Mu N’uf Jehovah ko Fulweg ni Ga Ma Pi’ u Nap’an e Muulung

1. (a) Mang ban’en ni gad ma rin’ u nap’an e muulung? (b) Susun ni nge uw rogon e re n’ey u wan’dad?

¹ Fulweg ni gad ma pi’ u nap’an e muulung e aram rogon ni gad ma weliy murung’agen e tin ni ke michan’dad ngay ma gad pi’ e athamgil nga laniyan’ e girdi’. (Prov. 20:15; Heb. 10:23, 24) Thingar da nanged ni fulweg ni gad ma pi’ e aram reb e tow’ath ni kan pi’ ngodad ma susun ni ngaud rin’ed ni gubin ngiyal’. Uw rogon ni ngad rin’ed e re n’ey me yib angin?

2. (a) Mang e fulweg nib fel’? (b) Uw rogon e fulweg nde fel’ ni ngan pi’?

² Fulweg nib fel’ e ba tamilang, mab mom ni ngan nang fan, mab puluw e thin riy ko babyor ni yibe fil. En ni kan pining ni nge pi’ e bin som’on e fulweg u reb e paragraph e susun ni nge pi’ e fulweg nib puluw ko fare deer, me digey e tin ni kabay e thin nge weliy boch e girdi’. Ngan gay rogon ndab ni weliy e thin ni boor ya ra fek e tayim ma dabkiyog ni ngki pi’ boch e girdi’ e fulweg rorad. Mu guy rogon ngam pi’ e fulweg ni thin rom ndab kum beeg u babyor. Faanra baadag be’ ni ngki pi’ reb e fulweg ma rayog ni nge puluwnag ko pi thin nu Bible ni bay ko paragraph. Mu fal’eg e motoyil ko fulweg ni kan pi’ ya nge dab kum sul u daken e fulweg ni kafini pi’ be’.

3. (a) Uw rogon u wan’ boch e girdi’ e fulweg ni ma pi’ e piin bitir nge tin kab beech e girdi’? (b) Uw rogon e re n’ey u wan’ Jehovah nge Jesus?

³ Boch e girdi’ e ma lemnag nde fel’ ni nge non e bitir u nap’an ni bay e piilal. Ku bay boch e girdi’ ni kar piilalgad ni yad ma son nge non e piin ni yad ba ilal boch fa piin ni boor ban’en ni yad manang ko som’on mfin ra nonad. Machane, Jesus e gathi aram rogon e lem rok. Nap’an ni puwan’ boch e girdi’ ngak bogi bitir ni yad be n’uf fare Messiah me non Jesus ni gaar: “Dawor mpoyed fa gin’em u lan e babyor nib thothup? Ya be gaar, ‘Kam fil ngak e bitir ni kabran ni ngar pininged e sorok ni bfel’ rogon.’” (Matt. 21:15, 16) Fulweg ni ma pi’ e piin ni bitir nge tin kab beech e girdi’ ni thin rorad e ma pi’ e athamgil nga laniyan’ e piin ni kar piilalgad. Fulweg ni aram rogon e ma n’uf Jehovah.

4. Uw rogon me yib angin e pi muulung ni gad ma tay?

⁴ Susun ni ngad athamgilgad ngaud fl’eged rogodad nge yog nda pied e fulweg u nap’an e pi muulung. Ya ra yib angin e muulung ni gad ma tay nfaanra boor e fulweg nib ga’ angin ni yibe pi’.​—Ps. 26:12.