Dab Mu Rus ni Ngam Machib ko Yungi N’en ni Ma Maruwel e Girdi’ Riy
1. Mang fan ndabi mulan’dad ni faanra gad be rus ni ngad uned ko machib ko yungi n’en ni ma maruwel e girdi’ riy?
1 Ga ma rus ni ngam un ko machib ko yungi n’en ni ma maruwel e girdi’ riy, fa? Faanra aram rogon ma dabi mulan’um ya mus ngak Paul nreb e tamachib nder ma rus, maku immoy yu ngiyal’ ni i ‘athamgil’ ya nge yog ni machib. (1 Thess. 2:2) Chiney e ngad weliyed boch e magawon ni gad ma mada’nag u nap’an e machib nge boch e kanawo’ nrayog ni ngad pithiged riy.
2. Mang fan ndabi magafan’dad nri puwan’ girdien e maruwel ngodad?
2 Ra Puwan’ Chon e Maruwel ni Faan Gad Ra Non Ngorad, Fa? Boor raba’ e maruwel ni ma yan e girdi’ ngay ni ngan ayuwegrad ara ngar chuw’iyed ban’en, ere dab ra puwan’gad ni faanra yan e girdi’ ko gin ni yad ma maruwel riy. Ba ga’ ni yad ra non ngom u fithik’ e sumunguy ni bochan e yad be lemnag ni ga ra chuw’iy boch ban’en rorad boch nga m’on. Ere, faanra ba fel’ e munmad rom ma ga be dag e sumunguy ko girdi’ ma dabisiy ni yira tayfam.
3. Mang e gad ra rin’ ma dabi damumuw e girdi’ ni kar bad nga kantin ni ngar chuway’gad?
3 Thingar Gu Machib ni Bay e Girdi’, Fa? Faanra ngam machib u kantin, mab fel’ ni ngam man u ba ngiyal’ ni gathi ri boor e girdi’, ni bod e ngiyal’ ni ka fini mab e kantin. Mu son nge taw ko ngiyal’ ndariy be’ ni yow be non e en nib ga’ ko maruwel fa en ni be maruwel u kantin, mfin mu non ngak bagayow. Ma dab mu non nib n’uw nap’an.
4. Mang e rayog ni nga dogned u nap’an ni gad be machib ko yungi n’en ni ma maruwel e girdi’ riy?
4 Mang e Nggog? Faanra boor e girdi’ ni ma maruwel ko gi n’em ma ga non ngak e en nib ga’ rorad. Rayog ni nge lungum: “Ba mo’maw’ ni ngan pirieg e girdi’ ni ma maruwel u tabinaw rorad, ere aram fan ni ku gu bad ni ngguyed gur ko gin ni ga ma maruwel riy. Gu manang ni ga be maruwel, ere dab gu par nib n’uw nap’an.” Faanra dan fith ngodad ko uw e ma yib e salpiy riy ni fan ko maruwel ni gad ma rin’, mab fel’ ndab dogned murung’agen e salpiy ni ayuw ni yima pi’ ni fan ko babyor ya ri lemnag e girdi’ ni gadad girdien e siyobay. Rayog ni nga mog ngak e en nib ga’ ko maruwel ni ga baadag ni ngam non ngak girdien e maruwel ni be yan u rogon e miti maruwel ni yima rin’ ko fa gi n’en ni kam man ngay. Mog ngorad e n’en ni ka mog ngak faen nib ga’ ko maruwel. Faanra kam guy ni boor ban’en ni be rin’ reb i girdien e maruwel ma dab mu non nib n’uw nap’an ma ga pi’ reb e tract ngak. Faanra dabiyog ni ngam non ngak girdien e maruwel, ma sana yira pagem ni ngam tay boch e babyor ko gin ni ma toffan girdien e maruwel riy ara gin ni ma yib e girdi’ ngay.
5. Mang fan ndab da rusgad ni ngad uned ko machib ko yungi n’en ni ma maruwel e girdi’ riy?
5 Da i rus Jesus nge Paul ni ngar machibgow ko gin ni ma maruwel e girdi’ riy. (Matt. 4:18-21; 9:9; Acts 17:17) Mu ning e ayuw ngak Jehovah ni nge dab mu rus. (Acts 4:29) Yungi n’en ni ma maruwel e girdi’ riy e ba ga’ ni aram e gin ni yira pirieg e girdi’ riy, ere mang ndab mu gay rogon ni ngam machib ko biney e kanawo’?