Uw Rogon ni Nge Fel’ Rogom ko Re Ulung ni Ga Ma Un Ngay ko Machib
1. Mang boch ban’en ni i yib angin ngodad ko Fol Babyor ko Ulung ni ka bay ko pi ulung ni kan tay ni nga u darod ngay ni ngan yarmiy e machib?
1 Bay boch ban’en ni ga baadag ni un rin’ u nap’an e Fol Babyor ko Ulung ndakunir rin’ e chiney, fa? Ngiyal’ nem e yima muulung ni buchuuw e girdi’. Re n’ey e ma momnag ngodad ni ngad m’ag fagergad ngak e pi walag ni yad ra ayuwegdad ni ngad pared nib gel e michan’ rodad. (Prov. 18:24) Ku ma momnag ngak e en ni ma yarmiy e fol babyor ni nge nang rarogon be’ nge be’ me yag ni nge pi’ e athamgil nga lanin’dad. (Prov. 27:23; 1 Pet. 5:2, 3) Machane, ku rayog ni ngad pirieged e pi n’ey ko re ulung ni gad ma yan ngay ni ngan yarmiy e machib.
2. Uw rogon nrayog ni ngad m’ag fagergad ngak e pi walag ni yad ba muun ko re ulung ni gad ma yan ngay ni ngan yarmiy e machib mi yad ayuweg e michan’ rodad?
2 Ngam M’on Ngam Rin’ Boch Ban’en: Ra reb e pi ulung ney ni kan yarmiy ni ngaur machibgad u taabang mab ga’ ni taareb urngirad ko pi ulung ko fol babyor ni un tay kafram. Rayog ni nge chugur e tha’ u thildad e piin ni gad ma machib ni faanra ud machibgad u “taab yang.” (Fil. 1:27) Uw urngin e walag ko bin ni ga ma un ngay e ulung u nap’an ni ngan yarmiy e machib ni ke yog ni ngam marod ko machib u taabang? Rayog ni ngam fol ko fare thin ni be yog ni ngad ‘daged lanin’dad ngodad,’ fa? (2 Kor. 6:13) Maku reb e rayog ni nge ba ngiyal’ ma gad pining be’ ko re ulung ni gad ma yan ngay ni ngan yarmiy e machib ni nge un ngodad ko Fol Bible ni Tabinaw ni gad ma tay e tabinaw rodad ara nge un ngodad ngad abichgad u taabang. U boch e ulung e nap’an nra yib reb e walag u yugu reb e ulung ni nge pi’ e welthin u nap’an e muulung, ma yima yarmiy reb e ulung ni fan ko machib ni ngar pied e ggan ko fare walag. Ere nap’an nra taw ko rofen ni ngar pied e ggan ko fare walag mar muulunggad ni ngar abichgad u taabang ma yad be pi’ e athamgil nga lanin’rad ni yugu demtrug ko rayog ko fare walag ni nge un ngorad fa danga’.
3. Mang boch e kanawo’ nrayog ni ngan ayuwegdad ko tirok Got ban’en ko re ulung ni gad ma yan ngay ni ngan yarmiy e machib?
3 Yugu aram rogon ni kemus ni l’agruw yay u reb e wik ni ma mada’ e ulung rodad nga taabang, ma gathi be yip’ fan ndaki t’uf e ayuw ko tirok Got ban’en ko pi walag u lan e ulung. Ra boch e piilal ma kan tayrad nga reb e ulung ni fan ko machib ni fan e ngar pied e athamgil nga laniyan’ e pi walag mi yad skulnagrad ni fan ko machib. Faanra dawori yog e en ni ma yarmiy e machib ni fan ko birom e ulung ni ngam marow ko machib u taabang, ma mang ndab mog ngak? Maku reb e faen ni ir e service overseer e gubin e pul ma bay reb e Sabado nge Madnom ni nge un nga reb e ulung ngar machibgad u taabang. Tin baaray e ulung nib achig maku buchuuw e ulung riy ni fan ko machib e ba ga’ nra reb e duw ma kemus ni l’agruw yay ni nge un e en service overseer nga reb e pi ulung ney ko machib. Ga ma yarmiy ni ngam un ko machib u nap’an nra yib e en ni ir e service overseer ni nge un ko machib ko fare ulung ni ga ma un ngay?
4. (a) Uw rogon ni yima yarmiy e pi muulung ni fan ko machib? (b) Mang fan nib fel’ ni ngad pied e tabinaw rodad ni ngaun muulung riy ni fan ko machib?
4 Ba ga’ nib fel’ ni nge reb e ulung ni fan ko machib me mada’ u bang u nap’an e Sabado nge Madnom ni ngar yarmiyed e machib. Faanra ba thilthil e gin ni nge mada’ e pi ulung ney riy, machane taab tayim e ngar mada’gad ma rayog ni nge mom ko pi walag ni nga ranod ra uned ko muulung ko machib ma ranod ko gin ni ngan machib riy. Ku ra mom ni ngan yarmiy e piin ni nga ranod ko machib miki yog ni nge papey ni ngan yan ko gin ni ngan machib riy. Kub mom ko en ni be yarmiy e machib ni nge yarmiy e piin ni nga ranod ko machib. Machane, sana ba yu ngiyal’ nib t’uf ni nge chagil l’agruw ara boor ko pi ulung ney nga taabang. Faanra gubin e girdi’ u lan e ulung ni yad ma mada’ nga taabang ko bin som’on e Sabado u reb e pul ara tomuren e Fol Wulyang ko Damit ni nga ranod ko machib u taabang, mab fel’ ni nge reb e ulung ni fan ko machib mi yad par nga taabang mar pied e tayim ngak faen ni ma yarmiy e machib ko ulung rorad ni nge yarmiy e birok e ulung u m’on ni ngan meybil.—Mu guy fare kahol ni kenggin e “Rayog ni Ngam Pi’ e Tabinaw Rom, Fa?”
5. Mang e rayog ni nge pagan’dad ngay ni yugu aram rogon ndakunir tay e Fol Babyor ko Ulung?
5 Yugu aram rogon ndakunir tay e Fol Babyor ko Ulung, ma ka be pi’ Jehovah e tin nib t’uf rodad ya nge yag nda rin’ed e tin nib m’agan’ ngay. (Heb. 13:20, 21) Faanra Jehovah e be ayuwegdad, ma dakuriy ban’en nga bang ni nge yag ngodad. (Ps. 23:1) Boor e tow’ath nra yag ngodad ko re ulung ni gad ma yan ngay ni ngan yarmiy e machib. Faan gad ra m’on ngad rin’ed boch ban’en ma gad “yung e awoch nib pire’,” mab ‘pire’ e n’en nra yog riy ngodad.’—2 Kor. 9:6.
[Kahol ko page 6]
Rayog ni Ngam Pi’ e Tabinaw Rom, Fa?
Bay boch e ulung ni yad ma taarebnag e muulung ni fan ko machib u nap’an e Sabado nge Madnom ni bochan e de yoor e tabinaw nrayog ni ngan mada’ ngay. Pi muulung ni yima tay ni fan ko machib e aram bang ko yaram ni fan ko ulung, ma faan yira tay u tabinaw rodad ma aram reb e tow’ath. Ere rayog ni ngam pi’ e tabinaw rom ni ngan tay e re muulung ney riy, fa? Dab mu magawon ni bochan rarogon e tabinaw rom. U m’on ni nge mel’eg e piin piilal e gin ni ngan tay e pi muulung ney riy, ma yad ra lemnag e gin ni bay e tabinaw rom riy nge ku boch ban’en nib ga’ fan. Faanra ga baadag ni ngam pi’ e tabinaw rom ni ngan tay e muulung riy ni fan ko machib, ma gog ngak e en ni ma yarmiy e machib ni fan ko bin ni ga ma un ngay e ulung.