Nguum Ngongolgad ni Bod Rogon e Girdi’ nib Gonop

¹ Nap’an ni pining Jesus aningeg i ta fita’ ni ngar manged pi gachalpen ma dar sagaalgad ni ngar turguyed ban’en ya “ka chingiyal’ nem . . . mar uned ngak.” (Matt. 4:18-22) Nap’an ni pig Saul nu Tarsus nge mich Jesus u wan’ me yog ni nge guy ban’en biyay, ma de sagaal ni nge wereg e machib ya ke “yan u lan tafen e muulung i yan, ni aram e ke tabab i machibnag murung’agen Jesus.” (Acts 9:20) Yugu be yan e tayim nder ma tal’; ngiyal’ ni ke yan ma ke m’ay. Aram fan ni baga’ fan ni nguud ‘ngongolgad ni bod rogon e girdi’ nib gonop’ u rogon ni gad ma fanay e tayim rodad.​—Efe. 5:15, 16.

² Pi N’en ni Be Buch ni Dawor ni Guy: Tin nrayog ni ngad rin’ed e daba’ ko pigpig rodad ku Jehovah e sana dabkiyog gabul. (Jas. 4:14) Dariy be’ nrayog ni nge siyeg e “pi n’en ni be buch ni dawor ni guy.” (Ekl. 9:11) Maku gad ma pillibthir iyan ni aram ban’en ni ma magawonnag e pigpig rodad ku Jehovah ndabiyog ni ngad siyeged e “pi rran nib gel e magawon riy” u nap’an ni gad bay ko re m’ag ney. (Ekl. 12:1) Ere dariy e gonop riy ni ngad sagaalgad ni ngad ognaged gadad ku Got fa ngad sonnagede ngiyal’ nib fel’ ni ngad uned ko machib nge mus rogon. (Luke 9:59-62) I par Abraham nib gapas laniyan’ u nap’an ni ke pillibthir me yim’ ni ke ‘pillibthir nib fel’ laniyan’’ ya ke fanay e yafos rok u fithik’ e gonop ni ke yul’yul’ ku Jehovah.​—Gen. 25:8.

³ Re Fayleng Ney ni Bod Rogon e Chiney ni Ba’ e Dabi Par: Maku gad ba adag ni ngad fanayed e tayim rodad u fithik’ e gonop ya “re fayleng ney ni bod rogon e chiney ni ba’ e dabi par.” (1 Kor. 7:29-31) Dabki n’uw nap’an ma ra m’ay e re m’ag ney. Ra tal e ngiyal’ nrayog ni ngan un i ayuweg e piin ni bod e saf ko ngiyal’ ni “ngan t’ar wom’engin e woldug u fayleng.” (Rev. 14:15) Thingarda ayuwgad ndabda paged e pi magawon nge fafel ko fayleng nge fek e tayim rodad ni kab fel’ ni ngad fanayed ko machib. (Luke 21:34, 35) Rib fel’ ni ngad sapgad nga tomur ma gad manang ni kad uned ko maruwel ko machib nge mus rogon!

⁴ Thingarda ayuwgad ndabda paged ni nge dabi yib ngodad e falfalan’ ko pigpig. Nge mudugilan’dad ni ngad rin’ed urngin ban’en nrayog rodad ni ngad pigpiggad ku Jehovah “ni n’umngin nap’an ni fare rran ni ‘Daba’’ ni be yog e babyor nib thothup murung’agen e be yip’ fadad.” (Heb. 3:13) Gad ra rin’ ni aram rogon ma gad be dag ni gad ba gonop ya “en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:17.