Gur Reb e Pi Mich Rok Jehovah nib Fel’ Yangarem?
1. Gimed e fel’ yangaren, mang boch e deer nib fel’ ni ngam fl’eged i lemnag?
1 Faanra ni fith e re deer nem ngom ma ga ra yog e arrogon fa danga’? Mang fan? Gur, bochan ni gallabthir rom e yow e Pi Mich Rok Jehovah ma kar filew e Bible ngom? Sana yow ma fekem ko muulung nge machib ma sana ku boor e fager rom nge girdi’ ni gamanang ni yad e Pi Mich Rok Jehovah. Me gur? Gur bagayad e pi mich rok Jehovah, fa?—Isa. 43:10-12.
2. Mang e rayog ni nge rin’ e piin ni fel’ yangarad nge yog nra mon’oggad ko fol Bible?
2 Fol Bible: Ra ngad manged reb e Pi Mich Rok Jehovah, ma ba t’uf ni nge yog e tamilangan’ rok ngodad, nib muun e tin nib m’agan’ ngay nge tin ni baadag ni ngad rin’ed. Kam dugliy ba ngiyal’ ni fan ko fol Bible, fa? Ga ma rin’ u gubin e rran, ni bod e abich ni ga ma tay ni gubin e rran, fa? (John 17:3) Ma nap’an ni ga be beeg e Bible nge ku boch e babyor rodad, ga ma fal’eg i yaliy boch ban’en nra tamilangnag ngom murung’agen Jehovah nge rogon e lem rok nge tin nib m’agan’ ngay nge yog nim weliy ngak boch e girdi’ nib fel’ rogon, fa? Ireray ban’en nib fel’ ni ngam rin’ u nap’an ni ga be beeg e pi babyor ni ke ngongliy e Ulung rodad ni fan ngodad ndemtrug ko kab beech fa ke n’uw nap’an.
3. Mang boch e deer nra yib ngan’um u tomren ni kam bieg e Hebrews 10:23-25?
3 Ga ma athamgil ni ngam fol ko schedule ko Bible reading ni yima tay u gubin e rran, fa? Ga ma fl’eg rogom ko pi muulung rodad, fa? Ga ma fil e Wulyang Ntagil’ E Damit rom nge babyor ni yima fil ko Fol Babyor ko Ulung u m’on riy, fa? Ga ma pi’ e fulweg u nap’an e muulung, fa? Ga ma weliy ni thin rom? Faanra aram rogon ni ga ma rin’, ma rib manigil. (Heb. 10:23-25) Ya aram e mich riy ni ga be athamgil ni ngam mang reb e pi mich rok Jehovah ko ngiyal’ ni kab fel’ yangarem.
4. Mang boch ban’en ni ngad rin’ed nra ayuwegdad ni ngad mon’oggad ko machib?
4 Machib: Riyul’ nra ngad mang reb e mich rok Jehovah, ma thingar da uned i machibnag murung’agen ngak e girdi’. Ga ma un ko machib ni gubin ngiyal’? Boor e fel’ yangaren ni kar daged e kanawo’ nrayog ni ngan folwok riy. Nap’an ni ga be wereg e babyor u mit e tabinaw ma ga ma dag reb e thin ngak e girdi’ ni ga be lemnag nra pug e tafinay rorad, fa? Ga ma fith ko uw rogon u wan’ fare n’em, ma ga motoyil ngak nib fel’ rogon nge yog nim nang e n’en ni be lemnag, fa? Ma nap’an ni kam pi’ e babyor ngak be’, ga ma tamilangnag boch ban’en riy ni ga be lemnag nra adag, fa? Sana ireray boch ban’en nib t’uf ni ngam mon’og riy. Ere mu athamgil mag meybil ngak Jehovah nge yog ni ayuwegem ni bod rogon ni be rin’ ngak e tin ni ka bay e tamachib rok ni yad be micheg ni yad boch e pi mich rok.−Kol. 1:9, 10.
5. Uw rogon nra fal’eg fare thin nu Hebrew 6:10-12 lanin’dad?
5 Ngan Ognagey: Ra nge fel’ be’ u wan’ Jehovah ma thingari mon’og i yan nge yog ni ognag e yafas rok ngak me un ko taufe. (Matt. 28:19, 20) Rriyul’ ni faanra mu athamgil nge yoor ban’en nim nang u murung’agen Jehovah mag rin’ e tin nib m’agan’ ngay ma ra ayuwegem ni ngam pasig ko pigpig ni ga be tay mu kum par ni gab yul’yul’ ngak.—Heb. 6:10-12.