Mu Gay Rogon ni Nge Mecham Ngom Ndab Um Sagaal
1. Mang e rayog ni ngad folwokgad rok Jehovah riy u rogon ni ma rin’ urngin ban’en ko ngiyal’ nthingari rin’ riy ma der ma sagaal?
1 Dariy ba ngiyal’ ni ke sagaal Jehovah. Bod ni, gubin ngiyal’ ni ma ‘ayuwegdad ko ngiyal’ ndabi siy ni ngari ayuwegdad riy.’ (Heb. 4:16) Ku ma pi’ e tin nib t’uf ko pi tapigpig rok “ko ngiyal’ ni yima pi’ riy.” (Matt. 24:45) Ere, rayog ni nge pagan’dad ni “dabi sowath” fare rran ko damumuw rok. (Hab. 2:3) Riyul’ ni ma yib angin e pi n’ey ngodad! (Ps. 70:5) Machane, bochan ni boor pa’ u puluwdad, ma dawor da flontgad, ma rayog ni nga i mo’maw’ ngodad ni nge dab ud sagaalgad. Ere, mang fan nsusun e ngad gayed rogon ni nge mecham ngodad ndab ud sagaalgad?
2. Faanra dab ud sagaalgad, ma mang fan ni yira pining e sorok riy ngak Jehovah?
2 Chiney ko tin tomuren e rran ni ke yoor e girdi’ ni kemus ni goo yad e yad ma lemnagrad ma dakuriy fan ban’en u wan’rad e ba ga’ ni yooren e girdi’ e darur rin’ed ban’en ko ngiyal’ nsusun e ngar rin’ed riy. (2 Tim. 3:1-3) Ere, faanra i yan e piin Kristiano ko maruwel, ara boch ban’en, ara muulung nib papey, mab ga’ ni ma guy e girdi’ e re n’ey, ma yima pining e sorok riy ngak Jehovah. (2 Pet. 2:12) Gad ma yan ko maruwel nib papey, machane gubin ngiyal’ ni gad ma taw nib sagaal ko pi n’en ni gad ma rin’ ni fan ko liyor rodad, fa? Faanra dab ud sagaalgad ko pi muulung rodad, ma gad ma un ko bin som’on e tang nge meybil, ma aram e be m’ug riy ni gad baadag ni ngad folwokgad ko Chitamangidad ni bay u tharmiy ni ir fare Got nib yaram.—1 Kor. 14:33, 40.
3. Mang fan ni faanra dab ud sagaalgad ma aram e gad be dag ni gad ma lemnag boch e girdi’?
3 Maku reb e, faanra dab ud sagaalgad ma be m’ug riy ni ka gad be lemnag boch e girdi’. (Fil. 2:3, 4) Bod ni faanra gad ma taw ko pi muulung rodad, ni kub muun e muulung ko machib ngay nib papey, ma aram e dab da magawonnaged boch e girdi’. Machane, faanra ke mecham ngodad ni gad ma taw nib sagaal, ma rayog ni nge lemnag boch e girdi’ ni kab ga’ fan e tayim rodad u wan’dad ko tayim rorad. Faanra dab ud sagaalgad, ma rayog ni nge taga’ e girdi’ ngodad, maku be m’ug riy ni gad ma tedan’dad ko n’en ni yima rin’, maku rayog ni nge pagan’uy ngodad. Ma ireray boch e fel’ngin nib ga’ fan u wan’ e girdi’.
4. Faanra ba ga’ ni gad ma taw ni gad ba sagaal, ma uw rogon ni ngad pithiged e re magawon ney?
4 Faanra ba ga’ ni ga ma taw nib sagaal, ma ga fal’eg i lemnag ko mang fan ni be buch e re n’ey. Mu fal’eg e schedule rom nra ayuwegem ni ngam mu’nag e pi n’en nib t’uf ni ngam mu’nag ko ngiyal’ ni nsusun e ngam mu’nag riy. (Ekl. 3:1; Fil. 1:10) Mu ning e ayuw ngak Jehovah. (1 John 5:14) Faanra dab ud sagaalgad ma aram reb e kanawo’ ni gad be dag riy feni ga’ fan u wan’dad fa gal nth’abi ga’ e Motochiyel ni aram e, nge t’uf Got rodad miki t’uf rodad e en nib migid ngodad.—Matt. 22:37-39.