“Dab Mpaged Talin ni Ngam Ayuweged e Milekag”

1, 2. (a) Mang boch e magawon ni ma mada’nag boor e girdi’ ni ka yad bbeech nga reb e nam? (Mu guy e sasing ni bay u tabolngin e re article ney.) (b) Mang e yog apostal Paul, ma mang boch e deer ni ke sum ni bochan e re n’ey?

BA PAG 30 e duw ni ke yan, me taw be’ nu Ghana nga Europe ni ka nog Osei ngak^[1] ni gathi ir bagayad e Pi Mich Rok Jehovah. I yog ni gaar: “De n’uw nap’an nug taw e ngaram mug nang ni yooren e girdi’ u rom e darur lemnaged gag. Kug gin nga rogon e yafang u rom. Nap’an nug chuw u sikojio mug thamiy gelngin e garbeb, ma aram mug tabab ko meyor, ya dariy biid ni kug thamiy e garbeb ni aram feni gel.” Ba pag reb e duw nde yag rok Osei ni nge pirieg reb e maruwel nib fel’ puluwon ni bochan e ba mo’maw’ ngak ni nge mit e thin ko re nam nem ngak. Maku reb e, bochan ni bay u bang nib palog rok chon e tabinaw rok, ma aram mi i par nib kireban’ ni bochan e yigoo ir miki tawrengnagrad.

² Faanra gur facha’ ni kan weliy murung’agen u roy, mab miti mang ngongol e ga baadag ni ngan dag ngom? Gathi ga ra adag ni nge yib e girdi’ i non ngom u nap’an ni kam man nga reb e Tagil’ e Liyor ndawor mu un ko muulung riy bayay ni yugu aram rogon nib thil e nam rom ara raen dowam? Bin riyul’ riy e, be pi’ e Bible e athamgil nga laniyan’ e tin riyul’ e Kristiano ni gaar: “Dab mpaged talin ni ngam ayuweged e milekag.” (Heb. 13:2.) Ere, chiney e ngad weliyed e fulweg ko pi deer ni baaray ni be gaar: Uw rogon e pi milekag u wan’ Jehovah? Mang fan nib t’uf ni ngad thilyeged rogon ni gad ma lemnag e girdi’ ni aray rogon? Ma uw rogon nrayog ni ngad ayuweged e girdi’ u yugu boch e nam ni ka fin nra bad ra uned ko ulung rodad ni ngar nanged ni ka yad bang ko ulung rodad?

ROGON NI MA LEMNAG JEHOVAH E PI MILEKAG

3, 4. Uw rogon e re miti ngongol ni baadag Got ni nga i dag e girdi’ rok kakrom ko girdi’ u yugu boch e nam ni ur pared u fithik’rad nrogon ni bay ko Exodus 23:9, ma mang fan?

³ Tomuren ni chuweg Jehovah e girdi’ rok u Egypt, me pi’ boch e motochiyel ni fan ngak yugu boch e girdi’ ni gathi girdi’ nu Israel ni kar uned ngorad. (Ex. 12:38, 49; 22:21) Ngiyal’ nem e ba ga’ ndanir ma ayuweg e milekag. Ere, aram fan ni ngongliy Jehovah boch e motochiyel nrayog ni nge ayuwegrad. Reb ko pi motochiyel nem e aram e rayog ni ngar kunuyed e tin ni ke mul nga but’ ko pi wom’engin e woldug ni ka i kunuy e piin ni yad ma maruwel u milay’.​—Lev. 19:9, 10.

⁴ Gathi kemus ni yigi pi’ Jehovah e motochiyel ngak piyu Israel ni be yog ni ngar ted fan e girdi’ u yugu boch e nam ni be par u fithik’rad, ya yog ngorad ni ngar lemnaged rarogorad u nap’an ni ur moyed ni yad boch e milekag. (Mu beeg e Exodus 23:9, BT.) Ya yad “manang fan laniyan’ be’ nib milekag.” U m’on ndawori mang piyu Israel e sib u Egypt, ma dabun piyu Egypt dakenrad ni bochan e yad ba thil, ma kub thil e Got ni ur liyorgad ngak. (Gen. 43:32; 46:34; Ex. 1:11-14) Ba gel e gafgow ni i tay piyu Israel u nap’an ni ur moyed u Egypt ni yad boch e milekag. Machane, baadag Jehovah nrogon e ngongol rorad ko girdi’ u yugu boch e nam ni ur moyed u fithik’rad e nge yan i par ni bod rogon e ‘ngongol rorad ngak e girdi’ nu Israel.’​—Lev. 19:33, 34.

5. Mang e ra ayuwegdad ni ngad lemnaged e pi milekag ni bay u fithik’dad ni bod rogon ni ma lemnagrad Jehovah?

⁵ Ngiyal’ ney e ka dawori thil e lem rok Jehovah u murung’agen e girdi’ u yugu boch e nam ni yad ma yib ra uned ko muulung ko ulung rodad. (Deut. 10:17-19; Mal. 3:5, 6) Am lemnag boch e magawon ni ma mada’nag e pi girdi’ ney, ya rayog ni yibe laniyan’ ngorad ara darur nanged fan e thin rodad. Faan gad ra lemnag e pi n’ey ma rayog ni nge ayuwegdad ni ngad lemnaged boch e kanawo’ nrayog ni ngad ayuweged e pi girdi’ ney riy ma gad gol ngorad.​—1 Pet. 3:8.

GUR, BA T’UF NI NGAD THILYEGED ROGON NI GAD MA LEMNAG E PI MILEKAG?

6, 7. Mang e be dag ni ke fil e pi Kristiano ko bin som’on e chibog rogon ni ngar siyeged e laniyan’ ni i tay e girdi’ e ngiyal’ nem?

⁶ Pi Kristiano ko bin som’on e chibog e ra filed rogon ni ngar siyeged e laniyan’ ni ma tay e pi Jew ko girdi’ u yugu boch e nam. Nap’an e Pentekost ko duw ni 33 C.E., ma aram me ayuweg e piin ni yad ma par u Jerusalem e piin ni ka fin nra piggad kar manged boch e Kristiano ni kar bad u yugu boch e nam. (Acts 2:5, 44-47) Bochan ni i ayuweg e pi Kristiano ni Jew e piin taareb e michan’ rorad ni kar bad u yugu boch e nam ma aram e n’en ni be tamilangnag ni yad manang ni fare bugithin ni gol e be yip’ fan ni ngan ‘ayuweg e milekag.’

⁷ Machane, nap’an ni yoor girdien e ulung ni Kristiano ko bin som’on e chibog, ma aram me sum reb e magawon u lan e ulung. I gun’gun’ e pi Jew ni yad ma non ni thin ni Greek ni bochan e danir ayuweg e tirorad e ppin ni ke yim’ figirngirad. (Acts 6:1) Ere, dugliy e pi apostal medlip e pumoon ni nge milfan e gaf nem e maruwel ngorad mar pithiged e binem e magawon ni ke sum. Gubin e pi pumoon nem ni bay fithingrad ko thin ni Greek. Ma re n’ey e be tamilangnag nrayog ni aram fan ni mel’egrad e pi apostal ya nge yag ni puf e binem e magawon ni ke sum u thilin e pi Kristiano nib thilthil e nam rorad.​—Acts 6:2-6.

8, 9. (a) Mang boch ban’en nrayog ni nge m’ug riy ni gad be laniyan’ ara be tolangan’dad ni bochan e ba thil e nam rodad be’? (b) Mang reb e lem nthingar da chuweged u lanin’dad? (1 Pet. 1:22)

⁸ Demtrug ko gad manang fa danga’, ma gad gubin ni ma gagiyegnagdad e yalen rodad. (Rom. 12:2) Maku reb e, sana rayog ni gad ma guy e pi buguli yoror rodad, ara girdi’ u tabon e maruwel rodad, ara bitir ni gadad nga skul ni yad ma yog e thin nib kireb u murung’agen boch e girdi’ ni bochan rarogon e gin ni kar bad riy, ara binaw rorad, ara raen dowrad. Mang e ke rin’ e pi lem ney ngodad? Ma mang e gad ma rin’ u nap’an nra k’ak’aringdad be’ ni bochan e ba thil e thin rodad ara i yog boch i thibngin e yalen ko nam rodad?

⁹ Immoy ba ngiyal’ ni i par apostal Peter ni be laniyan’ ngak e piin ni gathi yad e Jew. Machane, munmun me yag rok ni nge chuweg e binem e lem nib kireb u laniyan’. (Acts 10:28, 34, 35; Gal. 2:11-14) Ere, ku arrogodad ni faanra kad guyed ni gad be laniyan’ ngak yugu boch e girdi’ ara be tolangan’dad ni bochan e nam ni kad bad riy, ma susun e ngad guyed rogon ni nge chuw e biney e lem rodad. (Mu beeg e 1 Peter 1:22.) Dab da paged talin ni gad gubin ndariy rogon ni nge yag e yafos ngodad. Maku reb e, demtrug e re nam ni kad bad riy, ma gad gubin ni gadad bogi tadenen. (Rom. 3:9, 10, 21-24) Ere, mang fan ni nge lemnag bagadad ni kab tolang ngak bagadad? (1 Kor. 4:7) Susun e ngaud lemgad ni bod rogon apostal Paul ni faani yog ngak e pi Kristiano ni kan dugliyrad ni ‘gathi ka yad girdien yugu boch e nam ara bogi ni’ nda nnang owcherad . . . ya . . . kar manged girdien e tabinaw rok Got!’ (Efe. 2:19) Ere, faan gad ra athamgil ni ngad siyeged e laniyan’ ni gad ma tay ko girdi’ nib thil rarogon e gin ni kad bay riy, ma aram e rayog ni nge ayuwegdad e re n’ey ni nga don’ed nga dakendad e bin nib beech i gadad.​—Kol. 3:10, 11.

ROGON NI NGAUD GOLGAD KO MILEKAG

10, 11. Uw rogon ni dag Boaz ni taareb rogon e lem rorow Jehovah u murung’agen e pi milekag u rogon ni i ngongol ngak Ruth ni be’ nu Moab?

¹⁰ Dariy e maruwar riy ni taareb rogon ni i lemnag Boaz e pi milekag nga rogon ni ma lemnagrad Jehovah. Ma i m’ug e re n’ey u rogon e ngongol rok ngak Ruth ni ir be’ nu Moab. Nap’an ni yib ni nge guy rogon e maruwel ni yibe tay u milay’ rok, ma aram me guy e re ppin nem ni be’ u yugu reb e nam ni be maruwel nib gel ni be lek keru’ girdien e maruwel ni be kunuy wom’engin e woldug ni kan pag u but’. Nap’an nnog ngak Boaz ni ke wenignag Ruth ir ni ngan pag ni nge kunuy wom’engin e woldug ni ke aw ni yugu aram rogon ni ban’en ni bay mat’awun ni nge rin’, ma aram me gin Boaz ko n’en ni ke rin’, me yog nrayog ni ngan girngiy yu pa’ e grain u fithik’ e tin ni kan thumnag ngan pag nge yib i fek ndab ni puwan’ ngak.​—Mu beeg e Ruth 2:5-7, 15, 16.

¹¹ Pi n’en ni buch ni migid e be dag nri i lemnag Boaz rarogon Ruth nge pi magawon ni i mada’nag ni bochan e be par u reb e nam ni gathi nam rok. I yog ngak ni nge un ngak e piin nib pin ni tapigpig rok ko maruwel ya nge dabi yib e pi pumoon ni yad be maruwel u milay’ ra magawonnaged. Ki guy rogon ni nge maruwel Ruth nib gaman e ggan nge ran rok ni bod rogon e tin ni ka bay i girdien e maruwel. Maku reb e, da i darifannag ko thin, ya i yog boch ban’en ngak nra pi’ e athamgil nga laniyan’.​—Ruth 2:8-10, 13, 14.

12. Mang angin nra yib riy ni faanra ud golgad ko girdi’ ni kar bad u yugu boch e nam?

¹² Gathi kemus ni ngat Boaz nga rogon ni i t’ufeg Ruth Naomi ni chitiningin e pumoon rok, ya ki ngat nga rogon ni ke mang Ruth reb e tapigpig rok Jehovah. Rogon e gol ni i dag Boaz ngak Ruth e be m’ug riy rarogon e t’ufeg rok Jehovah ngak be’ ni be ‘naf nga tan pa’’ e Got rok yu Israel. (Ruth 2:12, 20; Prov. 19:17) Ku arrogon e ngiyal’ ney nrayog ni ngad ayuweged “urngin e girdi’” ni ngar nanged e tin riyul’ ma kur nanged gelngin nri yad ba t’uf rok Jehovah.​—1 Tim. 2:3, 4.

13, 14. (a) Mang fan nsusun e ngad guyed rogon ni nga darod da nonad ma gad pining e magar ngak e girdi’ u yugu boch e nam ni ka fin ra bad ra uned ko muulung u Tagil’ e Liyor rodad? (b) Mang e rayog ni nge ayuwegem ni nge dab kum magagawon ni ngam man mu non ko pi girdi’ nem?

¹³ Rogon nrayog ni nge m’ug ni gad ba gol ko girdi’ u yugu boch e nam e aram e nga darod da nonad ma gad pining e magar ngak e pi arorad ni ka fin ra bad ra uned ko muulung u Tagil’ e Liyor rodad. Sana kad guyed ni bay boch e pi girdi’ ney ni yad ba tamra’ ara ba ga’ ni darur chaggad ko girdi’ u lan e ulung. Bochan e yalen ko nam rorad ara rarogorad, ma aram fan nrayog ni ngaur magagawongad ko girdi’ u yugu reb e nam ara girdi’ nib thil e thin rorad. Ere, ba fel’ ni gadad e nga darod da nonad ko pi girdi’ nem ma gad dag ngorad nriyul’ ni gad be lemnag rarogorad. Faanra bay fare JW Language app ko thin rom, ma rayog ni nge ayuwegem e re n’ey ni ngam fil rogon ni nga mog in bug e thin ko nam ko pi girdi’ nem.​—Mu beeg e Filippi 2:3, 4. 

¹⁴ Sana rayog ni ga be magagawon ni ngam man mu non ko pi girdi’ nem. Ere, rogon ni nge dab kum magagawon ngorad e aram e rayog ni nga mog ban’en ngorad u murung’agem. Faan ga ra rin’ ni aray rogon, ma rayog ni nge munmun ma gguy ni boor ban’en u rarogomed e pi girdi’ nem ni taareb rogon. Maku reb e, dab mu pagtalin ni gubin e yalen ni bay fel’ngin nge thibngin.

MU AYUWEG URNGIN E GIRDI’ NI NGE DAB KU UR MAGAGAWONGAD

15. Mang e ra ayuwegdad ni ngad nanged rarogon e piin ni ka yad bbeech ko nam rodad?

¹⁵ Ra ngad ayuweged urngin e walag nge girdi’ u lan e ulung ni nge dab ku ur magagawongad, mab fel’ ni nge bagadad me fith ir ni nge gaar, ‘Faanra kug wan nga reb e nam ni gathi nam rog, ma uw rogon e re miti ngongol ni gu baadag ni ngan dag ngog?’ (Matt. 7:12) Mu gum’an’ u puluwon e pi girdi’ ney ni fin yad be fil rogon e par u reb e nam ni gathi nam rorad. Som’on e sana darud nanged fan rogon ni yad ma lem ara rogon ni yad ma rin’ boch ban’en. Machane, kab fel’ ni ngad guyed rogon ni ngad mechamgad ngorad ko bin ni ngad lemnaged ni yad e ngar mechamgad ko birodad e yalen.​—Mu beeg e Roma 15:7.

16, 17. (a) Mang boch ban’en nrayog ni ngad rin’ed ya nge yag nda nanged boch ban’en u rarogon e piin ni kar bad u yugu boch e nam? (b) Mang boch e kanawo’ nrayog ni ngad ayuweged boch e walag riy u lan e ulung rodad ni kar bad u yugu boch e nam?

¹⁶ Faan gad ra fil boch ban’en u murung’agen e nam nge yalen ko pi girdi’ nem, ma rayog ni nge mom ngodad ni ngad nanged boch ban’en u rarogorad. Rayog ni ngad ted ba ngiyal’ u nap’an e fol Bible ni tabinaw ni gad ma tay ni ngad gayed boch ban’en u murung’agen e girdi’ ko ulung rodad ara binaw ni gad ma machib riy nib thil e nam rorad. Maku reb e kanawo’ nrayog ni ngad nanged boch ban’en u rarogon e pi girdi’ ney e aram e ngad pininged yad nga tabinaw rodad ni ngad abichgad u taabang. Gad manang ni ke bing Jehovah e “kanawo’” ngak girdien e pi nam “ni nge mich Jesus u wun’rad.” Ere, susun e ngad folwokgad rok ma gad pining e “piin ni kad manged girdien e tabinaw rok Got u fithik’ e mich u wun’uy ngak Kristus” nga tabinaw rodad.​—Acts 14:27; Gal. 6:10; Job 31:32.

¹⁷ Faanra ud rin’ed girdien reb e tabinaw ni kar bad u yugu reb e nam boch ban’en u taabang, ma rayog ni nge ayuwegdad ni ngad nanged me ga’ fan u wan’dad rogon e athamgil ni yad be tay ni ngar mechamgad ko yalen rodad. Machane, sana gad ra guy nib t’uf ni ngan ayuwegrad ni ngar filed e thin rodad. Maku reb e, ku rayog ni nga dogned ngorad e gin nrayog ni nga ranod ngay ni ngan ayuwegrad u rogon ni ngar pirieged e naun ni ngar pared riy ara maruwel ni ngar uned ngay ni nge yag e salpiy ngorad. Pi n’ey e rayog ni nge ayuweg e pi walag ney.​—Prov. 3:27.

18. Mini’ e rayog ni nge folwok e piin ni kar bad u yugu boch e nam rok u rogon ni i tayfan ma be dag ni be pining e magar ko girdien e re nam ni baaram ni ke yan i par ngay?

¹⁸ Riyul’ ni kub milfan ko piin ni kar chuwgad ko nam rorad ka ranod ra pared nga yugu reb e nam ni ngar guyed rogon ni ngar mechamgad ko yalen nge par ko fare nam ni ka ranod ngay. Ma Ruth e dag e kanawo’ nib fel’ nrayog ni ngan folwok riy. Som’on e, i dag ni be tayfan e yalen ko nam ni ke yan i par ngay ni aram e fith u m’on riy ko rayog ni nge kunuy e pi wom’engin e woldug ni ke mul nga but’ u milay’ fa dabiyog. (Ruth 2:7) De lemnag ni bochan ni bay e motochiyel ni be pi’ mat’awun nrayog ni nge rin’ e re n’ey ndabi fith u m’on riy, ma aram e yug rayog rok ni nge rin’ e n’en ni ke lemnag ni bochan e bay mat’awun ni nge rin’. Bin migid e, dag ko ngongol rok nriyul’ ni be pining e magar nga rogon ni kan gol ngak. (Ruth 2:13) Ere, faanra i dag e piin ni kar bad u yugu boch e nam e lem ni aray rogon, ma aram e ra mom ko girdi’ u lan binaw nge pi walag ni ngar ted farad.

19. Mang boch i fan nthingar da golgad ko milekag?

¹⁹ Gad ba felfelan’ ya bochan nri ma runguy Jehovah e girdi’, ma aram fan ni ke bing e kanawo’ ko girdi’ nib thilthil e thin rorad ni ngar rung’aged fare thin nib fel’. Rayog nnap’an ni ur moyed ko nam rorad ma de yag ni ngar uned ko fol Bible ara ngaur chaggad ko girdi’ rok Jehovah nib fel’ rogon. Machane, chiney nrayog ni ngar chaggad ngodad e susun ni ngad golgad ngorad ya nge dab kur lemnaged ni yad boch e milekag ni yad be par u fithik’dad. Sana rayog nde yoor e salpiy rodad ara de yoor ban’en rodad nrayog ni ngad pied boch ngorad, machane faan gad ra gol ngorad, ma aram e gad be t’ufegrad ni bod rogon ni ma t’ufegrad Jehovah. Ere, bochan ni gad ma “folwok rok Got,” ma aram fan ni ngad athamgilgad u rogon nrayog rodad ni ngad golgad ko pi milekag ni bay u fithik’dad.​—Efe. 5:1, 2.