Gad Ma Wereg Fare Thin ko Gil’ilungun Got ni Ma Pi’ e Athap Ngodad

¹ Ngiyal’ ney ni tin tomren e rran e boor e girdi’ ni be par ndariy e athap rorad. (Efe. 2:12) Ma boch e girdi’ e kar pagedan’rad ko tin nu fayleng ban’en, nge pi tayugang ko am, nge science, nge yugu boch ban’en. Ri gad ba falfalan’ ya bay e athap rodad ko gabul nge langlath, ni aram e athap ni “ke mang angkar rok lanin’dad, ya be par nib mudugil”!​—Heb. 6:19.

² Ra paradis e fayleng u tan e gagiyeg ko Gil’ilungun Got. Ran faseg ko yam’ e piin ni kar m’ad. (Acts 24:15) Ra m’ay e gafgow, nge ngongol nde mat’aw, nge m’ar, nge pillibthir, nge yam’. (Ps. 9:18; Matt. 12:20, 21; Rev. 21:3, 4) Aram boch ban’en ni i micheg Jehovah ndabki n’uw nap’an ma ra lebug. Mang ban’en ko athap rodad ni ri ga ba adag?

³ Ngan Wereg Fare Thin nib Fel’: Thingar da wereged fare athap ko Gil’ilungun Got ngak boch e girdi’. Ba t’uf Got rodad nge girdi’ ma aram e ma k’aringdad ni ngad folwokgad rok Jesus ma ngad “machibnaged e Thin Nib Fel’ ni yib rok Got ngak e piin ni gafgow, ma ngan nog ngak e piin ni kan kolrad kan tayrad ni bay ni pagrad ma ngan nog ngak e piin ni malmit ni bay ra guyed ban’en, ma ngan chuweg ko gafgow e piin ni yibe gafgownagrad.” (Luke 4:18) I wereg apostal Paul fare thin nib fel’ ko girdi’ ko gin ni bay e market riy. Me par ni yigoo thin rok Got e be machibnag ko girdi’. (Acts 18:5) Faan gad ra folwok rok ma gad pasig i un ko machib ma aram e dabi war e athap rodad ni bochan e “pi n’en ni ma magafan’ e girdi’ ngay ko biney e tamilang, nge chogowen e fel’ rogon.”​—Mark 4:19.

⁴ Athap rodad ko Gil’ilungun Got e dabi war u nap’an ni gad ma mada’nag e girdi’ ni dariy fadad u wan’rad, ma yad ma dariy fannag fare thin ko Gil’ilungun Got, fa yad ma togopuluw ngodad. “Ngad chichiiyed pa’dad ko re n’en ni ir e ke l’agan’dad ngay ni ir e gadad be weliy murung’agen.” (Heb. 10:23) “Dagur tamra’ ko re Thin ney Nib Fel’.” (Rom. 1:16) Sana ra k’aring e girdi ngar motoyilgad ngodad ni bochan e ke mudugilan’dad ma gad be athamgil.

⁵ Ba puluw ni ngad tamilangnaged ko girdi’ ni be gel iyan e kireb ko fayleng ya aram rogon ni yog e thin ko profet u lan e Bible, machane gathi gad be machibnag e thin nib kireb. Ya machib ni gad ma tay e be tay nib ga’ fan e athap ko Gil’ilungun Got​—ni aram fare thin nib fel’ ko Gil’ilungun Got. Nguud machibnaged e re thin nib fel’ ney u fithik’ e pasig ma “nge yog ni yib i m’ug nib riyul’ e pi n’en ni ir e be l’agan’dad ngay.”​—Heb. 6:11.