DEER KO PIIN MA BEEG

Gur, fare thin ni yog David ko Psalm 37:25 nge fare thin ni yog Jesus ko Matthew 6:33 e be yip’ fan ndariy ba ngiyal’ nra pag Jehovah be’ nib Kristiano ni nge gafgow ko ggan?

Ke yoloy David ni ‘dawori guy be’ nib fel’ ni gomanga ke pag Somol faanem, ara guy pi fak ni yad be man ggan.’ Ere, ke weliy David boch ban’en ni be yan u rogon e n’en ni buch rok. Ma manang ni Got e ma ayuwegey ni gubin ngiyal’. (Ps. 37:25) Machane thin ni yog David e gathi be yip’ fan ndariy reb e tapigpig rok Got ni dawori gafgow ara dabi yib e gafgow ngak.

Immoy yu ngiyal’ ni i mada’nag David boch e magawon nib mo’maw’. Ni bod e ngiyal’ ni mil rok Saul. Ngiyal’ nem e ke lich e ggan rorad e piin ni yad be un ngak, ma aram me yan i ning e flowa ni ngar ked. (1 Sam. 21:1-6) Ere, ngiyal’ nem e be yan David ni be gay e “ggan.” Yugu aram rogon ni aram e n’en ni buch rok, machane manang ndawori pag Jehovah. Ya bin riyul’ riy e dariy bang u Bible ni be weliy ni ke gafgow David ma be taman ggan.

Thin rok Jesus ni bay ko Matthew 6:33 e be micheg nra pi’ Got e tin nib t’uf ko pi tapigpig rok ni yad ba yul’yul’ ma yad be m’oneg Gil’ilungun Got ko yafas rorad. I yog Jesus ni gaar: “Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed [nib muun ngay e ggan, garbod, nge mad].” Machane, ki yog Jesus ni bochan e togopuluw maku rayog ni nge gafgow pi “walagen” ko bilig. (Matt. 25:35, 37, 40) Ireray e n’en ni buch rok apostal Paul. Immoy yu ngiyal’ ni i gafgow ko bilig nge belel.​—2 Kor. 11:27.

Ke yog Jehovah ngodad ni boor kanawoen e gafgow ni yira tay ngodad. Dabisiy nra pagdad ni ngad gafgowgad, ya nge yag ni tamilang nde riyul’ e n’en ni yog Moonyan’ u murung’agen e pi tapigpig rok Got. (Job 2:3-5) Ni bod boch e walag ni Kristiano ni ke par e yafos rorad u thatharen e riya’ u nap’an nni tayrad nga lan e Nazi concentration camp. Reb e ban’en ni kan rin’ ngak e Pi Mich ya nge dabkur pared ni yad ba yul’yul’ e aram e dan pi’ e ggan ngorad nib gaman. Pi Mich Rok Jehovah ni yad ba yul’yul’ e de pagrad Jehovah. Ke pagrad ni nga ranod u fithik’ boor mit e skeng, ni bod ni pag e tin ni ka bay e Kristiano ni nge yib boor mit e skeng ngorad. Machane, dariy e maruwar riy ni ma ayuweg Jehovah e piin ni yibe gafgownagrad ni bochan ni yad be pigpig ngak. (1 Kor. 10:13) Dab da paged talin fare thin ni bay ko Filippi 1:29 ni gaar: “Ya ke mel’egmed Got ni ngam pigpiggad ngak Kristus, ni gathi ke mus ni ngam pired nib mich u wun’med, machane ngku um gafgowgad ni fan ngak.”

Bod ni be yog fare thin ko Isaiah 54:17 ni gaar: “Dariy ba talin e cham nni ngongliy nra maad’ad ngom.” Re n’ey nge ku boch ban’en ni ke micheg Jehovah e be m’ug riy ni be ayuweg Got e girdi’ rok ni yad ba ulung. Machane, rayog ni nge mada’nag reb e Kristiano e skeng maku rayog ni ngan li’ nge yim’.