Mu Kirebnag e Thin Nde Riyul’ nib Togopuluw ko Tin Kan Nang u Murung’agen Got!

1. Mang ginang e yoloy apostal Paul nge pi’ ngak e pi Kristiano ni kan dugliyrad?

I GINANGEY apostal Paul ni gaar: “Dab mu folgad ko ngongol ni yibe rin’ u roy u fayleng.” (Rom. 12:2) I yog Paul e pi thin ney ni fan ngak e pi Kristiano ko bin som’on e chibog. Mang fan ni non ni aray rogon ngak e pi pumoon nge ppin nem ni kar ognaged yad ngak Got ma kan dugliyrad nga gelngin nib thothup?​—Rom. 1:7.

2-3. Uw rogon ni ma guy Satan rogon ni nge chafegdad nga orel rok Jehovah? Uw rogon ni ngad ‘kirebnaged e yungi n’en ni ke fal’eg e moonyan’ rogon ke par riy be cham ngodad’ ara ngad chuweged boch e lem nib kireb ni bay rodad nib mo’maw’ ni nge chuw?

² Ke magafan’ Paul ni bochan e immoy boch e Kristiano e ngiyal’ nem ni kar paged e lem nib kireb nge gonop ko girdi’ ko fayleng rok Satan ni nge af ngorad. (Efe. 4:17-19) Re n’ey e demtrug bagadad nrayog ni nge buch rok. Satan ni ir e got ko re m’ag ney e ma fanay boor mit e ban ni nge guy rogon ni nge chafegdad nga orel rok Jehovah. Bod ni faanra gad baadag ni nge ga’ fadad ara nge gilbuguwdad, ma aram e ra fanay Satan e re n’ey ni nge guy rogon ni ngad paloggad rok Jehovah. Ku rayog ni nge fanay boch ban’en ni i buch rodad kafram, ara yalen rodad, ara rogon e skul rodad ni nge k’aringdad ni ngad lemgad ni bod rogon ni baadag.

³ Ere gur, rayog ni ngad ‘kirebnaged e yungi n’en ni ke fal’eg e moonyan’ rogon ke par riy be cham ngodad’ ara ngad chuweged boch e lem nib kireb ni bay rodad nib mo’maw’ ni nge chuw? (2 Kor. 10:4) Mu tay fanam i yan ko fulweg riy ni pi’ Paul ni gaar: “Gamad be kirebnag e thin nde riyul’ ni be togopluwnag e girdi’ ngak Got; ma kug buthuged urngin e lem nib tolang ni yibe togopluwnag ko tin ni kan nang ni murung’agen Got.” (2 Kor. 10:4, 5) Arrogon, faanra ayuwegdad Jehovah ma aram e rayog ni ngad gelgad nga boch e lem nib kireb ni bay rodad. Falayin e yub e rayog ni nge chuweg e yub u fithik’ i dow be’. Ere ku arrogon e Thin rok Got nrayog ni nge ayuwegdad ni ngad chuweged thibngin e re fayleng rok Satan ney ni ke af ngodad.

NGAD ‘PILIYEGED LANIN’DAD NI POLO’’

4. Mang boch ban’en nib t’uf ni nge thilyeg boch i gadad u rarogon u nap’an ni fil e tin riyul’?

⁴ Am lemnag e pi n’en nib t’uf ni ngam thilyeg u rarogom u nap’an nim fil e tin riyul’ u lan e Thin rok Got mag dugliy ni ngam pigpig ngak Jehovah. Boor i gadad e nap’an ni dugliy ni nge pigpig ngak Jehovah, ma aram e thingari tal i rin’ boch e ngongol nib kireb. (1 Kor. 6:9-11) Ri gad be pining e magar ngak Jehovah ni ke ayuwegdad ke yag ni ngad talgad i rin’ e pi ngongol nib kireb nem!

5. Mang l’agruw ban’en nib t’uf ni ngad rin’ed ni be yog e Roma 12:2?

⁵ Machane, thingar dab da lemnaged ndakuriy ban’en u rarogodad nib t’uf ni ngad thilyeged. Yugu aram rogon ni kad talgad i rin’ boch e denen nib ubchiya’ u m’on ni ngad uned ko taufe, machane thingar da ululgad i guy rogon ni ngad siyeged boch ban’en nrayog ni nge waliydad ngkud sulod nga rarogodad ni kafram. Uw rogon ni ngad rin’ed e re n’ey? I pi’ Paul e fulweg riy ni gaar: “Dab mu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’.” (Rom. 12:2) Ere l’agruw ban’en nib t’uf ni ngad rin’ed. Som’on e ba t’uf ni ngad talgad ‘ndab kud folgad’ ara dab kud paged gadad ko ngongol ni yibe rin’ ko re fayleng ney. Bin migid e ba t’uf ni ngad ‘piliyeged’ gadad ni aram e ngar da pilyeged lanin’dad ni polo’.

6. Mang e gad be fil ko fapi thin ni yog Jesus ni bay ko Matthew 12:43-45?

⁶ Nap’an ni yog Paul nib t’uf ni ngad pilyeged gadad ngad thilgad, ma gathi be yog nib t’uf ni ngad thilyeged yaadad, ya be yip’ fan nib t’uf ni ngad thilyeged urngin ban’en u rarogodad. (Mu guy fare kahol ni kenggin e “Kad Thilgad ni Polo’, Fa Kemus ni Rarogodad ni Yibe Guy e Ke Thil?”) Ba t’uf ni ngari pig lanin’dad ni polo’, ni aram e ba muun ngay fithik’ i lanin’dad, nge pi n’en ni gad ma ar’arnag. Ere ba t’uf ni nge bagadad me fith ir ni gaar, ‘Kemus ni yigoo tin ni yibe guy u rarogog e ir e gu be thilyeg ni bochan e nge yag nug folwok rok Kristus, fa kub muun fithik’ i lanin’ug nge gum’irchaeg ngay?’ Ba ga’ fan e re n’ey. I yog Jesus e n’en nib t’uf ni ngad rin’ed ko fapi thin ni bay ko Matthew 12:43-45. (Mu beeg.) Bay ban’en nib ga’ fan ni be fil e pi thin ney ngodad. De gaman ni kemus ni ngad chuweged e lem nib kireb u lanin’dad, ya kub t’uf ni ngad suguyed lanin’dad ko pi n’en nib m’agan’ Got ngay.

“GUM’IRCHA’MED NGE LANIN’MED E THINGARI PIG NI POLO’ NGE BEECH”

7. Uw rogon ni nge pig gum’ircha’dad nge lanin’dad ni polo’?

⁷ Gur, rayog ni ngad thilyeged fithik’ i lanin’dad ara bin riyul’ i rarogodad ndabiyog ni ngan guy? Be pi’ e Thin rok Got e fulweg riy ni be gaar: “Gum’ircha’med nge lanin’med e thingari pig ni polo’ nge beech. Thingar mon’ed nga dakenmed e bin nib beech i gimed ni bod rogon e munmad, ni bin nib beech i gimed ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngomed.” (Efe. 4:23, 24) Arrogon, rayog ni ngad thilyeged e bin riyul’ i rarogodad ndabiyog ni ngan guy, machane de mom ni ngad rin’ed e re n’ey. Gathi kemus nib t’uf ni ngad siyeged e ar’ar nib kireb ma gad tal i rin’ e ngongol nib kireb, ya kub t’uf ni ngari pig ‘gum’ircha’dad nge lanin’dad’ ni polo’. Re n’ey e ba muun ngay ni ngad thilyeged e pi n’en ni gad ma ar’arnag, nge pangidad, nge fan ni gad ma rin’ ban’en. Re n’ey e ban’en nib t’uf ni ngad rin’ed ni gubin ngiyal’.

8-9. Uw rogon ni ke m’ug ko n’en ni buch rok reb e walag ni pumoon fan nib t’uf ni ngad thilyeged e bin riyul’ i rarogodad ndabiyog ni ngan guy?

⁸ Ngad weliyed murung’agen reb e walag ni pumoon ni immoy kafram ni ir be’ nib ta cham. Tomuren ni tal ndaki un ko chingaw nge cham, ma aram me yag ni nge un ko taufe. Piin yad ma par ko gin ni ma par e re walag ney riy e ra ngatgad ngay ni ke thil e ngongol rok. Machane, faani reb e nep’ u tomuren ni ka fini un ko taufe, ma aram me mada’nag reb e skeng nde lemnag nra mada’nag. I yib be’ nib pumoon nib ching nga tafen ma aram me yog ngak ni ngar chamgow. Som’on e siyeg e re walag ney ndab ra chamgow fare pumoon. Machane faani tabab fare moon i darifannag fithingan Jehovah, ma aram e daki yag ni nge k’adan’ fare walag, me yan nga wen nge pirdiiy fare pumoon. Mang e magawon ko re walag ney? Yugu aram rogon ni ke ayuweg e fol Bible ni ke un ngay ke yag ni nge gel ko ar’ar ni immoy rok kafram ni aram e baadag e cham, machane dawor ri pig gum’irchaen nge laniyan’ ni polo’. Dawori yag ni nge thilyeg e bin riyul’ i rarogon ndabiyog ni ngan guy.

⁹ Machane, de mulan’ e re walag ney. (Prov. 24:16) Bochan e ayuw ni pi’ e piin piilal ngak, ma aram me yag ni nge mon’og i yan. Munmun ma aram me yag ni nge mang reb e piilal. Faani reb e nep’ u nap’an ni keb nga wuru’ e Tagil’ e Liyor, ma aram miki mada’nag fare skeng ni yib ngak boch e duw ni ke yan. Bay reb e pumoon nib ching ni keb e ngaram ma be n’en ni nge li’ reb e piilal. Ere mang e rin’ fare walag? I non ngak fare pumoon nib ching u fithik’ e sumunguy nge sobut’an’, me ayuweg ni nge gapas, miki un ngak nge yan i tay nga tafen. Ere mang e ke buch ko re walag ney? Ke yag ni nge pig gum’irchaen nge laniyan’ ni polo’. Ke yag ni nge mang be’ nib gapas mab sobut’an’. Re n’ey e pining e sorok ngak Jehovah!

10. Mang e ba t’uf ni ngad rin’ed ya nge yag nda thilyeged e bin riyul’ i rarogodad ndabiyog ni ngan guy?

¹⁰ Pi n’ey u rarogodad e yugu dabiyog ni ngad thilyeged nib tomgin. Sana rayog nib t’uf ni ngad ‘athamgilgad’ ni ngad rin’ed e re n’ey u lan boor e duw. (2 Pet. 1:5) Yugu ra ke n’uw nap’an ni kad pigpiggad ngak Jehovah ma gathi aram e be yip’ fan ni kad thilyeged e pi n’ey u rarogodad, ya ba t’uf ni ngad guyed rogon ni ngari thil e bin riyul’ i rarogodad ndabiyog ni ngan guy. Ere bay boch ban’en nib t’uf ni ngad rin’ed. Ngad weliyed boch e pi n’em.

ROGON NI NGE PIG GUM’IRCHA’DAD NGE LANIN’DAD NI POLO’

11. Uw rogon nra ayuwegdad e meybil ni ngad pingeged gum’ircha’dad nge lanin’dad ni polo’?

¹¹ Meybil e aram e n’en nib ga’ fan ni ngad rin’ed nsom’on. Ba t’uf ni ngad meybilgad ni bod rogon fare psalmist ni faani gaar: “Got, mu sunumeg e tafinay nib machalbog u fithik’ag, ma ga pi’ reb e tafinay ngog nib beech ma ba yul’yul’.” (Ps. 51:10) Thingar da nanged nib t’uf ni nge pig gum’ircha’dad nge lanin’dad ni polo’ ma gad yog ngak Jehovah ni nge ayuwegdad. Uw rogon nrayog ni nge pagan’dad ngay nra ayuwegdad Jehovah ni ngad rin’ed e re n’ey? Pi n’en ni micheg Jehovah nra rin’ ni fan ngak piyu Israel u nap’an Ezekiel ni yugu aram rogon farad gelan’ e rayog ni nge pi’ e athamgil nga lanin’dad. I yog ni ‘bayi pi’ ngorad reb e gum’ircha’ nge reb e tafinay nib beech. Me chuweg gum’ircha’rad ni gelan’ nge pi’ ngorad ba gum’ircha’ ni ma fol’ ara ba gum’ircha’ nib m’agan’ ngay ni nge fol u rogon ni be pow’iy Got. (Ezek. 11:19) Ba m’agan’ Jehovah ngay ni nge ayuweg piyu Israel ni ngar thilgad, maku arrogodad nib m’agan’ ngay ni nge ayuwegdad.

12-13. (a) Mang e ba t’uf ni ngad fal’eged i lemnag nrogon ni bay ko Psalm 119:59? (b) Mang boch e deer nsusun e ngam fithem riy?

¹² Bin migid e n’en ni kub ga’ fan ni ngad rin’ed e aram e ngad fal’eged i lemnag boch ban’en. Nap’an ni gad be beeg e Thin rok Got u reb e rran ngu reb, mab t’uf ni ngad ted e tayim ni ngad fal’eged i lemnag ya nge yag nda nanged boch e lem ni bay rodad ara boch ban’en ni bay u lanin’dad nib t’uf ni ngad thilyeged. (Mu beeg e Psalm 119:59; Heb. 4:12; Jas. 1:25) Thingar da guyed rogon ngad nanged boch e lem nu fayleng ni ke af ngodad. Ku thingar da nanged ni bay boch ban’en ni gad ba meewar riy, ma gad athamgil u rogon nrayog rodad ngad gelgad ko pi meewar nem.

¹³ Bod nrayog ni ngam fithem ni nge lungum: ‘Gu be guy ni ka bay e awan’ u gum’irchaeg, fa?’ (1 Pet. 2:1) ‘Ka ma tolangan’ug ni bochan e gin ni ku gub riy, ara tolngin e skul rog, ara urngin e salpiy ni bay rog, fa?’ (Prov. 16:5) ‘Gu ma sap nga but’ ngak e piin ni bay boch ban’en ni bay rog ndariy rorad ara piin nib thil e nam romad, fa?’ (Jas. 2:2-4) ‘Ka bay boch ban’en ni ma ognag e re fayleng rok Satan ney ni gu baadag, fa?’ (1 John 2:15-17) ‘Gu baadag ni gu ma chuweg e chalban rog nga boch ban’en ni bay yaan e ngongol ndarngal nge cham riy, fa?’ (Ps. 97:10; 101:3; Amos 5:15) Rogon e fulweg rom ko pi deer ney e ra ayuwegem ni ngam nang boch ban’en nib t’uf ni ngam thilyeg u rarogom. Faan gad ra “kirebnag e yungi n’en ni ke fal’eg e moonyan’ rogon ke par riy be cham ngodad” ara da chuweged boch e lem nib kireb ni bay rodad nib mo’maw’ ni nge chuw, ma aram e gad ra felfelan’nag e Chitamangidad ni bay u tharmiy.​—Ps. 19:14.

14. Mang nib ga’ fan ni ngad fal’eged i mel’eg e piin ni ngaud chaggad ngorad?

¹⁴ Bin dalip e n’en ni kub ga’ fan ni ngad rin’ed e aram e ngad fal’eged i mel’eg e piin ni ngaud chaggad ngorad. Demtrug ko gad manang e re n’ey fa danga’, ma piin ni gad ma chag ngorad e rayog ni nge af pangirad ngodad. (Prov. 13:20) Ra nap’an ni gad bay u tabon e maruwel ara skul, mab liyegdad e piin ndarur ayuweged gadad ni ngad lemgad u rogon nib m’agan’ Got ngay. Machane, nap’an ni gad ra yib ko muulung ma aram e gin nrayog ni ngad pirieged e tin th’abi fel’ e girdi’ riy ni ngaud chaggad ngorad. Aram e gin nrayog ni ngan pi’ e athamgil riy nga lanin’dad ni ngad ‘daged e t’ufeg ma gad be rin’ e tin nib fel’.’​—Heb. 10:24, 25.

NGA ‘I GEL I YAN E MICHAN’ ROM’

15-16. Uw rogon ni ma guy Satan rogon ni nge thilyeg e lem rodad?

¹⁵ Dab mu pagtalin ni ke dugliy Satan u wan’ ni nge thilyeg e lem rodad. Ma fanay urngin mit e lem ni nge kirebnag rogon ni be pow’iy e Thin rok Got lanin’dad.

¹⁶ Ka be ulul Satan i fith fare deer ni faani fith ngak Efa u lan fare milay’ nu Eden ni gaar: “Rriyul’ ni yog Got ngomew ni . . . ?” (Gen. 3:1) Ba ga’ ni gad ma rung’ag boch e deer ni ma fith e girdi’ ko re fayleng ney ni be gagiyegnag Satan nrayog ni nge k’aringdad ni nge maruwar u wan’dad e pi n’en ni ke mich u wan’dad. Pi deer nem e: ‘Gur, rriyul’ nde m’agan’ Got ngay ni nge mabgol e pumoon nge pumoon nge ppin nge ppin? Gur, rriyul’ nde m’agan’ Got ngay ni ngam un ko Christmas nge birthday? Gur, rriyul’ ni baadag e Got rom ndab mu fanay e racha’? Gur, rriyul’ ni baadag ba Got ni ma t’ufegey ni nge dab kum chag ngak be’ nib t’uf rom ni kan tharbog ko ulung?’

17. Mang e susun ni ngad rin’ed u nap’an ni ke fith be’ boch e deer ni bay rogon ko pi n’en ni ke mich u wan’dad ni bochan e be guy rogon ni nge maruwaran’dad? Mang angin nra yib riy nrogon ni be yog e Kolose 2:6, 7?

¹⁷ Ba t’uf ni ngari riyul’ u wan’dad e pi n’en ni ke michan’dad ngay. Faanra dab da guyed rogon ni ngad pirieged e fulweg u boch e deer nib ga’ fan ni ke fith be’ ngodad ni bay rogon ko pi n’en ni ke mich u wan’dad, ma aram e ra munmun me maruwar boch ban’en u wan’dad. Pi n’en ni be maruwar u wan’dad e rayog ni nge munmun me kirebnag rogon e lem ni gad be tay nge michan’ rodad. Ere mang e ba t’uf ni ngad rin’ed? Be yog e Thin rok Got ni lanin’dad e nge pig ni polo’, ya nge yag nda nanged e “tin nib m’agan’ Got ngay ni tin nib fel’, nib fel’ u wan’ Got ma rib yal’uw.” (Rom. 12:2) Faanra ud ted e fol Bible ni gubin ngiyal’, ma aram e rayog ni ngad micheged nga lanin’dad e tin riyul’ ni kad filed u Bible. Ku rayog ni ngari mich u wan’dad nib puluw e pi motochiyel rok Jehovah. Faan gad ra rin’ ni aray rogon, ma aram e rayog ni ngad boded ba ke gek’iy nib el lik’ngin ma kari rich nga fithik’ e but’, maku rayog ni nga ‘i gel i yan e michan’ rodad.’​—Mu beeg e Kolose 2:6, 7.

18. Uw rogon ni ngad ayuweged gadad u thibngin e re fayleng rok Satan ney?

¹⁸ Dariy be’ nrayog ni nge gelnag e michan’ rom ni fan ngom. Ere mu ulul ngam guy rogon ni nge pig gum’irchaem nge lanin’um ni polo’ nge beech. Um meybil ni gubin ngiyal’ mag ning gelngin Jehovah nib thothup ni nge ayuwegem. Um fal’eg i lemnag boch ban’en, mu um fal’eg i yaliy rogon e lem rom nge fan ni ga ma rin’ boch ban’en. Mu fal’eg i mel’eg e piin ni ngaum chag ngorad. Um chag ngak e piin nrayog ni ngar ayuweged gur ni nge pig lanin’um nge beech. Faan ga ra rin’ ni aray rogon, ma aram e rayog ni ngam chuweg mu kum ayuwegem u thibngin e re fayleng rok Satan ney, me yag nim kirebnag e thin nde riyul’ ni be togopuluwnag e girdi’ ngak Got, ma ga ‘buthug urngin e lem nib tolang ni yibe togopluwnag ko tin ni kan nang ni murung’agen Got.’​—2 Kor. 10:5.