Rayog ni Ngam Un ko Machib ko Madnom?
1. Mang e rayog ni ngad filed ko n’en nrin’ Paul nge piin ni kar uned ngak u Filippi?
1 Rofen nem e Sabbath, ni aram e rofen ni ma toffan piyu Jew ni yad ma par u Filippi. Paul nge piin ni yad ma milekag e kar bad ko re mach nem ni fan ko machib. Dariy be’ ni nge thibthibag ni fan ni kar toffangad ko rofen nem. Machane kar nanged ni ma muulung piyu Jew u wuru’ e re mach nem nguur meybilgad, ma kar pirieged ni aram e ngiyal’ nrayog ni ngan machibnagrad. Kari felfelan’ Paul nge piin ni yad u nap’an ni ke motoyil Lydia nge girdien e tabinaw rok mar uned ko taufe! (Acts 16:13-15) Ngiyal’ ney e boor e girdi’ ni ma toffan ko Madnom, ere mang ni dab mu machibnaged yad ko rofen nem?
2. Mang boch e magawon ni ke gel e girdi’ rok Jehovah riy ma aram fan nrayog ni ngar uned ko machib ko Madnom nib puf rogorad?
2 Kan Togopuluw ko Machib ni Yima Tay ko Madnom: Nap’an e duw ni 1927, ma ka nog ko girdi’ rok Jehovah ni ngaur uned ko machib ko Madnom. Ma aram mu un togopuluw ngorad. Boor e girdi’ u Meriken e kan kalbusnagrad ni bochan e kar th’abed fare motochiyel ko Sabbath ni aram e Madnom ni ma toffan e girdi riy, ma yad be kirebnag e gapas, ma yad be pi’ ban’en nchuw’ay ndariy e liscense rorad. Machane girdi’ rok Jehovah e de tal ko machib. Nap’an e pi duw ko 1930 ma kar yarmiyed e “divisional campaign,” ni aram e pi walag ko pi ulung nib chugur ngaram e ra bad ngar machibgad u reb e binaw. Ma kan guy rogon ni ngan kalbusnag boch e walag, ma bochan ni kay yugu ra yoorgad ma de yog ko polis ni ngan kolrad. Ga ma tay fan rogon e n’en ni ke rin’ e pi walag ney ni kar paged farad, ma aram fan nrayog ni ngad uned ko machib ko Madnom ndariy be’ ni ma togopuluw ngodad, fa?
3. Mang fan nib fel’ ni ngan un ko machib ko Madnom?
3 Re Rran nib Fel’ ni Ngan Un ko Machib: Boor e girdi’ ni yad bay u tabinaw rorad ko Madenom. Ma ba ga’ ni yad be toffan. Boch e piin ni ma yan nga galesiya e yad ba adag ni ngar weliyed murung’agen Got ko rofen nem. Faanra gad ma muulung ko Madnom ma dabisiy ni kad chuwgad nga mad ko muulung ere mang ni dabda uned ko machib u m’on ara tomren e muulung? Faanra ba t’uf ma ngan fek boch e ggan ni ngan kay.
4. Mang felfelan’ e ra yib ngodad ni faan gad ra un ko machib ko Madenom?
4 Faan gad ra un ko machib ko Madnom, ma ka bay e tayim ni ngad toffangad. Ma nap’an ni gad be toffan ma ra fel’ lanin’dad ya gad manang ni kad uned ko machib. (Prov. 19:23) Maku rayog ni ngad felfelan’gad ni bochan e kad pirieged be’ ni bod Lydia!