Gad Ma Chaariy e Tow’ath Rodad!
1 Ka nap’an e ngiyal’ nkakrom iyib ngaray ma ke taw’athnag Jehovah e pi tapigpig rok. Ke taw’athnagrad ni demtrug e duw rorad fa liw rorad fa yad e piin ni pumoon ara ppin. (Luke 1:41, 42; Acts 7:46; Fil. 1:29) Miti mang taw’ath ni ma pi’ ngodad ko ngiyal’ ney?
2 Boch e Taw’ath Rodad: Gad ba taw’ath ya Jehovah e be skulnagdad. (Matt. 13:11, 15) Maku reb e tow’ath e rayog ni ngad pininged e sorok ku Jehovah u nap’an e pi muulung ko ulung. (Ps. 35:18) Ngiyal’ nrayog ni ngad pied e fulweg ma gad ma rin’ u fithik’ e pasig. Maku gad ma lemnag ni gad ba taw’ath ni rayog ni ngad rin’ed ban’en ko ulung, ma gad ra rin’ nge mus rogodad riy. Gad ma un ko klin ko Kingdom Hall u gubin ngiyal’ fa?
3 Bokum milyon e girdi’ ni ke maruwaran’rad ko be rung’ag Got e meybil rorad, machane gad ba taw’ath ya fa En Nth’abi Tolang u palpalth’ib e ma motoyil ko meybil rodad. (Prov. 15:29) Jehovah e ir e ma motoyil ko pi tapigpig rok u nap’an ni yad ma meybil ngak. (1 Pet. 3:12) Ma de yog ni ke mus ni in yay nrayog ni ngan non ngak. Ri gad ba taw’ath ya rayog ni ngad meybilgad ngak “u gubin ngiyal’”!—Efe. 6:18.
4 “Gad Be Maruwel Rok Got u Taabang”: Reb e taw’ath rodad e “gad be maruwel rok Got u taabang” u nap’an ni gad be wereg fare thin nib fel’ ko Gil’ilungun Got. (1 Kor. 3:9) Aram ba maruwel ni ma fl’eg lanin’uy ma ma pi’ e toffan. (John 4:34) Jehovah e de t’uf rok e ayuw ko girdi’ ni nge lebuguy e tin nib m’agan’ ngay machane ke pi’ ere maruwel ney ngodad ya bochan gad ba t’uf rok. (Luke 19:39, 40) Ma dan pi’ e re taw’ath ney ngak urngin e girdi’. Piin ni ma un ko machib e thingara folgad ko motochiyel ko Bible. (Isa. 52:11) Gad be dag ni gad ma chaariy e re taw’ath ney ya gad ma un ko machib u gubin e wik?
5 Tow’ath ni ke pi’ Jehovah e ma flaabnag e yafos rodad. (Prov. 10:22) Dabda dariy fannaged! Ngad daged ni riyul’ ni gad ma chaariy e taw’ath rodad ko machib ma aram me felan’ e Chitamangidad nu tharmiy ni ir fa en Ta Ma Pi’ “urngin e tin nib fel’ nge urngin e tow’ath nrib manigil.”—Jas. 1:17.