ni ngad fal’eged i lemnag rogon e par rodad. Faan gad ra par nrogon nib m’agan’ Jehovah ngay, ma aram e rayog ni ngad athapeged e yafas ni manemus u tharmiy ara u Paradis u fayleng. Machane, yafas ko Kristiano e taareb rogon ko sagreng ni yibe tay u ba pa’ i kanawo’ ni boor e riya’ ni bay riy. (Matt. 7:13, 14) Boor ban’en nrayog ni nge magawonnag e pigpig ni gad be tay ngak Jehovah, ara talegdad ndab kud pigpiggad ngak. Bay boch e tapigpig rok Jehovah ni ke buch e re n’ey rorad. Ere mang boch e wup nge riya’ ni yira mada’nag u nap’an e sagreng ko yafas? Uw rogon ni ga ra siyeg e pi n’ey? Ma mang e rayog ni ngam rin’ ma ga mu’nag e re sagreng ney me yog puluwon ngom?

Ra Nge Yog Puluwon Ngodad ma Thingar Da Athamgilgad

5. Mang e weliy Paul ko Hebrews 12:1?

⁵ U lan e babyor ni yoloy Paul nge yan ngak e pi Kristiano nu Jerusalem nge Judea, e ki weliy riy bayay murung’agen e piin ni yad ma un ko sagreng. (Mu beeg e Hebrews 12:1.) I weliy fan ni susun e nge ulul e piin Kristiano ko re sagreng ney nge rogon ni ngar mu’naged. Som’on e ngad weliyed fan ni yoloy Paul e gi babyor nem nge yan ngak piyu Hebrew nge n’en ni baadag ni ngar rin’ed. Ngemu’ ma gad weliy e n’en nrayog ni ngad filed ko n’en ni yoloy.

6. Mang e i guy e pi tayugang’ ko teliw rogon ni ngar rin’ed ngak e pi Kristiano?

⁶ Pi Kristiano ko bin som’on e chibog, nib ga’ ni piin ni ur pared u Jerusalem ngu Judea e ur moyed u ba ngiyal’ nrib mo’maw’ e par riy ni bochan e i guy e pi tayugang’ ko teliw rogon ni ngar towasariyed e girdi’ ni ngar folgad rorad. U m’on ni nge buch e pi n’ey, mar guyed rogon ni nge lemnag e girdi’ ni be togopuluw Jesus Kristus ko am ma ir be’ nib kireb ni bay rogon ni ngan thang e fan rok. Pi tayugang’ ko teliw nem e yad e ra lied Jesus Kristus nge yim’, ma chiney e yad baadag ni ngar taleged e piin ni yad be machibnag murung’agen. Fare babyor ni Acts e rayog ni ngad beeged riy murung’agen e n’en ni buch u tomuren e Pentekost ko duw ni 33 C.E. Pi tayugang’ ko teliw nem e ur gafgownaged e pi Kristiano, ya yad be guy rogon ni ngar talgad ko machib.​—Acts 4:1-3; 5:17, 18; 6:8-12; 7:59; 8:1, 3. 

7. Mang e gelnag e mo’maw’ ko par ko pi Kristiano ni yoloy Paul e babyor nge yan ngorad?

⁷ Ku reb i fan ni i mo’maw’ e par ko pi Kristiano nem e bochan ni ke chugur ni ngan gothey yu Jerusalem. Ke mu’ Jesus i yog nra gothey Got yu Jerusalem. Ki yog ngorad e n’en nra buch u m’on riy nge n’en ni yad ra rin’ ma dab ra m’ad. (Mu beeg e Luke 21:20-22.) I ginangrad Jesus ni gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be muruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed.”​—Luke 21:34.

8. Mang ban’en ni sana ir e k’aring boch e Kristiano ni ngar malmalgad ara ra talgad ko pigpig ngak Jehovah?

⁸ Ba chugur ko 30 e duw nga tomuren ni yog Jesus e pi thin nem me yol Paul nge yan ngak e pi Kristiano ni Hebrew. Mang e i buch ko pi Kristiano nem u lan e re 30 i duw nem? Boch i yad e tal i fil murung’agen Jehovah ma daki fel’ e tha’ u thilrad ni bochan boch e magawon ara bochan ni i magafan’rad ko tin nib t’uf rorad. (Heb. 5:11-14) Boch e Kristiano e sana ur lemnaged ni kab mom ni ngar pared ni bod rogon e tin ni ka bay e Jew. Sana ur lemnaged nde kireb e re n’em ni bochan ni piyu Jew e ba mich Got u wan’rad ma yad ma fol ko fare Motochiyel rok Moses. Maku immoy boch e girdi’ ko ulung e ngiyal’ nem ni ur towasariyed boch e girdi’ ni ngar folgad ko fare Motochiyel rok Moses nge ku boch e yalen rok piyu Jew. Boch e Kristiano e mich e thin rorad u wan’rad, ma boch e ra motoyilgad ngorad ya yad be rus. Mang e yog Paul ni nge ayuweg e pi Kristiano nem ni ngar pared ni bod rogon e tin riyul’ e Kristiano ni yad ba yul’yul’ ngak Jehovah?

9, 10. (a) Mang e yog Paul nib t’uf ni nge rin’ e pi Kristiano ni Hebrew u tungun e Hebrew ko guruy ni 10? (b) Mang fan ni yoloy Paul murung’agen e pi n’en nib fel’ ni i rin’ e pi tapigpig rok Jehovah kakrom?

⁹ I thagthagnag Jehovah nga laniyan’ Paul ni nge yoloy e gi babyor ney ni nge pi’ e athamgil nga laniyan’ e pi Kristiano ni Hebrew. U tabolngin e guruy ni 10 e weliy ngorad ni fare Motochiyel rok Moses e “ke mus ni yaan e pi n’en nib fel’ ni bay fini yib ni kab samathmath,” ma kemus nu daken e maligach ni pi’ Jesus e rayog ni ngan n’ag fan e denen rorad riy. Mu tungun e re guruy nem e yog Paul riy ngorad ni faanra nge yib angin e re maligach nem ngorad, mab t’uf ni ngar athamgilgad. I gaar: “Thingari gum’an’med, ni fan e nge yog ni mu ngongliyed e tin nib m’agan’ Got ngay me yog ngomed e tin ni ke yog nra pi’ ngomed. Ni bod rogon ni ke yog e babyor nib thothup ni be gaar: ‘Dab ki n’uw nap’an ma en ni nge yib e bay yib, ni dabi sowath.’”​—Heb. 10:1, 36, 37.

¹⁰ I fanay Paul e pi thin nem ni nge pi’ e athamgil nga laniyan’ e pi Kristiano ni Hebrew ni ngar athamgilgad boch. Mu lan e guruy ni 12 e ki pi’ e athamgil nga lanin’rad bayay ni ngkur athamgilgad boch me yog ngorad ni ngar ‘athamgiliyed e gin ni ka ba’ ni ngar milgad riy.’ Machane u m’on ni yog e pi thin nem, miki thagthagnag Got nga laniyan’ ni ngki yoloy murung’agen yugu ban’en ni bay ko guruy ni 11. U lan e re guruy nem e i weliy riy fan e bin riyul’ e michan’ ngak Got u daken e pi n’en ni yoloy u murung’agen boch e girdi’ nib gel e michan’ rorad. Mang fan ni weliy murung’agen e michan’ u m’on ni nge weliy bayay murung’agen e athamgil? Bochan ni baadag ni nge nang e pi Kristiano nem ni faanra ngari mich Jehovah u wan’rad mab t’uf ni ngar athamgilgad. Boor e pumoon nge ppin kakrom ni weliy murung’agrad ni ur pared ni yad ba yul’yul’ ngak Jehovah ni yugu aram rogon ni boor e magawon ni i yib ngorad. Mu nap’an ni mu’ i weliy e pi n’ey, me gaar ngorad: “Gadad e ba sug e pi girdi’ nem u toobdad ni yad be guydad, ni ur daged ko ngongol rorad nrib michan’rad ngak Got. Ere ngad paged urngin ban’en ni be magawon ngodad, nge denen ni ke m’agdad ni ke chichiiy pa’ rodad, ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg.”​—Heb. 12:1.

“Ba Sug e Pi Girdi’ Nem u Toobdad”

11. Mang e susun ndab da paged talin u nap’an ni gad be lemnag e pi n’en ni i rin’ e “pi girdi’ nem”?

¹¹ I yog Paul ni pi tapigpig rok Jehovah ni ur moyed u m’on ndawori sum e ulung ni Kristiano e yad “e pi girdi’ nem u toobdad” ni ur pared ni yad ba yul’yul’ ngak Jehovah nge mada’ ko ngiyal’ nra m’ad. Ma pi n’en ni ur rin’ed e be dag nrayog ko piin Kristiano ni ngar pared ni yad ba yul’yul’ ngak Jehovah ni ki mada’ ko ngiyal’ nib mo’maw’. Pi “girdi’ nem” e yad bod girdien e mil ni kar mu’naged e sagreng rorad. Ngongol rorad e ra pi’ e athamgil nga laniyan’ boch e girdi’ ni nge dab ra talgad ko sagreng ni yad be un ngay. Mu lemnag rogon laniyan’ be’ ni be un ko mil ni faanra be guy e piin nib pey ko mil ni yad be yaliy ma yad be pi’ e athamgil nga laniyan’ ni nge dabi tal. Gathi ra athamgil ni nge mu’naged fare sagreng? Ere, pi Kristiano ni Hebrew e ba t’uf ni ngar lemnaged e n’en ni i rin’ e pi tapigpig rok Jehovah nem kakrom, ya rayog ni nge ayuwegrad ni ngar athamgilgad, me puguran ngorad nrayog ni ngar ‘athamgiliyed e gin ni ka ba’ ni ngar milgad riy,’ maku er rogodad.

12. Mang e rayog ni ngad filed ko michan’ rok fapi girdi’ ni ke weliy Paul murung’agrad?

¹² Rayog ni ngad filed ban’en ko michan’ rok fapi girdi’ ni weliy Paul murung’agrad ni bochan e boor i yad e i buch rorad e pi n’en ni ka ma buch rodad. Bod ni Noah e immoy u m’on ni nge thang Jehovah e girdi’ nib kireb ko ngiyal’ ni immoy riy. Ma gadad e ku gad bay ko ngiyal’ ni ke chugur ni nge thang Jehovah e fayleng rok Satan. I yog Jehovah ngak Abraham nge Sarah ni ngar digeyew e tabinaw rorow. I micheg ngorow nra sum ba nam rorow ni nge pigpig ngak. Mu ur sonnagew ni nge lebguy e re n’em. Be yog Jehovah ndab kud pared ni fan ngodad, ya ngad pared ni fan ngak. Ma ke micheg ni faan gad ra rin’ ni aram rogon, ma ra mang fager rodad me tow’athnagdad. Moses e ba n’uw yang ni i yan riy ni bay e riya’ riy ni be nameg fare Nam ni Kan Micheg. Ma gadad e gad be par u lan ba fayleng ni ke gel e kireb riy ni gad be sonnag e bin nib beech e fayleng ni ke micheg Jehovah. Rib ga’ fan ni ngaud lemnaged e pi n’en ni i rin’ e pi girdi’ nem, ya rayog ni ngad folwokgad ko pi n’en ni ur rin’ed nib m’agan’ Jehovah ngay, ma gad fil ban’en ko pi n’en ni ur olobochgad riy nde m’agan’ ngay.​—Rom. 15:4; 1 Kor. 10:11.

Mang e Ke Ayuwegrad Kar Mu’naged e Sagreng Rorad?

13. (a) Mang fan nib mo’maw’ e par rok Noah? (b) Mang e ke ayuweg ni nge rin’ gubin ban’en ni ke yog Jehovah ngak?

¹³ Mang e ke ayuweg e pi tapigpig rok Jehovah ney ni ngar athamgilgad ngar mu’naged fare sagreng ni ur ted? Mu tay fanam i yan ko n’en ni yoloy Paul u murung’agen Noah. (Mu beeg e Hebrews 11:7.) Dariy biid ni ke guy Noah e ran ni ke tharey e fayleng ke li’ gubin e girdi’ nge gamanman. (Gen. 6:17) Machane, de lemnag Noah ndabiyog ni nge yib e ran nge tharey e binaw. Mang fan? Bochan nib mich u wan’ ni Jehovah e ma rin’ urngin ban’en ni ma yog. Ere de lemnag ni kaygi mo’maw’ ni ngan fol rok Jehovah. I rin’ urngin ban’en nrogon “ni yog Jehovah ngak ni nge rin’.” (Gen. 6:22) Boor ban’en ni nge rin’ Noah. Ba t’uf ni nge toy e arke, me kunuy e gamanman, me kunuy e ggan rorad chon e tabinaw rok nge fapi gamanman, me weliy ngak e girdi’ murung’agen fare ran ni bay yib, me ayuweg chon e tabinaw rok ni ngar pared nib gel e michan’ rorad ngak Jehovah. Gathi gubin ngiyal’ nib mom ngak Noah ni nge rin’ urngin ban’en ni ke yog Jehovah ngak. Machane, bochan nib mich Jehovah u wan’, ma aram fan ni i athamgiliy e re maruwel nem.

14. (a) Mang boch e kanawo’ ni dag Abraham nge Sarah nib mich Got u wan’row? (b) Mang e gad ra fil rorow?

¹⁴ I yog Paul ni l’agruw e “pi girdi’ nem” e aram Abraham nge Sarah. I thil rogon e par rorow u nap’an ni yog Got ni ngar digeyew e tabinaw rorow u Ur. Dar nangew e n’en nra buch rorow, machane rib gel e michan’ rorow ngak Jehovah, mu ur folgow ni ki mada’ ko ngiyal’ nib mo’maw’. Be yog e Bible ni Abraham e ir “chitamangin urngin e piin ni ke mich Got u wun’rad” ni boor ban’en ni i pag fan riy ni fan ngak Jehovah. (Rom. 4:11) Pi Kristiano ni Hebrew e yad manang murung’agen Abraham nge chon e tabinaw rok, ere kemus ni buchuuw ban’en ni i weliy Paul u murung’agen e pi n’en ni ur rin’ed u fithik’ e michan’. Baaray e n’en ni yog Paul u murung’agen: “Ma urngin e pi girdi’ ney nra m’ad nib mich Got u wan’rad; nde yog ngorad ko biney e tamilang e pi n’en ni yog Got ni bayi pi’ ngorad, machane ra changargad u urel mi yad guy e tin ni ke yog Got ni bayi pi’ ngorad mi yad felfelan’ ngay, mu ur daged ko ngongol rorad ni yad e girdi’ nu bayang ma yad e milekag ni yad be par u roy u fayleng.” (Heb. 11:13) Michan’ rorad ngak Got nge tha’ nib fel’ u thilrad e ayuwegrad ni ngar athamgilgad ko sagreng ni yad be un ngay.

15. Mang fan ni dugliy Moses ni nge par ko bin baaram e par ni mel’eg?

¹⁵ Moses e ir bagayad e pi tapigpig rok Jehovah nib muun ko “pi girdi’ nem.” I digey e tabinaw rok ni bod ni rin’ Abraham. I digey e flaab ni immoy riy u tafen e pilung. Me mel’eg ni “nge un ngak girdien Got ko gafgow.” Mang fan? I weliy Paul ni gaar: “I par ni ke yip’ owchen ko tin ni ka ba’ nga m’on ni bayi pi’ Got ni puluwoy. . . . ni bochan e gowa ke guy fare Got ndab ni guy nga owchey.” (Mu beeg e Hebrews 11:24-27.) Manang Moses ni bay ban’en ni kab ga’ fan “ko bin ni nge felfelan’ nib ngoch nap’an ni be ngongliy e denen.” Ba riyul’ Got u wan’ ma manang nra riyul’ urngin ban’en ni ke micheg. Aram e n’en ni ayuweg ni nge athamgil miki ayuweg ni nge pow’iy yu Israel nga wuru’ yu Egypt, me fekrad nga lan fare Nam ni Kan Micheg.

16. Uw rogon ni kad nanged nde mulan’ Moses ni bochan e de yog ni nge un nga lan fare Nam ni Kan Micheg?

¹⁶ Moses e yim’ u m’on ni nge lebug e pi n’en ni micheg Got ngak, ni bod rogon Abraham. Nap’an ni be n’en ni nge yan piyu Israel nga lan fare Nam ni Kan Micheg, me gaar Got ngak Moses: “Re nam ni bay gu pi’ ngak yu Israel e bay mu yaliy u urel, machane dab mu un nga lan.” Bochan ndar folgow Aron rok Got u nap’an ni yad bay ko fapi alublub nu Meribah, ma aram fan ndar unew nga lan fare Nam ni Kan Micheg. Ra pagew e piin nra togopuluwgad ngar k’aringed e damumuw ngorow, ma aram mar darifannagew Got. (Deut. 32:51, 52) Yugu aram rogon ma de mulan’ Moses. De lemnag nde mat’aw e n’en ni ke rin’ Got. Gad manang e re n’ey ni bochan e yog ngak Jehovah ni nge fal’eg waathan e pi ganong nu Israel. Ma tin tomur e thin ni yog ngorad e: “Israel, ri gab felan’! Dariy be’ ni bod gur, ni ba nam ni Somol e ke chuweg u pa’ e toogor rok. I Somol e ir fa gin’en ni ga ma mith nga fon ko mahl ma ir e sayden rom, ni nge ayuwegem rok e toogor rom me gagiyegnigem ngam gel ngorad.”​—Deut. 33:29.

Pi N’en ni Gad Ra Fil Riy

17, 18. (a) Mang e gad ra fil rok e pi “girdi’ nem”? (b) Mang e gad ra weliy ko bin migid e article?

¹⁷ Kad filed ko n’en ni rin’ boch e pi ‘girdi’ nem ni yad bay u toobdad’ ni faanra ngad mu’naged fare sagreng, ma thingari mich Got u wan’dad nge pi n’en ni ke micheg. (Heb. 11:6) Re michan’ ney e thingari rin’ ban’en ko ngongol rodad e ngiyal’ ney. Gad manang ni ka bay reb e par nib fel’ boch nga m’on ni ke micheg Got ngodad. Rayog ni ngad guyed “fare Got ndab ni guy nga owchey” ma gad athamgiliy e gin ni ka bay ni ngad milgad riy.​—2 Kor. 5:7.

¹⁸ De mom fare sagreng ni be un e piin Kristiano ngay. De mom ni ngan par ni bod e Kristiano me mich Got u wan’uy. Machane, rayog ni ngad mu’naged e re sagreng ney. Bin migid e article e gad ra weliy riy boch ban’en nra ayuwegdad ni ngad mu’naged fare sagreng.

Rayog ni Ngam Weliy?

• Mang fan ni yoloy Paul murung’agen e pi n’en nib fel’ ni i rin’ boch e girdi’ kakrom?

• Uw rogon nra ayuwegdad e pi n’en ni i rin’ fapi ‘girdi’ ni yad bay u toobdad’ ni ngad athamgilgad ko fare sagreng ni gad be un ngay?

• Mang e kam fil ko pi n’en ni i rin’ Noah, nge Abraham, nge Sarah, nge Moses?

[Picture on page 21]

I m’agan’ Abraham nge Sarah ngay ni ngar digeyew e flaab rorow u Ur