Ngad Mon’oggad ko Machib—Rogon ni Ngad Fulweged Lungun Be’ ni Ke Yog Ban’en u Nap’an e Machib ya Nge Dab Kud Nonad Ngak

Fan nib Ga’ Fan: Susun e kam nang ni bayi yib reb e yoko’ ara durru’. Ma faanra dabi gay e girdi’ bang ni nga ranod ngay ndabi buch ban’en rorad, ma yad ra yim’. Ere, kam man nga tafen e buguli yoror rom ni nga mog ngak murung’agen fare yoko’ ara fare durru’ ni bayi yib, machane me yog ngom ndariy e tayim rok ni nge non ngom ya boor pa’ u puluwon. Dabisiy ni sana dab mu tal i guy rogon ni ngam ayuweg! Boor e girdi’ ko pi binaw ni gad ma machib riy e dubrad ni ngad nonad, ya dar nanged feni ga’ fan e thin ni ka darod ni ngad weliyed ngorad. Sana rayog ni boor ban’en ni ngar rin’ed ko ngiyal’ ni baaram ni ka darod nga taferad. (Matt. 24:37-39) Maku reb e sana dubrad dakendad ni bochan boch ban’en nde riyul’ ni ke weliy be’ u murung’agdad. (Matt. 11:18, 19) Rayog ni ngar lemnaged ni taareb rogodad nga boch e teliw nib kireb e ngongol ko girdi’ riy. (2 Pet. 2:1, 2) Susun ndabi mulan’dad ni yugu aram rogon ndabun facha’ ni nge motoyil ngodad ko yay nsom’on ni ka darod nga tafen.

Rogon ni Ngan Rin’:

U m’on ni ngam man ko machib u mit e tabinaw, ma som’on e ngam lemnag boch ban’en nrayog ni nge yog e girdi’ ngom ya nge dab mu machibnagrad.
Faanra ke yog be’ ban’en ngom ni bochan e be guy rogon ni nge dab kum non ngak, mag lemnag ban’en ni nga mog ngak ya nge yag ni kum ululgow ko numon. Sana rayog ni ngam pining e magar ngak. Bod ni faanra ke yog ni bay e teliw rok, ma rayog ni nge lungum ngak, “Gu ma athapeg ni nggu pirieg be’ ni bodem nib ga’ fan e tirok Got ban’en u wan’.” Yu ngiyal’ e faan gad ra yog boch ban’en ni aray rogon ma rayog ni nge pagdad facha’ ni ngad nonad ngak. Bod ni faanra ke yog ndabiyog ni ngam nonow ya boor ban’en ni nge rin’, ma rayog ni nge lungum: “Kug nang fan. Machane, u m’on ni nggu wan, ma gu baadag ni nggu pi’ e re babyor ni baaray ngom.” Maku reb e faanra ke yog ngom ndabun ni nge motoyil, ma rayog ni nge lungum, “Dabum ni ngan weliy murung’agen e Bible, fa dabum ni ngan weliy murung’agen e teliw?”
Mu lem nib fel’ rogon. Dab mu pagtalin nder ma towasariy Jehovah e girdi’ ni ngar motoyilgad. (Deut. 30:19) Gad gubin nra bagadad ma bay gilban ni be fek. (Gal. 6:5) Ere, faanra dabun facha’ ni nge thilyeg e lem rok, mab fel’ ni ngad chuwgad. Faanra guy ni gad be tayfan, ma rayog ni nge adag ni nge motoyil ko yay ni migid ni ke yan yugu reb e walag nga tafen.—1 Pet. 3:15.

Mu Gay Rogon ni Ngam Rin’ e Re N’ey u Lan e Re Pul Ney:

Faanra kam mada’nag be’ ni ke yog boch ban’en ngom ni bochan e be guy rogon ni nge dab kum non ngak, ma tomuren ni kam chuw u tafen, mi gimew weliy e en ni gimew be yan ko machib u taabang boch ban’en ni faan gomanga mogew ngak mab fel’.