Boch e Tract ni Kab Beech ni Kan Fal’eg nib Thil Yaan!

1. Mang boch ban’en ni kab beech ni kan fal’eg rogon ni fan ko machib?

¹ Bay lal e tract ni kab beech ni kan pi’ u nap’an e District Convention ni kenggin e “Thin rok Got e Ba Riyul’!” ni kan tay u nap’an e duw ni 2013. Kun uneg fare Kingdom News No. 38 ni kenggin e “Rayog ni Ngki Fas e Piin ni Kar M’ad Bayay?” ko pi tract ney. Re nel’ i tract ney e ba thil yaan ni kan fal’eg. Mang boch i fan nib thil yaan e pi tract ney? Ma uw rogon ni ngad fanayed e pi n’en nib beech ni bay riy u nap’an ni gad be wereg u mit e tabinaw i yan?

2. Mang fan nib thil yaan fapi tract rodad ni kab beech?

² Mang Fan nib Thil Yaan?: Ra nge yib angin e machib ni gad ma tay u mit e tabinaw ma bay aningeg ban’en nib t’uf ni ngad rin’ed: (1) Ngad fithed reb e deer ngak be’ nrayog ni nge weliy laniyan’ riy ya nge yag nda tababgad i machibnag. (2) Ngad beeged reb e thin nu Bible. (3) Ngad pied reb e babyor ni nge beeg facha’ ni kad mada’naged. (4) Ngad fithed reb e deer ni gad ra weliy e fulweg riy ko yay ni migid ni kad sulod, ma gad yarmiy ni ngkud sulod ngak facha’ bayay. Bochan ni kan thilyeg rogon ni kan fal’eg e pi tract ney, ma ra mom ngodad ni ngad folgad ko re aningeg i kanawo’ ney.

3. Uw rogon nrayog ni ngad pied fapi tract ni kab beech u nap’an e machib?

³ Rogon ni Ngan Pi’: (1) Tomuren ni ka mog ko gur mini’, ma ga dag ngak facha’ e thin ni bay u wuru’ fare tract, ma gog ngak ni nge yog ko mang e be lemnag riy. (2) Mu pithig fare tract nga baan langgin mi gimew weliy fare thin ni kenggin e, “N’en ni Be Yog e Bible.” Faanra rayog, mi gimew beeg e pi thin nu Bible ni bay riy. Faanra bay e tayim ko en ni gimew be non, mi gimew weliy fare thin ni kenggin e, “Pi N’en Nrayog Ngom Nfaanra Mich u Wan’um e Re N’ey.” (3) Mu pi’ fare tract ngak ma gog ngak ni nge beeg e tin ni ka bay e thin riy ko ngiyal’ ni bay e tayim rok. (4) U m’on ni ngam chuw, ma ga dag fare deer ngak ni bay u tan fare thin ni kenggin e “Ngan Lemnag,” ma gog e rofen ni ngkum sul ngam weliyew e fulweg riy u Bible.

4. Uw rogon ni ngad fanayed fapi tract nib beech u nap’an ni kad sulod ni ngad guyed be’ ni kad mada’naged u nap’an e machib?

⁴ Kub mom ni ngam sul ngam guy e en ni kam pi’ e re tract ney ngak. Kemus ni ngam fanay e thin nu Bible ni bay u wuru’ fare tract ni ngam weliyew e fulweg ko fare deer ni ka mog ngak ni gimew ra weliy e fulweg riy ko yay ni migid ni ga ra sul. U m’on ni ngam man, ma ga weliy ngak murung’agen fare brochure ni kenggin e Thin nib Fel’ ni bay yaan u wuru’ e re tract ney, ma ga dag fare brochure ngak nge reb e guruy u langgin ni ku be weliy boch ban’en u murung’agen e n’en ni gimew be weliy, ma ga pi’ fare brochure ngak. Faanra fek, ma gog ngak e rofen ni ga ra sul ni ngkum weliyew boch ban’en riy. Faan ga ra rin’ ni aray rogon, ma aram e kam tabab i fil e Bible ngak be’! Maku reb e rayog ni ngkum pi’ yugu reb fapi tract ngak ma gog e rofen ni ga ra sul ni ngkum weliyew boch ban’en riy.

5. Mang angin e tract ko machib ni gad ma tay?

⁵ Ke pag 130 e duw ni gad ma pi’ e tract u nap’an e machib. Yugu aram rogon nib thilthil ga’ngin nge yaan, ma rib ga’ angin ko machib ni gad ma tay. Manga yugu da fanayed e pi tract ney ni kab beech ya nge yag nda wereg e machib nu Bible ko gubin e girdi’ nu fayleng.​—Prov. 15:7a.