Ga Manang Murung’agen e Re N’ey, Fa?
Mang e maruwel ko pi tapigpig nib milfan boch ban’en ngorad kakrom?
KAKROM e re tapigpig nib milfan boch ban’en ngak e ir e ma yarmiy rogon e pi n’en ni yima rin’ u lan reb e tabinaw ara ir e en ma yarmiy rogon e tin yima rin’ ko chugum rok be’. Fare bugithin ni Hebrew nge Greek ni kan pilyeg ni “tapigpig” e bay yu ngiyal’ ni be yip’ fan e en ma yarmiy e maruwel ara en ma yarmiy rogon e pi n’en ni yima rin’ u lan reb e tabinaw.
Nap’an ni immoy Josef ni fak Jakob u Egypt ni ir reb e sib, min tay ni nge mang ir e re tapigpig nib milfan boch ban’en ngak u lan e naun ko masta rok. Bin riyul’ riy e, pag fan e masta rok u Egypt “urngin ban’en rok ngak.” (Gen. 39:2-6) Boch nga tomuren u nap’an ni mang Josef be’ nib ga’ lungun u Egypt, ma aram miki tay be’ ni nge mang tapigpig ni nge milfan urngin ban’en ngak u lan e naun rok.—Gen. 44:4.
Kakrom u nap’an Jesus e piin bay e binaw ni taferad e ba ga’ ni yad ma par u boch e mach nib palog ko gin bay e milay’ rorad riy. Ere yad ma tay e pi tapigpig rorad nib milfan boch ban’en ngorad ni yad e ngar yaliyed rogon e maruwel ni yibe tay ko yungi milay’ ney.
Mini’ e piin rayog ni ngar manged tapigpig nib milfan boch ban’en ngorad? I yog reb e tayol ni immoy u Roma ko bin som’on e chibog ni ka nog Columella ngak nre tapigpig ni yima dugliy ni nge milfan boch ban’en ngak e susun ni “ir be’ ni ke fil rogon ni nge rin’ e re maruwel nem nib fel’ rogon.” Susun e ir be’ nrayog ni “nga i yaliy girdien e maruwel ma be guy rogon ni yad gubin ni yad be rin’ e maruwel rorad, machane der gafgownagrad.” Ki ulul ngay ni gaar: “Bin th’abi ga’ fan riy e reb e tapigpig nib milfan boch ban’en ngak e susun e dabi lemnag ni manang urngin ban’en, ma susun e ngki m’agan’ ngay ni nge fil boch ban’en nib beech.”
Be weliy e Thin rok Got murung’agen reb e tapigpig nib milfan boch ban’en ngak ni nge yip’ fan boch e maruwel ni yima rin’ u lan e ulung ni Kristiano. Bod ni, pi’ apostal Peter e athamgil nga laniyan’ e piin Kristiano ni ngar fanayed e salap rorad ni ke pi’ Got ni ngar maruwelgad “ngay [“ni yad boch e tapigpig nib milfan boch ban’en ngorad,” NW] nge yib fan ngak boch e girdi’.”—1 Pet. 4:10.
I weliy Jesus murung’agen ba tapigpig nib milfan boch ban’en ngak u lan fare fanathin rok ni bay ko Luke 16:1-8. Maku reb e, nap’an ni be weliy murung’agen e pow ni be dag ni bay ni ke Pilung, me micheg ngak pi gachalpen nra mel’eg ba “tapigpig nib yul’yul’ ma ba gonop.” Maruwel nrib milfan ko re tapigpig nem e aram e nga i pi’ ngak pi gachalpen Kristus e ggan nib t’uf rorad ni fan ko tirok Got ban’en u nap’an e tin tomuren e rran. (Matt. 24:45-47; Luke 12:42) Gad ba felfelan’ ni gad boch e piin be yag ngorad e pi babyor nra gelnag e michan’ ni be ngongliy fare tapigpig nib yul’yul’, maku yad be wereg u ga’ngin yang e fayleng.