ARTICLE NI NGAN FIL 40
Mu Fanay e Tayim Rom ni Fan ko Tin nib M’agan’ Got Ngay u Tungun e “Tin Tomren e Rran”
“Um pired ni gimed mmudugil. Gubin ngiyal’ ma nguum muruwliyed e maruwel romed ni fan ngak Somol.”—1 KOR. 15:58.
TANG 58 Ngad Gayed e Piin ni Yad Baadag e Gapas
TIN NI YIRA WELIYa
1. Mang e be micheg ngodad ni gad be par ko “tin tomren e rran”?
FAANRA kan gargelnagem u tomuren e duw ni 1914, ma aram e ga be par ko “tin tomren e rran” ko re m’ag ney. (2 Tim. 3:1) Gad gubin ni kad rung’aged murung’agen e pi n’en ni yiiynag Jesus nra buch e ngiyal’ ney. Pi n’ey e ba muun ngay e mahl, nge uyungol, nge durru’, nge m’ar, nge girdi’ ni ke gel e kireb rorad, nge gafgow ni yibe tay ko girdi’ rok Jehovah. (Matt. 24:3, 7-9, 12; Luke 21:10-12) Ku gad be guy rogon e ngongol ko girdi’ ni yiiynag apostal Paul. (Mu guy fare kahol ni kenggin e “Rarogon e Girdi’ e Chiney.”) Gadad e pi tapigpig rok Jehovah e rib mich u wan’dad ni gad be par ko “tin tomuren e rran.”—Mik. 4:1, NW.
2. Mang l’agruw e deer nib t’uf ni ngad nanged e fulweg riy?
2 Bochan ni ke n’uw nap’an ni ke thumur e duw ni 1914, mab mudugil ni gad be par u tungun e “tin tomren e rran.” Ere bochan ni ke chugur e tomur, ma aram fan nib t’uf ni ngad nanged e fulweg u l’agruw e deer nib ga’ fan ni aram e: Mang e ra buch u nap’an nra mus e “tin tomren e rran”? Ma mang e baadag Jehovah ni ngad rin’ed u nap’an ni gad be sonnag e pi n’ey ni nge buch?
MANG E RA BUCH U NAP’AN NRA MUS E “TIN TOMREN E RRAN”?
3. Mang e ra yog e pi nam nrogon ni bay ko fare yiiy ko 1 Thessalonika 5:1-3?
3 Mu beeg e 1 Thessalonika 5:1-3. I weliy Paul murung’agen e “Rran rok” Jehovah. Re rran nem nrogon ni kan weliy ko re thin nu Bible ney e be yip’ fan ba ngiyal’ nra tabab u nap’an ni yira cham ko “fare Babylon nib Gilbuguwan” ni be yip’ fan e pi yurba’ i teliw ni googsur u fayleng, ma tomur riy e Armageddon. (Rev. 16:14, 16; 17:5) U m’on nra tabab e re “Rran” nem, ma aram e ra yog e pi nam ni “ke gapas ndariy ban’en nra buch.” Yu ngiyal’ e ma yog e tayugang’ ko pi nam u fayleng boch e thin ni aray rogon u nap’an ni yad be weliy murung’agen e tha’ u thilin e pi nam ni be mon’og i yan.b Machane fare thin ni be yog e Bible ni yira yog ni aram e “ke gapas ndariy ban’en nra buch” e ba thil. Mang fan? Nap’an nra buch e re n’ey, ma sana ra lemnag e girdi’ ni ke yag rok e tayugang’ ko pi nam u fayleng ni ngar awnaged e gapas u fayleng ndakuriy ban’en nra buch. Machane bin riyul’ riy e “yad ra da’da’ ni ke taw e riya’ ngorad,” ya aram e ke tabab fare “gafgow” nib ga’.—Matt. 24:21.
Dab mu pag fapi thin nde riyul’ ni bayi yog e pi nam ni aram e “ke gapas ndariy ban’en nra buch” ni nge bannagem (Mu guy e paragraph 3-6)h
4. (a) Mang e kab t’uf ni ngad nanged u murung’agen fare thin ni yira yog ni aram e “ke gapas ndariy ban’en nra buch”? (b) Mang e gad manang u murung’agen e re thin ney?
4 Bay boch ban’en ni gad manang u murung’agen fare thin ni yira yog ni aram e “ke gapas ndariy ban’en nra buch.” Machane ka bay boch ban’en ndad nanged. Dad nanged ko mang e ra k’aring e pi tayugang’ ni nga rogned e re thin ney ara rogon ni yira yog e re thin ney. Ku dad nanged ko re thin ney e taab yay ni yira yog fa ban’en ni yira yog ni boor yay. Demtrug e n’en nra buch, ma n’en ni gad manang e: Susun e dab da paged ban’en ni nge k’aringdad ngad lemnaged nrayog rok e tayugang’ ko pi nam u fayleng ni ngar awnaged e gapas u fayleng. Be yog e Bible ni ngad tedan’dad ko re thin ney, ya nap’an ni yira yog ma aram e pow riy ni be yan ni nge tabab e “Rran rok” Jehovah!
5. Uw rogon ni be ayuwegdad fare thin ko 1 Thessalonika 5:4-6 ni ngad fal’eged rogodad ni fan ko fare “Rran rok” Jehovah?
5 Mu beeg e 1 Thessalonika 5:4-6. Re thin ney ni yog Paul e be tamilangnag ngodad e n’en nsusun e ngad rin’ed ya nge yag nda fal’eged rogodad ni fan ko fare “Rran rok” Jehovah. Susun e “dab ud molod ni bod boch e girdi’,” ya thingar da “pired ni gadad be od” ma gad be tedan’dad. Bod nib t’uf ni ngad pared u mathilin ngongolen e am, ma gad kol ayuw ndab da uned nga boch ban’en ni bay rogon ko am. Faan gad ra un nga ngongolen e am, ma aram e kad manged bang ko re “fayleng” ney. (John 15:19) Gad manang ni kemus ni Gil’ilungun Got e rayog ni nge awnag e gapas u fayleng.
6. Mang e gad baadag ni ngad ayuweged e girdi’ ni ngar rin’ed, ma mang fan?
6 Gathi kemus ni ngad pared ni gad ba od ko tirok Got ban’en, ya ku gad baadag ni ngad ayuweged e girdi’ ni ngar filed murung’agen e n’en ni be yiiynag e Bible nra buch u fayleng. Dab da paged talin nnap’an nra tabab fare gafgow nib ga’, ma kaygi sagaal ni nge tabab e girdi’ ko pigpig ngak Jehovah. Aram fan nrib t’uf ni ngad machibgad e chiney!c
MU FANAY E TAYIM ROM NI FAN KO MACHIB
Ngiyal’ ney ni gad be machib e gad be dag ni kemus ni Gil’ilungun Got e rayog ni nge fek e bin riyul’ e gapas nga fayleng ndakuriy ban’en nra buch (Mu guy e paragraph 7-9)
7. Mang e baadag Jehovah ni ngad rin’ed e ngiyal’ ney?
7 Chiney ni kari chugur ni nge tabab fare “Rran rok” Jehovah e baadag ni ngad fanayed e tayim rodad ni fan ko fare maruwel ni machib. Ba t’uf ni ngad guyed rogon ni ‘gubin ngiyal’ ma ngaud muruwliyed e maruwel rodad ni fan ngak Somol.’ (1 Kor. 15:58) I yiiynag Jesus murung’agen e n’en ni gad ra rin’. Nap’an ni be weliy urngin ban’en nib ga’ fan nra buch u nap’an e tin tomuren e rran, miki gaar: “Ma som’on e thingar ni machibnag fare Thin Nib Fel’ ni yib rok Got ngak urngin e nam.” (Mark 13:4, 8, 10; Matt. 24:14) Am lemnag e re n’ey: Gubin yay ni ga ra un ko machib ma aram e ga be un i lebguy e re yiiy ney ni bay u Bible!
8. Uw rogon ni be ulul ni nge mon’og fare maruwel ni yibe machibnag murung’agen Gil’ilungun Got?
8 Mang e rayog ni nga dogned u rogon ni be mon’og fare maruwel ni yibe machibnag murung’agen Gil’ilungun Got? Gubin e duw ni boor e girdi’ ni yad be rung’ag fare thin nib fel’ ni murung’agen Gil’ilungun Got. Am lemnag rogon ni be yoor e pi tamachib u ga’ngin yang e fayleng u nap’an e tin tomuren e rran. Nap’an e duw ni 1914, ma 5,155 urngin e pi tamachib ni bay u 43 e nam. Chiney e sogonap’an 8.5 milyon e pi tamachib ni bay u 240 e nam! Machane dawori m’ay e maruwel rodad. Thingar da ululgad i weliy ko girdi’ ni kemus ni Gil’ilungun Got e rayog ni nge chuweg gubin e magawon ni be mada’nag e girdi’.—Ps. 145:11-13.
9. Mang fan nthingar da ululgad i machibnag murung’agen Gil’ilungun Got?
9 Dab da talgad i rin’ e re maruwel ney ni ngan machibnag murung’agen Gil’ilungun Got nge mada’ ko ngiyal’ ni ke yog Jehovah ni ke mus e maruwel. Uw urngin e tayim ni ka bay nrayog ni nge fil e girdi’ murung’agen Jehovah Got nge Jesus Kristus? (John 17:3) Dariy bagadad ni manang. Machane n’en ni gad manang e kab mab e kanawo’ ngak e piin bay rogon ni nge “yog e yafos ndariy n’umngin nap’an ngorad” ni nge m’agan’rad ko fare thin nib fel’, mar dugliyed ni ngar pigpiggad ngak Jehovah e chiney ndawori tabab fare gafgow nib ga’. (Acts 13:48) Ere uw rogon ni ngad ayuweged e pi girdi’ ney u m’on ni nge sagaal?
10. Mang e be pi’ Jehovah ngodad ni nge ayuwegdad ni ngad filed e tin riyul’ ko girdi’?
10 Be fanay Jehovah e ulung rok ni nge pi’ gubin ban’en nib t’uf rodad ya nge yag nda filed e tin riyul’ ko girdi’. Bod ni gubin e wik ma yibe skulnagdad u nap’an e muulung ni yima tay u lan e wik. Re muulung ney e ma ayuwegdad ni ngad nanged e n’en ni nga dogned u nap’an ni kad mada’naged be’ ko yay nsom’on, ngu nap’an ni kad sulod ngak be’ ni kad mada’naged u nap’an e machib. Ku ma skulnagdad u rogon ni ngad filed e Bible ko girdi’. Ku bay boch ban’en ni ke pi’ e ulung rok Jehovah ngodad u lan fare Tafen Talin e Maruwel ni Yima Fanay ni Ngan Fil Ban’en ko Girdi’. Pi n’ey e ra ayuwegdad u rogon ni ngad . . .
tababnaged e numon ngak be’,
nonad u reb e kanawo’ nra k’aring be’ ni nge adag ni nge motoyil ngodad,
k’aringed e girdi’ ni ngar adaged ni ngkur filed boch ban’en u Bible,
filed e tin riyul’ ko piin gad be fil e Bible ngorad, ma gad
yog ngak e piin baadag e machib ni nga ranod ko fare website rodad, mar bad nga Tagil’ e Liyor rodad.
De gaman ni kemus ni nge yag e pi talin e maruwel ney ngodad, ya thingar kud maruwelgad ngay.d Bod nu tomuren ni kam nonow be’ ni baadag e machib, ma kam pi’ reb e tract ara magazine ngak, ma aram e rayog ni ngki beeg boch ban’en ni bay riy nge taw ko ngiyal’ ni kam sul ngak bayay. Ba milfan ngodad ni nge gubin e pul, ma gad fanay e tayim rodad ni fan ko fare maruwel ni machib.
11. Mang fan ni kan ngongliy rogon e Fol Bible u Online?
11 Fare Online Bible Study Lessons ara Fol Bible u Online ni bay ko jw.org® e ku aram reb e kanawo’ ni be ayuweg Jehovah e girdi’ riy ni ngar filed e tin riyul’. Mang fan ni kan ngongliy e pi n’ey? Ra reb e pul ma bokum biyu’ e girdi’ u ga’ngin yang e fayleng ni yad ma yan ko Internet ni ngar gayed boch ban’en nrayog ni ngar filed u Bible. Pi n’en ni bay ko website rodad e rayog ni nge ayuweg e pi girdi’ ney ni ngar filed e Thin rok Got. Sana bay boch e girdi’ ni kam mada’nagrad u nap’an e machib ni gathi ri yad baadag ni nge yan be’ i guyrad ni ngar filed e Bible. Faanra aray rogon, ma aram e rayog ni ngam dag ngorad e gin ni bay e re fol Bible ney riy ko website rodad, ara mu pi’ e link ngorad nrayog ni nge fekrad ko gin bay e re n’ey riy.e Faanra rayog, ma gog ngorad ni nga ranod nga reb nrayog ni ngar nanged fan e thin riy.
12. Mang e rayog ni nge fil be’ ko fare Fol Bible u Online?
12 Baaray boch ban’en ni bay ko fare Fol Bible u Online: “Bible nge En Ke Yib Rok,” “Piin nib Ga’ ni Be Weliy e Bible Murung’agrad,” nge “Thin nu Bible e Ra Pi’ e Athap Ngodad.” Nap’an ni be fil be’ e pi n’ey, ma aram e rayog ni nge nang:
Rogon nrayog ni nge ayuweg e Bible be’
Mini’ Jehovah, nge Jesus, nge pi engel
Fan ni sunmiy Got e girdi’
Fan ni bay e gafgow nge kireb
Ku bay riy murung’agen rogon nra . . .
chuweg Jehovah e gafgow nge yam’
faseg Jehovah e piin kar m’ad, nge
rogon nra yan Gil’ilungun Got nga lon e pi am ko girdi’ nder fel’ e gagiyeg rorad.
13. Fare fol Bible u online e ke yan nga lon e yaram ko fol Bible ni gad ma tay, fa? Mu tamilangnag.
13 Re fol Bible nem u online e dawori yan nga lon e yaram ko fol Bible ni gad ma tay. Ke pi’ Jesus reb e maruwel ngodad ni aram e ngad ayuweged e girdi’ ni ngar manged pi gachalpen. Gad be athapeg ni piin yad ra fil e n’en ni bay ko re fol Bible nem u online e ra ga’ fan u wan’rad e n’en ni kar filed, mar adaged ni ngkur filed boch ban’en. Faanra buch ni aray rogon ma aram e yad ra adag ni ngar uned ko fol Bible. Tomuren nra mu’ be’ i fil e n’en ni bay ko re fol Bible nem u online, ma aram e bay bang nrayog ni nge yan ngay ni nge yog ni nge yib be’ i guy ni ngar filew e Bible. Gubin e rran nib pag 230 e girdi’ u ga’ngin yang e fayleng ni yad be fanay fare website rodad ni ngar ninged e fol Bible! Rib t’uf ni be’ e nge fil e Bible ko pi girdi’ ney!
MU ULUL I AYUWEG E GIRDI’ NGAR MANGED PI GACHALPEN JESUS
14. Mang e gad ma athamgil ni ngad rin’ed nrogon nib puluw ko n’en ni yog Jesus ko Matthew 28:19, 20, ma mang fan?
14 Mu beeg e Matthew 28:19, 20. Nap’an ni gad be fil e Bible ko girdi’ ma gad ma athamgil u rogon nrayog rodad ni ngad ‘pingeged yad ngar manged pi gachalpen [Jesus] . . . , ma gad fil ngorad rogon ni ngaur folgad u gubin e tin ni ke yog ngodad ni ngaud rin’ed.’ Ba t’uf ni ngad ayuweged e girdi’ ngar nanged feni ga’ fan ni ngar dugliyed ni ngar pigpiggad ngak Jehovah mi yad ayuweg Gil’ilungun. Re n’ey e be yip’ fan nib t’uf ni ngad guyed rogon ni ngaud pied e athamgil nga laniyan’ e girdi’ ni ngar folgad ko tin kar filed, mar ognaged e yafos rorad ngak Jehovah, mi yad un ko taufe. Kemus rogon me yag nra mageygad ni yad fos u nap’an fare rran rok Jehovah.—1 Pet. 3:21.
15. Mang e dariy e tayim rodad ni ngad rin’ed, ma mang fan?
15 Kad weliyed faram ndaki yoor e tayim ni ka bay u thilin e ngiyal’ ney ni gad bay riy nge ngiyal’ ni bay ni thang e re m’ag ney. Aram fan ndariy e tayim rodad ni ngaud filed e Bible ko girdi’ ndarur nameged ni ngar manged boch i gachalpen Kristus. (1 Kor. 9:26) Rib t’uf ni ngad gurgad ngad mu’naged e maruwel rodad! Ka boor e girdi’ nib t’uf ni ngar rung’aged murung’agen Gil’ilungun Got u m’on ni nge sagaal.
MU CHUW KO TELIW NI GOOGSUR
16. Mang e thingar da rin’ed ni gad gubin nrogon ni bay ko Revelation 18:2, 4, 5, 8? (Kum guy e footnote.)
16 Mu beeg e Revelation 18:2, 4, 5, 8. Pi thin nu Bible ney e be tamilangnag ban’en ni baadag Jehovah ni nge rin’ e pi tapigpig rok. Gubin e Kristiano nthingar dab kur uned nga gubin ban’en ni bay rogon ko teliw ni googsur. U m’on ni nge nang be’ ni be fil e Bible e tin riyul’, ma rayog ni immoy u barba’ e teliw ni googsur. Rayog ni i un ko muulung ni yad ma tay nge pi n’en ni yad ma rin’ ko galesiya rorad. Ku rayog ni i pi’ e salpiy ni ayuw ko re raba’ i teliw nem. U m’on ni nge mang be’ ni ma fil e Bible reb e unbaptized publisher, mab t’uf ndab ki un nga ban’en ni yima rin’ nib l’ag rogon ko teliw ni googsur. Maku reb e, susun ni nge yoloy e babyor nge pi’ ko re teliw ara ulung ni immoy riy kafram ni bay rogon ko fare Babylon nib Gilbuguwan nge yog ni ngan chuweg fithingan ko re teliw nem.f
17. Mang maruwel e thingari siyeg e piin Kristiano, ma mang fan?
17 Tin riyul’ e Kristiano e thingar ra kol ayuwgad ndab ra uned nga reb e maruwel nib l’ag rogon ko teliw ni googsur. (2 Kor. 6:14-17) Bod nreb e Kristiano e dabi un ko maruwel u reb e galesiya. Maku reb e, faanra be maruwel rok be’ ara barba’ e maruwel ma aram e susun e dabi rin’ reb e maruwel u reb e naun ni yima fanay ni fan ko liyor ni googsur ni faanra fare maruwel e ba maruwel nib ga’, ara ba t’uf ni ngan rin’ nib n’uw nap’an, ara boor ban’en ni ngan rin’ nib l’ag rogon ngay. Ma faanra bay e siyobay rok ma thingar dabi m’agan’ ngay ni nge fek reb e maruwel ni bay rogon ko teliw ni googsur. Mang fan ni ngad siyeged e pi maruwel ney? Bochan e dubdad ni ngad uned i rin’ boch ban’en ni bay rogon ko machib nge pi n’en ma rin’ e teliw ni googsur nib alit u mit Got.—Isa. 52:11.g
18. Uw rogon ni fol reb e walag ni pumoon ko pi kenggin e motochiyel u Bible u nap’an nnog ngak ni nge rin’ reb e maruwel?
18 Boch e duw kafram ma bay be’ nib moon ni ma fek e girdi’ ni ngaur toyed e naun ni yib i yog ngak reb e piilal ni bay e siyobay rok ni nge rin’ reb e maruwel nde ga’ u reb e galesiya ni bay ko re binaw nem ni ma par e re piilal ney riy. Manang e re moon ney nre walag ney e gubin ngiyal’ ni ma siyeg ni nge rin’ e maruwel ni yima tay ko pi galesiya. Machane rib t’uf ni nge gay be’ ni nge rin’ e re maruwel ney. Yugu aram rogon, me fol fare walag ko pi kenggin e motochiyel u Bible, me siyeg fare maruwel. Faani bin migid e wik nga tomuren, me aw yaan yugu reb e moon ni ku ma dimow naun nga lan e shimbung ni be tay e kuruth ko fare galesiya. Faan gomanga de fol fare walag ko pi kenggin e motochiyel u Bible, ma ir e ra aw yaan nga lan fare shimbung. Am lemnag rogon nra kireb thin e re piilal ney u wan’ e tin ka bay e walag, mu kum lemnag rogon laniyan’ Jehovah ko re n’ey.
MANG E KAD FILED?
19-20. (a) Mang e kad filed? (b) Mang e ka bay nib t’uf ni ngad filed murung’agen?
19 Be yog e Bible ni bin migid e yiiy nib ga’ fan ni bayi lebug e aram e ra yog e tayugang’ ko pi nam u fayleng ni “ke gapas ndariy ban’en nra buch.” Machane bochan e n’en ni ke fil Jehovah ngodad, ma kad nanged ni pi nam e dabiyog ni ngar feked e bin riyul’ e gapas i yib nga fayleng nra par ni manemus. Ere mang e susun ni ngad rin’ed u m’on ni nge buch e re n’ey ngu m’on ni nge taw e riya’ ko girdi’? Baadag Jehovah ni ngad fanayed e tayim rodad ni ngad machibnaged murung’agen Gil’ilungun, ma gad ayuweg e girdi’ ni ngar manged boch i gachalpen Jesus. Ku baadag ni ngad pared ni gad ba dar ko pi yurba’ i teliw ni googsur. Re n’ey e ba muun ngay ni ngad chuweged fithingdad ko pi yurba’ i teliw ara ulung ni bay rogon ko fare Babylon ni Gilbuguwan, ma gad siyeg urngin raba’ e maruwel nib l’ag rogon ngay.
20 Ka bay boch ban’en nra buch u tungun e “tin tomren e rran.” Ere bay boch ban’en ni baadag Jehovah ni ngad rin’ed. Mang e pi n’ey, ma uw rogon nrayog ni ngad fal’eged rogodad ni fan ko pi n’en nra buch boch nga m’on? Aram e n’en ni gad ra weliy ko bin migid e article.
TANG 71 Gadad e Salthaw rok Jehovah!
a Dabki n’uw nap’an ma gad ra rung’ag ni ke yog e pi nam ni ke yag ni ngar feked e gapas i yib nga fayleng “ndariy ban’en nra buch!” Ireray e pow riy ni aram e nge tabab fare gafgow nib ga’. Ere mang e baadag Jehovah ni ngad rin’ed e chiney nge yan i mada’ ko ngiyal’ nem? Re article ney e ra pi’ e fulweg ko re deer ney.
b Bod ni fare United Nations e yad ma yog ko website rorad ni yad be “awnag e gapas u thilin e pi nam u fayleng ndariy ban’en nra buch.”
c Mu guy fare article ni kenggin e “Gechig rok Got—Ba Gaman e Tayim ni Ma Pi’ ni Ngan Fol ko Ginang Rok, Fa?” ni bay ko re ke babyor ney.
d Faanra ka ga baadag ni ngam nang boch ban’en u rogon ni ngan fanay e pi n’en ni bay u lan fare Tafen Talin e Maruwel ni Yima Fanay ni Ngan Fil Ban’en ko Girdi’, mag guy fare article ni kenggin e, “Mu Fil e Tin Riyul’ ngak e Girdi’” ni bay ko Fare Wulyang ko Damit ko October 2018.
e Fare Fol Bible u Online e kemus ni yigoo thin ni Meriken nge Portuguese e bay riy. Bay fin nni pilyeg nga yugu boch e thin.
f Kub t’uf ni ngad siyeged boch e ulung ni kan ngongliy ni fan ko piin fel’ yangaren, ara yu yang i ban’en ni ma yan e fel’ yangaren ngay ni ngar rin’ed boch ban’en u taabang ni ngan felfelan’ ngay ni bay rogon ko teliw ni googsur. L’agruw ko pi ulung ney e ka nog e YMCA (Young Men’s Christian Association) nge YWCA (Young Women’s Christian Association) ngay. Yugu aram rogon nsana be yog girdien e re ulung ney ni YMCA/YWCA ni pi’ n’en ni yad ma rin’ e dariy rogon ko teliw, machane bin riyul’ riy e ireray boch e ulung ni yad be garereg boch e machib ko pi yurba’ i teliw nge pi n’en ni yad be nameg.
g Faanra ga baadag ni ngkum nang boch ban’en u murung’agen e n’en ni be yog e Bible u murung’agen e maruwel ni bay rogon ko teliw ni googsur, mag guy e guruy ni 15 ko fare ke babyor ni T’ufeg rok Got ko par. 14-17, nge Fare Wulyang Ntagil’ E Damit ko June 1, 2006 ko p. 25 ko par. 11-13.
h MURUNG’AGEN E SASING: Boch e girdi’ ni yad bay u bang ni yima pi’ e coffee riy nchuway’ e kar gingad u nap’an ni “Kan Weliy ko News” murung’agen ni “ke gapas ndariy ban’en nra buch.” Machane bay ba wu’ i mabgol ni yow l’agruw e Pi Mich u rom ni yow be toffan u tomuren e machib ndar pagew e pi thin ney ni nge bannagrow.