KENGGIN E RE KE BABYOR NEY | RAYOG NI NGAM NANG FAN E THIN NU BIBLE
Rayog ni Ngan Ayuwegem ni Ngam Nang Fan e Thin nu Bible
Am susunnag ni ka fin mman nga reb e nam ndanim mecham ko girdi’ riy, nge yalen riy, nge ggan riy, nge ku boch ban’en. Dabisiy nra chalbam.
Rayog ni ngkum lem ni aray rogon ko yay nth’abi som’on ni kam beeg e Bible. Ya boor ban’en ni ga ra beeg riy u murung’agen e pi n’en ni un rin’ kakrom ndanim mecham ngay. Ga ra beeg riy murung’agen boch e girdi’ ni ka nog piyu Filistia ngorad, nge murung’agen ban’en ni yima rin’ kakrom ni aram e yima ‘guchthiy e mad u dakeney,’ ara murung’agen ba mit e ggan ni ka nog e manna ngay. (Exodus 16:31; Joshua 13:2; 2 Samuel 3:31) Rayog ni nge balyangan’um ko pi n’ey. Ere, gathi ga ra adag ni nge ayuwegem be’ nge weliy ngom murung’agen e pi n’ey ni bod rogon u nap’an ni kam man nga reb e nam ndawor mman ngay bayay?
ROGON NNI AYUWEG E GIRDI’ KAKROM NI NGAR NANGED FAN E THIN NU BIBLE
Ka nap’an nni yoloy e Bible ko bin 16 e chibog ko B.C.E., ma un ayuweg e girdi’ ni ngar nanged fan e thin riy. Bod ni, Moses ni ir e en som’on ni i pow’iy fare nam nu Israel e “weliy fan” e n’en ni kan yoloy nga Bible ngak piyu Israel.—Deuteronomy 1:5.
Sogonap’an ragag e chibog nga tomuren ma ka immoy boch e girdi’ ni ur ayuweged e girdi’ ni ngar nanged fan e thin ni bay u lan e Babyor nib Thothup. Nap’an e duw ni 455 B.C.E., me muulung e pi Jew nga bangi ban’en u Jerusalem nib muun e piin bitir ngay. Ma aram me “beeg” e piin ni yad manang fan e thin ko fare Babyor nib Thothup e thin ni bay ko pi babyor nem ngorad. Machane, gathi kemus nra beeged e pi thin nem, ya kur ‘afweged ko bin baaram e thin ni manang e girdi’ fan.’—Nehemiah 8:1-8.
Lal e chibog nga tomuren, maku aray e n’en ni i rin’ Jesus Kristus. Bin riyul’ riy e, ma yog e girdi’ e tamachib ngak. (John 13:13) Ya i machibnag e girdi’ ni ke muulung nib pire’ nib pire’, maku i machibnag e girdi’ ni be’ nge be’. Immoy bayay ni fil boch ban’en ngak ba ulung i girdi’ ni kar muulunggad nga daken e burey. Re welthin rok nem e yima yog fare Welthin u Daken e Burey ngay, ma boor e girdi’ nra rung’aged e re welthin nem e ra gingad “nga rogon e machib ni ke tay.” (Matthew 5:1, 2; 7:28) U bang ko duw ni 33 C.E., me m’ug Jesus ngak l’agruw i gachalpen u nap’an ni yow be yan i yan nga reb e binaw nib chugur nga Jerusalem, me ‘weliy fan e thin ni bay u lan e babyor nib thothup ngorow.’—Luke 24:13-15, 27, 32.
Ku i fil pi gachalpen Jesus e Thin rok Got ko girdi’. Immoy bayay ni be beeg reb e tolang nu Ethiopia boch ban’en u lan fare Babyor nib Thothup, me yan Filip nreb i gachalpen Jesus ngak fare moon me gaar ngak: “Mog, ga be nang fan e pi n’ir ni ga be beeg?” Me fulweg fare moon nu Ethiopia ni gaar: “Uw rogon mu gu nang fan ni faanra dabi weliy be’ fan ngog?” Ma aram me weliy Filip fan fapi thin ngak.—Acts 8:27-35.
ROGON NI YIBE AYUWEG E GIRDI’ E NGIYAL’ NEY NI NGAR NANGED FAN E THIN NU BIBLE
Bay reb e maruwel ni ma rin’ e Pi Mich Rok Jehovah e ngiyal’ ney ni aram e yad ma fil e Bible ko girdi’ u 239 e nam ni bod rogon e n’en ni i rin’ e piin ni ur weliyed fan e thin nu Bible ko girdi’ kakrom. (Matthew 28:19, 20) Ba pag mereb e milyon e girdi’ ni yad ma ayuweg u gubin e wik ni ngar nanged fan e thin nu Bible. Boor ko pi girdi’ nem e darur uned ko pi yurba’ i teliw ni yad ma yog ni yad e Kristiano. Dariy puluwon e pi fol Bible ney ni yima tay, maku rayog ni ngan tay u tafen faen ni yibe fil e Bible ngak ara u bang ni baadag ni ngan fil e Bible riy ngak. Ku bay boch e girdi’ ni yima fil e Bible ngorad u telefon, ara computer, ara u cellphone.
Rayog ni nga mog ngak bagayad e Pi Mich Rok Jehovah ni nge weliy ngom rogon nrayog ni nge yib angin e re yaram ney ngom. Nap’an ni ga ra fil e Bible, ma ga ra nang ni Bible e ba ke babyor nrayog ni ngan nang fan e thin riy, ma “ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got,” ya nge yag ni ngar pared ni ‘ke bung rogorad nrayog ni ngar rin’ed urngin mit e ngongol nib fel’.’—2 Timothy 3:16, 17.
Mu yaliy fare video ni kenggin e Mang Fan ni Ngam Fil e Bible ni bay ko www.jw.org/yap
Mu yaliy fare video ni kenggin e What Happens at a Bible Study? ni thin ni Meriken ni bay ko www.jw.org
[Blurb ko page 6]
Rayog ni ngam downloadnag ba ken e Bible ko website romad ni www.jw.org ara mog ni ngan fil e Bible ngom
[Kahol ko page 7]
Boch e Ayuw Nrayog ni Ngan Pirieg ko Internet
Ga baadag ni ngam nang boch ban’en u Bible ni goo gur rom, fa? Faanra ga baadag, ma som’on e ngam man ko fare website ni jw.org. Boor ban’en u murung’agen e Bible ko re website nem ni kan pilyeg nga boor ko 700 mit e thin. Sana ga ra adag ni ngam nang boch ban’en u murung’agen e pi n’en ni baaray:
Boch e deer nib ga’ ni ma fith e girdi’
▪ Mang fan e yafas?
▪ Mang fan ni ma yim’ e girdi’?
▪ Mang e ma buch rok be’ u nap’an ni ke yim’?
(Mman ko fare thin ni kenggin e BIBLE TEACHINGS > BIBLE QUESTIONS ANSWERED)
Boch e magawon ni gad ma mada’nag
▪ N’en nrayog ni ngam rin’ u nap’an ni kari kireban’um
▪ Rogon ni ngam athamgil u fithik’ ba mit e m’ar ni ke yib ngom nib mo’maw’ ni nge chuw
▪ Magawon ko salpiy nge malfith
(Mman ko fare thin ni kenggin e BIBLE TEACHINGS > BIBLE QUESTIONS ANSWERED)
Ayuw ni fan ko tabinaw
▪ Rogon ni ngan taleg e tugthin
▪ Rogon ni ngan chuguliy e bitir me yag nra pared ni yad ba llowan’
▪ Rogon ni ngan fil ngak girdien e tabinaw e tin nib mat’aw ni ngar rin’ed
(Mman ko fare thin ni kenggin e BIBLE TEACHINGS > COUPLES & PARENTS)
Boch e fonow ni fan ko piin fel’ yangaren
▪ N’en ni nge rin’ reb e fel’ yangaren ni faanra bay be’ ni yugu be ngongol ara yugu be changar i dawol ngak
▪ N’en ni nge rin’ reb e fel’ yangaren ni faanra bay boch e taab yangar rok ni yad be gafgownag
▪ Rogon ni nge athamgil reb e fel’ yangaren u fithik’ e kireban’ ni be tay ni bochan e yigoo ir
(Mman ko fare thin ni kenggin e BIBLE TEACHINGS > TEENAGERS)