Mu Kol Ayuwgad u Nap’an ni Gimed Be Machib
1. Mang fan nib t’uf ni ngad kol ayuwgad u nap’an ni gad ra yan ko machib?
1 Pi tapigpig rok Got e yad ‘bod e saf ni nga ranod nga fithik’ ba ran’ i wolf’ ya yad ma machib u “fithik’ e girdi’ ndar yal’uwgad ma yad ba kireb.” (Matt. 10:16; Fil. 2:15) Yima rung’ag e news u murung’agen e girdi’ ni ma k’aring e wagey, nge cham ko yu ulung i girdi’, nge girdi’ ni ma iring e girdi’, ma pi n’ey e be micheg ni girdi’ nib kireb e “bayi gel farad kireb.” (2 Tim. 3:13) Mang kenggin e motochiyel u Bible e ra ayuwegdad ma rayog ni ngad kol ‘ayuwgad’ u nap’an ni gad be machib?—Matt. 10:16.
2. Nap’an ni kam man nga reb e binaw ko machib ma mingiyal’ e ffel’ ni ngam chuw u rom ngam man nga yugu reb e binaw?
2 Mu Pared ni Gimed Ba Gonop: Proverbs 22:3 e be tamilangnag ni gadad ba gonop ni faan manga kad guyed e oloboch ni be yib ma ngad ‘pilo’gad riy.’ Ere ngaud kol ayuwgad! Piin gimed buguli yoror e rayog ni nge buch ban’en rorad nib tomgin. Sana kam guy ni ke yoor e polis ni yad be yan yan ara girdi’ ni yad be muulung u kanawo’. Yu ngiyal’ ma be’ ni ga be machibnag e ra yog ngom ni ngam kol ayuw. Ere ba fel’ ni ngam chuw ko re binaw nem nib papey, ma ngam man nga yugu reb e binaw ko bin ni ngam par u rom ya ga baadag ni ngam nang ko mang e magawon.—Prov. 17:14; John 8:59; 1 Thess. 4:11.
3. Uw rogon ni ngad fanayed e thin ni bay ko Eklesiastes 4:9 u nap’an e machib?
3 Ngam Maruwelgad u Taabang: Eklesiastes 4:9 e be gaar: “L’agruw e ba fel’ ko taareb.” Sana kam mecham ni ngam man ko machib ni goo gur, machane kab fel’ ni ngam rin’ ni aram rogon e chiney? Bay boch e binaw ni ku rayog ni ngam rin’ ni aram rogon. Machane, bay boch e binaw nde fel’ ni reb e walag ni ppin ara reb e walag ni kab pagel e nge yan ko machib ni goo ir nib ga’ ni nap’an ni ke aw e yal’. Kan guy nib fel’ ni bay be’ ni be un ngom nga marow ko machib. (Ekl. 4:10, 12) Mu tiyan’um ngak e pi walag ni gimed be machib. Ma nap’an ni ngam tal fa ngam chuw ko binaw ni gimed be machib riy, ma ngam mog ngak e pi walag ngar nanged.
4. Mang e rayog ni ngad rin’ed ya nge yog ni ngad ayuweged urngin e girdi’ u lan e ulung?
4 Piin piilal e ‘yad be matanagiy lanin’dad ndarir talgad,’ ere ke mil fan ngorad ni ngar pied e fonow ngodad ko ngiyal’ nib t’uf. (Heb. 13:17) Ra tow’athnagdad Jehovah ni faanra ngad sobut’niged lanin’dad ma gad fol ko thin ni ka rogned ngodad. (Mik. 6:8; 1 Kor. 10:12) Yibe athapeg ni urngin e tapigpig rok Jehovah e rayog ni ngar machibnaged e girdi’ ko binaw rorad nib fel’ rogon, machane ffel’ ni ngan kol ayuw ni gubin ngiyal’.