Deer

◼ Uw n’umngin nap’an ni susun e ngan fil e Bible ngak be’ ni be mon’og i yan?

Ba fel’ ni ngan fil l’agruw e babyor ngak be’ ni be mon’og ni aram e fa gal ke babyor ni​—Mang e Ri Be Fil e Bible? nge “Um Pired Ni Gimed Ba T’uf Rok Got.” Ra dawori mu’nag e gal ke babyor ney u tomren ni ke un ko taufe ma nge ulul i fil nge mu’nag. Yugu aram rogon ni ke taufe, ma faen ni yow be fil e Bible e kura i yoloy e awa ni yow ma fol Bible riy, nge return visit, maku ra i matheeg ngak ni ir reb e study. Faanra un reb e publisher ngak ko study maku rayog ni nge yoloy e tayim rok.

Ba ga’ fan ni ngari tamilang e tin riyul’ u wan’ e en yibe fil e Bible ngak u m’on ni ngan digey. Ba t’uf ni ngar ted ‘lik’ngirad nib toar’ nga fithik’ Kristus me ‘gel i yan’ e michan’ rorad ngak ya nge yog nra gelgad ko pi skeng nra yib ngorad. (Kol. 2:6, 7; 2 Tim. 3:12; 1 Pet. 5:8, 9) Maku thingar ra “nanged e tin nib riyul’” ya nge yog nra machibnaged e yug girdi’ me yib angin. (1 Tim. 2:4) Faan gad ra fil l’agruw e babyor ngak ma aram e gad be ayuweg ni nge par u daken fare pa’ i kanawo’ ni sor ko “yafos.”—Matt. 7:14.

U m’on ni nge dugliy e piin piilal nrayog ni nge un be’ ko taufe, ma susun e nge tamilang u wan’ e thin nu Bible ma be fol riy. Faanra dawori mu’nag be’ e ken ni som’on e babyor ma thingari lemnag e piin piilal nib fel’ rogon u m’on ni ngar dugliyed ko rayog ni nge un ko taufe fa dabiyog. Faanra dawori bung rogon be’ ni nge un ko taufe, ma nge guy e piin piilal rogon ni ngan ayuweg facha’ ya nge yog ni un ko taufe boch nga m’on.​—Mu guy fare babyor ni Organized to Do Jehovah’s Will, ko page 217-218.

[Blurb ko page 2]

Ba ga’ fan ni ngari tamilang e tin riyul’ u wan’ e en ni yibe fil e Bible ngak