Gad Gubin ma Rayog ni Ngad Ayuweged e Girdi’ Ngar Manged Pi Gachalpen Jesus
1 Gathi taabe’ e ke ayuweg be’ nge mang reb e gachalpen Jesus. Rayog ni nge fanay Jehovah urngin e “piin ni ma maruwel u taabang” ni ngar ayuweged e pi Bible study ngar ilalgad ko tirok Got ban’en. (1 Kor. 3:6-9) Ra bagadad ma ma ayuweg e tin biech e girdi’ u daken e pi fulweg ni gad ma pi’ u nap’an e pi muulung ko Kristiano nge daken e ngongol rodad nib fel’ ni ma pi’ e mich riy ni kan ni thothup rok Got e be gagiyegnag e yafos rodad. (John 13:35; Gal. 5:22, 23; Efe. 4:22, 23) Ku mang e rayog ni ngad rin’ed ni ngad ayuweged e tin biech e girdi’?
2 U Daken e Ulung: Gad gubin ma rayog ni ngad ayuweged e piin ni ka fin ra tababgad i un ko pi muulung ngad pininged e magar ngorad ma ngad nongad ngorad u m’on nge tomren e muulung. Reb e pumoon e ke weliy u murung’agen e yay nsom’on ni ke un ko muulung ni gaar: “U reb e rran ma kug mada’nag e piin nib riyul’ ni yad ba gol, ma dagu nang owcherad, ma gathi aram rogon urngin e girdi’ ni kug mada’nag ko galesiya rog ni kug un ngay ka nap’an ni gub bitir. Ke tamilang u wan’ug ni kug pirieg e thin nriyul’.” Medlip e pul u tomren ni ke un ko bin som’on e muulung me un e re moon nem ko taufe.
3 Ngad pininged e magar ko pi Bible study ni yad be mon’og iyan ko tirok Got ban’en. Be athamgil u fithik’ e togopuluw? Be un ko pi muulung u gubin ngiyal’? Ke athamgil ni nge pi’ e fulweg? Ke un ko Theocratic Ministry School fa ke tabab i un ko machib? Ngad pininged e magar ngak ko mon’og ni ke tay. Aram e ra pi’ e athamgil nga laniyan’.—Prov. 25:11.
4 En ni ma Conductnag e Bible Study: Boch e publisher e kar ayuweged e pi Bible study rorad ngar nanged e pi girdi’ ko ulung ya kar pininged yad ngar uned ngorad ko Bible study. Ngan pining fare student nge un ko pi muulug ko ulung. Nap’an ni nra un ko pi muulung ma ngam guy rogon ni nge mada’nag urngin e girdi’. Be athamgil ni nge gel ko reb e ngongol nib kireb ni sana tamagow? Bay be’ ko tabinaw rok ni dabun ni nge fil e Bible? Ra fl’eg laniyan’ ni nge non ngak reb e publisher ni ke gel ko ba magawon ni taareb rogon.—1 Pet. 5:9.
5 Tin biech e girdi’ e ba t’uf rorad e ayuw ko ulung. Urngin e girdi’ ma rayog ni ngar ayuweged yad ngar mon’oggad iyan ko tirok Got ban’en ni faanra gad ra lemnagrad.