Dab Mu Rus ni Ngam Machib
1. Mang e ba t’uf ni dab ni rus riy, ma mang fan?
1 Bay bayay ni ke mab e kanawo’ ngom ni ngam machib u skul ma dan mu rin’ ya ga be rus nrin moningnagem? Ba t’uf ni ngam athamgil ni ngam machib nib ga’ nfaanra gur be’ ni gab tamra’. Ere, mang e ra ayuwegem?
2. Mang fan nib t’uf ni ngam gonopiy e ngiyal’ ni ngam machib u skul?
2 Ngam Gonopiy e Ngiyal’ ni Ngam Rin’: Yugu aram rogon ni skul e aram bang nrayog ni ngam machib riy, machane dab mu pagtalin ndabiyog ni ngam weliy murung’agen e tirok Got ban’en ngak urngin e girdi’ ni gimed ma non, ni bod ni yima rin’ u nap’an e machib u mit e tabinaw i yan. Mu gonopiy e ngiyal’ ni ngam non. (Ekl. 3:1, 7) N’en ni yibe weliy murung’agen u class ara n’en ni ke yog e sensey ni ngan rin’ e rayog ni nge bing e kanawo’ ngom ni ngam weliy e pi n’en ni ke mich u wan’um. Ma reb e rayog ni nge fith reb e bitir ngom ko mang fan ni damur ma un nga boch ban’en ni yima rin’ u skul. Bay boch e Kristiano ni ka rogned ko sensey rorad u m’on ni nge tabab e skul u reb duw ni yad e Pi Mich rok Jehovah ma kar pied boch e babyor ngorad ni be weliy murung’agen e pi n’en nib mich u wan’dad. Ma boch i yad e ma tay boch e babyor u daken e tebel rok ya nge yog ni fith boch e bitir u skul e deer u murung’agen.
3. Uw rogon nrayog ni ngam fal’eg rogom ni ngam machib u skul?
3 Mu Fal’eg Rogom: Faan ga ra fal’eg rogom ma aram e rayog ni nge pagan’um. (1 Pet. 3:15) Ere, mu guy rogon ni ngam lemnag boch e deer nrayog ni ngan fith ngom, ma ga lemnag rogon ni ngam pi’ e fulweg. (Prov. 15:28) Mu tay e Bible rom nge in ken e babyor rodad u skul ni faanra rayog, ya nge yog ni ngam yaliy u nap’an nra t’uf. Ma gog ngak e gallabthir ni ngam weliyed e pi n’ey u nap’an e fol Bible ni tabinaw.
4. Mang fan ni dab mu tal ko machib u skul?
4 Dabi Mulan’um: Dab mu lemnag ni gubin ngiyal’ ni ga ra weliy e tin riyul’ ngak e bitir u skul ma yad ra moningnagem. Boch i yad e dabisiy nra gin ngom ko athamgil ni ga be tay ma sana ra motoyil. Machane, faanra dariy be’ nra motoyil ngom ma dabi mulan’um, ya be felfelan’ Jehovah ko athamgil ni kam tay. (Heb. 13:15, 16) Mu ulul i ning e ayuw ngak ni nge yog nim ‘weliy e thin rok ni dab mu rus.’ (Acts 4:29; 2 Tim. 1:7, 8) Am lemnag gelngin e felfelan’ ni ga ra tay u nap’an ni ga ra pirieg be’ nra motoyil. Cha’ nem e rayog ni ngki mang reb e tapigpig rok Jehovah.