Ngari Fel’ u Wan’um Pi Fel’ngin Jehovah

1. (a) Mang boch i fel’ngin Jehovah nrayog ni nge yib ngan’um? (b) Mang angin nra yib ngom ni faan ga ra fil murung’agen pi fel’ngin Got?

NAP’AN ni ga ra lemnag murung’agen Jehovah, ma mang boch i fel’ngin ni ma yib ngan’um? Sana ra yib ngan’um ni ir e Got ko t’ufeg, mab mat’aw, mab gonop, mab gel gelngin. Gad manang ni ka boor fel’ngin Jehovah ni bay. Bin riyul’ riy, e kab kafram i yib ni ke pag 40 e pi fel’ngin Jehovah nib thilthil ni ma weliy e pi babyor rodad murung’agen. Am lemnag urngin ban’en ni ga ra fil u murung’agen Jehovah ni faan ga ra fil murung’agen e pi fel’ngin ney ni goo gur ara gimed chon e tabinaw rom! Re n’ey e ra ayuwegem ni nge ga’ fan e pi fel’ngin ney u wan’um. Angin nra yib riy e ga ra adag ni ngam folwok rok Jehovah me chugur e tha’ u thilmew.​—Josh. 23:8; Ps. 73:28.

2. (a) Mu weliy rogon nra ga’ fan pi fel’ngin Jehovah u wan’dad ni faan gad ra fil murung’agen. (b) Mang e gad ra weliy ko biney e article nge gal ni migid?

² Uw rogon ni ngad filed rogon ni nge ga’ fan ban’en u wan’dad? Am susunnag ni ga be kay ba mit e ggan ndawor mu kay bayay. Som’on e kam faray bon fare ggan mab fel’ bon. Ngemu’ mag ri’ ma rib fel’ lamen. Tomur riy mag lith. Ku er rogon pi fel’ngin Jehovah nrayog ni ngari ga’ fan u wan’dad ni faan gad ra fil murung’agen, ma gad fal’eg i lemnag rogon ni ma dag Jehovah e pi fel’ngin nem, ngemu’ ma gad guy rogon ni nge m’ug ko ngongol rodad. (Efe. 5:1) Biney e article nge gal ni migid e gad ra weliy riy boch i fel’ngin Jehovah. Ra reb e pi fel’ngin ney ma gad ra weliy dalip e deer ni bay rogon ngay, ni aram e: Mang e be yip’ fan e re fel’ngin ney? Uw rogon ni ma dag Jehovah? Ma uw rogon ni ngad folwokgad rok Jehovah u rogon ni nga i m’ug e re fel’ngin ney ko ngongol rodad?

BA MOM NI NGAN NON NGAK JEHOVAH

3, 4. (a) Uw rogon be’ nib mom ni ngan non ngak? (b) Uw rogon ni ma dag Jehovah ni ir be’ nib mom ni ngan non ngak?

³ Som’on e ngad weliyed rarogon be’ nib mom ni ngan non ngak. Be’ ni aray rogon e ba gol, ma gathi kaygi yoor pa’ u puluwon ndabiyog ni ngan non ngak. Be’ nib mom ni ngan non ngak e ma m’ug ko thin rok, nge owchen, nge ngongol rok ni baadag ni nge motoyil me pi’ e ayuw.

⁴ Ba mom ni ngan non ngak Jehovah. Yugu aram rogon ni Ir e th’abi gel gelngin u ga’ngin e palpalth’ib, ma ma pi’ e athamgil nga lanin’dad ni ngaud meybilgad ngak. Ma motoyil ko meybil rodad ma ma ayuwegdad. (Mu beeg e Psalm 145:18; Isaiah 30:18, 19.) Demtrug ngal’an nge gin’en ni gad bay riy, ma rayog ni ngad nonad ngak Jehovah u n’umngin nap’an ni gad baadag. Der ma chalban ni gad ma non ngak. (Ps. 65:2; Jas. 1:5) Be weliy e Bible murung’agen Jehovah u reb e kanawo’ nra momnag ngodad ni ngad nonad ngak u daken e meybil. Bod ni yog David ni ma ‘yaliydad’ Jehovah ma ma ayuwegdad ko ba’ ni mat’aw i “pa’.” (Ps. 34:15, BT; 63:8) Me yog Isaiah ni profet ni Jehovah e bod reb e tachugol saf. I yog ni gaar: “Bayi kunuy fapi fak e saf nga taabang, ngi i fekrad ni ke dibeyrad.” (Isa. 40:11, BT) Aygum lemnag! Baadag Jehovah ni ngad chugurgad ngak ni bod reb e tachugol saf ni be dibey ba fak e saf. Faan gad ra lemnag e Chitamangidad nu tharmiy ni aray rogon, ma ra gel feni t’uf rodad! Ere, uw rogon ni ngad boded Jehovah ko re kanawo’ ney?

BA FEL’NGIN NIB GA’ FAN KO PIIN PIILAL

5. Mang nib ga’ fan ni nge mom ni ngan non ngak e piin piilal?

⁵ Dawori n’uw nap’an ma kan fith boch e Pi Mich Rok Jehovah u boch e nam nu fayleng ni lunguy, “Mang e re fel’ngin nri ga baadag ni ma dag reb e piilal?” Yooren i yad e fulweg ni gaar, “Gu baadag ni faanra ir be’ nib mom ni ngan non ngak.” Riyul’ ni gad gubin nib t’uf ni ngad maruweliyed e re fel’ngin ney, machane piin piilal e yad e th’abi ga’ fan ni ngar maruweliyed. (Isa. 32:1, 2) Mang nib ga’ fan ni nge mom ni ngan non ko piin piilal? I yog reb e walag nib pin ni faanra ba mom ni nge non ngak reb e piilal ma aram e rayog ni nang boch i fel’ngin nib fel’. Riyul’ e re n’ey. Ere, mang e ga ra rin’ me mom rok boch e girdi’ ni ngar nonad ngom?

6. Mang reb e kanawo’ nrayog ni ngam momnag ngak boch e girdi’ ni ngar nonad ngom?

⁶ Reb e kanawo’ ni ngam rin’ e re n’ey riy e aram e ngam dag nriyul’ ni ga be lemnag boch e girdi’ ma ga baadag ni ngam ayuwegrad. Ga ra rin’ ni aray rogon, ma ra mom ko pi walag nib muun e piin fel’ yangaren ngay ni ngar nonad ngom. (Mark 10:13-16) Reb e pagel ni 12 e duw rok ni Carlos fithingan e yog ni gaar: “Gu ma fal’eg i yaliy e piin piilal u Kingdom Hall ni yad ma siminmin ma yad ma ngongol u fithik’ e sumunguy, ma aram reb e ban’en ni gu baadag rorad.” Ere, de gaman ni kemus ni nge yog reb e piilal ni baadag ni nge motoyil me pi’ e ayuw, ya thingar ki m’ug ko ngongol rok. (1 John 3:18) Uw rogon nrayog ni nge rin’ e re n’ey?

7. Mang fan nib mom rok boch e girdi’ ni ngar nonad ngodad u nap’an ni kad ted e badge ko convention ko mad rodad? Mang e rayog ni ngad filed ko re n’ey?

⁷ Am lemnag ban’en ni ke buch: Immoy reb e walag ni yan ni nge un nga reb e convention ni ngan tay u yugu reb e nam. Nap’an ni bay u sikoki ni be milekag i yan ko gi n’em ni ngan tay e muulung riy, me tay e badge rok ko mad rok ni bay fapi thin riy ni “Nge Yib e Gagiyeg rok Got!” Nap’an ni guy be’ nib pumoon ni ma maruwel u lan e sikoki e badge ko fare walag, me gaar, “Nge Yib!” Tomuren e re n’ey me tabab fare walag i machibnag fare pumoon, ma aram me fek boch e magazine rodad. Mang fan nib mom ni nge non e girdi’ ngodad u nap’an ni kad ted e badge ko convention ko mad rodad? Bochan ni fapi badge ni gad ma tay ko mad rodad e ma k’aring e girdi’ ni ngar lemnaged ko uw e gad be yan i yan ngay, maku be dag ngorad ni gad baadag ni ngad weliyed ngorad murung’agen e pi n’en ni ke mich u wan’dad. Ku er rogon e piin piilal ni gubin ngiyal’ ma thingar ra daged ko pi walag ni yad baadag ni ngar nonad ngorad. Mang boch e kanawo’ nrayog ni nge rin’ e piin piilal e re n’ey riy?

8. Uw rogon ni nge dag e piin piilal nriyul’ ni yad ma lemnag boch e girdi’? Uw rogon e re n’ey u wan’ e girdi’ u lan e ulung?

⁸ Yooren e nam e rayog ni ngam dag riy ni ga be lemnag e pi walag ni faan ga ra sap ngorad mag siminmin, ara mu rurug pa’rad, ara mu fingichiyrad. Susun ni mini’ e som’on ni nge rin’ e re n’ey? Be yog e Bible nnap’an ni muulung Jesus nge pi gachalpen nga taabang, me ‘chuchugur ngorad me non ngorad.’ (Matt. 28:18) Ku er rogon e ngiyal’ ney nrayog ni nge yan e piin piilal ngak boch e girdi’ ngar nonad ngorad. Faanra rin’ e piin piilal e re n’ey, ma ra uw rogon u wan’ e girdi’ u lan e ulung? I yog reb e walag nib pin nib pioneer ni ke gaman 88 e duw rok ni gaar: “Gu baadag daken e piin piilal ni bochan e nap’an ni gu ra yib nga Kingdom Hall nra sapgad ngog mi yad siminmin mi yad yog boch e thin ngog ni ma pi’ e athamgil nga lanin’ug.” Ki yog reb e walag nib pin ni gaar: “Ri gu ma felfelan’ u nap’an nra sap reb e piilal ngog me siminmin me pining e magar ngog ni ku gub ko muulung.”

MU TAY E TAYIM NI NGAM NONAD E PI WALAG

9, 10. (a) Mang e ma rin’ Jehovah nib fel’ ni ngad folwokgad riy? (b) Uw rogon nrayog ni nge folwok e piin piilal rok Jehovah?

⁹ Riyul’ ni faanra gad baadag ni nge mom rok boch e girdi’ ni ngar nonad ngodad, ma thingar da ted e tayim ni fan ngorad. Rayog ni ngad folwokgad rok Jehovah ko re n’ey. Be gaar e Bible: “Dariy bagadad nib mal’af Got rok nga orel.” (Acts 17:27) Reb e kanawo’ nrayog ni nge folwok e piin piilal rok Jehovah riy e aram e ngaur nonad ko pi walag u m’on ngu tomuren e muulung ni tin nib pilibthir nge mada’ ko tin nib bitir. I yog reb e walag ni pumoon nib pioneer ni gaar: “Gu ma felfelan’ u nap’an nra fith reb e piilal salpeg me motoyil ko n’en ni nggog.” Reb e walag nib pin ni ke chugur ni nge gaman 50 e duw ni ke pigpig ngak Jehovah e yog ni gaar: “Gu ma lemnag nib ga’ fag ni bochan e ma tay e piin piilal e tayim ni ngar nonad ngog u tomuren e muulung.”

¹⁰ Riyul’ ni boor e maruwel ko piin piilal. Machane, susun ni ngar ted e tayim ni fan ngak e pi walag u m’on ngu tomuren e pi muulung.

TAAREB ROGON URNGIN E GIRDI’ U WAN’ JEHOVAH

11, 12. (a) Mang e be yip’ fan ni nge taareb rogon urngin e girdi’ u wan’uy? (b) Uw rogon ni be dag e Bible ni Jehovah e taareb rogon urngin e girdi’ u wan’?

¹¹ Ku reb i fel’ngin Jehovah nrib fel’ e ba taareb rogon urngin e girdi’ u wan’. (Acts 10:34) Mang e be yip’ fan ni nge taareb rogon urngin e girdi’ u wan’uy? Be yip’ fan ni nge urngin e girdi’ ma ngaud ngongolgad ngorad ni taareb rogon. Faanra gad baadag ni nge taareb rogon urngin e girdi’ u wan’dad ma thingari mich u wan’dad ni urngin e girdi’ ma thingar ni ngongol ngorad ni taareb rogon. Be’ ni taareb rogon e girdi’ u wan’ e der ma lemnag ni bay boch e girdi’ ni kab fel’ nga boch ni bochan yaarad ara urngin e salpiy rorad. Ya taareb rogon ni ma lemnagrad ni demtrug ko yad ba miti mang girdi’.

¹² Jehovah e ir e ke dag e bin th’abi fel’ e kanawo’ ngodad u rogon ni ngi i taareb rogon e girdi’ u wan’dad. Be yog e Thin rok ni “gubin e girdi’ ma taareb rogorad u wan’” ma “der ma laniyan’.” (Mu beeg e Acts 10:34, 35; Deuteronomy 10:17.) Ngad weliyed ban’en ni be dag nriyul’ e re n’ey.

13, 14. (a) Mang e magawon rok fa lal i ppin ni fak Zelofehad? (b) Uw rogon ni ke dag Jehovah ni taareb rogon urngin e girdi’ u wan’?

¹³ U m’on ni taw piyu Israel ko fare Nam ni Kan Micheg, ma immoy lal i ppin ni fak Zelofehad ni bay e magawon rorad nib t’uf ni ngan pithig. Mang e re magawon nem? Ke yim’ e chitamangirad ma dabiyog ni ngar tafnayed e pi binaw ni tafen. Mang fan? Ya rogon ni bay ko Motochiyel e kemus ni piin pumoon e rayog ni ngar tafnayed e pi binaw ni tafen e chitamangirad. Machane, pi ppin ney e ke yim’ e chitamangirad ni dariy e pumoon ni fak. (Num. 26:33, 52-55) Ere gur, kan pi’ fa yungi binaw ko girdi’ rorad? Mang e rayog ni nge rin’ fapi ppin ni fak Zelofehad?

¹⁴ Ka ranod ngak Moses mar ninged e ayuw ngak nra gaargad: “Mang fan ni nge chuw fithingan e chitamangimad u fithik’ e girdi’ nu Israel, bochan e dariy e pagel ni fak?” Ere, mang e rin’ Moses? Gur ke gaar, ‘Aram rogon ni bay ko motochiyel, ere dariy ban’en nrayog ni nggu ayuwegmed riy’? Danga’, ya ke weliy fare magawon ngak Jehovah. (Num. 27:2-5, BT) Mang e yog Jehovah? I gaar ngak Moses: “Ba mat’aw e n’en ni ke yog fapi ppin ni fak Zelofehad; mu pi’ ngorad e binaw ni nge mil suwon ngorad u lan tafen girdien e chitamangirad. Mu pag e gayog rok e chitamangirad nge yan ngorad.” Gathi kemus e n’en ni rin’ Jehovah, ya ki yog ngak Moses ni nge tay e pi thin ni baaray ko Motochiyel ni gaar: “[Ra] yim’ be’ nib moon, ndariy e pagal ni fak, ma ppin ni fak e nge tafanay tafen.” (Num. 27:6-8, BT; Josh. 17:1-6, BT) Ka aram nap’an ma urngin e ppin nu Israel ni aram rogorad e ku yira pi’ e f’oth rorad.

15. (a) Uw rogon e ngongol rok Jehovah ko girdi’ rok nib muun ngay e piin ndariy be’ nra ayuwegrad? (b) Ku mang boch e chep u lan e Bible ni be tamilangnag ni taareb rogon urngin e girdi’ u wan’ Jehovah?

¹⁵ Riyul’ ni ireray ban’en ni kan rin’ ndariy e laniyan’ riy! Dariy be’ nra ayuweg fa lal i ppin ni fak Zelofehad, machane ke tay Jehovah farad ma ke ayuwegrad ni bod rogon ni ma ayuweg e tin ka bay e girdi’ nu Israel. (Ps. 68:5) Ireray reb ko pi chep nu Bible ni be tamilangnag ni taareb rogon urngin e girdi’ u wan’ Jehovah.​—1 Sam. 16:1-13; Acts 10:30-35, 44-48.

RAYOG NI NGAD FOLWOKGAD ROK JEHOVAH

16. Uw rogon ni nge taareb rogon urngin e girdi’ u wan’dad ni bod rogon Jehovah?

¹⁶ Uw rogon ni nge taareb rogon urngin e girdi’ u wan’dad ni bod rogon Jehovah? Dab mu pagtalin nrayog ni nge taareb rogon urngin e girdi’ u wan’dad ni faanra ba mich u wan’dad ni urngin e girdi’ ma thingar ni ngongol ngorad ni taareb rogon. Sana ga be lemnag ni gur be’ ni taareb rogon urngin e girdi’ u wan’um. Machane, yu ngiyal’ e ba mo’maw’ ngodad ni ngad nanged rogon ni gad ma lemnag boch e girdi’. Ere, uw rogon ma gad nang nriyul’ ni taareb rogon urngin e girdi’ u wan’dad? Ba fel’ e kanawo’ ni ke dag Jesus ngodad. Nap’an ni adag ni nge nang e n’en ni be yog e girdi’ u murung’agen, me fith e pi fager rok ni gaar: “Be gaar e girdi’ e mini’ e en ni Fak e Girdi’?” (Matt. 16:13, 14) Sana rayog ni ngam mel’eg reb e fager rom nib yul’yul’ ngom mag fith ni lungum, ‘Ga be lemnag ma gu ma ngongol ko girdi’ ni taareb rogon? Ma lemnag e girdi’ ni gag be’ ni taareb rogon urngin e girdi’ u wan’ug, fa?’ Sana ra yog ngom ni bay yu ngiyal’ nib thil e ngongol rom ngak boch e girdi’ ni bochan e nam rorad, fa reb e ga ma dag ni bay boch e girdi’ ni kab ga’ farad nga boch ni bochan e boor e salpiy rorad ara ba tolang e skul rorad. Ere, faanra yog ban’en ni aram rogon ngom, ma mang e ga ra rin’? Mu meybil ngak Jehovah ni nge ayuwegem ngam thilyeg rogon ni ga ma lemnag boch e girdi’ ya nge yag nim bod Jehovah me taareb rogon urngin e girdi’ u wan’um.​—Matt. 7:7; Kol. 3:10, 11.

17. Mang boch e kanawo’ nrayog ni ngad daged riy ni taareb rogon urngin e girdi’ u wan’dad?

¹⁷ Rayog ni ngad folwokgad rok Jehovah ni aram e ngaud ngongolgad ngak urngin e girdi’ u lan e ulung u fithik’ e tayfan nge sumunguy. Bod ni nap’an ni ga ra pining boch e walag nga tabinaw rom ma rayog ni ngkum pining boch e walag nib thilthil e nam rorad. Fa reb e ku rayog ni ngam pining e piin nde yoor salpiyrad, ara piin ni ke yim’ figirngirad, ara piin fel’ yangaren nder un e gallabthir rorad ko tin riyul’. (Mu beeg e Galatia 2:10; James 1:27.) U nap’an e machib ma gad ma non ngak urngin mit e girdi’ ni kub muun e girdi’ u yugu boch e nam ngay. Ulung rok Jehovah e ma ngongliy boch e babyor nib puluw e thin riy ko Bible u boor ko 600 mit e thin. Ere, boor e kanawo’ nrayog ni ngad daged riy ni taareb rogon urngin e girdi’ u wan’dad!

18. Faanra um fal’eg i lemnag rogon feni mom ni ngan non ngak Jehovah nge rogon nib taareb rogon urngin e girdi’ u wan’, ma mang e ga ra adag ni ngam rin’?

¹⁸ Faanra ud fal’eged i lemnag rogon feni mom ni ngan non ngak Jehovah nge rogon nib taareb rogon urngin e girdi’ u wan’, ma ra ga’ fan e gal fel’ngin ney u wan’dad. Angin nra yib riy e gad ra adag ni ngad folwokgad rok Jehovah ngaud daged e pi fel’ngin ney u daken e ngongol rodad ngak pi walagdad nge piin ni gad ma mada’nagrad u nap’an e machib.