Pi Tabinaw, Mu Pining E Sorok Ngak Got Ni Gimed Bang Ko Ulung Rok

“Nggu pining e sorok ngak Jehovah u fithik’ e yoor.”—PSALM 26:12, New World Translation.

1. Mang bang ko liyor rodad ko Got ni baga’ fan ni ngan uneg ko fol Bible nge meybil u tabinaw?

PIGPIG ko Jehovah e gathi kemus ni ngan meybil ngak nge ngan fil e Bible u tabinaw machane ku bay boch e maruwel ya aram bang ko ulung rok Got. Yu Israel kakrom e kan tay chilen ngorad nga “ulunguy e girdi’, piin ni pumoon nge piin ni ppin nge piin ni bitir,” ni ngar filed fare motochiyel rok Got ma aram rayog ni ngar ranod u kanawoen. (Deuteronomy 31:12; Joshua 8:35) Piin ni pilibthir nge ‘piin ni pagal nge piin ndawori un ko mabgol’ e kan pi’ athamgil nga laniyan’rad ni ngar n’ufed e ngochol rok Jehovah. (Psalm 148:12, 13) Taab rogon e yaram ni yima tay u lan e ulung ko piin ni kristiano. U lan e pi Kingdom Hall u ga’ngin yang u fayleng, piin ni pumoon, piin ni ppin, nge pi bitir e yad ma un ko pi’ e fulweg ko fare muulung nib t’uf ni nge un e tayengeg ngay, ma i boor yad e kara pirieged ni faan yad ra yodor ma bay e felfelan’ riy.​—Hebrews 10:23-25.

2. (a) Mang fan ni ri baga’ fan e fal’eg rogoy ni ngan ayuweg e piin ni fel’ yangarad ni nge fel’ e pi muulung rodad uwan’rad? (b) Ngongol rok mini’ e baga’ fan.?

² Riyul’, ni yu ngiyal’ ma mom’maw’’ ni ngan ayuweg e piin ni fel’ yangarad ni ngar uned ko boch e maruwel rodad u lan e muulung u gubin ngiyal’. Faanra bay boch e bitir ni ma un ko gallabthir rorad ko muulung, ma mang e magawon riy? Riyul’, ni boor e bitir ni dabiyog ni ngar tiyan’rad nga ban’en nib n’uw nap’an ma mom ni nge chuwan’rad. Ngan fal’eg rogoy ma rayog ni nge ayuweg ni ngan pithig e re magawon ney. Faanra dabra fal’eged rogorad, ma dabiyog ni ngar uned ko muulung nib fel’ rogon. (Proverbs 15:23) Faanra dan fal’eg rogoy, ma mom’maw’’ ni ngara monn’ogad iyan ko tirok Got ban’en nge yib e felfelan’ riy ngorad. (1 Timothy 4:12, 15) Mang e rayog ni ngan rin’? Fa bin som’on, pi labthir e thingar ra fithed nfaanra kara fal’eged rogorad u m’on ni fan ko muulung. Ngongol rorad e rib gel ni ma k’aring be’ ni nge folwok riy. (Luke 6:40) Ran fal’eg rogoy u m’on ni ngan tay e fol Bible u tabinaw e ku ban’en ni baga’ fan.

Ngan Ubung e Gum’ircha’

3. Nap’an e fol Bible, mang fan ni rib t’uf ni ngan athamgil ni ngan ubung e gum’ircha’en girdien e tabinaw, ma mang e n’en nib t’uf riy?

³ Fare fol Bible e susun aram e tayim ni gathi kemus ni ngan suguy e lem rodad ko tamilangan’ machane aram e tayim ni ngan ubung e gum’ircha’. Bat’uf riy ni ngan nang e pi magawon ni ke yib nga tabinaw ku bat’uf ni ngan dag e runguy ngak urngin e girdi’ riy. Yi Jehovah e “ma yaliy e gum’ircha’.”​—1 Kronicles 29:17.

4. (a) Mang fan fare bugithin ni “bat’uf rok e gum’ircha’”? (b) Mang e n’en nib muun ngay ko fare bugithin ni “nge yog ngak be’ ba gum’ircha’”?

⁴ Mang e ra pirieg Jehovah ko ngiyal’ ni nge yaliy gum’ircha’en e pi bitir rodad? Boor i yad e ra yog ni bat’uf Got rorad, ma manigil ni faanra aram rogon. Machane, fa cha’ ni kab bitir ara kefin ni fil murung’agen Jehovah e gathi ri manang e pi kanawoen. Bochan ndawori yoor e tin ni manang, ma dabiy siy “ni nge t’uf rok e gum’ircha’” rogon ni yog e Bible u murung’agen. Sana gathi urngin e lem rok e ba kireb, machane bat’uf boor e tayim ni ngan thiliyeg e lem rok be’ nge mang lem ni ri ma falan’nag Got. Ma ba muun ngay ni ngan puluwnag e lem rok be’, tin ni be tafinaynag nge yog ngak, e runguy, nrogon ni be thamiy ban’en, nge tin ni be nameg ko par rok ko mang e n’en ni baadag Got, rogon nrayog rok be’ ndawori flont. Faanra aram rogon e n’en ni be rin be’ ni be puluwnag e ngongol rok ko kanawoen Got, ma riyul’ ni ke “yog ngak fare gum’ircha’.”​—Proverbs 9:4; 19:8.

5, 6. Uw rogon ni nge ayuweg e pi labthir e pi bitir rorad ni ‘nge yog e gum’ircha’rad’?

⁵ Rayog ni nge ayuweg e pi labthir ni nge yog ngak e pi bitir rorad “fare gum’ircha’”? Riyul’, ndariy be’ nrayog ni nge afweg e lem nib fel’ rok be’ ngak yugu be’. Ra bagadad ma kan pi’ ngak mat’awon ni nge dugliy ban’en, ma biney e baga’ ni ma tor nga daken ban’en ni gad ma lemnag. Machane, baga’ ni rayog ni nge ayuweg e pi labthir ngak e bitir rorad u fithik’ e gonop, ni ngan nang ko mang e n’en ni bay u lan e gum’ircha’rad ma u uw e gin nib t’uf e ayuw riy. Ngam fanay boch e deer ni baaray ‘Mang e ga be thamiy u murung’agen e re ney?’ nge ‘Mang e n’en ni ri ga baadag ni ngam rin’?’ Ngemu’, ngam motoyil ngak u fithik’ e gum’an’. Dabmu pag ni nge yib e damumuw ngom. (Proverbs 20:5) Ram par nib gol, ga ma lemnag rogon e par rok, ma baga’ fan ni ngam dag e t’ufeg rom ngak nfaanra ga baadag ni nge taw nga gum’ircha’en e tin nib fel’.

⁶ Ran ga’nag e lem rok nib fel’, ma gubin ngiyal’ ma ngam weliy ngak murung’agen e pi ngongol nib fel’ ni fare Kan ni Thothup e ma yibnag ngak be’​—nge be’​—ma ngam maruweliyed u taabang ni gimed gubin ni nge yog e re n’ey ngomed. (Galatia 5:22, 23) Ngam ubung e t’ufeg rorad ni fan ku Jehovah nge Jesus Kristus, ni gathi kemus ni ngam mog ni bat’uf ni ngad t’ufeged yow machane thingar da weliyed ngorad ko mang fan ni thingar da t’ufeged yow nge uw rogon ni ngada daged e re t’ufeg ney. (2 Korinth 5:14, 15) Ngam pi’ athamgil nga laniyan’rad ni ngar folgad ko tin nib fel’ ma aram ngam weliy ngorad ko mang angin ni ke yib riy ngom. Ngam pi’ e athamgil nga laniyan’rad ni nge palog ko lem nib kireb, nge thin, nge ngongol ni aram e ngam weliy ngak ko mang wenegen ni yib riy ngak be’. (Amos 5:15; 3 John 11) Ngam dag ko uw rogon e lem, nge thin, nge ngongol​—ndemtrug ko manigil fa ba kireb​—ma rayog ni nge kirebnag ara nge fel’ thilrow Jehovah.

7. Mang e n’en ni rayog ni ngan rin’ ni ngan ayuweg e pi bitir ngar pithiged e pi magawon ni yib ngorad nge uw rogon ni ngar turguyed ban’en ko kanawo’ ni yad ra par nib chuchugur ko Jehovah?

⁷ Faanra reb e bitir ni bay e magawon rok ara thingari dugliy ban’en ni baga’ fan, ma rayog ni ngada fithed e deer ngak: ‘Ga be lemnag ma u rogon uwan’ Jehovah e re ney? Mang e ga manang u murung’agen Jehovah ni ke n’iginem ni ngam mog e re nir? Kam meybil ngak ma kam mog ngak murung’agen e re nir, fa?’ Ram tabab nib papey, ma rayog ni ngam ayuweg e pi bitir rom ni gubin ngiyal’ ma yad lemnag e tin nib m’agan’ Got ngay ma ra fol riy. Nap’an ni ke mang Jehovah e fager rorad, me fel’ thilrad, ma yad pirieg ni bay e felfelan’ riy ni ngar ranod u kanawoen. (Psalm 119:34, 35) Ma ra ayuwegrad e re ney ni nge yib nga laniyan’rad ni kan taw’athnagrad ya kar manged bang ko ulung rok Got.

Nguun F’leg Rogoy Ni Fan ko Pi Muulung U Lan e Ulung

8. (a) Mang e n’en ni rayog ni nge ayuwegdad ma aram rogon urngin ban’en nib t’uf e ayuw riy ma rayog ni ngan uneg ko n’en ni yira weliy u nap’an e fol Bible? (b) Uw feni ga’ fan re fol Bible ney?

⁸ Bay boor ban’en nib t’uf e ayuw riy u nap’an e fol Bible u tabinaw. Mang e ga ra rin’ ma rayog ni ngam fal’eg urngin ban’en? Dabiyog ni ngam rin’ urngin ban’en ni taab yay. Machane ban’en ni rayog ni nge ayuwegem e aram ngam yoloy nga babyor urngin ban’en. (Proverbs 21:5) Ma yu ngiyal’, ngam sul nga daken ni ngam yaliy ko mang e n’en ni ri bat’uf e ayuw riy. Ngam mu lemnag ko uw rogon ni ra bagayad ma ra mon’og ko tirok Got ban’en. Re yaram ney ni fol Bible u tabinaw e aram e n’en ni baga’ fan ni ngan skulnag e piin ni kristiano, ni nge ayuwegdad ko par rodad e chiney ma ra ayuwegdad ni nge yog ngodad e yafas ni dariy n’umngin nap’an.​—1 Timothy 4:8.

9. Mang e gad ra nameg ni ngan rin’ nib m’ag ko fal’eg rogoy ni fan ko muulung ni gad ra maruweliy u nap’an e fol Bible ni buchuw mbuchuw.

⁹ Uw rogon e fol Bible romed u tabinaw, ba muun ngay ni gimed be fall boch ban’en ni fan ko muulung rodad u gubin e wik, fa? Bay boor ban’en ni thingar mu maruweliy ni nge mon’og be’ u nap’an ni gimed be fil e Bible u taabang. Sana bat’uf ni nge yan in e wik, pul, ara duw ma ra yib angin. Ngam mu lemnag e pi n’en ni ngan maruweliy: (1) nge urngin e girdi’ u tabinaw ma rayog ni ngar pied e fulweg u nap’an e muulung; (2) ma ra bagayad ma ra maruweliy rogon nrayog ni nge pi’ e fulweg ko thin rok; (3) ma rayog ni nge puluwnag e thin nu Bible ko pin’en ni be weliy; (4)  ma ra lemnag ko uw rogon ni nge fol ko pin’en ni ke fil. Urngin e pin’en ney e rayog ni nge ayuweg be’ ni nge par ni be fol ko tin riyul’.​—Psalm 5:4, 5.

10. (a) Uw rogon nrayog ni ngada tiyan’dad ko urngin e pi muulung rodad u lan e ulung? (b) Mang fan ni bay fan e re ney?

¹⁰ Yugu demtrug ni sana tabinaw rom e gimed be fil fare babyor ni Wulyang Ntagil E Damit ni yira weliy ko re wik nem, dabmu pagtalin ni baga’ fan ni ngam fall rogom ni goo gur ara nap’an e fol Bible u tabinaw nge pi muulung ni bod fare Congregation Book Study, fare Theocratic Ministry School, nge fare Service Meeting. Pin’en ney e ku baga’ fan ya bang ko fare yaram ni yibe skulnagdad u rogon ni ngadarod ko kanawoen Jehovah. Sana rayog ni ngam yarmiy ni ngam fall rogomed ban’en ko pi muulung rodad. Rogon ni gimed be maruweliy u taabang, ma ra mon’og e girdi’ rogon ni nge fil ban’en. Ma angin ni yib riy, boor ban’en nib fel’ ni rayog ni ngar filed u nap’an e muulung. Maku, ngam mu weliy ko mang angin ni ke yib riy nfaanra ran fal’eg rogoy u gubin ngiyal’ ni fan ko pi muulung ney nge uw feni ga’ fan ni bay e tayim nib mudugil nni tay ni fan ko re yaram ney.​—Ephesians 5:15-17.

11, 12. Uw rogon ni ngeb angin ngodad e fal’eg rogoy ko tang rodad, ma uw rogon ni ngan rin’ e re ney?

¹¹ Nap’an fare Convention ni kenggin e “God’s Way of Life,” e kan pi e athamgil nga laniyan’dad ni ngad fall rogodad ni fan ko taab yang ko muulung rodad ​—ni aram e tang. Kam rin’ed e re ne’y, fa? Ran yodor e rayog ni ngan ayuwegdad ni nge taw ko lem rodad nge gum’ircha’dad e thin nu Bible ma ku rayog ni nge ri fel’ uwan’dad e pi muulung rodad u lan e ulung.

¹² Ran fal’eg rogoy ni ba muun ngay ni ngan bieg ma ngan weliy fan e pi thin ni bay ko tang ni kan dugliy ni yira yin’ ma ra ayuwegdad ni nga don’ed e pi tang nem ni yib u gum’ercha’dad. U Israel kakrom, yima fanay e musik ni fan ko liyor u gubin ngiyal’. (1 Kronicles 25:1; Psalm 28:7) Bay be’ u tabinaw romed ni ma chibog e musik fa? Mang fan ni dabmu fanayed e re talin e musik nem ni ngam fall rogomed u reb e musik nni dugliy ni yira yin’ ko re wik nem, ngemu’ mi gimed gubin e ngam mon’ed fare tang u taabang. Ku rayog ni ngan fanay e recording ko pi tang nem. Bay boch e nam ni pi walagdad u rom e rayog ni nga ron’ed e tang rodad ndariy e talin e musik rorad. Nap’an ni yad be yan u but’ u kanawo’ ara nap’an ni yad be maruweliy e milay’ rorad, ma yad be tang u fithik’ e felfelan’ fapi tang nni dugliy nyira yin’ ko re wik nem u nap’an e muulung rorad.​—Ephesians 5:19.

Tabinaw ni Ma Talpen ko Machib

13, 14. Mang fan ni baga’ fan ni ngan weliy u tabinaw ban’en ni ngan fal’eg rogon e gum’ircha’dad ko machib.

¹³ Ran machinag yugu boch e girdi’ u murung’agen Jehovah ma aram bang ko yafas rodad ni baga’ fan. (Isaiah 43:10-12; Matthew 24:14) Demtrug ko kab bitir fa ke pilibthir, ke felfelan’dad ko biney e maruwel ma ri ra yib angin ngodad nfaanra kada fal’eged rogodad. Uw rogon ni ngad rin’ed e re ney u lan e tabinaw?

¹⁴ Urngin ban’en nib m’ag ko liyor ni gad ma tay, ma baga’ fan ni ngad fal’eged rogon gum’ircha’dad. Thingarda weliyed ni gathi kemus ni murung’agen ban’en ni gad ra rin’ ya ku gad ra weliy ko mang fan ni gad ra rin’ e re ney. Chirofen ni immoy Jehoshaphat ni Pilung, Kan pi’ e thin ngak e girdi’ nni fek ko motochiyel nib thothup machane be weliy e Bible ngodad “ndawora fal’eged rogon e gum’ircharad.” Arfan ni mom’ ni ngan wawliyrad ni ngara rin’ed ban’en ni nge k’aringrad ni ngara paloggad ko teliw nib riyul’. (2 Kronicles 20:33; 21:11) Tin ni gad be nameg e gathi kemus ni ngada thognag boch e awa ni fan ko machib, ara kemus ni ngada wereged boch e babyor. Gad ma un ko machib nbochan gad baadag ni ngada daged ni bat’uf Jehovah rodad ma bat’uf e girdi’ rodad ma bat’uf rorad ni ngar mel’eged e yafas. (Hebrews 13:15) I ir eray e maruwel ni “gad be maruwel Got u taabang.” (1 Korinth 3:9) Uw feni ga’ fan e re maruwel ney! Nap’an ni gad be yan ko machib, ma pi engel nib thothup e be ayuwegdad. (Revelation 14:6, 7) Nap’an e fol Bible u tabinaw ma rib fel’ ni ngan fanay re tayim nem ni ngan weliy feni ga’ fan re maruwel ney, sana u nap’an e fol Bible u gubin e wik ara u nap’an ni yibe weliy e thin nu Bible nni fek ko babyor ni Examining the Scriptures Daily!

15. Wuin e rayog ni ngada fal’eged rogodad u ban’en u lan e tabinaw ni fan ko machib?

¹⁵ Bay e tayim yu ngiyal’ ni nap’an e fol Bible romed u tabinaw ma kam ayuweg be’ u lan e tabinaw rom ni nge fal’eg rogon ni fan ko machib? Ran rin’ ni aray rogon ma rib fel’. (2 Timothy 2:15) Ra ayuweg e re ney ni nge yibnag fan e maruwel rorad ma ra yib angin ngorad. Yu ngiyal’, ma rayog ni ngam yarmiy e tayim ni kemus ni ngam fal’eged rogomed ko machib. Baga’ ni ngam weliy ngorad murung’agen e machib u mit e tabinaw iyan nib ngoch nap’an tomren e fol Bible u tabinaw ara yugu boch e tayim u lan e wik.

16. Ngan weliy uw feni ga’ fan ra reb e step nni yoloy nga paragraph.

¹⁶ Nap’an ni yibe weliy e re ney u tabinaw ffel’ ni ngan tiyan’uy ko boch e steps, ni bod: (1) Ran fal’eg rogoy u reb kanawo’ ko uw rogon ni ngan weliy ban’en ngak be’ ma ba muun ngay ni ngan bieg reb e thin nu Bible nfaanra rayog ni ngan yodor. (2) Ngam guy ni ra be’, ma bay rok e kabang, Bible, notebook, reb e pen ara pencil, tracts, nge yugu boch e babyor ni kab fel’ yaan. Fare kabang ni ngan fanay ni fan ko machib e det’uf ni aram mit e kabang nib tolang puluwon, machane susun ba klin. (3) Ran weliy ko u uw nge uw rogon ni ngan wereg e thin rok Got u fithik’ e sabethin. Nap’an ni gimew be yan ko machib ma fel’ ni ngam weliyew murung’agen e pi n’en ney nreb nge reb. Mog boch e kanawo’ ni fel’ ni ngan rin’, machane  dabmu pi’ boor e fonow nib thil thil rogon.

17, 18. (a) Miti mang e fal’eg rogoy ni ngan rin’ u lan e tabinaw nrayog ni nge ayuwegdad ma ra yib angin ngodad ko machib ni gad ra tay? (b) Mang bang ko re fal’eg rogoy ney nrayog ni ngan rin’ u gubin e wik?

¹⁷ Fare maruwel ni ri baga’ fan ni i pi’ Jesus ngak pi gachalpen e aram ngan fil e Bible ngak be’. (Matthew 28:19, 20) Ran fil e Bible ngak be’ ma gathi kemus ni ngam un ko machib ni ngam wereg e thin rok Got. Bat’uf ni ngan skulnag be’ u ban’en. Uw rogon ni nge ayuwegem e fol Bible u tabinaw rom ni nge yib angin ngom ko re maruwel ney?

¹⁸ U lan e tabinaw romed, ran weliy ko mini’ e manigil ni ngan sul ngak. Boch i yad e kan pi’ ngorad reb e babyor; ma boch e kemus ni kar rung’aged boch e thin. Sana kar mada’gad u nap’an e machib u mit e tabinaw iyan ara machib u fithik’ e sabethin ara u skul. Ngam pag ni Thin rok Got e ra pow’iyem. (Psalm 25:9; Ezekiel 9:4) Ngam dugliyed ko mini’ e ra sul ngak ra bigimed ko re wik nem. Ma mang e yira weliy? Ran weliy e re ney u tabinaw ma rayog ni ngan ayuwegrad nra bagayad ma rayog ni nge fal’eg rogon. Ngam yoloy nga gi babyor boch e thin nu Bible ni ngan weliy ngak be’ ni baadag e machib ku boch e thin nib puluw ko re ney ni bay ko fare babyor ni Mang e bat’uf ni Ngada Rin’ed ko Got? ara fare babyor ni Knowledge That Leads to Everlasting Life. Dabmu guy rogon ni ngam weliy boor ban’en ni taab yay. Ngam mog reb e deer ngak ni ngam weliyew ko bin migid e tayim ni ga ra sul ngak. Mang fan ni dabni tay ni nge mang bang ko yaram romed u tabinaw ni ngan weliy ko mini’ e nge sul ngak ra bigimed, mang ngiyal’ ni ngan rin’ e re ney, mang angin ni be lemnag ni ngeb ngak. Ran yodor ma rayog ni ngan ayuweg ni ngeb angin e machib ni tay fare tabinaw ni yad urngin.

Mu Ulul Ni Ngam Fil Ngorad Kanawoen Got

19. Rayog ni nge ulul girdien e tabinaw ni ngar ranod ko kanawoen Jehovah, nfaanra nge yog ngorad e mang, ma u rogon me yodor?

¹⁹ Fare lolugen e tabinaw ni be par ko biney e fayleng nib kireb e ba mom’maw’’ rok. Ma athamgil Satan nge pi moonyan ni nge kirebnag e michan’ ko pi tapigpig rok Jehovah. (1 Peter 5:8) Maku, boor ban’en e chiney ni ma tomalnag lanin’med e pi labthir, ma rib ga’ ni aram rogon e labthir nta’be’ u tafen. Ba mom’maw’’ ni ngam pirieg a tayim ni ngam rin’ urngin ban’en ni ga baadag ni ngam rin’. Ram yodor ma aram e n’en ni bay fan, yugu demtrug ni taab yay ma kemus taareb ko boch ban’en ni kan weliy e rayog ngam fol riy, ma buchuw mbuchuw ma ra fel’ e yaram ko fol babyor u tabinaw rom. Ga ra guy e girdi’ ni rib t’uf rom ni yad ba yul’yul’ ko kanawoen Jehovah ma aram e taw’ath ni bay e felfelan’ riy. Ran yan ko kanawoen Jehovah me yib angin riy, e aram girdien e tabinaw e susun ni nge fel’ uwan’rad ni ngar uned ko muulung nge ngar uned ko machib u mit e tabinaw iyan. Bat’uf ni ngan ta’ talpey riy nge riyul’ e re n’ey​—fare fal’eg rogoy e ra nge ubung fare gum’ircha’ ma aram rogon me yog ni nge un be’ ko re maruwel ney nib fel’ rogon.

20. Mang era ayuweg boor e labthir ni nge yog ngorad e felfelan’ ni bod rogon e fare n’en ni kan nog ko 3 John 4?

²⁰ I yoloy John ngak e girdi’ ni ke ayuwegrad ko tirok Got ban’en, ni i gaar: “Dariy Ban’en nrib gel e felfelan’ nra pi’ ngog ko bin ni nggu rung’ag murung’agen pi fakag ni yad be fol ko tin riyul’.” (3 John 4) Fol Bible u tabinaw ni yibe ngongliy ko kanawo’ nib tamilang uwan’uy e aram e n’en ni yibe nameg riy nge fare lolugen e tabinaw e be ayuweg girdi’en u fithik’ e gol, ma be ayuweg ko mang e n’en nib t’uf rorad ma rayog ni ngar uned ko re maruwel ney u fithik’ felfelan’. Ran ga’nag e t’ufeg ko kanawoen Got nib m’ag ko yafas, ma be ayuweg e piin ni labthir e tabinaw rorad ni nge yog ngorad e kanawoen e yafas ni bin th’abi fel’.​—Psalm 19:7-11.

Rayog Ngam Weliy?

◻ Mang fan ni ri baga’ fan ko pi bitir rodad e fal’eg rogoy ni fan ko muulung?

◻ Uw rogon ni nge ayuweg e pi labthir e pi bitir rorad ni nge ‘yog ngorad e gum’ircha’rad’?

◻ Uw rogon ni nge ayuweg e fol Bible u tabinaw ni ngad fal’eged rogodad ko urngin e muulung?

◻ Uw rogon nfaanra ngada fal’eged rogon ban’en u tabinaw ni fan ko machib ma gad ra salap ko re maruwel ney?

[Sasing ko page 29]

Ran fal’eg rogoy ko tang nyira yin’ u nap’an e muulung era yib angin