Pi Tabinaw e Ra Liyor ku Jehovah u Taabang
1 Nap’an e ngiyal’ ni kan yoloy e thin ko Bible ma boor ban’en ni rin’ girdien e tabinaw u taabang. Kar maruwelgad u taabang mar liyorgad ku Jehovah u taabang. (Lev. 10:12-14; Deut. 31:12) Boor e binaw e ngiyal’ ney e ri buchuuw ban’en ni ma rin’ girdien e tabinaw riy u taabang. Machane manang e pi Kristiano nib ga’ fan ni nge rin’ girdien e tabinaw boch ban’en u taabang ma ba ga’ ni aram rogon ko liyor. Ma felan’ e en Ta Sunumiy ni nge guy girdien e tabinaw ni yad be liyor ngak u taabang!
2 Ngan Machib u Taabang: Ra fel’ thilin girdien e tabinaw ni faan yad ra machibnag fare thin nib fel’ u taabang. Ere be’ ni piilal ko ulung e ra un nga yugu boch e girdi’ ko ulung ko machib maku ra un ko ppin rok nge bitir rok ko machib. (1 Tim. 3:4, 5) Mus ko piin piilal ni ma lekag e ulung ni yugu demtrug ni boor pa’ u puluwrad machane yad ma un ko pi leengiyrad ko machib.
3 Ma un e pi gallabthir ko bitir rorad ko machib ya ngar ayuweged yad ngar mon’oggad ko machib. Ma pi bitir e ra guy e gallabthir rorad ni ba t’uf Jehovah nge girdi’ rorad. (Deut. 6:5-7) Ma gathi de ga’ fan e re n’ey u nap’an ni be ilal e bitir u tabinaw. Ba wu’ i mabgol e bay dalip e pagal ni 15 nge mada’ ko 21 e duw rorad ma yow be ul’ul’ i un ngorad ko machib u gubin ngiyal’. Ke gaar fare matam: “Gamow ma fil ban’en ngorad u gubin ngiyal’. Ma gamow ma guy rogon ni bay e falfalan’ riy.”
4 Ngan Fl’eg Rogoy u Taabang: Ke yib angin e pi tabinaw ya yad ma fl’eg rogorad ko machib u taabang. Pi bitir e ma falfalan’ ni ngar practicegad ma bagayad e ra weliy e machib ma bagayad e householder. Boch e tabinaw e ma rin’ e re n’ey u tomren e study ko tabinaw.
5 Ma gel e falfalan’ rodad u nap’an ni gad ma un ko pi n’en nib ga’ fan u taabang ko piin nib t’uf rodad. Rib fel’ ni nge un girdien e tabinaw u taabang ko machib u mit e tabinaw iyan nge return visit nge Bible study! U nap’an ni ngam liyorgad ku Jehovah u taabang e tabinaw romed ma rayog ni ngam gaargad: “Gag nge girdi’ ko birok e tabinaw e nguug pigpiggad ngak Jehovah.”—Josh. 24:15.