Rayog ni Ngam Un ko “Kanawo’” ni Ba Mab Ngom Ngam “Ngongliy e Maruwel Riy ni Ba Ga’”?
1. Mang e “kanawo’” ni “ba mab” ni ngad “ngongliyed e maruwel riy ni ba ga’” ni ke bing ngodad?
1 Faani “mab e kanawo’ ku apostal Paul ni nge “ngongliy e maruwel riy ni ba ga’”, ma i un ngay ni nge mon’ognag e machib u murung’agen Gil’ilungun Got, ni yugu aram rogon ni bay boor e tatogopuluw. (1 Kor. 16:9) Ngiyal’ ney ma 642,000 e publisher ko Gil’ilungun Got u fayleng iyan e kar uned ko kanawo’ ni ke mab ngorad mar uned ko regular pioneer.
2. Mang fan ni ba fel’ ni ngad lemnaged rarogodad u reb e ngiyal’ nge reb?
2 Rayog ni Nge Thil Rarogom: Yugu aram rogon rarogom e be magawonnagem ko machib, machane rayog ni nge thil. Ere, ba puluw ni ngad lemnaged rarogodad u reb e ngiyal’ nge reb ma dab da sonnaged e ngiyal’ ni ba m’ag. (Ekle. 11:4) Gur, reb e pagel nra graduate ko high skul fa danga’? Gur, reb e llabthir ndabi n’uw nap’an ma ra un e bitir rom ko skul fa? Dabi n’uw nap’an ma ga retire ko maruwel fa? Faanra thil rarogom nge yoor e tayim rom ma rayog ni ngam un ko regular pioneer. Reb e walag ni ppin ni ba magawon ko m’ar e ke dugiliy ni nge un ko pioneer ko ngiyal’ ni 89 e duw rok. Ko mang fan? Ya ke pag reb e duw nde yan nga aspital, me ere ke lemnag nrayog rok ni nge un ko pioneer.
3. Uw rogon ni ke thiliyeg boch e girdi’ rarogorad ni fan e ngar uned ko regular pioneer?
3 I lemnag Paul ni nge yan nge guy pi walagen u Korinth. Machane, de yan ni nge guyrad ni fan ko fare thin nib fel’. Boor e regular pioneer ko ngiyal’ ney e kar thiliyeged boch ban’en rorad ni fan e ngar uned ko regular pioneer. Boch i yad e kar paged boch ban’en nib t’uf rorad ma kar uned ko maruwel ni part-time ni fan e nge yog e tin nib t’uf rorad. Ke falfalan’rad ko re flaab ney ko pigpig. (1 Tim. 6:6-8) Boch e mabgol e kar paged boch ban’en rorad ni ke mus taa bagayow ba t’uf ni nge un ko maruwel, me ere rayog ko ppin rok ni nge un ko regular pioneer.
4. Mang e ngad rin’ed ni faanra de mudugil u wan’dad nrayog ni ngad tawgad ko awa ni ba t’uf riy?
4 Dab mu pag ni ngam lemnag ndabiyog ni ngam un ko pioneer ni bochan kam rus ni dabiyog ni ngam taw ko awa ni thingar mu yognag. Ke mus ni ba t’uf l’agruw e awa nge boch ko reb e rran nge reb. Faanra de mudugil u wan’um nrayog ni ngam rin’, mang ni dab mu un ko pioneer ni ayuw ko reb e pul machane ngam nameg ni ngam taw ko 70 e awa. Aram rogon ni ga ra ri lamen e falfalan’ ko maruwel ni pioneer. (Ps. 34:8) Nga mu non ngak e piin ni yad be pioneer e chiney. Sana ba t’uf rorad ni ngar gelgad ko boch e magawon ni bod gur. (Prov. 15:22) Mu ning ngak Jehovah ni nge ayuwegem ngam athamgil nge yoor e machib ni ngam tay.—1 John 5:14.
5. Mang fan e ba fel’ ni ngam nameg i un ko regular pioneer?
5 Ban’en nib Fel’ ni Ngan Nameg: Ra ngam un ko regular pioneer ma ke yog boor e flaab ngom. Ra yog e falfalan’ ngom ni bochan e ga ma pi’ ban’en iyan. (Acts. 20:35) Ra ngam un ko pioneer ma ke ayuwegem ngam salap i machibnag e Thin Rok Got nrogon. (2 Tim. 2:15) Ra yog ngom ni ngam guy ni be maruwel pa’ Jehovah nga dakenam. (Acts 11:21; Fil. 4:11-13) Ra ngam un ko pioneer ma ke ayuwegem ngam mon’og ko tirok Got ban’en, ni ngam k’adan’um ngay, ma ra ayuwegem ni ngam chugur ngak Jehovah. (Jas. 4:8) Rayog ni ngam un ko re kanawo’ ney ni ba m’ab ngom ma ngam un ko regular pioneer fa danga’?