Rayog ni Nge Yog e Flaab Ngom!

1. Mang fan ni ngam lemnag ni ngam un ko regular pioneer?

¹ Ga be gay ban’en nra gelnag e felfelan’ rom me yib fan ko yafos rom, fa? Gab felfelan’ ngay ni ngam ayuweg e girdi’, fa? Ga baadag ni nge ga’ e tayim ni gabe fanay ni fan ko pigpig ngak Jehovah, fa? Faanra ka mog e arrogon nga reb e pi deer ney, ma susun e ngam lemnag ni ngam un ko regular pioneer. Riyul’, ya thingar mu lemnag e tabinaw rom nge tin ni be yog e Bible nib milfan ngom, nge rogon fithik’ i dowam nge tin rayog u gelngim.

2. Mang boch e flaab ko tirok Got ban’en ni ma yog ngak e piin pioneer?

² Fapi thin nni thagthagnag nga laniyan’ Solomon nge yoloy e be puthuy e tow’ath rok Jehovah ko flaab ko chugum nge salpiy. (Prov. 10:22) Ngiyal’ ney, e tow’ath rok Jehovah e ma yib angin ni flaab ko tirok Got ban’en. Pi flaab ney e be map’ ngak e pi regular pioneer. Bod ni, yad ba felfelan’ ngay ni ngar pied ban’en ko girdi’ ‘nge yan nga lon e tayim’ nrayog ni ngar fanayed ngar yognaged e chugum nge salpiy riy. (Kol. 4:5; Acts 20:35) Dabi pagtalin Jehovah maku ba felfelan’ ko maruwel ni yad be tay u fithik’ e t’ufeg. Pi tow’ath nem ni kar chaariyed nga “tharmiy” e dabi m’ay fan. (Matt. 6:20; Heb. 6:10) Maku, ra gel e tha’ u thilrad Jehovah nfaanra ra pired nib ‘mom’ e par rorad mab pagan’rad ngak nra pi’ e tin nib t’uf rorad.​—Matt. 6:22, 25, 32; Heb. 13:5, 6.

3. Mang e ba thil ko ngan nameg e flaab ko tirok Got nge ngan nameg e flaab ko chugum nge salpiy?

³ Piin ni yad ma nameg e flaab ko chugum nge salpiy e ba ga’ ni ma fekrad i yan ko “tin ndariy fan nge tin nra kirebnigey.” (1 Tim. 6:9, 10; Jas. 5:1-3) Machane, gathi aram rogon e flaab ni ma yib rok Jehovah. Tayim ni ma fanay e piin pioneer ko machib e ma ayuwegrad ni ngar pired nib thabthabel lanin’rad ko tirok Got ban’en mi yad be tiyan’rad ko tin ni kab ga’ fan ban’en. (Fil. 1:10) Reb e walag nib pumoon ni maruwel rok e ba engineer e digey e maruwel rok ni fan e nge un ko pioneer. I gaar: “Rib gel e mochuch ni gu ma tay ko maruwel rog. Machane thil u nap’an ni gu un ko pioneer. Chiney e rayog ni nggu ayuweg e girdi’ mug fil e thin riyul’ ngorad. Ke yib fan ere n’ey ko yafos rog ma kab gel e felfelan’ ni kug tay riy.”

4. Uw rogon nra yib e tow’ath ngak e piin pioneer u nap’an ni yad be fek i yan boch e tow’ath ngak e girdi’?

⁴ Flaab Riy Ngak Boch e Girdi’: Ngiyal’ ney e kari ‘mo’maw’ e par.’ (2 Tim. 3:1) Rib t’uf ni nge gubin e girdi’ u fayleng me yog e athap ngorad. Ma felfelan’ e pi tamachib ko Gil’ilungun ni ngar guyed ni piin ni yad be lemnag ndakuriy e athap ko gabul e langleth e kar motoyilgad ko fare thin nib fel’. Rib gel e binem e felfelan’ ni ma yib ko piin pioneer, ni yad ma tay 800 e awa u gubin e duw ni fan ko re maruwel ney ni ngan ayuweg e girdi’ ngar thapgad ngak Got!​—1 Tim. 4:16.

5, 6. Mang e ra ayuwegem ni ngam mang reb e pioneer?

⁵ Gabe lemnag ni ngam un ko pioneer, fa? Dabisiy nib t’uf ni ngan tay e tin nib ga’ fan nga ‘lon e tayim’ ni yima fanay ko tin ni gathi rib ga’ fan. (Efe. 5:15, 16) Boor e girdi’ ni kar rin’ed ere n’ey ma kar momnaged e par rorad ke yog nra buchuuwnaged e tayim ni yad be un ko maruwel ni fan e nge yoor e tayim nra fanayed ko fare maruwel ni fan ko Gil’ilungun. Rayog ni ngam thilyeg boch ban’en u rarogon e par rom nge yog nim bod e picha’ ney, fa?

⁶ Mu ning e gonop rok Jehovah nge yog nim fl’eg e schedule rom nib fel’ rogon. (Jas. 1:5) Gur mang tow’ath e rayog ni ngam athapeg? Aram e flaab ko tirok Got ndabi m’ay! Maku ra tow’athnagem Jehovah ko tin nib t’uf ko par rom. (Matt. 6:33) Piin ni yad ra skengnag Jehovah ko re n’ey e ra yib ngorad e “pi n’en nib fel’ nge pag e fol riy.”​—Mal. 3:10.