Piin Piilal, Gimed Ra Pasignag Laniyan’ e “Piin ni Ke Aw Porowrad”?

Reb e walag ni Angelaa fithingan ni ke gaman 30 e duw rok e be par nib magafan’. Ya be sonnag e piin piilal ni ngar nonad. Gur, mang e yad ra yog ngak? Riyul’ ni bay in e muulung nde yag ni nge un ngay ni bochan nra mu’ ko maruwel rok ma ke aw porowan, ya maruwel rok e ma ayuweg e piin ni kar pilibthirgad. Maku be magafan’ ko nina’ rok ni kub m’ar.

Faan ga ra yan ni ngam guy Angela, ma uw rogon ni ga ra pi’ e athamgil nga laniyan’ ni bochan ni ke ‘aw porowan’? (Jer. 31:25) Som’on, ma uw rogon ni ga ra fal’eg rogom ni ngam man ni ngam guy be’ mag pi’ athamgil nga laniyan’?

MU LEMNAG RAROGON E PI WALAG

Bay yu ngiyal’ ni ma aw porowdad ni bochan e maruwel ni gad ma un ngay ya nge yag e salpiy ngodad nge ku boch e maruwel nib mil fan ngodad u lan e ulung. Bod rogon Daniel ni profet ni lemnag ni gowa kan ‘nchuchuy nga but’’ u nap’an ni piliyeg e changar rok nge guy boch ban’en nde nang fan. (Dan. 8:27) Ma nap’an ni m’ug fare engel ni Gabriel ngak Daniel me ayuweg. Got e l’og e re engel nem ni nge tamilangnag ngak Daniel ni be motoyil Jehovah ko meybil rok, ma kab “t’uf rok Got.” (Dan. 9:21-23) Ma boch nga tomuren ma pi thin nem e ke pi’ e athamgil nga laniyan’ Daniel ni profet.​—Dan. 10:19.

Ni bod u m’on ni ngan yan ngan guy reb e walag ni ke aw porowan ara ke mulan’, mab fel’ ni ngan lemnag rarogon. Mang e pi magawon ni be mada’nag? Uw rogon ma pi magawon rok e be k’aring ni nge mulan’ ara nge m’ay gelngin? Mang pi fel’ngin e re walag nem ni ma dag? Richard ni ke pag 20 e duw ni ke mang reb e piilal e yog ni gaar: “U m’on ni nggu wan’ guy reb e walag ma gu ma lemnag pi fel’ngin.” Miki ulul ngay ngki gaar: “Ra gu lemnag rarogon mab mom rog ni nggu weliy reb e thin ni nge yag ni nggu pi’ e athamgil ngak nib m’ag ko magawon rok.” Faanra ra un reb e piilal ngom ni ngam guyew reb e walag, mab fel’ ni ngam lemnagew rogon e magawon rok?

MU FAL’EG LANIYAN’ E PI WALAG

Dabisiy nfaanra ngam weliy ban’en u murung’agem, ma ga ra tamra’. Ni bod ni: Nap’an nra yan e piin piilal ni ngar guyed reb e walag ma sana ba mo’maw’ rok fare walag ni nge weliy laniyan’. Ere, uw rogon ni ngam ayuweg nge yag ni nge weliy e magawon rok? Ga ra siminmin, ma gog boch e thin nra pi’ e athamgil nga laniyan’. Micheal ni ir reb e piilal ni ke pag 40 e duw, e ba ga’ nra yan ni nge guy reb e walag ma ma yog ni gaar “Reb e ban’en nrib fel’ ni ma rin’ e piin piilal e yad ma yan ni ngar mada’gad e pi walag u tabinaw rorad, ya nge yag ni ngar nanged yad nib fel’ rogon. Ere, kug felfelan’ ni ke yag ni nggub ni guyem e daba’.”

Rayog ni ngam meybil u m’on ni ngam guy reb e walag. I tamilangnag apostal Paul ko meybil rok murung’agen e michan’ nge t’ufeg nge athamgil ni i dag e pi walag. (1 Thess. 1:2, 3) Ma nap’an ni ga ra weliy e n’en ni bay u gum’irchaem u murung’agen pi fel’ngin fare walag, ma rayog ni nge fel’ lanin’um miki fel’ laniyan’ fare walag, me yag ni fel’ e numon u thilmew. Thin rom e ku rayog ni nge fal’eg laniyan’ be’. Ku bay reb e piilal ni Ray fithingan ni yog ni gaar: “Bay yu ngiyal’ ni gamad ma pagtalin feni rib ga’ fan e re maruwel ney ni gamad be rin’, machane, nap’an ni yira puguran ngomad, ma gamad ma felfelan’ ngay.”

MU WELIY E THIN ROK GOT NGAK E PI WALAG

Rayog ni ngam weliy e “thin rok Got” ngak be’ ni bod rogon ni rin’ Paul. (Rom. 1:11) Ni bod reb e walag nib pumoon ni ke mulan’, ma ke lemnag ni dakuriy fan ni bod rogon fare psalmist ni ke taarebrogonnag ir nga ba “tafen e wayin ni kan n’ag” (Ps. 119:83, 176, BT) Ma tomuren ni kam weliy fan e re thin nem, ma rayog ni ngam tamilangnag nib pagan’um ni ‘dawori pagtalin’ fare walag e pi motochiyel rok Got.

Maku rayog ni ngan ayuweg reb e walag nib pin ni ke malog ko ulung ara daki pasig ko pigpig ngak Jehovah u nap’an ni yira weliy fare fanathin ngak u Bible ni murung’agen fare taare salpiy ni wasey rok be’ nib pin ni ke yan nga bang, me tay e nifiy ko magal ya nge gay. (Luke 15:8-10) Re salpiy ni wasey nem e bang u ba kiy churuwo’ ni boor e salpiy ni wasey ni bay riy, me thay reb nge yan nga bang. Ere, nap’an ni ga ra weliy murung’agen e re fanathin nem, ma rayog ni ngam ayuweg fare walag nib pin ni nge nang nib ga’ fan u lan e ulung ni Kristiano. U tomuren ni kam weliy e re n’ey, ma rayog ni ngam tamilangnag feni rib t’uf rok Jehovah ni bod rogon reb e saf.

Pi walag u lan e ulung e ba ga’ ni yad baadag ni ngar weliyed e tafinay rorad u murung’agen e thin ni bay u Bible. Ere, dab mu lemnag ni kemus ni yigoo gur e ngam non. U tomuren ni kam beeg reb e thin nu Bible ni bay rogon ko magawon rok reb e walag, ma rayog ni ngam mel’eg reb e thin ara boch e thin ko fare verse nrayog ni nge weliy fare walag laniyan’ riy. Ni bod u tomuren ni ke beeg reb e piilal fare thin ko 2 Korinth 4:16, ma rayog ni nge fith ni gaar, “Mang reb e kanawo’ nra fal’eg Jehovah lanin’um riy?” Ma re n’ey e rayog ni ‘fel’ rogon fare walag riy, ma er rogon fare piilal nra fel’ rogon riy.’​—Rom. 1:12.

Maku rayog ni ngam weliy murung’agen be’ u Bible ni taareb rogon e magawon rorow fare walag nrayog ni nge pi’ e athamgil nga laniyan’. Reb e walag ni kari kireban’ e rayog ni nge taarebrogonnag ir ngak Hannah ara Epafroditus ni bay yu ngiyal’ ni kari kireban’row, machane kar parew ni yow ba t’uf rok Jehovah. (1 Sam. 1:9-11, 20; Fil. 2:25-30) Mang fan ni dab mu weliy boch e chep u Bible ni faanra rayog?

NGAM NAMEG NI NGAM SUL

Rayog ni ngam dag nib ga’ fan reb e walag u wan’um nfaanra ngam sul ni ngam guy. (Acts 15:36) Ma tomuren ni kam nonow, mab fel’ ni ngam puruy’ nigew ba ngiyal’ ni ngam marow ko machib u taabang. Bernard e ke n’uw nap’an ni ke mang reb e piilal, ma ke yog ni nap’an nra mada’nag reb e walag ni ke yan i guy u m’on, ma ma fith ngak ni gaar “ke uw rogom boch?” Nap’an ni ga ra dag nib ga’ fan reb e walag u wan’um, ma rayog ni ngam nang ko ba t’uf e ayuw rok fa.

Ngiyal’ ney ma pi walagdad e ba ga’ fan ni ngar nanged nib ga’ farad, ma yibe lemnagrad, ma yibe t’ufegrad. (1 Thess. 5:11) Ere, u m’on ni ngam man ni ngan guy reb e walag nga tafen, mab fel’ ni ngam fal’eg i lemnag rarogon e magawon rok. Mu pi’ e meybil riy. Mag mel’eg e thin nu Bible nib puluw ko magawon rok. Ma aram e ga ra nang e n’en ni nga mog me yag nim ayuweg e “piin ni ke aw porowrad”!