Mu Fil Ngak e Piin nib Sobut’an’ ni Nga Ranod ko Kanawoen Got
1. Ra ngan ayuweg e girdi’ ngar manged pi gachalpen Kristus ma mang e ba l’ag ngay?
1 Kan nog u murung’agen pi gachalpen Kristus ko fa bin som’on e chibog ni ur folgad ko “Fare Kanawo’.” (Acts 9:2) Urngin ban’en ni ma rin’ e Kristiano e ba l’ag ko tin riyul’ e Kristianity. (Prov. 3:5, 6) Nap’an ni ngad filed e Bible ngak e girdi’, ma gathi ke mus ni gad ra tamilangnag e machib nu Bible ngorad. Ya thingar da ayuweged yad nga ranod ko kanawoen Jehovah mar folgad rok.—Ps. 25:8, 9.
2. Mang ban’en nrayog ni nge k’aring e Bible study ni nge fol ko pi motochiyel rok Got?
2 Nge Par nib T’uf Jehovah Rok nge Jesus: Mo’maw’ ko girdi’ ni dawori flont ni ngar ted lanin’rad, nge thin rorad, nge ngongol rorad nge par nib puluw ko tin nib m’agan’ Got ngay! (Rom. 7:21-23; Efe 4:22-24) Machane t’ufeg ni fan ku Got nge Fak e ra k’aring e piin nib sobut’an’ ni ngar gelgad ngay. (John 14:15; 1 John 5:3) Uw rogon ni ngad ayuweged e pi Bible study rodad nge yog e re t’ufeg ney ngorad?
3. Uw rogon ni ngad ayuweged e Bible study ni nge par nib t’uf Jehovah rok nge Jesus?
3 Nga mu ayuweg e Bible study rom nge tamilang u wan’ ko miti mang be’ Jehovah. Ke yog reb e walag ni gaar, “Dabiyog ko girdi’ ni ngar t’ufeged be’ ni dar nanged, me ere ka nap’an tobolngin e fol Bible, gu ma fil fithingan Got u Bible ngorad, ma gu ma guy rogon ni nggu tamilangnag fel’ngin Jehovah ngak ko ngiyal’ nrayog riy.” Reb e kanawo’ ni ngan rin’ e ngan tamilangnag rarogon Jesus. (John 1:14; 14:9) Maku, ngam sul nga daken e tin ni baga’fan riy u tomren ra reb e guruy ko fare babyor ni Rayog ni Ngam Par ni Gab Fas ma ga ayuweg e Bible study rom ni nge maruweliy fel’ngin Got nge Fak.
4. (a) Mang fan ni ba mo’maw’ ko piin ni Bible study ni ngar weliyed e tin nib mich u wan’rad? (b) Uw rogon nrayog ni ngad ayuweged e pi Bible study ni ngar uned ko machib u mit e tabinaw ko yay ni som’on?
4 Mu Dag Rogon: Gadad e pi sensey, ere ngongol rodad e ma dag ngak e girdi’ rogon ni nga ranod ko kanawoen Got mar folgad rok. (1 Kor. 11:1) Baga’ nde mecham e piin ni Bible study ni ngar weliyed e tin nib mich u wan’rad ngak e girdi’ ndar nanged. Ere, ba t’uf e guman’ nge salap rodad ko ngiyal’ ni nge yog ngorad e t’ufeg, michan’, nge laniyan’ nde rus ni aram e tin nib t’uf rorad nfaan yad ra un ko fare maruwel ni ngan machibnag e girdi’ nge mang gachalpen Jesus. (2 Kor. 4:13; 1 Thess. 2:2) Gad baadag ni ngad ayuweged i pow’iy e pi Bible study rodad ni ngar mon’oggad iyan ma ireram e n’en nra k’aringdad ngad uned ngorad ko yay ni som’on ni yad ra un ko machib u mit e tabinaw.
5. Uw rogon ni ngongol rom e ra ayuweg e pi Bible study ni ngar guyed rogon ni ngar folgad ko pi motochiyel rok Got?
5 Pi n’en ni ga ma rin’ e ku rayog ni nge skulnag e pi Bible study rom ko yugu boch ban’en nib ga’ fan ko Kristiano. Faan ga ra yan i guy e piin nib m’ar ara ngam mada’nag e girdi’ u nap’an e muulung, ma yad ra guy e t’ufeg rok e Kristiano. (John 15:12) Faan ga ra un i klinnag e Kingdom Hall ara ngam rin’ e tin nra ayuweg yugu girdi’, ma ga be skulnagrad rogon ni ngar pigpiggad ku Got. (John 13:12-15) Nap’an ni yad ra guy e yafos rom nde m’oneg e chogow, ma yad ra nang fan e thin ni ngan “m’oneg u wan’rad e gagiyeg rok Got.’—Matt. 6:33.
6. Mang angin nra yib ni faan ran ayuweg e piin nib sobut’an’rad ni ngar pigpiggad ku Jehovah?
6 Ra ngan fil e Thin rok Got ngak yugu girdi’ min ayuwegrad ngar manged pi gachalpen Jesus, ma ba l’ag ngay ni ngan athamgiliy. Machane uw fene fel’ e felfelan’ ni ngan guy e piin nib sobut’an’rad ni “yad be fol ko tin riyul’”!—3 John 4.