Mang Angin Nra Yib Ngom ni Faan Ga Ra Nang ko Mini’ Got?
U lan e pi article ney ma kad filed boch ban’en ni nge ayuwegdad ni ngad nanged e fulweg ko fare deer ni, Mini’ Got? Som’on e kad filed u Bible ni fithingan Got e Jehovah ma bin th’abi lingagil i fel’ngin e aram e t’ufeg. Kad weliyed e tin ni ke rin’ nge tin nra rin’ nra yib angin ngak e girdi’. Yugu aram rogon ni ka boor ban’en ni ngan fil u murung’agen Got, machane rayog ni ngam lemnag ko mang angin nra yib ngom ni faanra mu ulul i fil murung’agen?
Ke micheg Jehovah ni faanra mu “gay ma rayog ni nge fel’ e tha’ u thilmew.” (1 Kronicles 28:9, NW) Am lemnag fare tow’ath nrib ga’ fan nra yag ngodad u nap’an ni gad ra fil murung’agen ni aram e ra mang ‘fager’ rodad nib chugur e tha’ u thildad! (Psalm 25:14) Ere mang angin nra yib ngom ni faanra fel’ e tha’ u thilmew Jehovah?
Bin riyul’ e felfelan’. Ke weliy e Bible ni Jehovah e ir “fare Got nib felfelan’.” (1 Timothy 1:11, NW) Ere faan ga ra chugur ngak mag folwok ko tin ni ma rin’, ma rayog e bin riyul’ e felfelan’ ngom nra yib angin ngom ni aram e ra fel’ lanin’um nge fithik’ i dowam. (Psalm 33:12) Rayog ni nge yib e felfelan’ nga lan e tabinaw rom ni aram e ngam siyeg boch e ngongol ni yima rin’ nra gafgownag fithik’ i dowey, ma ngaum rin’ boch ban’en nra ayuweg fithik’ i dowam, me yag ni nge par e tha’ u thilmed e girdi’ nib fel’. Ma aram e ra m’agan’um ko n’en ni yoloy fare psalmist ni gaar: “Gag e kari felan’ug, ya gu be par u tooben Got [“gu be guy rogon ni nggu chugur ngak Got,” NW]!”—Psalm 73:28.
Be lemnagem ma ra ayuwegem. Ke micheg Jehovah ngak e pi tapigpig rok ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Psalm 32:8) Re n’ey e be yip’ fan ni ma lemnag maku ma ayuweg Jehovah e pi tapigpig rok nra be’ ma be pi’ e tin nib t’uf rok ko ngiyal’ nib t’uf riy. (Psalm 139:1, 2) Nap’an nra fel’ e tha’ u thilmew Jehovah, ma rayog ni ngam nang ni gubin ngiyal’ ma bay nrayog ni nge ayuwegem.
Tin nra buch nga m’on nrib manigil. Gathi kemus ni be ayuwegem Jehovah e ngiyal’ ney ni nge yag e felfelan’ ngom me yib angin e yafos rom, ya ke bing e kanawo’ nrayog ni nge yag boch ban’en nib manigil ngom boch nga m’on. (Isaiah 48:17, 18) Be gaar e Bible: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Ere nap’an ni gad ra yan u fithik’ e skeng nib mo’maw’, ma athap rodad ni ke pi’ Got e ir e ra yiluydad ni ngad pared ni gad ba “mudugil.”—Hebrews 6:19.
Ireray boch i fan nib t’uf ni ngad nanged Got ma gad guy rogon ni nge fel’ e tha’ u thildad. Ere yibe pi’ e athamgil ngom ni ngam non ngak bagayad e Pi Mich Rok Jehovah ara mman ko jw.org/yap ni faanra ga baadag ni ngkum nang boch.