Mang Fan ni Ngam “Felfelan’”?
1. Mang fan ni ngad felfelan’gad u tungun gubin e pul?
1 Mang fan ni ngam “felfelan’” u nap’an ni ke taw nga tungun e pul, ma ra be’ ma ke pi’ e report rok ko machib? (Gal. 6:4) Demtrug ko gad boch e special pioneer ni gad ma thognag 130 e awa u nap’an e machib ara gad boch e publisher ni kemus ni 15 e minit e be yag ni ngad thognaged, ma gad gubin ni susun e ngad felfelan’gad ko pigpig ni gad be tay ngak Jehovah u polo’ i gelngidad.—Ps. 100:2.
2. Mang fan ni susun ni ngad athamgilgad ko pigpig ni gad be tay ngak Jehovah?
2 Bochan ni Jehovah e ir e Th’abi Tolang u ga’ngin e palpalth’ib, ma bay rogon ni ngad pied e tin th’abi fel’ rodad ni fan ngak. (Mal. 1:6) Kad ognaged gadad ni ngad rin’ed e tin nib m’agan’ ngay ni bochan e ba t’uf rodad. Ere, ra m’ay reb e rran ara reb e pul, ma faanra ba pagan’dad ni kad pied ngak e “tin th’abi fel’” ni bay rodad, ni bod rogon e tayim rodad, nge salap rodad, nge gelngidad ni fan ko pigpig ni gad be tay ngak, ma aram e bay fan ni ngad felfelan’gad. (Prov. 3:9) Machane, faanra be yog e nangan’ rodad ngodad ni ku rayog ni ngad mon’oggad boch ko n’en ni gad be rin’, ma aram e ngad guyed rogon ni ngad mon’oggad.—Rom. 2:15.
3. Mang fan nde fel’ ni ngaud taarebrogonnaged gadad ngak yugu boch e girdi’?
3 Ra Be’ Me “Siy i Puluwnag e Ngongol Rok ko Ngongol ni Ke Rin’ Yugu Be’”: De fel’ ni ngaud taarebrogonnaged gadad ngak yugu boch e girdi’ ara ud taarebrogonnaged gadad nga rarogodad kafram. Ma thilthil rarogodad. Ku ra bagadad ma tin nrayog rok. Ere, faanra ud taarebrogonnaged gadad ngak yugu boch e girdi’, ma rayog ni nge k’aring e tagenging u thildad ara ud lemnaged ndariy fadad. (Gal. 5:26; 6:4) Jesus e da i taarebrogonnag ir ngak yugu boch e girdi’, ya ma yog e tin nib fel’ ni ma rin’ be’ ni be yan u rogon e tin nrayog rok faanem.—Mark 14:6-9.
4. Mang e rayog ni ngad filed ko fare fanathin rok Jesus u murung’agen fapi salpiy ni gol?
4 Rogon ni bay ko fare fanathin rok Jesus ni murung’agen fapi salpiy ni gol e ra bagayad fapi tapigpig min pi’ e salpiy ngak “nrogon e maruwel nrayog rok.” (Matt. 25:15) Nap’an ni sul fare masta ni fith rogon e maruwel ni ke tay fapi tapigpig, ma piin nra maruwelgad nrogon nrayog rorad e yog nib fel’ e n’en ni kar rin’ed, ma aram mi yad un ngak fare masta ko felfelan’. (Matt. 25:21, 23) Faanra ud machibgad ni gubin ngiyal’ ma rayog ni nge pagan’dad ni gad ra fel’ u wan’ Got, ma rayog ni ngad felfelan’gad!