Deer

◼ Uw rogon ni nge pi’ e girdi’ u lan e ulung e ayuw ya nge yog ni yan e muulung nib fel’ rogon ma ba gapas? (Deut. 31:12)

Yibe pi’ e athamgil nga lanin’dad ni ngaud bad ko muulung nib papey ma gad fal’eg rogodad ni nge fil Jehovah e thin rok ngodad. Girdi’ ni ke yib nib papey e ba fel’ ni ngar pared nga m’on ya nge par e tin nu tomur e chiya’ ni fan ngak e piin ni bay e bitir rorad nge piin ni kar bad nib sagaal. U m’on ni nge tabab e muulung ma faanra bay e cell phone rom, mag guy rogon ndabi yan lingan u nap’an e muulung ya nge dabi magawonnag e girdi’. Faan gad ra fol ko pi fonow ney ma aram e rayog ni nge yan e muulung rodad nib fel’ rogon ndariy ban’en ni be magawonnag.​—Eklesiastes 5:1; Filippi 2:4.

Faanra ka fini un be’ ko muulung mab fel’ ni nge yan reb e walag ni manang owchen faanem nge par nga tooben. Ba manigil e re n’ey ya faanra bay e bitir rok facha’ ma rayog ni ngan ayuweg, ya sana aray e som’on ni ke un fapi bitir ko muulung. Faanra aray rogon ma sana ba fel’ ni nge par fare tabinaw boch nga tomur ya nge mom ko fagal labthir ni ngar ayuwegew e tin ni kab achig e bitir rorow. (Proverbs 22:6, 15) Dab ni tay e tabinaw ni bay e bitir ni kab achig riy nga yugu reb e singgil nrayog ni nge wagey fapi bitir riy. Ya faanra be magawonnag fapi bitir e girdi’ ma rayog ni ngan fekrad nga wen.

Piin ni yad ma ayuweg e muulung e yad ma gay rogon ni nge par e gin ni yima liyor riy ngak Got nib gapas. Yad ma ayuweg e piin ni bay e bitir rorad nge piin ni kar bad nib sagaal ni ngar pirieged bang ni ngar pared riy. Machane, ku thingari gonopiy e pi walag ney rogon ni ngar ayuweged e girdi’ ngar pirieged bang ni ngar pared ngay ndab ra magawonnaged e girdi’ u nap’an e muulung. Maku reb e faanra bay reb e bitir ni be wagey u nap’an e muulung ma be magawonnag e girdi’, ma rayog ni nge pi’ e piin ni yad ma ayuweg e ulung e ayuw.

Urngin e girdi’ ni kar uned ko muulung e rayog ni ngar pied e ayuw ya nge yog ni yan e muulung nib fel’ rogon mab yaram mab gapas ya nge yog ni fil e girdi’ murung’agen Jehovah nge n’en nib m’agan’ ngay ni fan ko bin nib beech e fayleng rok nib gapas.​—Hebrews 10:24, 25.