Ngad Leked e Kanawo’ ni Tay Jesus
1. Uw rogon e ngongol ni i tay Jesus?
1 Nap’an e ngiyal’ ni ngad uned ko maruwel ni ngad machibnaged e girdi’ ngar manged pi gachalpen Jesus, ma thingar da dab da paged talin ni ngongol rodad e rayog ni nge suruy laniyan’ e girdi’ ni be yaliydad. Jesus e i machibnag e girdi’ ko thin nge ngongol rok. Piin ni ur yaliyed e kar guyed e pasig ni i tay, nge par ni ba t’uf e girdi’ rok, me par ni ba adag ni nge n’uf fithingan Chitamangin, me par nib mudugil ni nge rin’ e tin nib m’agan’ Chitamangin ngay.—1 Pet. 2:21.
2. Uw rogon ni ngongol rodad e rayog ni nge suruy laniyan’ e girdi’ ni be un ngodad ko machib u mit e tabinaw?
2 Ngiyal’ ni Ngam Un ko Machib u Mit e Tabinaw: Taab rogodad Jesus, ya ngongol rodad e ra suruy laniyan’ e girdi’ ni be un ngodad ko machib. Faanra guy e pi publisher ni de n’uw nap’an ni kar uned ko muulung ni gad ba pasig ko machib u mit e tabinaw ma yad ra lemnag u murung’agen e machib ni ngar ted u mit e tabinaw. Faan yad ra guy ni ke felfelan’dad, ma gad baadag ni ngad ayuweged yugu girdi’, ma ra puguran ngorad ni ba ga’ fan ni ngar daged e pi ngongol nem ko ngiyal’ ni ngar machibnaged e girdi’. Faan yad ra guy ni gad be athamgil ni ngad fanayed e Thin Rok Got ko ngiyal’ ni ngad sulod ngak e girdi’, nge ngiyal’ ni ngad filed e Bible ngak e girdi’, ma ra k’aringrad ngar yodorgad.
3. Uw rogon ni ngongol rodad e rayog ni nge fil boch ngak e Bible study, ma mang e ra tamilang u wan’rad?
3 Ngiyal’ ni Ngam Fil e Bible Ngak e Girdi’: Ri ra guy e girdi’ ni gad be fil e Bible ngorad e ngongol rodad. Susun, ba ga’ ni gad ma weliy ngorad ni ba ga’ fan ni ngar fl’eged rogorad ko fol Bible ni ngar beeged e thin nu Bible, mar layinnaged e thin nib ga’ fan riy, machane yad ra yaliydad ni faanra kad fl’eged rogodad. (Rom. 2:21) Faan gad ra par nib yul’yul’ ma gadad taw nga taferad ko ngiyal’ ni kad dugiliyed ni ngad filed e Bible ngorad, ma ba ga’ ni dab ra paged e fol Bible nbochan yugu ban’en. Maku dariy e maruwar riy ni yad ra guy ni gad be pag fadad ko machib ma ba mudugil e michan’ rodad. Faan ri ra folwok e tamachib rok Jesus ma ba ga’ ni ra mang e Bible study reb e tamachib nib salap mab pasig.
4. Nap’an e ngiyal’ ni ngad uned ko muulung, mang e gad ma skulnag ngak yugu girdi’ ko ngongol rodad?
4 Ngiyal’ ni Ngam Un ko Muulung: Gubin e girdi’ ni yad bang e ulung ni Kristiano e yad ma skulnag yugu girdi’ ko ngongol rorad ko muulung. Piin ni ka fini tabab i un ko muulung e ra fel’ rogorad ko ngongol nib fel’ ni yad ma guy u lan e ulung. Yad ra guy e runguy ni bay u fithik’ e pi walag, ma yad taab ulung i Kristiano, mab yaram e munmad nge piyan’ lolugey e girdi’. (Ps. 133:1) Maku yad ra guy ni gadad ba yul’yul’ ni ngad uned ko muulung nge pi n’en nib mich u wan’dad ko thin ni gad ma weliy u nap’an e muulung. Be’ ni ke un ko muulung ko yay ni som’on e ke guy reb e bitir nge rogon nib pay ni ke pirieg e thin u lan e Bible rok nge rogon ni ke tiyan’ ko muulung.
5. Mang fan nib ga’ fan e ngongol rodad?
5 Be pi’ e thin ko Bible e athamgil nga lanin’dad ni ngad folwokgad ko ngongol nib fel’ rok yugu girdi’. (Phil. 3:17; Heb. 13:7) Ere, susun ni dab da paged talin ni faan gad ra folwok rok Jesus, ma ra guy yugu girdi’ e ngongol rodad ma rayog ni nge suruy lanin’rad nga rogon nib puluw. Bochan e ke tamilang e re n’ey u wan’dad, ma gad ra tiyan’dad ko pi thin ni bay ko 1 Timothy 4:16: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’.”