PI DEER NI BAY E FULWEG RIY U BIBLE

Mang e ma k’aring boor e girdi’ ni ngar lemnaged ni bay be’ ni ke Sunmiy urngin ban’en?

Sogonap’an 3,000 e duw ni ke yan, me yoloy be’ ni gaar: “Gubin yang rog ni gur e msunumiy.” (Psalm 139:13, 14) Faan ga ra lemnag rogon ni ma sum e bitir u taab cell, ma dabisiy ni ga ra ngat ngay. Boor e girdi’ ni yad ma yog nriyul’ ni bay be’ ni ir e ke Sunmiy urngin ban’en.​—Mu beeg e Psalm 139:13-17; Hebrews 3:4.

En ni sunmiy e palpalth’ib, miki sunmiy e fayleng ni nge par e girdi’ riy e ku ir e sunmiy urngin mit e yafas. (Psalm 36:9) Ke weliy murung’agen ko girdi’.​—Mu beeg e Isaiah 45:18.

Gur, kad bad ko gamanman?

Bay boch ban’en u rarogon downgin e girdi’ ni taareb rogon ko gamanman. Fan e re n’ey e bochan ni ke sunmiy Got e girdi’ nge gamanman ni ngar pared u fayleng. I sunmiy e bin som’on e girdi’ ko but’, ma gathi gamanman.​—Mu beeg e Genesis 1:24; 2:7.

Ku bay l’agruw e kanawo’ nib thil e girdi’ riy ko gamanman. Bin som’on e, rayog ko girdi’ ni ngar nanged, mar t’ufeged, mar ted fan e En ni Ke Sunmiy urngin ban’en. Ma bin migid e, dan sunmiy e gamanman ni nge par ndariy n’umngin nap’an, machane girdi’ e ni sunmiyrad ni ngar pared ndariy n’umngin nap’an. Machane, ma yim’ e girdi’ e chiney ni bochan e mel’eg e bin som’on e girdi’ ni nge dabi fol rok e En ni Ke Sunmiy.​—Mu beeg e Genesis 1:27; 2:15-17.