Dab Mu Pag Ban’en ni Nge Palognagem Rok Jehovah

1-3. (a) Mang fan nib fel’ ni ngad folgad ko n’en ni rin’ Joshua? (b) Mang e thingar dab da paged talin u nap’an ni gad ra dugliy ban’en?

PI N’EN ni gad ra dugliy e rib ga’ fan. Ra ayuwegdad e pi n’ey ni ngad nanged rogon ni ngad fanayed e yafas rodad. Re n’ey e rayog ni ngad taareb rogonnaged ngak be’ ni be yan u daken ba pa’ i kanawo’, me munmun me yan i l’agruw pa’ e re kanawo’ nem. Ba t’uf ni nge dugliy ko pa’ ni ngan e ra yan riy. Ba ga’ nra mel’eg fa pa’ i kanawo’ nra fek i yan ko gin ni be nameg nib papey boch, ko bin ni nge yan ko fa pa’ nem e kanawo’ ni ke palog boch ko gin ni be nameg.

² Boor e girdi’ ni be weliy e Bible murung’agrad nib t’uf ni ngar dugliyed boch ban’en. Bod nib t’uf ni nge dugliy Kain ko ra gagiyegnag e damumuw rok, fa danga’. (Gen. 4:6, 7) Ma Joshua e ba t’uf ni nge dugliy ko ra liyor ngak e bin riyul’ e Got, fa got ni googsur. (Josh. 24:15) Ba ga’ fan u wan’ Joshua ni nga i par ko kanawo’ nib mat’aw. Ma baadag ni nge par nib chugur ngak Jehovah, ere ke dugliy ban’en nra ayuweg ya nge yag ni nge rin’ e re n’ey. Machane, n’en ni ke dugliy Kain e ke kirebnag e tha’ u thilrow Jehovah.

³ Yu ngiyal’, mab t’uf ni ngad dugliyed ban’en nib ga’ fan ya nge yag ni ngad pared u daken e bin nib mat’aw e kanawo’. Ba t’uf ndab da paged talin ni n’en ni gad ra dugliy e rayog ni nge pining e sorok ngak Jehovah, ma ra ayuwegdad ni ngad chugurgad ngak ara nge palognagdad rok. (Mu beeg e Hebrews 3:12.) U lan e re article ney nge bin migid, e gad ra weliy riy murung’agen medlip i ban’en ni bay rogon ko yafas rodad nib t’uf ni ngad rin’ed me yag ni ngad folgad ko bin nib mat’aw e kanawo’. Ma dab da paged ni pi n’en ni gad ra dugliy ni nge kirebnag e tha’ u thildad Jehovah.

MARUWEL

4. Mang nib ga’ fan ni ngan un ko maruwel?

⁴ Piin Kristiano e thingar ra uned ko maruwel ya nge yag ni ngar pied e tin nib t’uf ko tabinaw rorad. Be dag e Bible nfaanra bay be’ ndabun ni nge pi’ e tin nib t’uf ko tabinaw rok, ma kab gel e kireb rok ngak e en nde mich Got u wan’. (2 Thess. 3:10; 1 Tim. 5:8.) Ere ba ga’ fan ni ngam un ko maruwel. Machane, faanra dab mu kol ayuw, ma pi n’en ni ga ra dugliy ni bay rogon ko maruwel rom e rayog ni nge kirebnag e tha’ u thilmew Jehovah. Ni uw rogon?

5. Mang e thingar mu lemnag u m’on ni ngam un nga reb e maruwel?

⁵ Uw rogon nfaanra ba t’uf ni ngam gay reb e maruwel? Faanra ba mo’maw’ ngom ni ngam pirieg reb e maruwel ko binaw rom, ma dabisiy ni ga ra lemnag ni yugu demtrug e maruwel ni yira ognag ngom, ma ga ra un ngay. Machane, uw rogon nfaanra bay kenggin e motochiyel nu Bible nib togopuluw ko fare maruwel ni kan ognag ngom? Ara ba t’uf ni ngam tay e tayim ni boor ni fan ko fare maruwel ma ke lich e tayim ni ga ra tay ni fan ko ulung nge tabinaw rom? Ere gur, ga ra un ko re maruwel nem ya ga be lemnag ni kab fel’ ni bay e maruwel rom ni aram rogon ko bin ndariy? Dab mu pag talin ni n’en ni ga ra dugliy e rayog ni nge chugurnag ara nge palognag e tha’ u thilmew Jehovah. (Heb. 2:1) Ere demtrug ko ga be gay reb e maruwel, ara ga baadag ni ngam thilyeg e maruwel rom, ma uw rogon ni ngam dugliy ko mang e ba fel’ ni ngam rin’?

6, 7. (a) Mang l’agruw i fan ni nge un be’ ko maruwel? (b) Ma bin ngan i fan e ra m’ug riy ni baadag be’ ni nga i par nib chugur ngak Jehovah? Mang fan?

⁶ N’en ni ga ra dugliy e be yan u rogon e n’en ni ga baadag ni ngam rin’ ko yafas rom. Mu fithem ni nge lungum: ‘Mang angin e re maruwel ney ngog?’ Faanra ga be gay e maruwel ya ga baadag ni ngam ayuwegem nge chon e tabinaw rom, ya nge yag ni ngam ulul ko pigpiggad ngak Jehovah, ma ra ayuwegem. (Matt. 6:33) Manang Jehovah rogon ni nge ayuwegem nfaanra kan talegnem ko maruwel rom nib tomgin, ara ke buchuuw e salpiy ko am. (Isa. 59:1) Manang rogon ni nge “ayuweg e piin ni yad ma fol rok ko gafgow ni ma yib ngorad.”​—2 Pet. 2:9.

⁷ Machane, uw rogon nfaanra kemus ni ga be gay e maruwel ya ga baadag ni nge yoor e salpiy rom? Rayog ni nge yoor e salpiy rom. Machane, bay e magawon riy nfaanra ireray e n’en ni ga be nameg. (Mu beeg e 1 Timothy 6:9, 10.) Faanra kemus salpiy nra yag ngom nge maruwel rom e pi n’en nib ga’ fan ko yafas rom, ma ra palog e tha’ u thilmew Jehovah.

8, 9. Mang e pi deer ni thingari fith e piin gallabthir yad riy u murung’agen e maruwel rorad? Mang fan?

⁸ Faanra gur reb e gallabthir, ma dab mu pagtalin ni bitir rom e rayog ni nge fil ban’en u rogon ni ga ma dugliy ban’en. Mang e yad ra lemnag ni ir e th’abi ga fan ko yafas rom? Maruwel rom? Ara tha’ u thilmew Jehovah? Faanra ga be athamgil ni nge gilbuguwam ara ga be gay rogon ni nge yoor e salpiy rom, gur, ga be lemnag ni ku aram e n’en nra rin’ e pi bitir rom u nap’an ni yad ra ilal? Ara rayog ni nge dab ku ra ted fam? N’en ni ke yib ngan’ reb e Kristiano ni ppin ni kab fel’ yangaren e ke yog ni n’en nth’abi ga’ fan u wan’ e chitamangin e aram e maruwel rok. Ke yog ni gaar, “Som’on e gowa ke maruwel nib elmerin ya ri baadag ni nge ayuweg chon e tabinaw rok. Ri baadag ni nge pi’ e tin nib t’uf romad. Machane, u nap’an e pi duw ni ke yan ma bay ban’en ni ke thil.” Gubin ngiyal’ ni ma un ko maruwel, ma ma chuw’iy boch ban’en nib tolang puluwon nde t’uf ko tabinaw rok. Ma tomur riy, ma ke nang e girdi’ ni boor e salpiy ko tabinaw rorad, ma de yag ni ngar pied e athamgil nga laniyan’ e pi walag ni ngaur pigpiggad ngak Jehovah. Miki yog fare walag nra felfelan’ nfaanra chitamangin e ke ayuwegrad ni nge yag ni ngar mon’oggad ko pigpig ngak Jehovah ko bin ni nge athamgil ni nge yoor e salpiy rorad.

⁹ Gimed e piin gallabthir, mu athamgilgad ndab mu paged e maruwel romed ni nge palognagmed rok Jehovah. Ngaum daged e ngongol nib fel’ ngak e pi bitir romed. Ngam daged ngorad nriyul’ ni kab ga’ fan u wun’med e tha’ u thilmed Got ko salpiy ara chugum.—Matt. 5:3.

10. Mang e thingari lemnag reb e fel’ yangaren u m’on ni nge un ko maruwel?

¹⁰ Faanra gur reb e fel’ yangaren, ma ga be lemnag ko miti mang maruwel e ngam un ngay u nap’an ni ga ra ilal? Ma uw rogon ni ngam dugliy e re n’ey nib fel’ rogon? Rogon ni kad filed faram, n’en ni ga ra dugliy e be yan u rogon e n’en ni ga baadag ni ngam rin’ ko yafas rom. Faanra ga be lemnag ni ngam un nga reb e maruwel, gur, rayog ni nge ayuwegem e re maruwel nem ni ngam dag ni pigpig ngak Jehovah e aram e n’en th’abi ga’ fan ko yafas rom? Fa ra palognag e tha’ u thilmew Jehovah? (2 Tim. 4:10) Ga ba adag ni ngam bod e girdi’ nu fayleng ni kemus yad ra felfelan’ nfaanra ke yoor e salpiy rorad? Ara ra pagan’um ngak Jehovah ni bod rogon David ni faani gaar: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Ps. 37:25) Re n’ey e bod ni ga be dugliy ko pa’ ni ngan e kanawo’ e ngam man riy. Dab mu pag talin nreb e ra palognagem rok Jehovah, ma reb e ra ayuwegem ni nge yag e bin th’abi fel’ e yafas ngom. (Mu beeg e Proverbs 10:22; Malaki 3:10.) Bin ngan e ngam mel’eg?a

FAFEL NGE PI N’EN NI MA CHUWEG E CHALBAN

11. Mang e be fil e Bible ngodad u murung’agen e fafel nge pi n’en ni ma chuweg e chalban? Mang e thingar dab da paged talin?

¹¹ De yog e Bible nib kireb ni ngan felfelan’, maku de yog ni fafel nge pi n’en ni ma chuweg e chalban e be adbey e tayim rodad. Ke yog Paul ngak Timothy ni dowef ni yima gelnag u fithik’ urngin e gosgos e ba’ fan. (1 Tim. 4:8) Maku be yog e Bible ni bay “ngal’an ni nge felan’uy” nge “ngal’an e churu’” maku be yog ngodad nib t’uf ni nge gaman e toffan rodad. (Ekl. 3:4; 4:6) Machane, faanra dab mu kol ayuw ma fafel nge pi n’en ni ma chuweg e chalban e ra palognagem rok Jehovah. Ni uw rogon? Aram rogon nfaanra kam mel’eg ni ngam un ko fafel nge pi n’en ni ma chuweg e chalban nib kireb, ara ke yoor e tayim ni ga be n’ag ngay.

12. Mang e thingar da lemnaged u nap’an ni gad ra mel’eg e miti fafel nge pi n’en ni ma chuweg e chalban ni ir e ngad uned ngay?

¹² Som’on, e ngad lemnaged ko ba miti mang fafel nge pi n’en ni ma chuweg e chalban e thingar da mel’eged. Rayog ni ngan pirieg e fafel nge pi n’en ni ma chuweg e chalban nib fel’. Machane, boor ko pi n’en ni ma chuweg e chalban ko re fayleng ney e bay rogon ko pi n’en ndabun Got ni bod e cham, nge pig, nge ngongol ndarngal. Ere ba t’uf ni ngam kol ayuw ko miti mang fafel nge pi n’en ni ma chuweg e chalban e ga ra mel’eg. Nga mu lemnag boch e pi deer ni baaray: Pi n’en ni gu ma un ngay ni ma chuweg e chalban e mang e ma rin’ ngog? Be k’aringeg ni nggu un ko cham ara nggu uf ko nam rog? Be k’aringeg ni nggu lemnag nib t’uf ni nguug gel ko gosgos ni gubin ngiyal’? (Prov. 3:31) Gu ma n’ag boor e salpiy ngay? Ra k’aring e damumuw ngak boch e girdi’ nfaanra kar nanged ni ireray e fafel nge pi n’en ni ma chuweg e chalban ni kug mel’eg? Miti mang girdi’ e gu ma chag ngorad? (Prov. 13:20) Ma k’aringeg ni nggu rin’ ban’en nib kireb?​—Jas. 1:14, 15.

13, 14. Mang fan ni thingar mu lemnag ko uw urngin e tayim ni ga ma fanay ni fan ko fafel?

¹³ Ba t’uf ni ngkum lemnag urngin e tayim ni ga ma fanay ko fafel nge pi n’en ni ma chuweg e chalban. Mu fithem ni nge lungum: ‘Kaygi yoor e tayim ni gu ma fanay ni fan ko fafel ma ke buchuuw e tayim ni fan ko machib nge muulung?’ Faanra kaygi yoor e tayim ni ga ma fanay ko fafel nge pi n’en ni ma chuweg e chalban, ma ra buchuuw e felfelan’ rom riy. Bin riyul’ riy, e piin ni yad be kol ayuw ni nge dabi pag rogon e tayim ni ngar fanayed ni fan ko fafel e ma yib e felfelan’ ngorad nib gel. Mang fan? Ya yad manang ni kar rin’ed e tin nib ga’ fan ko som’on, ere dabi magawon e nangan’ rorad.​—Mu beeg e Filippi 1:10, 11.

¹⁴ Yugu aram rogon ni gowa bay e felfelan’ riy nfaanra yira tay boor e tayim ni fan ko fafel, machane re n’ey e rayog ni nge palognagem rok Jehovah. Ireray e n’en ni ke buch rok Kim ni ir reb i walagdad ni ppin ni 20 e duw rok. Ke yog ni kafram e ma un ko mur u gubin e wik u nap’an e Biyernes, nge Sabado, nge Madnom. Machane chiney e ke guy ni ka bay boch ban’en nrib ga’ fan nthingari rin’. Ya ke yog ni gaar: “Bochan ni gag reb e pioneer ma gu ma od ko 6:00 ni kakadbul ya gu ma un ko machib, ere dabiyog ni nggu un ko mur nge yan i mada’ ko taareb ara l’agruw e kolok ni kakadbul. Gu manang ni gathi gubin e mur nib kireb, machane rayog ni nge magawonnagdad ko pi n’en ni gad ma rin’.” Ere ke guy nib t’uf ni nge kol ayuw ni nge dabi pag rogon e tayim nra fanay ni fan ko mur.

15. Uw rogon ni nge ayuweg e piin gallabthir e pi bitir rorad nge yag ni ngar mel’eged e fafel nib fel’?

¹⁵ Ke mil fan ngak e piin gallabthir ni ngar pied urngin ban’en nib t’uf rok chon e tabinaw rorad. Ma kub mil fan ngorad ni ngar ayuweged chon e tabinaw rorad ni ngar pared nib fel’ e tha’ u thilrad Jehovah, ma ngkur pared ni yad ba felfelan’ ma ngar t’ufeged yad. Faanra gur reb e gallabthir, ma dab mu lemnag ni urngin e fafel e ba kireb. Riyul’ ni bay boch nib kireb. (1 Kor. 5:6) Machane, faanra ngam athamgil ni ngam mel’eg ba mit e fafel nge n’en ni ma chuweg e chalban nib fel’, ma rayog ni ngam ayuweg chon e tabinaw rom nge yag ni ngam felfelan’gad u taabang.b Ga ra rin’ ni aram rogon, ma dabi palog e tha’ u thilmew Jehovah.

THA’ U THILIN E GIRDI’ U LAN E TABINAW

16, 17. Mang e ke k’aring e kireban’ ngak boor e gallabthir? Uw rogon ni ngad nanged ni manang Jehovah e kireban’ ni yad be tay?

¹⁶ Ba puluw ni bay u t’ufeg u thilin reb e gallabthir nge bitir rok. Ke yog Jehovah nib t’uf rok e girdi’ rok ni bod rogon reb e matin ni ma t’ufeg fak. (Isa. 49:15) Ere faanra bay reb i chon e tabinaw rodad ni ke pag Jehovah, ma ra kireban’dad nib gel. Reb e walag ni ppin ni kan tharbog fak ni be’ nib ppin ko ulung e yog ni gaar: “Ke kireban’ug nib gel. Gu ma yog u lanin’ug ni, ‘Mang fan ni ke pag fakag Jehovah?’ Gu ma lemnag ni gag e kireb rog.”

¹⁷ Manang Jehovah e kireban’ ni ga be tay. “Kari kolngan’” Jehovah u nap’an ni ke togopuluw e bin som’on e girdi’ ni ke sunmiy. Ma ki kireban’ ni yooren e girdi’ e dar motoyilgad ngak Noah u m’on ni nge yib fare Ran ni nge tharey e fayleng. (Gen. 6:5, 6) Piin ndawori buch rorad ni aram rogon e sana darur nanged feni rib gel e kireban’ riy. Machane bay e riya’ riy nfaanra ngam pag e ngongol nib kireb ni ke rin’ reb i chon e tabinaw rom ni nge palognagem rok Jehovah. Ere, uw rogon ni ga ra athamgil nfaanra ke pag reb i chon e tabinaw rom Jehovah?

18. Mang fan ni piin gallabthir e thingar dab ron’ed e kireb nga dakenrad nfaanra ke pag e bitir rorad Jehovah?

¹⁸ Dab mon’ e kireb riy nga dakenam. Urngin girdien reb e tabinaw ni kan taufenagrad e thingari be’ me i ‘fek gilban’ ma ir e ra dugliy ko ra pigpig ngak Jehovah, fa danga’. (Gal. 6:5) Ma tay Jehovah ni en ni ke denen e ir e kireb rok, ma dabi yon’ e kireb riy nga dakenam. (Ezek. 18:20) Maku dab mon’ e kireb riy nga daken yugu boch e girdi’. Ngam tay fan rogon ni be llowan’nag Jehovah e girdi’ rok. Dab mon’ e kireb nga daken e piin piilal ni yad be ayuweg ni nge dabi af e ngongol nib kireb ngak girdien e ulung. Machane, ngam togopuluw ngak fare Moonyan’, ma dab mu pag e re n’ey ni nge kirebnag e tha’ u thilmew Jehovah.​—1 Pet. 5:8, 9.

19, 20. (a) Uw rogon, ma piin gallabthir rok e pi bitir ni kan tharbograd ko ulung e rayog ni ngar athamgilgad u nap’an ni ke kireban’rad? (b) Mang e thingar ra athapeged?

¹⁹ Ere mang e ra buch nfaanra kam lemnag ni ngam damumuw ngak Jehovah nbochan e n’en ni ke buch rok e bitir rom? Re n’ey e rayog ni nge palognagem rok Jehovah. Ere rib t’uf ni nge nang girdien e tabinaw rom ni kam dugliy u wan’um ni ngam gelnag boch e t’ufeg rom ngak Jehovah ko t’ufeg rom ngorad. Ere ngam maruwel nib elmerin ni nge fel’ e tha’ u thilmew Jehovah ya nge yag ni ngam athamgil u nap’an ni ke kireban’um. Ngaum chag ngak e pi walagdad u lan e ulung ni gubin ngiyal’. (Prov. 18:1) Ngam meybil ngak Jehovah, mag weliy ngak rogon e lem rom u fithik’ e yul’yul’. (Ps. 62:7, 8) Dab mu tawey ni ngam togopuluw ko motochiyel rok Jehovah ni bay rogon ko girdi’ u lan e ulung ni kan tharbograd. Dab da lemnaged ni ngad ted e tayim ni fan e ngad chaggad ngak reb i chon e tabinaw rodad ni kan tharbog ara ngad nonad ngak u daken e e-mail ara telefon. (1 Kor. 5:11) Ngam yoornag boch e tayim ni fan ko maruwel ni ke pi’ Jehovah ngom. (1 Kor. 15:58) Fare walag ni ppin ni kan weliy murung’agen e yog ni gaar: “Gu manang nib t’uf ni nggu yoornag boch e pigpig ni gu be tay ni fan ngak Jehovah, ma nggu athamgil ni nge par nib gel e michan’ rog, ya nap’an nra sul e bitir rog ngak Jehovah ma rayog ni nggu ayuweg.”

²⁰ Be yog e Bible ni be’ nib t’uf Got rok nge girdi’ e dabiyog ni nge pag ir ni nge “dab ki l’agan’.” (1 Kor. 13:4, 7) Ere dariy e kireb riy ni ngam athapeg be’ nib t’uf rom e ra sul ngak Jehovah. Gubin e duw, ma boor e girdi’ ni kan tharbog ko ulung ni kar kalgadngan’rad ma kar sulod ko ulung rok Jehovah. Ma tomuren ni kar kalgadngan’rad ma daki damumuw Jehovah ngorad ya ma “n’ag fan” e kireb u wan’.​—Ps. 86:5.

NGAM DUGLIY BAN’EN NIB FEL’ ROGON

21, 22. Uw rogon ni ngam dugliy ban’en?

²¹ Jehovah e ke pi’ mat’awun e girdi’ ni ngar dugliyed ban’en. (Mu beeg e Deuteronomy 30:19, 20.) Machane, re n’ey e be yip’ fan nib mil fan ngodad ni ngad dugliyed boch ban’en nib fel’ rogon. Ere urngin e Kristiano nthingari fith ir ni gaar: ‘Gu ma dugliy ban’en ni be ayuwegeg ya nge yag ni nggu par ko bin nib mat’aw e kanawo’? Gu be pag e maruwel rog, nge fafel, nge pi n’en ni ma chuweg e chalban, ara tha’ u thilmad girdien e tabinaw rog ni nge palognageg rok Jehovah?’

²² Jehovah e dabi tal i t’ufegdad. Ya kemus nfaanra gad ra dugliy ni ngad ngongliyed ban’en nib kireb, ma aram e rayog ni ngad palognaged gadad rok. (Rom. 8:38, 39) Machane, susun ndabi buch ban’en ni aram rogon! Ngam athamgil ni nge dariy ban’en ni nge palognagem rok Jehovah. Bin migid e article e ra weliy murung’agen aningeg i ban’en ko yafas rodad nib t’uf ni ngad kol ayuwgad riy u rogon ni ngad dugliyed ban’en.