“Ngam Machibnag e Thin Rok Got Nda Mu Rus”

¹ Yu ngiyal’ ma ga ma tinna’ ni ngam weliy u murung’agen e michan’ rom u nap’an ni ga bay u skul ara tabon e maruwel? Ba mo’maw rom ni ngam machibnag e girdi’ rom u fithik’ e sabethin ara piin buguli yoror rom ara piin ndamu nang? Mang e ra ayuwegdad ngad “machibnaged e thin rok Got ngak e girdi’ ndab kud rusgad” ni gubin ngiyal’?​—Fil. 1:14.

² Dab Mu Tinna’: Faanra bay e girdi’ rom ara fager rom ni kan gathibthibnag ma ga ra tinna’ ni ngam mog e thin nra ayuweg? Jehovah e Fager rodad, ma kan gathibthibnag u bokum e chibog. Gad ba taw’ath ya rayog ni ngad pied e mich ni fan ko Got rodad! (Isa. 43:10-12) Rogon fene gel ni ba t’uf Jehovah rodad e ra ayuwegdad ndabda tuntungad ma dabda tamdaggad ni ngad machibnaged fare thin nriyul’.​—Acts 4:26, 29, 31.

³ Dabda paged talin ni thin ni gad be wereg e aram e thin nib fel’. Ra yibnag angin ko piin ni ma fol riy ndariy n’umngin nap’an. Faan gad ra tiyan’ ko uw fene ga’ fan e maruwel ko machib ma dabda lemnaged gadad fa piin ni be togopuluw ngodad, ma aram e ra ayuwegdad ndab da rus ni ngad wereged e machib.

⁴ Kanawo’ ni Tay Boch e Girdi’: Rayog ni nge pi’ e athamgil nga lanin’dad ni ngad lemnaged e kanawo’ nib yul’yul’ ni tay boch e girdi’ ni kar machibnaged fare thin rok Got ndar tamdaggad. Susun, i machibnag Enok e pufthin rok Jehovah ngak e piin ni tadenen. (Jude 14, 15) I yul’yul’ Noah me machibnag e girdi’ ni dariy fan e machib u wan’rad. (Matt. 24:37-39) Tin som’on e Kristiano e “dariy e skul rorad” ma kar wereged e machib u fithik’ e togopuluw. (Acts 4:13, 18-20) Fagali babyor ni Wulyang Ntagil’ E Damit nge Awake! e be weliy u murung’agen e girdi’ ko ngiyal’ ney ni ke michan’rad ku Jehovah ma aram e kar gelgad ko marus ko girdi’ mar wereged fare thin nib fel’ u fithik’ e pasig.

⁵ Ra pi’ e athamgil nga lanin’dad ni ngad lemnaged e pi tapigpig nib yul’yul’ nkakrom ni kar gelgad ko magawon. (1 Ki. 19:2, 3; Mark 14:66-71) “Got rodad e pi’ e athamgil nga lanin’rad ni ngar weliyed e Thin nib Fel’ ni yugu ereram gelngin e togopuluw ni yibe tay ngorad.” Ma ku rayog rodad!​—1 Thess. 2:2.