Ayuw ni Fan ko Pi Tabinaw
1. Mang angin fare Sabbath ko pi tabinaw nu Israel?
1 I pi’ Jehovah fare Sabbath ni nge ayuweg e pi tabinaw kakrom. Piyu Israel e yad ma toffan ko maruwel rorad ni fan e ngar fal’eged i lemnag pi fel’ngin Jehovah nge tha’ u thilrad Got. Ma pi gallabthir e ur filed e pi Motochiyel rok Got ngak e pi bitir rorad mar guyed rogon ni nge taw nga gum’ircha’rad. (Deut. 6:6, 7) Bochan fare Sabbath ma aram fan ni bay e tayim ko pi tapigpig rok Jehovah kakrom ni ngar fal’eged i lemnag e tirok Got ban’en.
2. Mang e be fil fare Sabbath ngodad u murung’agen Jehovah?
2 Ngiyal’ ney e dakir tay Jehovah chilen ko pi tabinaw ni ngar folgad ko fare motochiyel ko Sabbath. Machane re motochiyel nem e be fil ban’en ngodad u murung’agen e Got rodad. Ya gubin ngiyal’ ni ma lemnag e girdi’ rok nge rarogorad ko tirok Got ban’en. (Isa. 48:17, 18) Ere reb e kanawo’ ni ma dag Jehovah ni be lemnagdad riy e ngiyal’ ney e aram u daken fare yaram ko Fol Bible ni Tabinaw.
3. Mang fan fare Fol Bible ni Tabinaw?
3 Mang Fan Fare Yaram ko Fol Bible ni Tabinaw? Nap’an e pul ko January 2009, ma fare Theocratic Ministry Skul nge Service Meeting nge Fol Babyor ko Ulung e kan tay nga taabang. Kan rin’ e re n’ey ni fan e nge yog ni tay e tabinaw reb e blayal’ ni fan ko fol Bible ni tabinaw ya nge yog nra gelgad ko tirok Got ban’en. Faanra rayog ma ra reb e tabinaw ma ngar ted e fol Bible ni tabinaw nga lon e fol babyor kafram u reb e nep ya nge yog ni ngar filed boch ban’en nib m’ag ko tabinaw rorad.
4. Susun nra reb e tabinaw ma kemus ntaareb e awa ni ngar fol Bible gad ni tabinaw, fa? Mu weliy rogon.
4 Nap’an ni ngad uned ko fol Babyor ko ulung ma ba t’uf ni ngad fal’eged rogodad, maku ba t’uf e tayim ni ngad milekaggad, nge ku boch ban’en. Fare fol Babyor ko ulung ni ud ted kafram e rib ga’ angin ko tabinaw. Ma chiney e kan thiliyeg e schedule ko muulung rodad ere bay e tayim rodad ni ngad fol Bible gad ni tabinaw u taabang. Ere de t’uf ni ngad ted e fol Bible ni taareb e awa. Ya susun ni ngad lemnaged e tin nib t’uf ko tabinaw rodad nge rogon nib m’ag ko tabinaw rodad.
5. N’umngin nap’an ni kan yarmiy ni fan ko fol Bible ni tabinaw e ngan fanay ni ngan weliy boch ban’en u taabang, fa? Mu weliy rogon.
5 N’umngin Nap’an ni Kan Yarmiy ni Fan ko Fol Bible ni Tabinaw e Ngan Fanay ni Ngan Weliy Boch Ban’en u Taabang, Fa? Nap’an nra fol Bible e piin mabgol nge pi tabinaw ni bay e bitir riy u taabang, ma aram e yad be pi’ e athamgil nga lanin’rad. (Rom. 1:12) Ma re n’ey e rayog ni nge ayuweg chon e tabinaw nge par nib fel’ e tha’ u thilrad. Ere Thin nu Bible e aram e n’en nib ga’ fan ni ngan weliy. Machane ku rayog ni ngan tay ba ngiyal’ u nap’an e fol Bible ni tabinaw ni nge be’ me fil e Bible rok ni goo ir. Bod nu tomuren ni kan mu’ ko fol Bible maku rayog ni ngan par u taabang ma ra be’ me guy ko nge fil e Bible rok, fa nge fal’eg rogon ko muulung, fa nge beeg boch e babyor. Bay boch e tabinaw ni ma turguy ni nge dabra meyal TV gad ko re blayal’ nem.
6. Uw rogon ni ngan tay e re fol Bible ney?
6 Uw Rogon ni Ngan Tay e Re Fol Bible Ney? De t’uf ni gubin ngiyal’ ma ngan fith e deer min pi’ e fulweg riy. Boor e tabinaw ni yad ma tay e Fol Bible ni Tabinaw ni bod rogon e muulung ni gad ma tay u lukngun e wik ni bochan e nge dabi chalban chon e tabinaw ngay. Boor ban’en ni yad ma weliy ma kub thilthil rogon. Bod ni yad ma tay ba ngiyal’ ko re tayim nem ni ngar beeged e Bible u taabang, mi yad tay ba ngiyal’ ni ngar fal’eged rogorad ko muulung, mu kur ted ba ngiyal’ ni ngar fal’eged rogorad ni fan ko machib. Page 6 e be weliy boch ban’en nrayog ni ngan rin’.
7. Mang e susun ni nge athamgil e piin gallabthir ni ngar rin’ed ya nge dabi chalban e bitir rorad?
7 Mang e Susun ni Nge Athamgil e Piin Gallabthir ni Ngar Rin’ed Ya Nge Dabi Chalban e Bitir Rorad? Ra yoor ban’en ni fil chon e tabinaw ni faan yira fol Bible u fithik’ e t’ufeg ni dariy be’ ni be magawon ngak be’. Faanra ba fel’ e yafang ma rayog ni ngan fol Bible u wen. Maku rayog ni ngan tal ngan toffan u taaboch yangiyal’. Boch e tabinaw e yad ma ngongliy ban’en ni ngan kay u nap’an ni kan mu’. Piin gallabthir e gathi aray e ngiyal’ ni ngar puwan’gad ko bitir rorad, machane rayog ni ngar weliyed ngak e bitir rorad ban’en ni kar guyed nib t’uf ni nge nang e bitir rorad fa reb e magawon ni ke sum. Machane faanra bay reb e bitir ni ke rin’ ban’en nib kireb mab fel’ ni ngar weliyed e gallabthir rok u yugu ba ngiyal’ ni gathi nap’an e fol Bible ni tabinaw ya nge dabi tamra’ u p’eowchen pi walagen. Fol Bible ni Tabinaw ni gad ma tay e susun ni dabi yan i par ni ban’en ndariy e felfelan’ riy mab mak’ar chalban, ya susun ni nge m’ug riy rarogon fare Got ni gad be pigpig ngak ni ir reb e Got nib felfelan’.—1 Tim. 1:11.
8, 9. Mang e ba t’uf ni nge fal’eg e piin lolugen e tabinaw rogorad riy?
8 Uw Rogon Nrayog ni Nge Fal’eg e En Lolugen e Tabinaw Rogon? Ra yib angin ko tabinaw ni faanra lemnag e en lolugen e tabinaw u m’on riy e pi n’en ni yira fil nge rogon ni ngan fil. (Prov. 21:5) Mab fel’ ni nge weliy e en figirngiy e re n’ey ngak leengin. (Prov. 15:22) Piin lolugen e tabinaw, mang ni dab mu fithed e bitir romed ngar weliyed lanin’rad? Ya faan gimed ra rin’ ma aram e rayog ni ngam nanged e n’en ni yad ba adag nge n’en ni yad be lemnag.
9 Ba ga’ nde t’uf ni nge tay fa en lolugen e tabinaw boor e tayim ni nge lemnag e n’en ni yira fil. Ya bay boch ban’en ni ma fil e tabinaw nde t’uf ni ngan thiliyeg u gubin e wik, ere de t’uf ni nge gubin e wik ma nge lemnag fa en lolugen e tabinaw boch ban’en nib beech ni ngan fil. Sana ba fel’ ni nge fal’eg rogon u tomren ni kan mu’ ko fol Bible ni tabinaw ya ka manang e n’en nib t’uf ko tabinaw rok ko tirok Got ban’en. Boch e piin lolugen e tabinaw e yad ma yoloy nga but’ e n’en ni yira weliy u biyay e fol Bible ni tabinaw mar ted nga bang nrayog ni nge guy gubin e girdi’ u tabinaw. Re n’ey e ra k’aring chon e tabinaw ni ngar sonnaged e ngiyal’ ni yira fol Bible riy u fithik’ e felfelan’ miki yog ni ngar fal’eged rogorad u m’on riy.
10. Mang e rayog ni nge rin’ e piin ni yad ma par ni goo yad u nap’an e Fol Bible ni Tabinaw?
10 Uw Rogon ni Faanra Goo Gag u Lan e Tabinaw Rog? Piin ni goo yad ni yad ma par e rayog ni ngar fanayed e re tayim ney ni fan ko Fol Bible ni goo yad. Rayog ni ngar beeged e Bible, mar fal’eged rogorad ni fan ko muulung, mar beeged Fare Wulyang ko Damit. Boch e publisher e yad ma fil yugu boch ban’en nib thil. Ma yu ngiyal’ e rayog ni ngar pininged yugu reb e publisher ara be’ u tabinaw rorad ni ngar weliyed boch ko Bible u taabang.
11, 12. Mang angin nra yib ni faanra un tay e Fol Bible ni Tabinaw?
11 Mang Angin Nra Yib ni Faanra Un Tay e Fol Bible ni Tabinaw ni Gubin Ngiyal’? Piin ni yad ma un ko bin riyul’ e liyor e rayog ni ngar chugurgad ngak Jehovah. Maku tabinaw ni yad ma liyor ngak Got u taabang e ma gel e tha’ u thilrad. Ba wu’ e mabgol e ra yoloyew murung’agen e pi tow’ath ni yib ngorow ni bochan e re n’ey ni lungurow: “Bochan ni gamow ma pioneer ma dariy e bitir romow ma ri gamow ba adag e Fol Bible ni Tabinaw’. Ya kug thamiyew ni kari chugurnagmow nga taabang ma ki chugurnagmow ngak e Chitamangidad nu tharmiy. Chiney e gamow ra od ni kakadbul ko rofen ni gamow ra fol Bible riy, ma ma lungumow, ‘Mang e gadow ra rin’ ni balayal’? Gadow ra fol Bible ni Tabinaw!”
12 Fare yaram ni ngan fol Bible ni tabinaw e ku ma ayuweg e pi tabinaw ni boor pa’ u puluwrad. Bay reb e matin ni goo ir ni ma chuguliy l’agruw i pagal ni fak maku ma pioneer ni gaar: “Kafram e ba mo’maw’ ni nggu fol Bible gad u taabang. Ere gathi gubin ngiyal’ ni gamad ma fol Bible ya ba ga’ ni kug magar. Dagnang rogon ni nggu uneg e fol Bible ko pi n’en ni gu ma rin’. Ere gu be yol ni nggu pining e magar ngomed ni kam yarmiyed ni ngaun tay e Fol Bible ni Tabinaw. Chiney e ke yog ni ngaug fol Bible gad u taabang ni gubin ngiyal’, ma ke yib angin ngomad.”
13. Uw rogon ni nge yib angin e re yaram ney ko tabinaw rom?
13 Fare Fol Bible ni Tabinaw e aram reb e tow’ath ni ke pi’ e Chitamangidad nu tharmiy ni rayog ni nge ayuweg e pi tabinaw ni bod rogon fare Sabbath. (Jas. 1:17) Pi n’en ni i rin’ e pi tabinaw nu Israel u nap’an fare Sabbath e be dag rogon angin nra yib ngorad ko tirok Got ban’en. Ere ku arrogon fare rran ni kan tay ni fan ko fol Bible ni tabinaw ni faan gad ra maruwel ngay nib fel’ rogon ma ra yib angin ko tabinaw rodad. (2 Kor. 9:6; Gal. 6:7, 8; Kol. 3:23, 24) Faan gimed ra fol chon e tabinaw rom ko re yaram ney ma rayog ni ngam uned i yog fapi thin ni yog fare psalmist ni gaar: “Machane gag e kari felan’ug, ya gu be par u tooben Got! U charen Somol nib th’abi tolang e kug par riy ndabi buch ban’en rog.”—Ps. 73:28.
[Blurb ko page 5]
Fol Bible ni Tabinaw ni gad ma tay e susun ni dabi yan i par ni ban’en ndariy e felfelan’ riy mab mak’ar chalban, ya susun ni nge m’ug riy rarogon fare Got ni gad be pigpig ngak ni ir reb e Got nib felfelan’
[Kahol ko page 6]
NGAN AYUWEG
Boch Ban’en Nrayog ni Ngan Rin’ u Nap’an e Fol Bible ni Tabinaw
Bible:
• Ngan beeg bang ko Bible reading ni fan ko yu wik. Faanra ba puluw, ma rayog ni nge beeg be’ e thin rok e en ni yoloy fare babyor ko Bible ma yugu boch e girdi’ e yad ra beeg e n’en ni i yog e girdi’ ni bay murung’agrad ko fare thin nu Bible.
• Ngan yan u yaan boch ban’en ni bay ko Bible reading.
• Ra be’ me beeg e gin’en ni yira beeg u nap’an e Bible reading u m’on riy me fal’eg rogon taareb ara l’agruw e deer ni ngan gay e fulweg riy u nap’an e fol Bible ni tabinaw.
• Ra reb e wik min yoloy yu yang i babyor ni bay e thin nu Bible riy min gay rogon ni ngan fil nge mit mu kun weliy murung’agen. Min kunuy e yungi babyor nem ya ngan sul u daken ni gubin e wik ya nge yog nnang urngin e thin nu Bible ni ke mit.
• Ngan motoyil ko audio recording ko Bible reading min lek ko Bible.
Pi Muulung:
• Ngan fal’eg rogoy u taabang ni fan nga reb e ban’en ni yima rin’ u nap’an e muulung.
• Ngan fil e pi tang ni yira yon’ u nap’an e muulung ko re wik nem.
• Faanra bay be’ nra pi’ reb e welthin u nap’an e Theocratic Ministry Skul, fa bay e demonstration rok u nap’an e Service Meeting, ma rayog ni ngan ayuweg u rogon ni nge weliy fa yan riy ngan guy.
Tin nib T’uf ko Tabinaw:
• Ngan yan u yaan boch ban’en ni yu ngiyal’ e gallabthir e nge yan riy ma yu ngiyal’ e bitir. Rayog ni nge fal’eg i gay e piin bitir murung’agen ban’en ni ngar weliyed ko gallabthir rorad.
• Ngan yan u yaan e n’en ni ngan rin’ ni faanra ke mada’nag reb e bitir e magawon u skul.
Machib:
• Ngan yan u yaan boch e kanawo’ ni ngan machib riy u nap’an e weekend.
• Ngan weliy boch ban’en nrayog ni nge nameg chon e tabinaw ya nge yog ni yoor e tayim rorad ko machib u nap’an ni ke chugur ko Puguran ara ngiyal’ ni nge tal e skul.
• Ngan pi’ e tayim ko pi chon e tabinaw ni ngar fal’eged i gay rogon ni ngar pied e fulweg ko pi deer nib thilthil ni ma fith e girdi’ u nap’an e machib min yan u yaan rogon ni ngan pi’ e fulweg riy.
Ku Boch Ban’en:
• Ngan beeg u taabang reb e article ni bay ko pi magazine rodad.
• Ngan yarmiy ni nge be’ me beeg reb e article ko pi magazine rodad ni kab beech me weliy boch ban’en u murung’agen.
• Yu ngiyal’ e rayog ni ngan pining reb e walag u lan e ulung ara ba wu’ e mabgol ni ngar unew ko Fol Bible ni Tabinaw, ma rayog ni ngan fith boch e deer ngorow.
• Ngan yaliy reb e video rodad min weliy boch ban’en u murung’agen.
• Tomuren ni kan un nga reb e convention ara assembly min sul u daken e pi n’en ni kan fil riy.
• Ngan yaliy boch ban’en ni ke sunmiy Jehovah min weliy u taabang e n’en ni be fil ngodad u murung’agen Jehovah.
• Ngan fal’eg boch ban’en u taabang, ni bod yaan ban’en, ara reb e map, ara chart.