PI DEER NI BAY E FULWEG RIY U BIBLE

Uw rogon ni nge yag e felfelan’ nga lan e mabgol?

Fonow ni bay ko thin rok Got u Bible u murung’agen rogon ni nge yag e felfelan’ nga lan e mabgol e ma yib angin nbochan ni ke yib rok Jehovah Got, ni ir e Sunumeg e mabgol. Ma fil rogon ngodad ni nge yag boch e pi fel’ngin nib t’uf nra yibnag e felfelan’ nga lan e mabgol rodad maku ma pi’ e ginang ngodad u rogon e pi lem nrayog ni nge kirebnag e tha’ u thilin ba wu’ i mabgol. Maku ma fil ngodad rogon ni ngaud nonad e en mabgol rodad, ya nge yag ni gel boch e felfelan’ u lan e mabgol rodad.​—Mu beeg e Kolose 3:8-10, 12-14.

Piin figirngiy nge piin leengiy e susun ni ngaur ted farad. Faanra fel’ u wan’ e en figirngiy nge en leengiy e maruwel rorow ni ke pi’ Got, ma yow ra felfelan’.​—Mu beeg e Kol 3:18, 19.

Mang e rayog ni nge ayuweg e mabgol?

Rayog ni nge par ba wu’ i mabgol nib fel’ nfaanra ba t’uf bagayow rok bagayow. Ke fil Got ngodad rogon ni ngad daged e t’ufeg. Ma Ir nge Jesus e rib fel’ rogon ni kar dagew e t’ufeg.​—Mu beeg e 1 John 4:7, 8, 19.

Faanra tay e en figirngiy nge en leengiy fan e mabgol ni reb e yaram rok Got, ma dabi wer e mabgol rorow. Ke sunumeg Got e mabgol ni nge par ni dabi wer, ya nge yag ni par girdien fare tabinaw ni yad ba felfelan’. Rayog ni nge par e mabgol ni dabi wer, ya ke sunmiy Jehovah e pumoon nge ppin ni ngar ayuwegew yow. Maku ke sunmiyrow u yaan nrayog ni ngar folwokgow rok u rogon ni dag e t’ufeg.​—Mu beeg e Genesis 1:27; 2:18, 24.