Ngam Machibnag “Urngin Mit e Girdi’”
1. Uw rogon ni pi tamachib e taareb rogorad ngak be’ nib salap i ngongliy ban’en?
1 Be’ nib salap i ngongliy ban’en e boor talin e maruwel rok, ma manang e ngiyal’ nge rogon ni nge maruwel ngay. Ku er rogodad ni boor talin e maruwel rodad ni ma ayuwegdad ko maruwel ni gad ma tay ni gadad e tamachib. Bod ni boor e brochure ni kan ngongliy ni nge ayuwegdad u rogon ni ngad machibnaged “urngin mit e girdi’.”—1 Kor. 9:22.
2. Mingiyal’ e rayog ni ngad fanayed e brochure u nap’an e machib?
2 Ngiyal’ ni Ngad Fanayed e Brochure: Be’ nib salap i ngongliy ban’en e ma fanay e pi talin e maruwel rok ko ngiyal’ nib t’uf. Ere, ku er rogodad nrayog ni ngad pied reb e brochure ni faanra kad guyed nra yib angin ko en ni kad nonad ngak. Ma gathi kemus ni ngad pied ko ngiyal’ ni ka nog ni ngan wereg riy. Bod ni faanra fare ke babyor ni Mang e Ri Be Fil e Bible? e yibe wereg ko girdi’, ma kad mada’naged be’ ni ke yib u reb e nam ndariy e teliw ko piin ni yad ma yog ni yad e Kristiano riy, ma rayog ni ngad pied reb e brochure nra m’ag ngak. Ma nap’an ni kad sulod ngak in yay ma kad guyed ni ke adag e machib mfin da pied fare ke babyor ni Mang e Ri Be Fil e Bible? ngak.
3. Mang fan ni susun e ngad salapgad i fanay e pi talin e maruwel rodad?
3 Be yog e Bible nib fel’ e piin ni yad ba salap i rin’ e maruwel rorad. (Prov. 22:29) Machane, dariy reb e maruwel ni kab ga’ fan ko fare maruwel ni yibe rin’ e ngiyal’ ney ni aram e yibe “machibnag e Thin Nib Fel’ ni yib rok Got” ngak e girdi’. (Rom. 15:16) Faanra ngad ‘boded rogon be’ ni girdien e maruwel nder tamra’ ko maruwel rok,’ ma susun e ngad athamgilgad ngad salapgad i fanay e pi talin e maruwel rodad.—2 Tim. 2:15.